Mataupu 4

O Le Korama a le Au Peresitene Sili

O Le Faatomuaga

O le aso 18 o Mati, 1833, na faatulaga aloaia ai le Au Peresitene Sili ma o le Perofeta o Iosefa Samita sa avea ma Peresitene, ae o Sini Rikitone ma Feterika G. Viliamu sa avea ma fesoasoani (tagai i le History of the Church, 1:334; tagai foi i le MF&F 81; 90, e aofia ai ulutala o vaega). O faaaliga na mulimuli ane ai, na tuuina mai ai faamatalaga faaopoopo e faatatau i le Au Peresitene Sili, lea o loo faagaoioia i aso nei o le korama aupito maualuga o le perisitua, faatasi ai ma le “aiā e galue ai i tofi uma i le ekalesia.” (MF&F 107:9; tagai foi i le MF&F 124:126).

O le Korama a le Au Peresitene Sili e aofia ai le Peresitene ma e masani lava, ae e le o taimi uma, ma ni fesoasoani e toalua. O fesoasoani e masani lava, ae e le o taimi uma, e filifilia mai ai mai le Korama a Aposetolo e Toasefululua. O nei “Faitaulaga Sili Pulefaamalumalu e toatolu … ua avea o se korama o le Au Peresitene o le Ekalesia” (MF&F 107:22). E faalagolago i o latou luga le tiutetauave o le taitaiina o le malo o le Atua i le fogaeleele (tagai i le MF&F 90:12–16). Na faamamafa mai e le Alii le taua o le Au Peresitene Sili ina ua Ia fetalai, “Soo se tasi e talia laʼu upu ua talia aʼu, ma o soo se tasi e talia aʼu, ua talia e ia i latou na, o le Au Peresitene Sili, o e ua Ou auina atu, o e ua Ou faia o fautua ia te outou, mo loʼu igoa” (MF&F 112:20).

O le mataupu lenei o le a fesoasoani e faateleina ai lou malamalama i auala e pulefaamalumalu ai le Au Peresitene Sili ma taitai ai le galuega a le Alii i luga o le fogaeleele.

Faamatalaga

4.1

O Se Taitaitama a le Au Peresitene Sili o loo i le Ekalesia i le Feagaiga Fou

O le uluai Au Peresitene Sili lea na faavaeina ia Mati, na aofia ai Iosefa Samita, Peresitene (ogatotonu); Sini Rikitone, Fesoasoani Muamua (agavale); ma Feterika G. Viliamu, Fesoasoani Lua (taumatau).

Na aoao maiPeresitene Iosefa Filitia Samita (1876–1972) e faapea, o le taitaitama mo la tatou Korama a le Au Peresitene Sili i aso e gata ai, o loo maua lea i le faatulagaga o loo i le Feagaiga Fou o le Ekalesia a Iesu Keriso:

“O le mea moni e faapea, o Peteru, Iakopo, ma Ioane na motu ese mai isi aposetolo ma tuuina atu i ai le pule faapitoa, na avea ma taitaitama i le korama a le Au Peresitene Sili i o tatou aso. E tatau ona manino lelei lava mai mea ua tusia o o nei aposetolo e toatolu na faatulagaina i se au peresitene sili faapea. … Ua iloa lelei lava e le Au Paia o Aso e Gata Ai o le toatolu lenei o se Au Peresitene ona o le mea moni e faapea, na o mai uma le toatolu lea i le Perofeta o Iosefa Samita ma Oliva Kaotui ma tuu mai i o laua luga le Perisitua Mekisateko” (Seek Ye Earnestly [1970], 207–8; ua faaopoopo le faamamafa).

4.2

Faavaeina o le Au Peresitene Sili

O le siata o loo mulimuli mai o loo faailoa ai nisi o mea na tutupu i le faavaeina o le Au Peresitene Sili:

Aso	Mea na Tupu
6 Aperila, 1830	Na faatulagaina ai le Ekalesia, ma o Iosefa Samita “o lē na valaaulia e le Atua, ma faauuina o se aposetolo a Iesu Keriso, e avea ma toeaina muamua o lenei ekalesia”; ae o Oliva Kaotui “o lē foi na valaaulia e le Atua, o se aposetolo a Iesu Keriso, e avea ma toeaina lona lua o lenei ekalesia” (MF&F 20:2–3).
11 Novema, 1831	Na maua ai e le Perofeta o Iosefa Samita le faaaliga o loo faamaumauina i le Mataupu Faavaema Feagaiga 107:59–100; fuaiupu e 64–66 o loo talanoaina ai le “Peresitene o le Perisitua Maualuga o le Ekalesia” (tagai i le Robin Scott Jensen, Robert J. Woodford, and Steven C. Harper, eds., Revelations and Translations: Manuscript Revelation Books, facsimile ed., vol. 1 of the Revelations and Translations series of The Joseph Smith Papers, edited by Dean C. Jessee, Ronald K. Esplin, and Richard Lyman Bushman [2009], 216–19).
25 Ianuari, 1832	“Na lagolago ai Iosefa Samita le Perofeta o le Peresitene o le Perisitua Maualuga” i se konafesi a toeaina, faitaulaga sili, ma tagata o le Ekalesia i Amherst, Ohaio (MF&F 75 ulutala o le vaega; tagai foi i le MF&F 82 ulutala o le vaega; History of the Church, 1:243, vaefaamatalaga).
Mati 1832	Na maua e le Perofeta o Iosefa Samita le faaaliga e uiga i matafaioi i le lumanai o le Au Peresitene Sili (tagai i l MF&F 81:1–2). “O le faaaliga … e tatau ona manatu i ai o se laasaga agai i le faatulagaga aloaʼia o le Au Peresitene Sili, ona ua faapitoa ona valaaulia ai le tofi o le fesoasoani i lena tino potopoto ma faamalamalama mai ai le mamalu o le tofiga” (MF&F 81 ulutala o le vaega).
26 Aperila,1832	I le faagasologa o se “fono āoāo a le Ekalesia” i Jackson County, Misuri, “na lagolago ai Iosefa Samita le Perofeta o le Peresitene o le Perisitua Maualuga, le tofi lea na faauu muamua i ai o ia” (MF&F 82 ulutala o le vaega).
8 Mati, 1833	Na maua ai e le Perofeta o Iosefa Samita le faaaliga o loo maua i le Mataupu Faavae ma Feagaiga 90, “o se laasaga faaauau i le faatuina o le Au Peresitene Sili” (ulutala o le vaega). I le faaaliga lenei na faailoa mai ai e le Alii, e tatau ona auauna atu Sini Rikitone ma Feterika G. Viliamu o ni fesoasoani i le Au Peresitene Sili (tagai i le fuaiupu e 6).
18 Mati, 1833	Na vaetofia ai Sini Rikitone ma Feterika G. Viliamu o ni fesoasoani i le Au Peresitene Sili. Na faamaumauina e le Perofeta o Iosefa Samita: “Na faaalia e Elder Rikitone se manao e tatau ona faauuina i laua ma Uso Feterika G. Viliamu i tofi na valaauina i ai i laua, … e tusa ai ma le faaaliga na tuuina mai i le aso 8 o Mati, 1833. O lea na tuu ai ou lima i luga o Uso Sini ma Feterika, ma faauuina i laua ina ia la auai faatasi ma au i le taulimaina o ki o lenei malo mulimuli, ma lagolago i le Au Peresitene o le Perisitua Maualuga, i le avea ai ma ou Fesoasoani” (i le History of the Church, 1:334).
28 Mati, 1835	Na maua ai e le Perofeta o Iosefa Samita le faaaliga o loo maua i le Mataupu Faavae ma Feagaiga 107:1–58, ma faamatala atili mai ai le Au Peresitene Sili o le komara pulefaamalumalu o le Ekalesia: “Mai i le Perisitua Mekisateko, e toatolu Faitaulaga Sili Pulefaamalumalu, e filifili e le tino potopoto, e tofia ma faauu i lena tofi, ma e lagolagoina e le talitonuga, faatuatua, ma tatalo a le ekalesia, e faia ai se korama o le Au Peresitene o le Ekalesia” (MF&F 107:22).

