Mataupu 1

O Lo Tatou Manaomia o Perofeta Soifua

O Le Faatomuaga

Talu mai lava aso o Atamu, o se tasi o auala na fesootai mai ai e le Alii Lona finagalo i Lana fanau e ala mai lea i perofeta (tagai i le Amosa 3:7). O perofeta e aoao mai ia i tatou le finagalo o le Atua, ma faaali mai Ona uiga paia. O i latou o le au folafola o le amiotonu ma tau mai le leaga o le agasala, ma pe a musuia ai, e valoia e perofeta mea e tutupu i le lumanai. Ae o le mea aupito taua, o perofeta e molimau atu ia Iesu Keriso. Ua folafola mai le Alii, afai tatou te “uai atu” i upu a le perofeta, “o le a le manumalo faitotoa o seoli ia te outou; ioe, ae tafieseina e le Alii le Atua le malosi o le pogisa mai o [tatou] luma, ma luluina le lagi mo lo [tatou] lelei, atoa ma le mamalu o Lona suafa” (MF&F 21:4, 6). E mafai ona tatou mautinoa i le finagalo o le Atua mo i tatou, i le i ai o perofeta e taitaia i tatou. Ia tatou mautinoa, a tatou mulimuli i le fautuaga a perofeta soifua, o le a manuia la tatou folauga i taimi faigata o loo tatou ola ai.

Faamatalaga

1.1

E Faaali Mai e le Alii Lona Finagalo i Perofeta Soifua i Aso Nei e pei ona Sa Ia Faia i aso ua Mavae.

Na faamalamalama mai ePeresitene Russell M. Nelson o le Korama a Aposetolo e Toasefululua e faapea, mai lava ia Atamu e oo mai i le Peresitene o loo i ai nei o le Ekalesia, o avea lava perofeta o se vaega taua o le fuafuaga a le Alii:

“O le uluai [tisipenisione o le talalelei] o le taimi o Atamu. Ona oo mai ai lea o tisipenisione o Enoka, Noa, Aperaamo, Mose, ma isi [tagai i le Bible Dictionary, “Dispensations”]. Sa i ai i perofeta taitasi se matafaioi paia e aoao atu ai le paia ma aoaoga faavae a le Alii o Iesu Keriso. I tupulaga taitasi, o nei aoaoga sa faia e fesoasoani ai i tagata. Peitai o lo latou le usiusitai na tulai mai ai le liliuese. …

“O le mea la lea, sa manaomia ai se toefuataiga atoatoa. Sa valaau atu le Atua le Tama ma Iesu Keriso i le Perofeta o Iosefa Samita, ina ia avea ma perofeta o lenei tisipenisione. E tatau ona toefuatai uma mai mana paia uma o tisipenisione ua mavae atu, e ala mai ia te ia” (“O Le Faapotopotoina o Isaraelu Ua Faataapeapeina,” Ensign po o le Liahona, Nov. 2006, 79–80; ua faaopoopo le faamamafa).

O lenei tisipenisione faaiu o le talalelei, sa amataina i le valaauina o se perofeta—o Iosefa Samita. E pei o tisipenisione ua mavae, e tuuina mai le finagalo o le Atua i Lana fanau e ala i le faagasologa o faaaliga.

Sa faasoa maiPeresitene James E. Faust (1920–2007) o le Au Peresitene Sili i le alagatatau o faaaliga faifaipea.

“O le tele o faaaliga ua maua, i le taimi lenei faapea ma anamua, e faaleaoaoga faavae. O nisi e faatatau i le faatautaiga [o le Ekalesia] ma e faatatau i le po o a faatinoga e fai. O le tele lava [o faaaliga] e le mataina. Ua faamanatu mai e Peresitene Ioane Teila ia i tatou: ‘O faaaliga a Atamu e le’i faatonuina mai ai Noa e fau lona vaa; e le’i ta’u atua foi i faaaliga ia Noa e fai ia Lota e lafoai Sotoma; e le o tautala foi se tasi o ia faaaliga i le aveeseina mai o le fanauga a Isaraelu mai Aikupito. O nei [perofeta] uma sa i ai faaaliga mo i latou lava’ (Millennial Star, 1 Nov. 1847, 323)” (“Continuing Revelation,” Ensign, Aug. 1996, 5; ua faaopoopo le faamamafa).

Na faamatala ePeresitene Hugh B. Brown (1883–1975) o le Au Peresitene Sili, se la talanoaga na faia ma se sui o le Maota Maualalo o Peretania ma o le sa avea muamua ma faamasino o le Faamasinoga Maualuga a Egelani, ma sa le o se tagata o le ekalesia, e uiga i le manaomia o perofeta soifua ma faaaliga latou te maua:

“[Sa ou faapea atu,] ‘Ua ou tuuina atu ia te oe i le faamaoni atoatoa o se tulaga aloaia i le taimi o le Tusi Paia, sa talanoa le Atua i tagata.’

