Pene 9

Te mau Auraa Mo‘a o te Utuafare

« Mai te mea e haapa‘o-maitai-noa tatou e apiti atu ïa tatou i te tahi e te tahi i roto i te hoê huru tahuti ore e te hanahana … Taua mau tu‘atiraa ra tei haamauhia i ŏ nei, te huru auraa maoro roa a‘e, e vai noa mai ïa e a muri noa’tu ».

No roto mai i te oraraa o Lorenzo Snow

Ei faaineineraa no te 70raa o to’na oro‘a fanauraa, ua ani o Lorenzo i te taatoaraa o ta’na mau tamarii e to ratou mau utuafare ia ta‘iruru mai i Brigham City, no te « hoê amuiraa e faahanahanaraa rahi no te oro‘a fanauraa ». Ua faanaho oia i to ratou vahi faaearaa e te maa e te mau faaoaoaraa e oaoahia e te taatoaraa, e tae noa’tu i te mau tamarii rii. Ua papa‘i oia, « ia feruri ana‘e au i teie tumu ohipa no te [hoê rururaa utuafare], e rahi ïa to’u mau mana‘o pe‘ape‘a e to’u mau hinaaro no te hoê rururaa utuafare, ia nehenehe ia’u ia ite ia outou paatoa hoê a‘e taime i roto i to’u oraraa, e ia horo‘a ia outou i te hoê haamaitairaa metua tane ». Ua ti‘aoro oia ia ratou ia ore roa te hoê mea ia tape‘a ia ratou ia tae mai « maori râ te mau fifi hau atu i te rahi o te ore e noaa i te tatara ».¹

Ua ta‘iruru te utuafare Snow mai te 7 e tae atu i te 9 no me 1884, e ua oaoa i te pehe, te mau ha‘utiraa taata ora, te mau a‘oraa, te rohipehe, te mau ha‘uti, te maa, e te aparauraa hoa.² Ua faaite mai te tuahine o te peresideni Snow o Eliza e i te roaraa o te haaputuputuraa, ua tae atu oia i « te mau rururaa o te utuafare, e na ni‘a i to’na ti‘araa ei Patereareha… ua horo‘a oia i te mau haamaitairaa i ni‘a i te mau melo » ma te horo‘a rahi « i te a‘oraa, te haapiiraa e te ti‘aororaa ». I te hopearaa o te ta‘irururaa, ua amui paatoa te utuafare no te faaroo ia’na ia paraparau mai. Mai te au i te buka a Eliza, ua faaite oia i « to’na oaoa e te mauruuru i te Atua no to’na fana‘oraa i teie nei i te oaoa no te hi‘o mata atu i te mau hoho‘a mata nehenehe e te ataata o to’na utuafare rahi, e te maitai o ta’na i mana‘o e matara mai na roto mai i teie rururaa ». Ma te hi‘o atu i to’na utuafare, ua parau te peresideni Snow : « Ua î roa to’u aau i te mauruuru maitai i to’u Metua i te Ao ra … Aita to te reo e mana no te faaite atu i te mau mana‘o hohonu o to’u aau no teie taime mo‘a no teie faahanahanaraa i te hitu ahururaa o to’u mahana fanauraa, no te ti‘a’tu i ŏ nei e no te hi‘o atu i teie hoho‘a hanahana maitai no te ra‘i mai ».

Ua tamau â te peresideni Snow i te parau : « Teie ïa te haaputuputuraa hopea i to tatou mana‘oraa i teie atu pae o te ao varua. Ia tauturu mai te Atua o to tatou mau metua ia tatou ia haapa‘o i Ta’na mau ture, ia ora i te mau oraraa tura, ia paruru i to tatou viretu e te parau-ti‘a, ia faaroo i te mau ohumuhumuraa a te Varua Maitai, e ia imi itoito i te tamâ ia tatou iho, ia ore te hoê noa a‘e melo o teie utuafare ia mo‘ehia na roto i te hahi-ê-raa’tu i te e‘a afaro e te piriha‘o, ia faaite paatoa râ tatou e e mea ti‘amâ tatou i te ti‘a mai i te po‘ipo‘i no te ti‘a-faahou-raa matamua, ma te faakoronohia i te hanahana, ma te tamau noa te hoêraa o te utuafare i roto i te tahuti ore, e ia tamau noa i te haere i mua e tae no‘atu i te oraraa mure ore ».³ [A hi‘o i te mana‘o tauturu 1 i te api 149.]