4.3

O le Pule a le Au Peresitene Sili

O sui o le Au Peresitene Sili o Faitaulaga Sili Pulefaamalumalu ia i le Ekalesia atoa. O le tulaga la lea, o le Au Peresitene Sili o le pule faaiu lea i le olaga nei i mataupu uma lava. Ua faailoa mai e le Alii le tele o le latou pule ina ua Ia fetalai mai:

“O lenei foi, e moni, Ou te toe fai atu ia te outou, o pisinisi sili ona taua o le ekalesia, ma faamasinoga sili ona faigata o le ekalesia, o le tulaga e oo i ai le lē maua o se maliega i le faaiuga a le epikopo po o faamasino, ia tuu atu ma avatu i luga i le aufono a le ekalesia, i luma o le Au Peresitene o le Perisitua Maualuga.

“Ma o le Au Peresitene o le aufono o le Perisitua Maualuga o le a i ai le mana e valaaulia ai isi faitaulaga sili, e toasefululua lava, e fesoasoani o ni fesoasoani; ma o le a faapea ona i ai i le Au Peresitene o le Perisitua Maualuga ma ona fesoasoani, le mana e filifili ai i molimau e tusa ma tulafono o le ekalesia.

“Ma a uma lenei faaiuga o le a lē toe manatuaina lea mea i luma o le Alii; ona o le aufono aupito maualuga lenei o le ekalesia a le Atua, ma o se faaiuga faaiu lea i luga o feteenaʼiga i mataupu faaleagaga” (MF&F 107:78–80; ua faaopoopo le faamamafa).

Na faamalamalama mai ePeresitene Stephen L Richards (1879–1959) o le Au Peresitene Sili e faapea, ua i ai i le Au Peresitene Sili le pule e faamatala ai aoaoga faavae:

“O ai e agavaa e faamatalaina aoaoga faavae o le Ekalesia … ? Ou te mautinoa, pe a manatu loloto i ai, e leai se eseesega moni i manatu faaalia o tagata o le ekalesia i lenei fesili? Ua matuai lelei ona faatulagaina e ala i faaaliga ua tatou maua ma le faiga masani a le Ekalesia e faapea, o le Peresitene ma ona Fesoasoani ua tuuina i ai lenei pule, lea ou te le talitonu o le a i ai soo se tasi o le ekalesia o le a ono faafinauina. I le gagana a le faaaliga, o i latou, o le Au Peresitene Sili, ua faavaeina ‘a quorum … e talia faaaliga mo le Ekalesia atoa’ [MF&F 124:126]. O i latou o le faamasinoga maualuga iinei i le lalolagi i le faauigaga o le tulafono a le Atua.

“I le faaaogaina ai o o latou aoga ma mana na faasafua atu i ai, ua pulea ai i latou i se faavae, o se vaega o lena [faavae] ua tusitusia ae o se vaega e le o tusitusia. O le vaega ua tusitusia ua i ai i tusitusiga paia ua faamaoniaina, o aso anamua ma aso nei, ma i saunoaga tusitusia a o tatou perofeta o aso e gata ai. O le vaega e le o tusitusia o le agaga lea o faaaliga ma musumusuga faalelagi lea e faatatau i o latou valaauga” (i le Conference Report, Oct. 1938, 115–16; ua faaopoopo le faamamafa).

4.4

O le Tulaga Maualuga o le Peresitene o le Ekalesia

O Peresitene Iosefa F. Samita (ogatotonu) ma ona fesoasoani, o John R. Winder (agavale) ma Anthon H. Lund (taumatau)

I le aso 8 o Mati, 1833, na tau mai ai e le Alii i le Perofeta o Iosefa Samita e faapea, o fesoasoani i le Au Peresitene Sili e “ua faitau tutusa i laua ma [le Peresitene] i le umiaina o ki o le malo mulimuli lenei” (MF&F 90:6). Ae peitai, o le Peresitene o le Ekalesia, e pulefaamalumalu i lenei korama o le perisitua ma taitaia le galuega a ona fesoasoani.