“[Sa ia tali mai,] ‘Ou te manatu ou te talia lena tulaga, ae peitai sa faagataina i le taimi faatoa maea le seneturi muamua o le vaitaimi o le Faakerisiano.’

“‘Aisea e te manatu na taofia ai?’

“‘Ou te le iloa.’

“‘E te manatu e lei toe fetalai mai lava le Atua talu mai lena taimi?’

“’Ou te lei iloa.’

“’E mafai ona ou fautuaina atu nisi o mafuaaga na ono mafua ai ona ia le toe fetalai mai. Atonu ona e le mafai ona ia fetalai mai. Ua leiloa le mana.’

“Sa ia fai mai, ‘O lona uiga o lena mea o le taufaifai.’

“‘Ia, o lona uiga la, afai e te le talia lena mea, masalo ua Ia le fetalai mai i tagata ona ua le toe alofa o Ia ia i tatou. Ua le toe fiafia o Ia i tulaga e uiga i tagata.’

“‘Leai,’ sa ia fai mai ai, ‘O le Atua e alofa i tagata uma, ma o Ia e le faailoga tagata.’

“‘Ia, … o lona uiga la na o le pau le tali talafeagai, e pei ona ou iloa, tatou te le manaomia o Ia. Ua vave tele lo tatou tomai i mea tau aoaoga ma saienisi, ua tatou le toe manaomia ai le Atua.’

“Ona ia fai mai lea, ma sa tetete lona leo ao mafaufau i le taua o loo lupe [Taua Lona II o le Lalolagi],—‘Lau Susuga Brown, e lei i ai lava se taimi i le talaaga o le lalolagi sa manaomia ai le siufofoga o le Atua e pei ona manaomia ai nei. Masalo e mafai ona e tauina mai ia te au pe aisea ua Ia le toe fetalai mai ai.’

“O lau tali sa faapea atu: ‘O loo fetalai mai o Ia, sa Ia fetalai mai; ae e manaomia e tagata le faatuatua e faalogo ai ia te Ia.’

“Ona faaauau lea ona ma suesueina le mea ou te ta’ua o le ‘ata faataitai o se perofeta.’ …

“Sa saofai le faamasino ma faalogologo ma le totoa. Sa ia fesiligia nisi o fesili na sili ona tuusao ma fia iloa, ma i le faaiuga o le faatalatalanoaga, sa ia faapea mai ai, ‘Lau Susuga Brown, pe mata e talisapaia e ou tagata le taua o lau savali. Ae a oe?’ Sa ia faapea mai, ‘Afai e sao mea ia na e tauina mai ia te au, o le savali aupito maoae lea ua oo mai i lenei lalolagi talu ona logo mai e agelu le soifua mai o Keriso’” (i le Conference Report, Oct. 1967, 118, 120; emphasis added; see also “The Profile of a Prophet” [Brigham Young University devotional, Oct. 4, 1955], 2–3, 5, 8, speeches.byu.edu; po o le “The Profile of a Prophet,” Ensign, June 2006, 36–37, 39).

1.2

O Faafitauli i Aso Nei E Faafetauia i Fofo Faalelagi

Na aoao mai le Perofeta o Iosefa Samita (1805–44) e faapea, tatou te manaomia pea lava pea le taitaiga faalelagi “e fetuunai i tulaga” o tagata o lenei tisipenisione (i le History of the Church, 5:135). Sa ia aoao mai foi e faapea, “O i tatou e tulaga ese mai lo isi lava tagata na soifua i luga o lenei fogaeleele” o le mea lea, e manaomia ai ni faaaliga ma taitaiga tulaga ese (i le History of the Church, 2:52; tagai foi i le Aoaoga a Peresitene o le Ekalesia: Iosefa Samita [2007],207-8). “Matou te talitonu i mea uma na faaali mai e le Atua, mea uma ua ia faaali mai nei, ma matou te talitonu foi o le a ia faaali mai le tele o mea silisili ma le tāua tau i le Malo o le Atua” (Mataupu Faavae o le Faatuatua 1:9).

I se faaaliga i le 1883 na ala mai ia Peresitene Ioane Teila (1808–87), na folafola mai ai e le Alii, o le a faaauau ona Ia faamanuia le Ekalesia i faaaliga:

“O le a ou faaali atu ia te outou, mai lea taimi i lea taimi, e ala mai i ala o faaaliga ua ou tofiaina, mea uma o le a manaomia mo le atinaega i le lumanai ma le faaatoatoaga o lau Ekalesia, mo le fetuunaiga ma le alualu i luma o lou malo, ma mo le fausiaina ma le faavaeina o lau Siona” (i le James R. Clark, comp., Messages of the First Presidency of The Church of Jesus Christ of Latter-day Saints [1965], 2:354).