Te mau haapiiraa a Lorenzo Snow

E mea mo‘a te mau auraa utuafare e e nehenehe e tupu puai roa’tu â i roto i te oraraa mure ore.

A faaitoito i te faaipoiporaa… e a faaite papû ia vetahi ê i te mo‘araa o taua auraa ra e te titauraa ia ratou ia haapa‘o i taua faaueraa rahi ra tei horo‘ahia mai e te Atua i to tatou mau metua matamua, ia faarahi e ia faaî i te fenua nei [a hi‘o Genese 1:28]. Teie ïa te taatoaraa o te mea e titauhia, ia hi‘o ana‘ehia i teie nei te huru i roto i te ao nei i te haafaufaa-ore-raa i taua ture ra e te faature-ore-raa i te fafauraa o te faapoiporaa. E mea oto ia ite i te pinepineraa o te mau faataaraa i te fenua nei e te tupu rahiraa te peu e faariro ra i te mau tamarii ei hoê faaapiapiraa eiaha râ ei hoê horo‘araa tao‘a rahi no ŏ i te Fatu ra.⁴

Ua faaite mai [te Fatu] ia tatou e mai te mea e haapa‘o-maitai-noa tatou e apiti atu ïa tatou te tahi i te tahi i roto i te hoê huru tahuti ore e te hanahana ; e taua mau tu‘atiraa ra o te vai maoro mai, tei haamauhia i ŏ nei, e vai noa â ïa i roto i te oraraa mure ore.⁵

Te mau taatiraa tei haamauhia i ŏ nei, e fatuhia ïa e [tatou] i roto i te mau ao mure ore. Te mau metua tane, te mau metua vahine, te mau tuahine, te mau taea‘e—e, te mau metua vahine tei ite i te hoê o ta ratou mau tamarii tei herehia e ratou i te poheraa i piha‘iho ia ratou, ua ite ïa ratou e e na ratou teie mau tamarii i roto i te ao varua, e e farii ratou ia ratou mai ta ratou i tuu ia ratou i raro i te repo. Te vahine faaipoipo ia ite ana‘e oia i ta’na tane faaipoipo pohe, ia rave ana‘ehia’tu to’na ora, e ite oia e e farii faahou oia ia’na, e ite oia i te tamahanahanaraa, te tamarûraa e te oaoa, o te horo‘ahia mai na roto i te mau heheuraa a te Mana Hope, oia ho‘i e farii faahou oia i ta’na tane faaipoipo i roto i te ao mure ore. Te mau huru auraa i ŏ nei e vai noa ïa i tera’tu pae o te paruru ; te mau taamu tei faatupuhia i ŏ nei e tupu ïa i te puai roa i roto i te tahi atu oraraa i mua nei. E e ite te Feia Mo‘a i te mau Mahana Hopea nei i te hoê haapapûraa, no te mea ua horo‘a te Atua i te reira ia ratou.⁶ [A hi‘o i te mana‘o tauturu 2 i te api 149.]

Te Feia Mo‘a haapa‘o maitai i te mau Mahana Hopea nei o te ore e nehenehe e faaipoipo e aore râ e fanau i te mau tamarii i roto i teie oraraa e nehenehe ïa ia ratou ia farii i te mau haamaitairaa atoa no te faateiteiraa i roto i te oraraa i mua nei.