Na faamalamalama mai eElder John A. Widtsoe (1872–1952) o le Korama a Aposetolo e Toasefululua e faapea, o le Peresitene o le Ekalesia e taitaia le galuega a le Au Peresitene Sili:

“Sa tuuina atu ia Iosefa Samita ni fesoasoani e toalua, o le toatolu lea ua fausia ai le Au Peresitene Sili o le Ekalesia. (18 Mati, 1833.) Na muamua mai lenei [faaaliga] i le aso 8 o Mati, 1833 i se faaaliga na folafola mai ai e faapea, ‘O le a ala atu ia te oe [Iosefa Samita] ona tuuina atu o faaaliga i se tasi, ioe, i le Ekalesia lava’ [MF&F 90:4]. Sa faatumauina le tulaga maualuga o le Peresitene o le Ekalesia. Sa lei umi ae falo tagata i le fesili pe na tutusa lava le mana na umia e Fesoasoani ma le Peresitene. O le a se mea e mafai ona fai e Fesoasoani e aunoa ma le tofia sao mai le Peresitene? Sa taliina nei fesili i se fonotaga i le aso 16 o Ianuari, 1836. Na saunoa le Perofeta, ‘O le Toasefululua e le i lalo o le pule a se isi lava tagata nai lo o le Au Peresitene Sili … pe a ou le i ai, e leai foi se Au Peresitene Sili e pulea le Toasefululua’’ [i le History of the Church, 2:374; ua faaopoopo le faatusilima]. I se isi faaupuga, a faapea e le avanoa le Peresitene, o le a leai se pule i Fesoasoani. E le o i ai i Fesoasoani le mana o le Peresitene ma le mafai ona faatinoina mataupu o le Ekalesia e aunoa ma le taitaiga ma le maliega a le Peresitene” (Joseph Smith: Seeker after Truth, Prophet of God [1951], 303; ua faaopoopo le faamamafa).

4.5

O le Peresitene o le Ekalesia e Pulefaamalumalu i le Ekalesia

O Peresitene Thomas S. Monason (ogatotonu) ma ona fesoasoani, o Henry B. Eyring (agavale) ma Dieter F. Uchtdorf (taumatau), 2008

Na taua ePeresitene Iosefa Filitia Samita (1876–1972) le tulaga taitai o le Au Peresitene Sili:

“Ua i ai i le Ekalesia a Iesu Keriso i aso nei le korama a le Au Peresitene Sili, e ese mai i le Aufono a le Au Aposetolo. E galulue le au aposetolo i lalo o le taitaiga a le Au Peresitene Sili i mataupu uma o le perisitua ma i le Ekalesia” (Doctrines of Salvation, comp. Bruce R. McConkie [1956], 3:152; ua faaopoopo le faamamafa).

I le avea ai “aufono aupito maualuga lenei o le ekalesia a le Atua” (MF&F 107:80), e taitai ai e le Au Peresitene Sili le Ekalesia i faaiuga musuia e faatatau i mea uma, i le faaleagaga ma le faaletino. Na aoao maiPeresitene Iosefa Filitia Samita (1876–1972):

“E ala i le faaaliga, ua tuuina mai ai ni fesoasoani i le Peresitene o le Ekalesia [tagai i le MF&F 107:78–80]. …

“O le mana maualuga o le taitaiga o le Ekalesia ua tuuina atu i le Peresitene ma ona fesoasoani. O le Au Peresitene Sili e pulefaamalumalu i aufono uma, i korama uma, ma faalapotopotoga uma o le Ekalesia, faatasi ma le mana maualuga e fai ai tofitofiga ma le mana e fautua [atu ai suafa mo tofiga] [tagai i le MF&F 107:9]. O nei mana mo le faia o tofitofiga, fautuaina atu o [suafa mo tofiga], ma le pulefaamalumalu, e mafai ona faasafuaina e le Au Peresitene Sili i isi o e e mafai ona latou filifilia ma i latou ua lagolago e tagata e fai ma sui o le au peresitene sili i le taitaiga o le Ekalesia.

“O le Au Peresitene Sili o faaaliga soifua a le Atua ma le au maualuluga e faia faaiuga, ma faamatala upu o le tulafono a le Ekalesia. Latou te vaaia le galuega a le Ekalesia aoao i mataupu uma e faatatau i tulafono, faatulagaga, ma le taitaiga. E leai se vaega o le galuega a le Ekalesia e i fafo atu o le latou pule” (“The First Presidency and the Council of the Twelve,” Improvement Era, Nov. 1966, 978).

Sa saunoaPeresitene James E. Faust (1920–2007) o le Au Peresitene Sili:

“Ua i ai i le Au Peresitene Sili le tiutetauave mulimuli mo mataupu o le malo o le Atua i le fogaeleele. Na fetalai mai le Alii e uiga ia i latou:

“‘Mai i le Perisitua Mekisateko, e toatolu Faitaulaga Sili Pulefaamalumalu, e filifili e le tino potopoto, e tofia ma faauu i lena tofi, ma e lagolagoina e le talitonuga, faatuatua, ma tatalo a le ekalesia, e faia ai se korama o le Au Peresitene o le Ekalesia. …

“‘Ma o le Au Peresitene o le aufono o le Perisitua Maualuga o le a i ai le mana e valaaulia ai isi faitaulaga sili, e toasefululua lava, e fesoasoani o ni fesoasoani; ma o le a faapea ona i ai i le Au Peresitene o le Perisitua Maualuga ma ona fesoasoani, le mana e filifili ai i molimau e tusa ma tulafono o le ekalesia’ [MF&F 107:22, 79]” (“Responsibilities of Shepherds,” Ensign, Me 1995, 47).

4.6

O le Taua o Fesoasoani i le Au Peresitene Sili

O Peresitene Gordon B. Hinckley (ogatotonu) ma ona fesoasoani, o Thomas S. Monson (agavale) ma James E. Faust (taumatau), 2005

Na aoao maiElder William R. Walker o le Fitugafulu e faapea, o le Au Peresitene Sili o le faataitaiga lea e tatau ona mulimuli ai isi au peresitene i totonu o le Ekalesia:

“O i tatou uma lava o galulue i au peresitene i soo se mea o le Ekalesia e tatau ona tagai atu i le Au Peresitene Sili e fai ma a tatou mamanu ma faataitaiga lea tatou te saili e mulimuli ai a o faataunuu o tatou tiutetauave. E tatau ona tatou taumafai ia faapei o i latou ma ia galulue faatasi i le alofa ma le lotogatasi e pei ona latou faia.

“Sa masani ona saunoa Peresitene Gordon B. Hinckley e uiga i le taua o fesoasoani. Na fai mai a ia, ‘Na tuu e le Alii ia [fesoasoani] iina mo se faamoemoega’ (Teachings of Gordon B. Hinckley [1997], 94).