Na faamanatu mai ePeresitene Boyd K. Packer (1924–2015) o le Korama a Aposetolo e Toasefululua, i le Au Paia o Aso e Gata Ai e faapea, o le tumau ma suiga i totonu o le Ekalesia e faatonuina uma e ala i faaaliga:

“O le a i ai suiga e faia i le lumanai e pei ona faia i taimi ua tuanai. Pe faia e le Usoga [le perofeta ma aposetolo] ni suiga pe teena, e faalagolago atoa lava i faatonuga latou te maua e ala mai i ala o faaaliga ia na faavaeina i le amataga.

“O le a tumau le tamauina ma le faavavau o aoaoga faavae, ae o faiga faavae o le a suia e pei ona faatonuina ai e Ia o le e ana lenei ekalesia” (“Revelation in a Changing World,” Ensign, Nov. 1989, 16).

Na saunoaPeresitene Ioane Teila (1808–87) i le manaomia o faaaliga i aso nei, i le avea ai o se vaega o le lotu moni a le Alii:

“Tatou te talitonu e tatau i le tagata ona fesootai ma le Atua; e tatau ona ia maua faaaliga mai ia te ia, ma afai e le iloa e ia musumusuga a le Agaga Paia, e le mafai ona ia iloa mea a le Atua. … A o ai na faalogo i le lotu moni e aunoa ma le fesootaiga ma le Atua? Ia te au lava ia, o se mea aupito le faavaea lea e ono mafaufau i ai le tagata. E leitioa foi, pe a teena e tagata le mataupu faavae o faaaliga i le taimi nei, ona matua faateleina ai lea o le le mautinoa ma le le faamaoni. E leitioa foi toatele naua tagata latou te manatu faatauvaa i talitonuga faalelotu, ma ua latou faapea o se mea e leai se aoga i tagata atamamai, aua a leai ni faaaliga, ua na o se tauemuga ma se meaula ia talitonuga faalelotu. …

“O lea, o le mataupu faavae o faaaliga i ona po nei, o le faavae tonu lea o lo tatou talitonuga faalelotu” (“Discourse by Elder John Taylor,” Deseret News, Mar. 4, 1874, 68; ua faaopoopo le faamamafa; tagai foi i le Aoaoga a Peresitene o le Ekalesia: Ioane Teila [2001], 169–70).

1.3

O Faaaliga E Faifaipea i Lenei Tisipenisione

Sa faaali mai e le Perofeta o Iosefa Samita le mafaufau ma le finagalo o le Atua i le Au Paia.

Ua molimau maiPeresitene Spencer W. Kimbal (1895–1985) e faapea, e faifaipea le oo mai o faaaliga i lo tatou tisipenisione:

“Ou te faapea atu ma le lotomaualalo tele, faapea foi ma le mana ma le malosi o se molimau o loo mumu pea i lou agaga, e faapea, mai lava i le perofeta o le Toefuataiga e oo mai i le perofeta o o tatou nei vaitaimi, e lei motusia lava lea laina o fesootaiga, o loo i ai pea le pule, ma se malamalama matagofie ma le mata’ina, o loo faaauau pea ona susulu mai. O le leo o le siufofoga o le Alii o se fati e usuina pea ma o se talosaga faatauanau leotele” (“Revelation: The Word of the Lord to His Prophets,” Ensign, Me 1977, 78; tagai foi i le Aoaoga a Peresitene o le Ekalesia: Spencer W. Kimball [2006],267).

Na aoao maiPeresitene George Q. Cannon (1827–1901) o le Au Peresitene Sili:

“O lenei Ekalesia mai lava i le aso na faatulagaina ai, e oo mai i le taimi nei, e lei tasi lava se itula, ioe, ou te faapea atu, e lei i ai se taimi na aunoa ai ma se faaaliga, aunoa ma le i ai o se tamalii i totonu ia i tatou o le e mafai ona tau mai ia i tatou le mafaufau ma le finagalo o le Atua, o le e mafai ona faasino mai ia i tatou le mea e tatau ona tatou faia, o le e mafai ona aoao i tatou i aoaoga faavae a Keriso, o le e mafai ona faasino mai ia i tatou le mea sese ma e le sao, ma o le e mafai, i mataupu uma lava lea e i totonu o o tatou aafiaga, ma e manaomia ona tatou auai ai ia tuuina mai ia i tatou le fautuaga ma faatonuga e alagatatau. O le tulaga lava lenei na i ai i taimi uma” (“Discourse by President George Q. Cannon,” Deseret News, Jan. 21, 1885, 3; ua faaopoopo le faamamafa).

1.4

O le Ekalesia a le Alii Ua Atinae i luga o le Faavae o Aposetolo ma Perofeta

O Le Korama a Aposetolo e Toasefululua, 2009

Na molimau maiPeresitene Gordon B. Hinckley (1910–2008):

“O le Ekalesia toefuataiina lenei a Iesu Keriso. O i tatou o se nuu, o le Au Paia o Aso e Gata Ai. Tatou te molimau atu na tatalaina mai le lagi, na talaia pupuni, na fetalai mai le Atua ma sa faaalia mai Iesu Keriso lava Ia, ma sosoo ai ma le faaeeina mai o le pule paia mai le lagi.