I te tahi mahana, ua haere mai te hoê vahine i roto i ta matou piha ohipa e ua ani ia farerei ia’u no te hoê ohipa no’na iho. Ua faaite mai oia ia’u e ua inoino roa oia, no te mea aita ta’na mau rave‘a ia noaa te hoê tane faaipoipo i manuïa … Ua hinaaro oia ia ite eaha ïa to’na huru i roto i te tahi atu oraraa, mai te mea eita e noaa ia’na te hoê tane faaipoipo i roto i teie nei oraraa. Te mana‘o nei au e e tupu teie uiraa i roto i te aau o to tatou feia apî … Te hinaaro nei au e horo‘a i te tahi tatararaa iti no te tamahanahana e no te tamarû i te mau taata tei roto i teie huru oraraa. Aita roa hoê a‘e mea ta te hoê Feia Mo‘a i te mau Mahana Hopea nei e ere, ia pohe ana‘e oia i muri a‘e i te oraraa i te hoê oraraa haapa‘o maitai, no te mea aita oia i manuïa i te raveraa i te tahi mau mea e no te mea ho‘i aita i horo‘ahia ia’na te mau rave‘a no te faatupu i taua mau mea ra. Oia ho‘i, mai te mea aita te hoê feia apî tane e aore râ te hoê feia apî tamahine e faaipoipohia, e ua ora ho‘i raua i te mau oraraa haapa‘o maitai e tae noa’tu i to raua poheraa, e farii ïa raua i te taatoaraa o te mau haamaitairaa, te faateiteiraa e te hanahana o te fariihia e te hoê tane e aore râ vahine tei faaipoipohia e tei haamaitai i te reira. Mea papû e e mea mau ïa te reira…

Te mau taata tei ore i farii i te rave‘a no te faaipoipo i roto i teie oraraa, mai te mea e pohe ratou i roto i te Fatu, e farii ïa ratou i te rave‘a o te horo‘ahia’tu ia ratou e nehenehe ai ia ratou ia farii i te mau haamaitairaa atoa e hinaarohia no te mau taata tei faaipoipohia. E mea aroha e e mea hamani maitai te Fatu, e ere Oia i te mea ti‘a ore. Aita e parau-ti‘a ore i roto Ia’na ; e mea varavara tatou ia hi‘o i te reira ei mea tano ia pohe ana‘e te hoê vahine e aore râ te hoê tane ma te ore i farii i te rave‘a no te faaipoipo mai te mea eita te reira e faaafarohia i roto i te tahi atu oraraa. E parau-ti‘a ore ïa tei roto i te reira faanahoraa, e ua ite tatou e ere te Fatu i te hoê taata parau-ti‘a ore. Ua ite au e e vahine maitai to’u tuahine o Eliza R. Snow mai te mau vahine Feia Mo‘a atoa i te mau Mahana Hopea nei o tei ora, e ua ora oia i te hoê oraraa faaipoipo-ore-hia e tae noa’tu i te taime aita i nehenehe ia’na ia atuatu i te hoê utuafare … Eita e nehenehe ia’u ia mana‘o i te hoê taime, e e ere ïa oia i te hoê noa a‘e mea no taua huru ra to’na. E faatiti‘aifarohia te reira i roto i te tahi atu oraraa, e e farii ïa oia i te hoê basileia rahi mai tei fariihia e ana ahiri oia i farii i te rave‘a i roto i teie oraraa ia atuatu i te hoê utuafare.⁷

Ia oaoa ana‘e te tane e te vahine faaipoipo i te hoê hoêraa o te mana‘o, e faaitoito ïa raua i te here e te maitai i roto i te utuafare.

A ara eiaha te mau taa-ore-raa ha‘iha‘i e te faufaa ore i roto i te mau ohipa no te utuafare e faataero i to outou oaoa.⁸

Te mau vahine faaipoipo, a here i ta outou mau tane faaipoipo. Ua ite au e te faaoroma‘i nei outou i te mau mea au ore e rave rahi, e na reira atoa ta outou mau tane faaipoipo. E mea papû maitai e ua tamatahia outou i te tahi mau taime e ta outou mau tane faaipoipo, no ni‘a paha i te ite ore o ta outou mau tane faaipoipo, e aore râ peneia‘e i te tahi mau taime no to outou iho ite ore…

Aita vau e parau nei e e mea ino ta outou mau tane—mai ia outou iho, e peneia‘e e mea ino roa’tu te tahi o ratou ; eiaha râ e haape‘ape‘a te mana‘o : a tamata i te faaoroma‘i i te au ore o te tupu mai i te tahi mau taime, e ia farerei orua te tahi i te tahi i te oraraa i mua nei e oaoa ïa orua no te mea ua faaoroma‘i orua i taua mau mea ra.