“Na aoao atili i tatou e Peresitene Hinckley: ‘O taeao uma lava vagana ai le Aso Gafua, e fono ai le Au Peresitene Sili, pe a matou i ai i le aai. Ou te fai atu ia Peresitene [James E.] Faust e faailoa mai ana mataupu ona matou talanoaina lea ma fai i ai se faaiuga. Ona ou fai atu lea ia Peresitene [Thomas S.] Monson e faailoa mai ana mataupu ona matou talanoaina lea ma fai i ai se faaiuga. Ona ou tuuina atu lea o aitema ia ou te manao e faailoa atu ona matou talanoaina lea ma fai i ai se faaiuga. Matou te galulue faatasi. … E le mafai ona e galue toatasi i se au peresitene. O Fesoasoani—o se mea manaia tele [le i ai] o fesoasoani. La te laveai mai oe mai le faia o mea sese, la te fesoasoani ia te oe e fai mea sao’ (Teachings of Gordon B. Hinckley,95; tagai foi i le “In … Counsellors There Is Safety,” Ensign, Nov. 1990, 48–51).

“Na faamatala e se fesoasoani o Peresitene Iosefa F. Samita i se taimi le ala e soalaupule ai le Au Peresitene Sili: ‘Pe a oo mai se mataupu i luma [o le Peresitene o le Ekalesia] ina ia faamasinoina, e soalaupule ai o ia ma ona fesoasoani ma latou iloiloina ma le totoa seia oo ina latou tasi i se faaiuga’ (Anthon H. Lund, in Conference Report, June 1919, 19; ua faaopoopo le faatusilima).

“O le mamanu lena e tatau ona i ai i a tatou au peresitene.

“Ua aoaoina i tatou i faaaliga ina ia faia a tatou faaiuga i korama ma au peresitene ‘i le amiotonu atoa, i le paia, ma le maualalo o le loto, agamalu ma le tali-tiga, ma i le faatuatua, ma le amiomama, ma le poto, faautauta, onosai, amioatua, agalelei faaleuso ma le alofa mama’ (MF&F 107:30).

“Ua tuuina mai e le Alii ia i tatou le mamanu” (“Three Presiding High Priests,” Ensign po o le Liahona, Me 2008, 39; ua faaopoopo le faamamafa).

4.7

E Faaauau e Fesoasoani le Galuega a le Au Peresitene Sili Pe Afai e Gasegase le Peresitene.

Ona o gasegase o Peresitene Spencer W. Kimball ma Peresitene Marion G. Romney, o nisi taimi na saofai ai nao Peresitene Gordon B. Hinckley i le konafesi aoao.

Na faamalamalama mai ePeresitene Gordon B. Hinckley (1910–2008), le ala e faaauau ai le galuega a le Au Peresitene Sili e tusa lava pe o gasegase pe le mafai e le Peresitene o le Ekalesia ona faataunuu ona tiute:

““A gasegase le Peresitene pe ua le mafai ona ia galue atoatoa i tiute uma o lona tofi, o ona Fesoasoani e toalua faatasi o le Korama lena a le Au Peresitene Sili. O i la’ua e faia galuega o aso taitasi a le Au Peresitene. I tulaga faapitoa e ese ai, pe a na o se toatasi ua mafai ona galue pea, e mafai ona ia galue i le pule o le tofiga o le Au Peresitene e pei ona faatulaga mai i le Mataupu Faavae ma Feagaiga, vaega e 102, fuaiupu 10–11“ (“O Le Atua o loo i le Ao o Lenei Ekalesia,” Liahona, Iulai 1994, 71; ua faaopoopo le faamamafa).

O le tolu ma le afa tausaga na muamua atu, na faasoa mai ai e Peresitene Gordon B. Hinckley lona aafiaga patino i le avea ai o se fesoasoani i Peresitene e toalua o le Ekalesia, o e na faapea ona gasegase mo ni vaitaimi umi:

“I le taimi na gasegase ai Peresitene Kimball, na faaletonu ai foi le soifua maloloina o Peresitene Tanner ma na maliu ai. Sa valaauina Peresitene Romney e avea ma Fesoasoani Muamua, ae o au e Fesoasoani Lua ia Peresitene Kimball. Sa faapea ona gasegase Peresitene Romney, ma na faapea ona tuu mai ai ia te au se avega o tiutetauave na toetoe lava a lofituina. Sa matou fono soo ma ou Uso o le Toasefululua, ma e le mafai ona lava lou talisapaia o i latou mo lo latou malamalama ma mo le poto o la latou filifiliga. I mataupu ia na i ai se tulafono ua lelei ona faavaeina, sa faapea ona matou agai i luma. Peitai, e leai se tulafono fou na faasilasilaina pe na faaaogaina, ma e leai se faiga masani iloga na suia e aunoa ma le saofafai i lalo faatasi ma Peresitene Kimball ma fofola atu le mataupu i ona luma, ma maua mai lana maliega ma le faamaoniga atoatoa.

“I tulaga faapena, pe a ou alu e asi o ia, ou te alu lava ma ave se failautusi o le na tausia se faamaumauga auiliili o le talanoaga. Ou uso pele, e mafai ona ou faamautinoa atu, ou te lei fuafuaina lava e sopo loa i lou taitai, ma e lei i ai lava sou manao e alu ese mai lana taitaiga i tulafono po o aoaoga a le Ekalesia. Na ou iloa o ia o le Perofeta filifilia a le Alii i lena vaitau. E ui lava, na lagolagoina foi au, o se perofeta, tagatavaai, ma talifaaaliga, faatasi ai ma ou Uso o le Toasefululua, na ou iloa foi, sa le o le Peresitene o le Ekalesia se tasi o i matou. Na ou iloa na faafualoa e le Alii le soifua o Peresitene Kimball mo faamoemoega na silafia e le Alii, ma na i ai lou faatuatua atoa o lenei faafualoa o le soifua, sa mo se pogai atamai o Ia o le o loo i ai le atamai sili atu nai lo soo se tagata lava.

“O Novema 1985, na maliu ai Peresitene Kimball, ma na faapea ona autasi ai le lagolagoina o Peresitene Ezra Taft Benson, o le sa avea i lena taimi ma Peresitene o le Aufono a le Toasefululua, e avea ma Peresitene o le Ekalesia, ma perofeta, tagatavaai, ma talifaaaliga. Sa ia filifilia ona fesoasoani, ma ou te faamautinoa atu ia te outou, sa matou galulue faatasi i le lotogatasi ma le lelei, ma o se aafiaga sili ma matagofie le tauia.