“O Iesu Keriso o le maa tulimanu o lenei galuega, ma o lo o fausia i luga o se ‘faavae o … aposetolo ma perofeta’ (Efeso 2:20)” (“O Le Faavae Ofoofogia o lo tatou Faatuatuaga,” Ensign, Nov. 2002, 81).

Na faamalamalama mai eElder Jeffrey R. Holland o le Korama a Aposetolo e Toasefululua, le pogai e manaomia ai i aso nei le faavae o aposetolo ma perofeta:

“O le faavae o le tofi faaaposetolo ma le faaperofeta o le Ekalesia o le faamanuia lea i taimi uma aemaise lava i taimi o faigata po o tulaga matautia, o taimi atonu tatou te lagonaina ai le pei o ni tamaiti, e fenumiai po o le le mautonu, atonu o sina fefe, o taimi o uiga le taupulea o tagata po o le le taupulea o le tiapolo o le a taumafai e faafenumiai po o le faasese po o le taitaisese. … I taimi o le Feagaiga Fou, i taimi o le Tusi a Mamona, ma taimi o ona po nei, na fausia ai e nei taitai maa faavae o le Ekalesia moni, e faatutuina ma maua mai lo latou malosi mai le maatulimanu sili, ‘le papa o lo tatou Togiola, o [Iesu] Keriso lea, o le Alo o le Atua’ [Helamana 5:12]” (“Perofeta, Tagatavaai, ma Tali Faaaliga,” Ensign po o le Liahona, Nov. 2004, 7).

1.5

O le Au Peresitene Sili ma le Korama a Aposetolo e Toasefululua O Perofeta, Tagatavaai ma Talifaaaliga

Na aoao mai ePeresitene Harold B. Lee (1899–1973) le uiga o le tatou lagolagoina o le Au Peresitene Sili ma le Korama a Aposetolo e Toasefululua o ni perofeta, tagatavaai, ma talifaaaliga:

“O sui uma o le Au Peresitene Sili ma le Toasefululua e masani lava ona lagolagoina o ni ‘perofeta, tagata vaai, ma tali faaaliga.’ … O le uiga o lenei mea o so’o se Aposetolo lava, ua filifilia ma faauuina, e mafai ona pule faamalumalu i le Ekalesia pe afai o le a ‘filifilia e le faalapotopotoga [lea e faauigaina o le vaega atoa a le Korama e Toasefululua], ma tofia ma faauuina i lea tofiga, ma talisapaia le talitonuga, faatuatua, ma le tatalo a le ekalesia,’ e sii sao mai i se faaaliga i lenei mataupu, i se tuutuuga e tasi, ma o lena tuutuuga pe a o ia o se uso sinia, poo se Peresitene, o lena faalapotopotoga. (Tagai i le MF&F 107:22.)” (in Conference Report, Apr. 1970, 123; po o le Improvement Era, June 1970, 28; ua faaopoopo le faamamafa; tagai foi i le Aoaoga a Peresitene o le Ekalesia: Harold B. Lee [2000],89).

Na faamalamalama mai ePeresitene J. Reuben Clark Jr. (1871–1961) o le Au Peresitene Sili:

“O nisi o le Au Pulega Aoao [o le Au Aposetolo] ua uma ona atofa atu ia i latou se valaauga faapitoa; ua latou umia se meaalofa faapitoa; ua lagolagoina i latou o perofeta, tagatavaai, ma talifaaaliga, lea ua tuu atu ai ia i latou se faamanuiaga faapitoa faaleagaga e fesootai ma lo latou aoaoina o tagata. Ua ia i latou le aia tatau, le mana, ma le pule e folafola mai ai le mafaufau ma le finagalo o le Atua i lona nuu, e faalagolago lea i le mana ma le puleaoao o le Peresitene o le Ekalesia” (“When Are Church Leaders’ Words Entitled to Claim of Scripture?” Church News, 31 Iulai, 1954, 9; ua faaopoopo le faamamafa).

1.6

O A Perofeta, Tagatavaai, ma Talifaaaliga?

1.6.1

Perofeta

O se perofeta o “se tagata ua valaauina e le Atua ma e tautala foi mo le Atua. I le avea ai o se avefeau a le Atua, o se perofeta e maua poloaiga, valoaga, ma faaaliga mai le Atua. O lona tiutetauave o le faailoa atu o le finagalo o le Atua ma lona uiga moni i tagata, ma faailoa atu le uiga o ana fesootaiga ma i latou. O se perofeta e ta’usalaina le agasala ma valoia atu lona taunuuga. O ia o se folafola o le amiotonu. I nisi taimi, e mafai ona musuia perofeta e valoia le lumanai mo le manuia o tagata. Ae peitai, o lona tiutetauave autu lava, o le fai ma molimau a Keriso. O le Peresitene O Le Ekalesia a Iesu Keriso o le Au Paia o Aso e Gata Ai o le perofeta a le Atua i le lalolagi i le aso. O sui o le Au Peresitene Sili ma le Au Aposetolo e Toasefululua e lagolagoina o ni perofeta, tagatavaai, ma talifaaaliga” (Guide to the Scriptures, “Prophet,” scriptures.lds.org; ua faaopoopo le faamamafa).