I te mau tane faaipoipo, te parau nei au : E rave rahi o outou o te ore e haafaufaa nei i ta outou mau vahine faaipoipo mai tei ti‘a ia outou … A hamani maitai atu ia ratou. Ia haere ana‘e ratou i te pureraa, e amo outou i te aiû i te afaraa o te taime. E ia hinaaro ana‘e te aiû e ia hiihia oia, e aita i rahi ta outou ohipa, a hii i te aiû. Ia marû outou mai te mea e titauhia ia outou i te tahi mau taime ia rave i te hoê tusia no te riro ei taata marû; ia marû noa outou, noa’tu eaha te faatusiaraa.⁹

E ti‘a i te mau tane ia riro ei metua tane mau i te utuafare, ia noaa te mau mana‘o maitai no ta ratou mau vahine faaipoipo e ta ratou mau tamarii, te mau taata tupu e te mau hoa, ia riro ei mau taata hau atu i te maitai e mai te Atua ra te huru. Ia haere ana‘e au i roto i te hoê utuafare e faahiahia vau i te hi‘o i te upoo o taua utuafare ra ia faatere i te utuafare mai te hoê taata na te Atua, te maitai e te marû, tei î i te Varua Maitai e te paari e te iteraa no te ra‘i.¹⁰

Mai te mea noa’tu e haamata outou i te hoê utuafare i Ziona, mai te mea noa’tu e noaa ia outou te hoê faaipoiporaa tiretiera e hinaarohia ia vai mai i reira, e ti‘a ïa ia outou ia taati hoê i taua utuafare ra, e e ti‘a ia vai mai te Varua o te Fatu i te upo’o o taua utuafare ra, e e ti‘a ia’na ia mau i taua maramarama ra e taua ite ra e mai te mea e faaohipahia te reira i roto i te oraraa i te mau mahana atoa e i roto i te huru o taua mau taata ra, e haapapû ïa te reira i te ora o taua utuafare ra, no te mea tei roto to ratou ora i to’na na rima.

E tutava oia ma te itoito i te apiti atu i to’na mau mana‘o e to’na mau here i to ratou, e e tutava oia i te horo‘a i taua mau mea atoa ra tei hinaarohia no to ratou oraraa maitai, e e ti‘a ia ratou ia rave i ta ratou ra tufaa e ia faaite i te hoê â mana‘o, te hoê â maitai e te hoê â huru, e ia faaite i to ratou mau mana‘o mauruuru no te mau haamaitairaa ta ratou i farii.

E titauhia te reira ia vai mai te hoêraa o te mana‘o e aore râ te hoêraa o te aau e te aroha, e na roto i to ratou hoêraa ia taati-amui-hia ratou i roto i teie huru.¹¹

Ia tuturi ana‘e [te mau tane] i mua i ta ratou mau vahine faaipoipo e ta ratou mau tamarii e ti‘a ia ratou ia faaûruhia e te horo‘araa e te mana o te Varua Maitai ia riro te tane faaipoipo, taua tane ra ta te hoê vahine maitai e faatura, e ia vai tamau noa mai te horo‘araa e te mana o te Atua i ni‘a ia ratou. E ti‘a ia ratou ia hoê i roto i to ratou mau utuafare ia nehenehe i te Varua Maitai ia pou mai i ni‘a iho ia ratou, e e ti‘a ia ratou ia ora ia nehenehe i te vahine faaipoipo ia haamo‘ahia na roto i te pure, ia nehenehe ia’na ia ite i te titauraa ia tamâ ia’na iho i mua i ta’na tane faaipoipo e i mua i ta’na mau tamarii ia hoê raua ia nehenehe i te tane e te vahine faaipoipo ia riro ei nau taata hoê mau roa, e tano i te parahi i ni‘a i te hoê parahiraa i roto i te haamauraa e te faatupuraa i te basileia o te Atua, ia nehenehe ia raua ia huti i te hoê varua mâ e ia horo‘a i te haapiiraa papû i ta raua mau tamarii e te mau tamarii a ta raua mau tamarii.¹² [A hi‘o i te mana‘o tauturu 3 i te api 150.]