“Ua ivasefulu-tasi nei tausaga o le soifua o Peresitene Benson ma ua le o toe i ai le malosi po o le tiotio lea sa masani ona tele ia te ia. Ma te faia ma Uso Monson, i le avea ai ma ona fesoasoani, e pei ona sa faia muamua, le tulei i luma o le galuega a le Ekalesia, ao matuai faaeteete foi ia aua nei sopo loa i le Peresitene pe amata aveesea soo se ituaiga o tulafono ua loa ona faavaeina, e aunoa ma lona silafia ma le faamaoniga atoa” (“In … Counsellors There Is Safety,” Ensign, Nov. 1990, 50).

4.8

O se Faataitaiga se Tasi o Gaoioiga i Aso Uma a le Au Peresitene Sili

O ofisa o sui o le Au Peresitene Sili o loo i le Maota o le Pulega o le Ekalesia i le Aai o Sate Leki, Iuta.

I le 1979, na faamatala auiliili ai e Peresitene N. Eldon Tanner (1898–1982), o le sa tautua o se fesoasoani i Peresitene e toafa o le Ekalesia, ia fuafuaga i aso uma a le Au Peresitene Sili i lena vaitaimi. E ui e ono suia fuafuaga atofaina i pulega taitoatasi, ma ua suia nisi o faamatalaga, ae ua tuuina mai e lana faamatalaga se malamalamaaga lelei i le tele o tiutetauave a le Au Peresitene Sili:

“O mataupu uma lava e faatatau i le pulega o le Ekalesia, e sau mai lalo o le taitaiga a le Au Peresitene Sili, ma e masani lava ona vaevae ia mataupu i ni vaega se tolu:

“Muamua, o [mataupu] na e faatautaia sao e le Au Peresitene Sili; lona lua, o mataupu faale-ekalesia na taulimaina e le Toasefululua i lalo o le taitaiga a le Au Peresitene Sili; ma lona tolu, o mataupu faaletino na taulimaina e le Au Epikopo Pulefaamalumalu, ma na atofa atu ia i latou e le Au Peresitene Sili.

“Sei ou lisiina atu nisi o mea na fitoitonu le taulimaina e le Au Peresitene Sili: konafesi a eria; potopotoga paia; paketi, aoga, talafaasolopito, ma matagaluega o tagata faigaluega; malumalu; suegatusi; o le Aufono Faamaopoopo; ma auaunaga o le uelefea. …

“… I fonotaga atofaina e masani ai, e fono ai le Au Peresitene Sili i Aso Lua, Aso Lulu, Aso Tofi, ma Aso Faraile uma i le 8 i le taeao faatasi ma se failautusi o le e faia le faamaumauga atoatoa o taualumaga uma lava. O nei talanoaga e aofia ai fesootaiga na faatuatusi atu i le Au Peresitene Sili—lea e i ai toetoe lava o mea uma mai i fesili e uiga i le tatuiina o taliga e oo i apili o faaiuga e tape igoa, mai le au peresitene o le siteki ma fautua maualuga. E i ai fesili e uiga i tulaga faatonuina o laei ma foliga vaai, tulaga o le moemalama, tausia o le Aso Sapati, faauigaga o mau, aoaoga maaleale, faamauga, faasea e faasaga i taitai i le lotoifale, ulutinoina, foaiga o itutino i saienisi po o i isi, susunuina o tino maliu, suiga o totoga, mataupu faaletulafono, ma isi mea faapena.

“O a latou faaiuga e aofia ai foi le filifiliga o au peresitene fou o malumalu, o afea ma o fea foi e tatau ona fausia ai malumalu fou, ma isi mataupu e tatau ona talanoaina pe a fono faatasi ma le Aufono a le Toasefululua ma faatasi ma le Au Epikopo Pulefaamalumalu. Latou te fuafuaina foi potopotoga paia ma konafesi a eria e faia i le lalolagi atoa.

“Taeao o le Aso Lua i le 10 i le taeao latou te fono ai ma le Komiti o Tupe Faaalu. … O le taimi lea e faailoa mai ai e ulu o matagaluega eseese mea latou te manaomia mo tupe faaalu ina ia iloiloina ma fai ai vaevaega. O faataitaiga e aofia ai talosaga mai le Matagaluega o Fale ma Fanua mo le faatauga mai o fanua ma fale e pei o fale o le siteki po o le uarota, fale o misiona, nofoaga autu mo tagata asiasi, ma isi, ma talanoaga o tau o le tausiga [o fanua ma fale]. Ma le isi, e faailoa atu ai e le Au Epikopo Pulefaamalumalu ia talosaga mo tupe faaalu e aofia ai galuega faatino o le uelefea.

“O fonotaga a le Au Peresitene Sili i Aso Lulu e faaaoga e faalogologo ai i lipoti mai ulu o matagaluega eseese ia e lipoti sao mai i le Au Peresitene Sili, e pei o matagaluega o Talafaasolopito, Tagata Faigaluega, ma Fesootaiga Lautele. O taimi atofaina mo tagata asiasi faapitoa e faapea foi ona faatulagaina mo taeao o Aso Lulu pe a mafai. …

“E tasi i le masina i Aso Lulu e fono faatasi ai le Au Peresitene Sili ma le Tuufaatasiga o le Pulega o Aoga a le Ekalesia ma le Laulau a le Au Faatonu e taulima ai mataupu uma e aafia ai iunivesite ma kolisi, inisitituti ma seminare, ma isi aoga a le Ekalesia. Ma le isi foi, i le Aso Lulu e tasi i masina taitasi, latou te fono ai ma le Aufono Faamaopoopo. … O iinei latou te soalaupule ma filifili ai i tulafono, aiaiga faavae, ma fesili a pulega e tagatagai i ai ia mautinoa o talafeagai ona faamanino ma faamaopoopo ia vaega uma o tiutetauave. A uma lea, ona latou fono faatasi lea ma le Komiti o Auaunaga o le Uelefea. …

“I taeao o Aso Tofi i le 10 i le taeao latou te auai faatasi ma le Aufono a le Toasefululua i le afeafe pito i luga o le [Malumalu o Sate Leki], lea na faapotopoto ai le Toasefululua talu mai le 8 i le taeao O totonu o le potu lenei na aoao ai e le Alii le autaitai o le Ekalesia talu ona maea le malumalu. O i nei e maua ai e se tagata se lagona faaleagaga faapitoa, ma e i ai taimi e lagona ai le faatasi mai o nisi o nei taitai maoae o e ua maliliu. O loo tautau i luga o puipui ata o Peresitene e toasefululua o le Ekalesia, ma faapea foi ma Ailama, le Peteriaka. O loo i ai foi atavali o le Faaola i le Sami o Kalilaia lea na ia valaauina ai nisi o ana aposetolo, ma isi [atavali] o loo faaalia ai lona faasatauroga ma lona afio ae [i le lagi]. O iinei e faamanatu mai ai ia i matou le toatele o taitai maoae o e na alala i totonu o lenei potu fono, ma faia ai faaiuga tetele i lalo o le taitaiga a le Alii.