1.6.2

Tagatavaai

I le avea ai ma se tagatavaai, sa vaai Isaia i le lumanai.

O se tagatavaai “o se tagata ua faatagaina e le Atua e vaai ma ni mata faaleagaga i mea ua natia e le Atua mai le lalolagi (Mose 6:35–38). O ia o se talifaaaliga ma o se perofeta (Mosaea 8:13–16). I le Tusi a Mamona, na aoao mai ai Amona e faapea, e na o se tagatavaai e mafai ona faaaogaina mea faaliliuupu, po o se Urima ma le Tumema (Mosaea 8:13; 28:16). O se tagatavaai na te iloa le taimi ua tuanai, le taimi nei, ma le lumanai. I aso anamua, o se perofeta sa masani ona taua o se tagatavaai (1 Sam. 9:9; 2 Sam. 24:11).

“O Iosefa Samita o le tagatavaai maoae o aso e gata ai (MF&F 21:1; 135:3). Ma le isi, o le Au Peresitene Sili ma le Aufono a le Toasefululua, ua lagolagoina o ni perofeta, tagatavaai, ma talifaaaliga” (Guide to the Scriptures, “Seer,” scriptures.lds.org; ua faaopoopo le faamamafa).

Na faamalamama mai eElder John A. Widtsoe (1872–1952) o le Korama a Aposetolo e Toasefululua:

“O se tagatavaai o se tasi e iloa mea i mata faaleagaga. Na te iloa le uiga o mea e foliga nenefu i isi; o le mea lea o ia o se tagata faaliliuupu ma faamalamalama o le upumoni e faavavau. … O le faapuupuuga, o ia o le tagatavaai, e savali i le malamalama o le Alii ma ni mata e vaai” [tagai i le Mosaea 8:15–17]” (Evidences and Reconciliations, arr. G. Homer Durham, 3 vols. in 1 [1960], 258).

Na faamatala ePeresitene Iosefa Filitia Samita (1876–1972) se tasi o ona fesoasoani, o se tasi na i ai le meaalofa o le avea ma tagatavaai:

“O Peresitene Harold B. Lee o se faataitaiga tumau o le upumoni ma le amiotonu, o se tagatavaai moni ua i ai le malosi maoae faaleagaga ma le malamalama ma le poto, ma o lona silafia ma le malamalama e uiga i le Ekalesia ma ona manaoga e le siliae ai se tagata” (in Conference Report, Apr. 1970, 114; or Improvement Era, June 1970, 27).

1.6.3

Talifaaaliga

I le avea ai ma talifaaaliga, o le Au Peresitene Sili ma le Korama a Aposetolo e Toasefululua e faailoa maia le finagalo o le Alii mo le Ekalesia ma mo tagata lautele. Latou te faaali mai Lona finagalo i mataupu faaleagaga ma faaletino, e ui o mea uma lava e faaleagaga i le Alii (tagai MF&F 29:34). Latou te aoao mai aoaoga faavae, taitai korama o le au perisitua, taiala ausilali, vaavaaia le fausiaina o falelotu ma malumalu, ma fai isi lava mea e manaomia ina ia “taavale atu ai i luma le talalelei i tuluiga o le lalolagi, e pei ona o le a taavale atu le maa na tofi mai le mauga e aunoa ma lima, seia tumu ai le lalolagi atoa” (MF&F 65:2).

Na aoao maiElder John A. Widtsoe (1872–1952):

“O se talifaaaliga e faaalia, faatasi ai ma le fesoasoani a le Alii, se mea e lei iloa muamua. Atonu o se mea e fou po o se upumoni ua galo, po o se faaaogaaga fou pe ua galo o se upumoni ua iloa e manaomia e le tagata” (Evidences and Reconciliations, 258).

1.7

E Fesoasoani Perofeta Ia i Tatou e Atinae le Faatuatua ia Iesu Keriso

O le faalogo atu ma mulimuli i upu a perofeta soifua e faamalosia ai o tatou faatuatua ia Iesu Keriso (tagai Roma 10:17). Na aoao mai le Perofeta o Iosefa Samita (1805–44), “E oo mai le faatuatua e ala i le faalogo atu i le upu a le Atua, e ala i le molimau a auauna a le Atua; o lena molimau e i ai lava i taimi uma ma le Agaga o valoaga ma faaaliga [tagai i le Faaaliga 19:10]” (i le History of the Church, 3:379; ua faaopoopo le faamamafa). E folafola mai e perofeta le afioga a le Atua e ala i le agaga o valoaga, ina ia mafai e i latou o e faalogo i ai ona faaaoga le faatuatua ia Iesu Keriso.