E haapii maitai mai te mau tamarii i te evanelia ia imi ana‘e to ratou mau metua i te faaûruraa e ia horo‘a i te mau hi‘oraa maitai.

E ere na tatou teie ohipa ta tatou e rave nei, e ohipa râ na te Atua. Te arata‘ihia nei tatou i roto i to tatou mau tere e te hoê maramarama teitei … Te ananahi o teie basileia tei ni‘a ïa i to tatou mau huaai ; e to’na mana e ta’na rê hopea roa, tei ni‘a ïa i ta ratou haapiiraa e te haapiipiiraa tano. Mai te mea e hinaaro tatou i te horo‘a i te hoê hoho‘a maitai i ni‘a i to tatou mau utuafare, e ti‘a ïa ia tatou ia horo‘a ia ratou te mau hi‘oraa maitai e ia horo‘a atoa ia ratou te mau haapiiraa maitai. E ti‘a ia tatou ia nehenehe ia parau, a rave mai ta’u e rave, e ia parau atoa a rave mai ta’u e parau.¹³

A tutava i te haapii i ta outou mau tamarii, na roto i te hi‘oraa e te haapiiraa, ia pee ratou ma te feaa ore i to outou mau taahiraa avae e ia riro ei feia itoito no te parau mau mai ia outou.¹⁴

Te mau taata o te hinaaro i te tape‘a i to ratou ti‘araa i mua i te Atua i roto i te autahu‘araa mo‘a e ti‘a ïa ia ratou ia mau i te varua tohu, e ia faaineine maitai no te faatere i te ora e te faaoraraa i te nunaa ; e [noa’tu] eita e nehenehe ia ratou ia na reira i to te ao nei, e ti‘a râ ia ratou ia na reira i te fare, i roto i to ratou mau utuafare, i roto i ta ratou mau fare toa e i roto i te mau aroa puromu ia faaûruhia to ratou mau aau e te mau parau no te ora i ta ratou mau pureraa pae auahi, i te haapiiraa i te evanelia i ta ratou mau tamarii e i to ratou mau taata tupu mai ta ratou e a‘o nei i to ratou mau taea‘e mai teie atu vahi. E ere i te mea ti‘a ia farii ana‘ehia te tahi tufaa o te Varua ia ti‘a ana‘e i mua i te taata e i muri iho ia tuu i te Varua i te hiti. E paraparau te tahi mau taata i te nunaa e e ho‘i atu i te fare i muri iho… e no te mea aita te mau parau no te ora i roto ia ratou e riro roa ratou ei feia mărŏ e te pohe, eita râ te reira e tano faahou.

Ua riro ei hopoi‘a na te mau metua tane i Iseraela ia ara e ia riro ei faaora no te taata, ia nehenehe ia ratou ia haere i mua i te Fatu i roto i taua puai ra no te faaroo e taua hinaaro mau ra o te horo‘a papû ia ratou i te faaûruraa a te Mana Hope no te haapii i te mau parau no te ora i to ratou mau utuafare…

E ite ïa tatou i roto i te reira te hoê varua papû o te faati‘a ia tatou ia riro ei hoê, ia nehenehe ia tatou ia haapii nahea i te here i te tahi e te tahi, e te pure nei au i te Fatu ia tuu mai oia i taua here ra i roto i to tatou mau aau atoa ta’na ho‘i i tuu i roto ia Iesu ta’na Tamaiti, e e tamau noa â oia i te tuu i te hoê iteraa no te mea maitai.¹⁵

E ohipa teie na te metua tane ia faaineine i te haapii e i te arata’i ta’na mau tamarii, e ia hohora i te mau parau tumu i mua ia ratou, e na roto i te haapa‘oraa i taua mau arata‘iraa ra e nehenehe ïa ia ratou ia oaoa rahi, mai to ratou na reiraraahia i to ratou tamarii-rii-raa, e ia haapii i taua atoa taime ra i te mau ture e nenehene ai e noaa ia ratou te poupou e te oaoa rahi i to ratou paariraa.¹⁶