“Pe a ulufale mai le Au Peresitene Sili i lenei potu i le ta o le sefulu i taeao o Aso Tofi, matou te lululima ai ma sui uma o le Toasefululua, ona sui lea i o matou ofutalaloa o le malumalu. Matou te pepese, tootutuli i le tatalo, ona auai lea i le lio tatalo i le fatafaitaulaga, a maea lea ona sui lea o o matou ofu i ofu masani.

Ina ua fesili atu Iesu ia Peteru, “Pe sili mai lou alofa ia te au i o latou nei?” (Ioane 21:15), na faaalia ai le ositaulaga e fai e le Au Aposetolo e fai ai ma sui o le Ekalesia.

“A uma ona talanoaina minute o le fonotaga talu ai, matou te iloiloina mataupu e pei o nei: faamaonia o suiga i au epikopo e pei ona fautuaina mai e peresitene o siteki—na talanoaina muamua i le fonotaga a le Toasefululua … ; suiga i faatulagaga o siteki, uarota, misiona ma malumalu i le Ekalesia atoa, e aofia ai tuaoi ma au ofisa; au ofisa ma au taitai o faalapotopotoga o ausilali; mataupu e aumai i totonu e ulu o matagaluega eseese; ma a tatou lipoti o konafesi faalesiteki ma isi gaoioiga i le aluga o le vaiaso, e pei o maliu, lauga faatonuina, ma isi lava mea. O le tino lenei e iloiloina ma faamaonia soo se suiga i pulega po o tulafono, ona avea ai lea ma tulafono aloaia a le Ekalesia. …

“O Aso Tofi muamua o masina uma lava, e fono ai le Au Peresitene Sili faatasi ma le Au Pulega Aoao uma—o sui o le Toasefululua, o Fitugafulu, ma le Au Epikopo Pulefaamalumalu. I le fonotaga lenei, e logoina ai i latou uma i soo se suiga i polokalama po o faiga faavae ma aoaoina i o latou tiute po o tiutetauave. E valaaulia e le Peresitene sui e tuuina mai a latou molimau, a uma lea, ona fai lea o o matou laei o le malumalu, taumamafa i le faamanatuga, ma fai se lio tatalo ma e auai uma sui auai. I le maea ai o le tatalo, ona tuumuli lea o sui auai uma, vagana ai le Au Peresitene Sili ma le Korama a le Toasefululua, ae o i latou e nonofo pea e sui i o latou laei masani ona faaauau lea o pisinisi masani o fonotaga o le Aso Tofi. E fai e le failautusi e faamaumauina [taualumaga] se lipoti o mea uma na tautalagia ma faia.

“… Aso Faraile i le 9 i le taeao e fono ai le Au Epikopo Pulefaamalumalu ma le Au Peresitene Sili e tuuina atu lipoti ma talanoaina mataupu e faatatau i le pulega” (The Administration of the Church,” Ensign, Nov. 1979, 45–48; ua faaopoopo le faamamafa).

4.9

O Le Faauigaga o Aoaoga Faavae O Le Aia Tatau ma le Tiutetauave lea o le Au Peresitene Sili

Peresitene Siaosi Alapati Samita (ogatotonu) ma ona fesoasoani, J. Reuben Clark Jr. (agavale) ma Tavita O. MaKei (taumatau)

O le Au Peresitene Sili o le pule faaiu lea mo le faauigaga o aoaoga faavae i le Ekalesia. Na faamalamalama mai ePeresitene Ezra Taft Benson (1899–1994):

“O le faauigaga o aoaoga faavae o le galuega lena a le Au Peresitene Sili. Ua tuuina mai e le Alii lena tiute ia i latou e ala i le faaaliga. E leai se faiaoga e i ai se aia tatau e faauiga ai aoaoga faavae mo tagata o le Ekalesia” (“The Gospel Teacher and His Message,” i le Charge to Religious Educators, 2nd ed. [1982], 51–52; ua faaopoopo le faamamafa).

Na faamalamalama mai eElder L. Tom Perry (1922–2015) o le Korama a Aposetolo e Toasefululua e faapea, e vaavaai atu foi isi Au Pulega Aoao i le Au Peresitene Sili mo le faauigaga o aoaoga faavae:

“Ua silafia lelei e le Alii le manaomia o le tausia o le mama o Ana aoaoga faavae, ma e na o le tasi lava le punavai ua faamoemoe i ai lo latou faauigaga. Ioe, ua apoapoaiina i tatou uma ina ia suesue ma ia tele se malamalama e mafai ona tatou maua i lenei olaga. Ua uunaia i tatou ia talanoa ma fefaaaliai manatu ma le tasi ma le isi e faalautele ai o tatou malamalama. Ae peitai, ua na o le tasi lava le punavai a le Alii mo le folafolaina mai o Ana aoaoga faavae autu. E oo lava i le Au Pulega Aoao o le Ekalesia, ua faatonuina i matou, ‘Ina ia faapea ona faatumauina le laugatasia o le faauigaga o aoaoga faavae ma tulafono, ua talosagaina ai outou e tapa atu i le Ofisa o le Au Peresitene Sili mo se manatu [e uiga] i soo se fesili faatatau i aoaoga faavae po o tulafono e le o manino ona faamatalaina i tusitusiga paia po o totonu o le General Handbook of Instructions.’

“O le auala lenei, e aveese ai le feteenai, le mautonu ma le eseese o manatu” (“Heed the Prophet’s Voice,” Ensign, Nov. 1994, 19).

Na tautino maiPeresitene James E. Faust (1920–2007) o le Au Peresitene Sili:

“O ai e tatau ona folafola maia aoaoga faavae o le Ekalesia? Ua uma lelei ona faavaeina e ala i faaaliga ma faiga masani, o le Peresitene o loo i ai nei o le Ekalesia ma ona fesoasoani, ua i ai ki e folafola mai ai aoaoga faavae o le Ekalesia. O le faaeeina aloaia mai o lenei pule e mai i faaaliga. O le Au Peresitene ua faavaeina ‘o se korama … e talia faaaliga mo le ekalesia atoa’ (MF&F 124:126)” (“The Abundant Life,” Ensign, Nov. 1985, 9).