Ona e alofa o Ia i Ana fanau, ma “iloa le malaia o le a oo mai i luga o e o nonofo i le lalolagi,” (MF&F 1:17), ua tuuina mai ai e le Tama Faalelagi se fofo: Ua Ia toefuataiina mai le atoatoaga o le talalelei a Iesu Keriso e ala i le Perofeta o Iosefa Samita. I le faia o lea mea, ua saunia ai e le Alii se auala ina ia “mafai ona faateleina le … faatuatua i le lalolagi” (MF&F 1:21). Ua Ia folafola mai, “E ui ina mavae atu le lagi ma le lalolagi, e lē mavae atu lava laʼu upu, ae o le a faataunuuina uma lava, pe i loʼu lava leo po o i le leo o aʼu auauna, ua tutusa lava” (MF&F 1:38). Afai tatou te faalogo i le afioga a le Alii e ala mai i aoaoga a perofeta ma molimau i lona faataunuuga, e tuputupu ae ai o tatou faatuatua. E aumaia e lena mea ia i tatou le filemu, faamoemoe, ma le olioli, e oo lava i se lalolagi ua afaina i le masalosalo, amioleaga, ma faalavelave.

1.8

E Aoao Mai Perofeta mo lo Tatou Manuia

Na tuuina mai e Peresitene Gordon B. Hinckley (1910–2008) ia i latou ua faaosoosoina e tetee i fautuaga ma lapataiga a perofeta:

“Faamolemole ia outou silafia, o a matou aioiga e le faaosofiaina e se manao manatu faapito. Faamolemole ia outou silafia, o a matou lapataiga e le faapea ua aunoa ma ni pogai ma ni mafuaaga. Faamolemole ia outou silafia, o faaiuga e talanoa atu e uiga i ni mataupu eseese, e le mafai ona ausia e aunoa ma ni feutagaiga, soalaupulega, ma tatalo. Faamolemole ia outou silafia, na pau lava la matou faanaunauga ia fesoasoani atu ia te outou taitoatasi i a outou faafitauli, a outou tauiviga, o outou aiga, ma o outou soifuaga. …

“E leai ni o matou manao manatu faapito … nai lo o le naunau ina ia fiafia o tatou uso ma tuafafine, ina ia i ai le filemu ma le alofa i o tatou aiga, ina ia faamanuiaina i latou e ala i le mana o le Silisili Ese i a latou taumafaiga eseese i le amiotonu” (“The Church Is on Course,” Ensign, Nov. 1992, 59–60).

1.9

E Oo Mai le Saogalemu i le Iloa ma Faaaoga o Aoaoga a Perofeta Soifua

O totonu o le Maota Autu mo Konafesi i le taimi o se konafesi aoao a le Ekalesia

O mea matautia faaletino ma faaleagaga o loo feagai ma le lalolagi i aso nei, o faamaoniga ia o lo tatou matuai manaomia o le taitaiga faaperofeta. Na faamatalaina ePeresitene James E. Faust (1920–2007) o le Au Peresitene Sili, le ala e mafai ona tatou saogalemu ai mai na mea matautia:

“Ua folafola mai ia i tatou e faapea, o le Peresitene o le Ekalesia, i le avea ai ma talifaaaliga mo le Ekalesia, o le a mauaina le taitaiga mo i tatou uma lava. O lo tatou saogalemu ua taatia lea i lo tatou uai atu i mea e fai mai ai ma mulimuli i ana fautuaga” (“Continuing Revelation,” Ensign, Aug. 1996, 6; ua faaopoopo le faamamafa).

Na tuuina mai eElder Quentin L. Cook o le Korama a Aposetolo e Toasefululua se faataitaiga o le auala na puipuia ai e se aoaoga faaperofeta ia tagata o le Ekalesia mai i mea matautia:

“E musuia perofeta ina ia saunia mo i tatou ni tomatauga faaperofeta e puipuia ai i tatou mai mea matautia. Mo se faataitaiga, o Peresitene Heber J. Grant, le perofeta mai le 1918 e oo atu i le 1945, sa musuia o ia e faamamafa le usitaia o le Upu o le Poto [tagai i le Aoaoga a Peresitene o le Ekalesia: Heber J. Grant (2002), 203-13], le mataupu faavae ua i ai ma se folafolaga na faaalia mai e le Alii i le Perofeta o Iosefa [tagai i le MF&F 89]. Sa ia faamamafa mai le taua o le lē ulaula po o le inu ava malosi ma sa faatonuina epikopo ina ia toe iloiloina nei mataupu faavae i le taimi o faatalanoaga mo pepa faataga o le malumalu.