Mai te mea e itoito tatou i te faatupuraa i roto ia tatou iho i te mau parau tumu mau o te oraraa e te faaoraraa, e paari ïa ta tatou mau tamarii i roto i te iteraa i teie mau mea e e nehenehe ia ratou ma te ohie rahi a‘e ia tatou iho, ia faatupu i te hoê sotaiete no te ra‘i e ia haamau i te oaoa e te hau na piha‘iho ia tatou.¹⁷ [A hi‘o i te mau mana‘o tauturu 4 e 5 i te api 150.]

Te mau Mana‘o Tauturu no te Tuatapaparaa e te Haapiiraa

A feruri i teie nei mau mana‘o a tuatapapa ai outou i te pene e aorerâ, a faaineine ai outou i te haapii. No te tahi atu mau tautururaa, a hi‘o i te mau api vii–xi.

A tai‘o faahou i te mau mana‘o o te peresideni Snow no ni‘a i te faatahoêraa i te taatoaraa o to’na utuafare (te mau api 141–42). Eaha te tahi mau hotu maitai e nehenehe e tae mai ia faatahoê ana‘e tatou i to tatou mau utuafare ? Nahea ta tatou e nehenehe ai e tauturu i to tatou mau utuafare ia faaea hoê noa ?
Nahea te piti o te taatoaraa o te paratarafa i te api 142 e riro ai ei mea faufaa rahi roa i teie mahana ? Nahea ta tatou e nehenehe ai e tauturu i te feia apî o te Ekalesia ia maramarama i te mo‘araa o te fafauraa o te faaipoiporaa ? Nahea ta tatou e nehenehe ai e tauturu ia ratou ia ti‘aturi i te faaipoiporaa e te ti‘araa metua ?
Ua parau te peresideni Snow e nehenehe i « te mau taa-ore-raa ha‘iha‘i e te faufaa ore e faataero i to [tatou] oaoa » i roto i te utuafare (te api 145). Eaha te tahi o te mau mana‘o papû maitai e nehenehe e tauturu ia tatou ia ape i teie « raau taero » ? (No te tahi mau hi‘oraa, a hi‘o i te mau api 145–47).
A tuatapapa i te tufaa e haamata i te api 147. I to outou mana‘oraa no te aha e ti‘a i te mau metua ia parau « a rave mai ta’u e rave » taa ê noa’tu i te « a rave mai ta’u i parau » ? Eaha te mau rave‘a e nehenehe ai i te mau metua ia haapii na roto i te hi‘oraa ? Eaha te tahi mau parau tumu ta outou i haapii mai no te mau hi‘oraa maitai o to outou mau metua ?
Ua faaite te peresideni Snow i te pe‘ape‘a no ni‘a i te mau metua o te haapii nei ma te puai i te fare pureraa eiaha râ i te utuafare (te mau api 148–49). A feruri e nahea e nehenehe ai ia outou ia faaite « i te mau parau no te ora » i to outou utuafare.

Te mau Papa‘iraa Mo‘a : 1 Nephi 8:10–12 ; Helamana 5:12 ; PH&PF 68:25–28 ; 93:40–50 ; 132:19–20

Tauturu Haapiiraa : « E ti‘a ia outou ia haapa‘o maitai ia ore ia parau rahi hau atu i te hinaarohia aore râ ia faaite pinepine i to outou iho mana‘o. E nehenehe i teie mau peu e faatupu i te anaanatae ore i roto i te mau piahi… Ta outou fâ tumu o te tautururaa ïa ia vetahi ê ia haapii mai i te evanelia, eiaha râ ia horo‘a’tu i te hoê haapiiraa rahi. Oia ho‘i te horo‘araa i te mau taime no te mau piahi ia haapii te tahi i te tahi » (Te Haapiiraa !Aita e Piiraa Teitei A‘e, 64).

Te tamarii ra « e tufaa ïa no ŏ mai ia Iehova ra ».

E ti‘a i te mau metua ia tutava i te « taamu i to [ratou] utuafare ei hoê ».