O Le Faatomuaga
I le Potu Tele a Perofeta, o loo i le Maota Autu o Konafesi i le Aai o Sate Leki, Iuta, ua avea ai faatusa vane o perofeta o lenei tisipenisione ma faamanatu mamalu e faapea, o loo maua faaaliga faifaipea.
Na faamalamalama mai e Peresitene James E. Faust (1920–2007), o le Au Peresitene Sili, le matafaioi a perofeta ma le manaomia o faaaliga o loo latou maua:
“Sa i ai ma o loo i ai pea i perofeta, tagatavaai, ma talifaaaliga le tiutetauave ma le faamanuiaga o le mauaina ma le folafolaina atu o le afioga a le Atua mo le lalolagi. …
“… O perofeta vavalo nei o e ua loa o faafofoga atu i ‘savali mai le lagi,’ ma se tiutetauave ia momoli atu le afioga a le Alii i isi. …
“E manaomia i taimi uma e lenei Ekalesia le taitaiga a lona faaao, le Alii ma le Faaola, o Iesu Keriso. Na lelei ona aoao mai e Peresitene George Q. Cannon lenei mea, [a o tautua ai] i le Au Peresitene Sili: ‘Ua ia i tatou le Tusi Paia, le Tusi a Mamona, ma le Tusi o Mataupu Faavae ma Feagaiga; peitai o nei tusi uma, a aunoa ma perofeta soifua ma se auvai e tafe pea o faaaliga mai le Alii, o le a le mafai ona taitai atu ai se tagata i le Malo Selesitila o le Atua’ [Gospel Truth: Discourses and Writings of President George Q. Cannon, 2 vols., sel. Jerreld L. Newquist (1974), 1:323]. …
“Sa manaomia faaaliga e faatu ai le Ekalesia lenei. O faaaliga na aumaia ai [le Ekalesia] mai ona amataga faatauvaa seia oo mai i lona tulaga ua i ai nei. Ua oo mai faaaliga e pei o se vai ola o loo tafe pea. O faaaliga faifaipea o le a taitaia atu i luma i aso amuli. Ae, e pei ona tau mai ia i tatou e Peresitene [J. Reuben] Clark, tatou te le manaomia ni perofeta se toatele po o ni perofeta eseese. Tatou te manaomia ni tagata se toatatele e i ai ‘se taliga e faalogo’ (i le Conference Report, Oke. 1948, 82)” (James E. Faust, “Continuing Revelation,” Ensign, Aok. 1996, 2, 4, 6–7).
O aso nei, e pei foi o le vaitaimi o le vaeluaga o taimi, o le faavae o le Ekalesia o aposetolo ma perofeta (tagai i le Efeso 2:20) ma faaaliga latou te maua (tagai i le Amosa 3:7; Mataio 16:16–18). E faaali mai e le Alii Lona finagalo e ala i Ana auauna o perofeta ma ua folafola mai, “E lē mavae atu lava laʼu upu, ae o le a faataunuuina uma lava, pe i loʼu lava leo po o i le leo o aʼu auauna, ua tutusa lava” (MF&F 1:38).
O Le Faamoemoega o Lenei Tusi Lesona
O le a faamalosia lau molimau a o e suesue i tusitusiga paia ma upu a perofeta soifua.
O le faamoemoega o le Tusi Lesona a le Tagata Aoga mo Aoaoga a Perofeta Soifua, o le fesoasoani atu lea e faamalosia lau molimau e uiga i perofeta soifua ma a latou aoaoga. O loo talanoaina ai lo tatou manaomia o perofeta soifua, le matafaioi a le Peresitene o le Ekalesia, o le faatulagaga faalelagi o le faasologa i le Au Peresitene, o le Korama a le Au Peresitene Sili ma le Korama a le Au Aposetolo e Toasefululua, ma le taua o konafesi aoao.
Na aoao mai Peresitene Harold B. Lee (1899–1973):
“I le avea ai o i tatou o ni Au Paia o Aso e Gata Ai, e le lava le na o le tatou mulimuli i o tatou taitai ma talia a latou fautuaga, ae ua ia i tatou se matafaioi sili atu, ia maua mo i tatou lava se molimau e le maluelue e uiga i le tofia faalelagi o nei tamalii ma le molimau e faapea, o mea ua latou ta’uina mai ia te i tatou o le finagalo lava lea o lo tatou Tama Faalelagi” (Harold B. Lee, i le Conference Report, Oke. 1950, 130).