4.10

O Mea e Saunoa Ai le Au Peresitene Sili o Tusitusiga Paia Ia

O Peresitene Iosefa Filitia Samita (ogatotonu) ma ona fesoasoani, o N. Eldon Tannerr (agavale) ma Harold B. Lee (taumatau)

Na aoao maiPeresitene Marion G. Romney (1897–1988) o le Au Peresitene Sili e faapea, o le Au Peresitene Sili e fofoga maia upu e fetalaia mai e Iesu Keriso pe ana i ai tino o Ia iinei:

“O aso nei, ua faaali mai ai e le Alii lona finagalo i tagata uma o le lalolagi, ae maise lava i tagata o le Ekalesia, e uiga i faafitauli i o tatou aso nei, e ala mai i perofeta soifua, ma e faaao i le Au Peresitene Sili. O a latou saunoaga o se au peresitene, o mea ia e fetalai mai ai le Alii pe ana i ai tino o ia iinei. O le faavae papa lea o le Faamamona. … Ina ua fesiligia le Perofeta o Iosefa Samita po o le a le eseesega o le Ekalesia o le Au Paia o Aso e Gata Ai ma isi aulotu o le lalolagi, sa ia saunoa, ‘Ua ia i matou le Agaga Paia,’ o le uiga o lana saunoaga, o le mana o le Agaga Paia, e faaali mai ai le finagalo o lo tatou Tama i mafaufau o taitai o lenei Ekalesia. O lea ou te toe fai atu ai, o a latou saunoaga o se au peresitene, o mea ia e fetalai mai ai le Alii pe ana i ai tino o ia iinei, ma o tusitusiga paia ia. E tatau ona suesueina, malamalama i ai, ma mulimuli i ai, e pei lava o faaaliga i le Mataupu Faavae ma Feagaiga ma isi tusitusiga paia. O i latou o e mulimuli i lenei ala, o le a le faauigaina upu latou te fai mai ai e faapea, na musuia ona o faigaupufai faaituau po o le manatu faapito; pe latou te fai mai foi, e lei logoina le usoga e uiga i tulaga o i latou na aafia i a latou fautuaga; po o le, e le taliaina a latou fautuaga ona e le o faatomuaina i le upusii e faapea, ‘Ua faapea ona fetalai mai le Alii.’

“O i latou … o e, e ala atu i le tatalo malosi ma le suesue faatauanau, latou te iloa mo i latou lava mea ua saunoa ai nei perofeta soifua, ma galulue loa i ai, o le a asiasia e le agaga o le Alii, ma iloa e ala i le agaga o faaaliga, ua latou saunoa mai i le mafaufau ma le finagalo o le Tama” (i le Conference Report, Apr. 1945, 90; ua faaopoopo le faamamafa).

4.11

E Tatau i Tagata o le Ekalesia ona Lagolago le Au Peresitene Sili

O loo aoao mai i tusitusiga paia e faapea, o “le talitonuga, faatuatua, ma tatalo a le ekalesia” e sapasapaia ai le Au Peresitene Sili (MF&F 107:22). Ua i ai sa tatou tiute paia e lagolago le Au Peresitene Sili o le Ekalesia.

A o auauna atu o se fesoasoani ia Peresitene Iosefa Filitia Samita, sa saunoa Peresitene Harold B. Lee (1899–1973) i le ala e lagolago ai e fesoasoani i le Au Peresitene Sili ma tagata uma o le Ekalesia le Peresitene o le Ekalesai:

“A o ou mafaufau i le matafaioi a Peresitene Tanner ma au lava ia o ni fesoasoani [o Peresitene Iosefa Filitia Samita], ou te mafaufau i se tulaga i le olaga o Mose, ao faapei uma lava fili o le ekalesia i na aso o nei foi aso. Sa latou taufaamatau e faatoilalo ma toso i lalo ma taofia le galuega a le ekalesia. A o nofo Mose i luga o se mauga ma sii i luga lona tootoo o lana pule, po o ki o lona perisitua, sa manumalo Isaraelu i o latou fili; ae ao faagasolo pea le aso, sa oo ina mamafa ona lima ma amata ona tautau i ona autafa. O lea sa sii ai i luga e [Arona ma Huro] ona lima ina ia le vaivai ma le pau ai i lalo le tootoo. E lagolagoina o ia ina ia le mafai ona manumalo fili o le ekalesia i le au paia a le Atua Silisili Ese. (Tagai i le Esoto 17:8–12.)

“Ou te manatu o le tiute lena e tatau ona ma faataunuuina ma Peresitene Tanner. E mafai ona faasolosolo vaivai aao o Peresitene Samita. Atonu e iu ina faatautau i nisi o taimi ona o le mamafa o ona tiutetauave; ae a maua uuina ona aao, ma ao ma taitai i lalo o lana taitaiga, i ona tafatafa, o le a le manumalo faitotoa o seoli e faasaga ia te oe ma faasaga ia Isaraelu. O lou saogalemu ma o tatou saogalemu e faalagolago lea pe tatou te mulimuli pe leai ia i latou o e ua tofia e le Alii e pulefaamalumalu i lana ekalesia. …

“Ia taulai atu la tatou vaai i le Peresitene o le Ekalesia ma sapasapai ona aao e pei o le a faaauau pea ona ma faia ma Peresitene Tanner” (i le Conference Report, Oct. 1970, 153; po o le Improvement Era, Dec. 1970, 126–27).

Na faamalamalama mai ePeresitene Siaosi Alapati Samita (1870–1951), a o tautua ai o se tasi o le Korama a Aposetolo e Toasefululua, lo tatou tiute ua i ai a o tatou lagolagoina le Au Peresitene Sili:

“Ua ou olioli i le aso ona o le faatagaina e feiloai ma outou i lenei konafesi aoao, ma i le faatagaina e sii lou lima e lagolago ai i latou, o e ua valaauina e lo tatou Tama faalelagi e pulefaamalumalu ia i tatou. Atonu o se puna o le malosiaga i le Peresitene o lenei Ekalesia, le vaavaai atu i foliga o le faitau afe o alii ma tamaitai faamaoni, ma matauina i latou o sii o latou lima e osifeagaiga ai ma lo tatou Tama oi le lagi, ma lagolagoina o ia i le tofi lea ua valaauina i ai o ia, o le peresitene o lenei Ekalesia maoae. O le tautinoga tatou te faia pe a sii o tatou lima i lalo o tulaga faapena, o se tautinoga sili ona paia. E le faapea o le a tatou o atu gugu ai i o tatou ala ma le naunau o le a taitaiina e le perofeta a le Alii lenei galuega, ae o lona uiga,—pe afai ou te malamalama i le tiute na ou amatalia ina ua sii lou lima—o le a tatou lagolagoina o ia; o le a tatou tatalo mo ia; o le a tatou puipuia lona igoa lelei, ma o le a tatou taumafai e faatino ana faatonuga e pei ona taitaiina ai o ia e le Alii e tuuina mai ia i tatou a o i ai o ia i lena tulaga. O lea, o se mana o le malosiaga lea na siiae i le aso i lo tatou peresitene peleina … ma ona fesoasoani, a o tatou palotaina i latou i lenei potopotoga paia” (i le Conference Report, June 1919, 40).