“O le taimi lena sa taliaina ai le ulaula e tagata, o se aga e talafeagai, ma e manaia. Sa taliaina e le galuega faafomai le ulaula faatasi ai ma sina popolega laitiiti, aua e lei faia i lena taimi ni suesuega faasaienitisi i le sootaga o le ulaula tapaa ma le tele o ituaiga kanesa. Sa fautua mai ma le malosi Peresitene Grant, ma sa oo ina lauiloa i tatou o ni tagata e faasa ai le inu ava malosi ma le ulaula. …

“O le usitai i le Upu o le Poto na aumaia ai i o tatou tagata, aemaise lava o tatou tupulaga talavou se tui puipui e faasaga i le faaaogaina o fualaau faasaina, ma taunuuga mai toatuga matautia faalesoifua maloloina ma tulaga matautia o amio” (“Ia Gauai Atu i Upu a Perofeta,” Ensign po o le Liahona, Me 2008, 48; ua faaopoopo le faamamafa).

Na lapatai maiElder M. Russell Ballard o le Korama a Aposetolo e Toasefululua e faapea, ona e maua le saogalemu i le mulimuli i upu a le perofeta soifua, o lea e tatau ona tatou puipui ai e faasaga i mea faalavefau ia e taofia ai nisi o i tatou mai le uai atu i upu a perofeta:

“E le o se mea itiiti, uso e ma tuafafine, le i ai o se perofeta a le Atua ma i tatou. … Afai tatou te faalogo i le fautuaga a le Alii ua faailoa mai e ala i saunoaga a le Peresitene o le Ekalesia, e tatau ona sao ma vave la tatou tali. Ua faaalia mai i le talafaasolopito e i ai le saogalemu, filemu, manuia, ma le fiafia i le tali atu i fautuaga faaperofeta e pei ona faia e Nifae o anamua: ‘Ou te alu ma fai ia mea ua poloaiina e le Atua’ (1 Nifae 3:7).

“Ua tatou iloa le aafiaga o Naamanu, o le na maua i le lepela ma o le na iu ina logoina atu le perofeta o Elisaia, ma na faatonuina ai e ‘ina alu ia ina taele faafitu i Ioritana, ona toe foi mai ai lea o lou tino tuai ia te oe, ona e mama ai lea’ (2 Tupu 5:10).

“I le taimi muamua, sa lei manao Naamanu e mulimuli i le fautuaga a Elisaia. Sa lei malamalama i le mea na faatonuina o ia e fai—ia taele faafitu i le vaitafe o Ioritana. I se isi faaupuga, o lona faamaualuga ma le ulumalo na taofia ai o ia mai le mauaina o faamanuiaga a le Alii e ala mai i Lana perofeta. Mulimuli ane, sa alu ifo ai o ia, ‘ua fufui faafitu i Ioritana, e tusa ma le upu a le tagata o le Atua: ona foi mai ai lea o lona tino tuai pei o le tino o le tamaitiiti, ua mama foi ia’ (2 Tupu 5:14).

“Ai lava se faalotomaualaloina o lenei mea mo Naamanu i le iloa, na toeitiiti lava a ona faatagaina lona lava faamaualuga ma lona le manao e faalogo i le fautuaga a le perofeta, e toafia ai o ia mai le mauaina o sea faamanuiaga maoae o le faamamaina. Ma o se mea faalotomaualaloina foi pe a mafaufau atu pe toafia i tatou e ono misia faamanuiaga folafolaina ma maoae ona tatou te le faalogo ona toe faia lea o mea faigofie lava ia e tau mai e lo tatou perofeta tatou te faia i aso nei. …

“O le aso o le a ou fai atu ai se folafolaga. O se folafolaga faigofie, ae e moni. Afai o le a outou faalogo i le perofeta soifua ma aposetolo ma usitai i a latou fautuaga, o le a outou le se ese” (“O Lana Upu o le a Outou Talia,” Liahona, Iulai 2001, 79-80).

Ua faamanatu mai ia i tatou ePeresitene Dieter F. Uchtdorf o le Au Peresitene Sili, e oo mai faamanuiaga pe a tatou galulue i tali musuia e tuuina mai ia i tatou e le perofeta:

“Ua i ai so tatou perofeta soifua i luga o le fogaeleele. … Na te silafia o tatou luitau ma popolega. Ua ia te ia ni tali musuia. …

“E tulei saunoa mai perofeta ia i tatou i le suafa o le Alii, i upu faigofie. E pei ona faamautu mai e le Tusi a Mamona, ‘ua foai mai e le Alii le Atua le malamalama i le mafaufau; aua foi ua tautala mai o ia i tagata i o latou mafaufau e tusa ma la latou gagana’ (2 Nifae 31:3).

“O lo tatou tiutetauave e le gata ia faalogo ae ia faia foi Lana upu, ina ia tatou maua faamanuiaga o sauniga ma feagaiga o le talalelei toefuataiina. Na fetalai o Ia, ‘O Aʼu, o le Alii, e noatia aʼu pe a outou faia mea Ou te fai atu ai; ae a outou lē faia mea Ou te fai atu ai, e leai se folafolaga mo outou’ (MF&F 82:10).