Ua folafola mai ia i tatou taitoatasi se molimau e uiga i le tofia faalelagi o perofeta soifua, a o tatou suesue i fautuaga a le Usoga ma lotomau e lagolago i latou e ala i lo tatou usiusitai. O le a fesoasoani lenei tusi lesona ia te oe i lau suesuega o perofeta soifua.
Auala o Loo Faatulaga Ai le Tusi Lesona Lenei
O mataupu taitasi o le tusi lesona lenei a le tagata aoga ua i ai ni vaega se fa: “O Le Faatomuaga,” “Faamatalaga,” “Manatu e Mafaufau Loloto I Ai,” ma “Galuega Fautuaina.”
O Le Faatomuaga
O mataupu taitasi e amata i se faatomuaga puupuu. O le a fesoasoani lenei mea e te taulai atu ai i le manatu autu o le mataupu.
Faamatalaga
O mau ma upu a perofeta, aposetolo, ma isi Pulega Aoao o loo i le vaega o “Faamatalaga” o loo faamatala ma faamanino atu ai aoaoga faavae ma mataupu faavae e o faatasi ma le manatu autu o le mataupu. O le faitau ma le totoa o le faamatalaga o le a fesoasoani e te malamalama ai i le manaomia ma le matafaioi a perofeta soifua i se lalolagi fesuisuiai.
Manatu e Mafaufau Loloto I Ai
O le vaega “Manatu e Mafaufau Loloto I Ai” o le a fesoasoani e te mafaufau loloto ai i mea ua e aoaoina.
Na tautino mai e Peresitene Russell M. Nelson o le Korama a Aposetolo e Toasefululua e faapea, o le mafaufau loloto e aumaia ai taunuuga taua:
“A o e mafaufau loloto ma tatalo e uiga i se mataupu faavae faaleaoaoga faavae, o le a talanoa atu le Agaga Paia i lou mafaufau ma lou loto. … O le a oo mai malamalamaaga fou ma o le a tuu ifo i lou loto mataupu faavae e alagatatau i lou tulaga” (Russell M. Nelson, “Living by Scriptural Guidance,” Ensign, Nov. 2000, 18).
Galuega Fautuaina
I le faaiuga o mataupu taitasi o loo i ai galuega e fautuaina ai le faaaogaina e le tagata. Faamolemole ia manatua, o nei galuega o ni fautuaga ma e mafai ona fetuunai e tusa ai ma ou lava manaoga ma taitaiga mai le Agaga Paia. Afai ua e lesitala i le Aoaoga a Perofeta Soifua i kosi a le inisitituti (Religion 333), e ono faaaofia e lou faiaoga nisi o nei galuega i lau kosi. O le faaalu o le taimi e fai ai nei galuega, o le a tuu atu ai ia te oe ni avanoa faaopoopo ia aoaoina ai e le Agaga Paia.
Faaaliga: Ina ia sili atu le aoga o le faaaogaina o vaega “Manatu e Mafaufau Loloto I Ai” ma le “Galuega Fautuaina” atonu e te manao e faaaoga se apitalaaga mo suesuega po o se api e faamaumau ai fesili, mafaufauga, sini ma uunaiga mai lau suesuega.
Na uunaia i tatou e Elder Richard G. Scott (1928–2015) o le Korama a Aposetolo e Toasefululua, e tusi i lalo uunaiga mai le Agaga:
“E auala atu i le faagasologa faifai soo o le lagonaina o uunaiga, tusitusia, ma le usitaia [o na uunaiga] o le a aoao ai se tagata e faalagolago tele atu i le taitaiga a le Agaga nai lo o fesootaiga e ala mai i sane e lima” (Richard G. Scott, “Fesoasoani i Isi Ia Taitaia Faaleagaga” [Church Educational System symposium on the Doctrine and Covenants and Church History, Aug. 11, 1998], 3).
Faamatalaga mo i Latou e i ai Manaoga Faapitoa
Afai e faafaigata ona e faaaogaina lenei tusi lesona ona o se manaoga faapitoa, faamolemole faafesootai lou faiaoga mo ni punaoa faaopoopo.