E pei o nei tumutumuga mauga o loo i luga ae o Willard, Iuta, o le Au Peresitene Sili ua “pei o se faavae maa malosi.”

Na faatusaina ePeresitene Boyd K. Packer (1924–2015) o le Korama a Aposetolo e Toasefululua ia sui o le Au Peresitene Sili i ni tumutumuga mauga mataina ma uunaia tagata o le Ekalesia e lagolago le Au Peresitene Sili:

“I matu o le [Aai o Sate Leki] i le Wasatch Range o lo tutu ai ni tumutumu mauga se tolu. E faamatala e le fatusolo i latou e pei o ni faavae maa malolosi. O le tumutumuga ogatotonu, e pito i maualuga o le tolu, o le a tau atu e le faafanua ia te oe, o Williard Peak [Tumutumu o Uiliata]. Ae na faaigoaina e le au paionia ‘O Le Au Peresitene.’ Afai e te alu atu i Willard, autilo i sasae, ma luga, i le pito lava i luga, o iina o loo tu ai ‘Le Au Peresitene.’

“Faafetai i le Atua mo le au peresitene. E pei lava foi o na [tumutumu mauga e tolu], e tutu ai iina e aunoa ma se mea e tasi i o latou luga ae ua na o le lagi lava. Latou te manaomia la tatou palota lagolago. O nisi taimi e lagona ai le tuua toatasi i na valaauga fita o le tulaga taitai—aua o lo latou valaauga e le o le faamalieina o le tagata a ia faamalieina ai le Alii. Ia faamanuia e le Atua nei tamalii maoae ma lelei e toatolu” (“E Molimau Atu Ai le Agaga,” Ensign, Iune 1971, 87).

4.12

E Tatau i Tagata o le Ekalesia ona Vaai atu i le Au Peresitene Sili mo Faatonuga

O Peresitene Thomas S. Monson ma isi sui o le Au Peresitene Sili ma le Korama a Aposetolo e Toasefululua, ua tuua le tulaga i le faaiuga o se sauniga o le konafesi aoao

Na aoao mai le Perofeta o Iosefa Samita (1805–44) e faapea, “o Peresitene po o le Au Peresitene e vaaia le Ekalesia; ma o faaaliga o le mafaufau ma le finagalo o le Atua i le Ekalesia, e ala mai i le Au Peresitene. O le faatulagaga lea o le lagi, ma le mana ma faamanuiaga o lenei Perisitua” (i le History of the Church, 2:477; ua faaopoopo le faamamafa). Na ia apoapoaiina foi tagata o le Ekalesia ina ia “outou faamasani i na tamalii. … Vaai atu i le Au Peresitene ma maua mai ai faatonuga” (i le History of the Church, 3:391).

Ua faigofie ona maua e tagata o le Ekalesia Aoaoga a le Au Peresitene Sili O mekasini tai masina a le Ekalseia ua i ai savali masani mai sui o le Au Peresitene Sili. E faapena foi, o savali mai isi Au Pulega Aoao o le Ekalesia, e mafai ona maua e ala i le uepisaite a le Ekalesia o le LDS.org.

4.13

O I Latou O E Mulimuli i le Au Peresitene Sili E Le Mafai Ona Se Ese ma O Le A Maua le Mamalu e Faavavau

Na tuuina mai ePeresitene Iosefa Filitia Samita (1876–1972) le folafolaga lenei i tagata taitoatasi o e mulimuli i le fautuaga a le Au Peresitene Sili:

“Ou te molimau atu afai tatou te vaai atu i le Au Peresitene Sili ma mulimuli i a latou timaiga ma taitaiga, e leai se mana i le lalolagi e mafai ona suia lo tatou ala o se ekalesia, ma o le a tatou maua taitoatasi le filemu i lenei olaga ma fai ma suli o le mamalu e faavavau i le lalolagi a sau” (“Eternal Keys and the Right to Preside,” Ensign, July 1972, 88).

Na taua eElder Mark E. Petersen (1900–84) o le Korama a Aposetolo e Toasefululua, ina ua uma ona ia sii mai le folafolaga lenei a Peresitene Iosefa Filitia Samita, e faapea “na saunoa foi isi peresitene na muamua atu ia te ia, afai tatou te mulimuli i le taitaiga a le Au Peresitene Sili, e le mafai lava ona tatou se ese pe liliuese foi mai le upumoni” (The Salt and the Savor [1976], 29).

Manatu e Mafaufau Loloto i ai

O a faamanuiaga o le faatulagaina o le Ekalesia faatasi ma se Au Peresitene Sili nai lo na o se Peresitene e tautua na o ia?
O le a le uiga o le talia le Au Peresitene Sili (tagai i le MF&F 112:20)? I le avea ai ma se tagata o le Ekalseia, o le a se mea e mafai ona e faia e sapasapai lelei ai le Au Peresitene Sili e ala i le “talitonu, faatuatua ma le tatalo” (MF&F 107:22)?

Galuega Fautuaina

Lisi tiutetauave o le Au Peresitene Sili e pei ona aoaoina i tusitusiga paia ma faamatalaga o loo maua i le mataupu lenei.
Lisi faamanuiaga ua folafolaina atu ia i latou o e mulimuli i le Au Peresitene Sili. Tusi se fuafuaga o le a fesoasoani e te suesue soo ai i saunoaga a le Au Peresitene Sili.
Mai le lomiga aupito lata mai o le konafesi aoao o le Ensign po o le Liahona, faitau saunoaga na tuuina mai e sui o le Au Peresitene Sili. Faailoga mea na latou saunoa mai ai e faapitoa ona faatatau i lou olaga.