“Atonu e i ai ni taimi tatou te maua ai lagona lofituina, tiga, pe ua tauau lava ina tatou faavaivai, a o tatou taumafai atili e avea ma tagata atoatoa o le Ekalesia. Ia outou mautinoa, o lo o i ai le pulupasama i Kiliata. Ina tatou faafofoga atu ia ma faalogologo i perofeta o o tatou vaitaimi, a o latou fesoasoani mai ina ia tatou tulimatai atu i mea o lo o faaautu i ai le fuafuaga a le Foafoa mo le taunuuga e faavavau o Lana fanau” (“Ua Faamanuiaina Le Ekalesia i le Lalolagi Atoa i Siufofoga o Perofeta,” Ensign, Nov. 2002, 12; ua faaopoopo le faamamafa).

1.10

O le Tasi o o Tatou Manaoga Silisili O le Faalogo i Perofeta

Na faamalamalama mai ePeresitene Harold B. Lee (1899–1973) le taua o le ua’i atu i fautuaga a le perofeta, e tusa lava pe ese mai o tatou lava manatu mai lena fautuaga:

“Na pau lava le saogalemu o loo i ai ia i tatou i le avea ai ma tagata o le ekalesia, o le faia lea o le mea tonu sa fetalai mai ai le Alii i le Ekalesia i lena aso ina ua faatuina le Ekalesia. E ao ona tatou aoao e ua’i atu i upu ma poloaiga o le a tuuina mai e le Alii e ala mai i Lana perofeta, ‘e pei ona maua e ia, ma savavali i le paia atoa i o’u luma; … e pei lava ua mai i lo’u lava gutu, i le onosai ma le faatuatua atoa.’ (MF&F 21:4–5.) E i ai mea o le a manaomia ai le onosai ma le faatuatua. Atonu o le a e le fiafia i le mea e sau mai le pulega o le Ekalesia. E ono feteenai ma ou taofi faapolokiki. E ono feteenai ma ou taofi faale-olaga nei. E ono faalavelave i le ituaiga olaga o loo e ola ai. Ae afai e te faalogo i nei mea, e pei o loo tuuina mai i le fofoga o le Alii lava ia, faatasi ma le onosai, ma le faatuatua, o le folafolaga e faapea ‘o le a le manumalo faitotoa o seoli ia te outou; ioe, a e tafieseina e le Alii le Atua le malosi o le pogisa mai o outou luma, ma luluina le lagi mo lo outou lelei, atoa ma le mamalu o lona suafa.’ (MF&F 21:6.)” (i le Conference Report, Oct. 1970, 152–53; po o le Improvement Era, Dec. 1970, 126; tagai i le Aoaoga a Peresitene o le Ekalesia: Harold B. Lee, 84–85).

Na faamautinoa mai eElder Robert D. Hales o le Korama a Aposetolo e Toasefululua ia i tatou le saoloto mai “tiga e le manaomia” pe afai o le a tatou mulimuli i fautuaga faaperofeta:

“Afai tatou te mulimuli i fautuaga e tuuina mai e perofeta, e mafai ona tatou maua se olaga i le olaga nei lea tatou te le aumaia ai ia i tatou lava tiga e le manaomia ma le faatamaiaga o le tagata lava ia. E le faapea ai la, o le a leai ni o tatou luitau. O le a i ai. E le faapea ai la, o le a le tofotofoina i tatou. O le a tofotofoina, aua o se vaega lenei o lo tatou faamoemoega i le lalolagi. Ae afai o le a tatou faalogo i le fautuaga a lo tatou perofeta, o le a faapea ona tatou malolosi ma mafai ona tatou tatalia luitau o le olaga nei. O le a tatou maua le faamoemoe ma le olioli. O saunoaga o fautuaga uma mai perofeta, ua tuuina mai ina ia mafai ona faamalosia ai i tatou, ma ia mafai ona siitia ma faamalosia ai isi” (“Hear the Prophet’s Voice and Obey,” Ensign, May 1995, 17; tagai foi i le Mosaea 2:41; MF&F 59:23).

Manatu e Mafaufau Loloto i ai

• E tusa ai ma le faamatalaga o le mataupu lenei, aisea tatou te manaomia ai aoaoga a perofeta soifua e faaopoopo atu i tusitusiga a perofeta o loo i tusitusiga paia?

• Mata e ese faapefea lou olaga pe ana fai e te le maua aoaoga a perofeta soifua?

• Na taua e Elder M. Russell Ballard, o le faamaualuga o se tasi o maagao lea e taofia ai tagata mai le mulimuli i le perofeta. O a nisi maagao? O a ni mea e mafai ona tatou faia e faatoilalo pe puipui ai e faasaga i nei maagao?

Galuega Fautuaina

• Tusi ni parakalafa pupuu se tolu e faamalamalama ai i au lava upu ia faaupuga perofeta, tagatavaai, ma le talifaaaliga. O le a le eseesega i le va o nei faalupega? Aisea e taua ai na eseesega?

• Tusi ou lagona i le moni o le faamatalaga lenei: E le mafai e tagata o Le Ekalesia a Iesu Keriso o le Au Paia o Aso e Gata Ai ona talia le Alii a o teena Lana perofeta.