Mataupu 5

O Le Korama a Aposetolo e Toasefululua

O Le Faatomuaga

Na saunoa Peresitene Boyd K. Packer (1924–2015) o le Korama a Aposetolo e Toasefululua e uiga i ona uso o le korama:

“O le Toasefululua o loo i ai nei, o ni tagata masani lava. E le o i latou, e pei foi o le uluai Toasefululua, o ni tagata iloga, ae a tuufaatasi o le Toasefululua e mamana.

“Matou te o mai mai ni galuega eseese. O i matou o saienitisi, loia, faiaoga.

“O Elder Russell M. Nelson o se fomai tipitipi o le fatu na faailoaina mai ni faatinoga fou. Sa ia faataunuuina le faitau afe o taotoga. …

“O nisi o i lenei Korama o ni alii sa i ai i le militeli—o se aliivaa, malini, pailate.

“Sa latou umia ni tulaga eseese i le Ekalesia: faiaoga o aiga, faiaoga, faifeautalai, peresitene o korama, epikopo, peresitene o siteki, peresitene o misiona, ma le mea e sili ona taua, o tane ma tama.

“O i latou uma o tagata aoga ma faiaoga o le talalelei a Iesu Keriso. “O i latou uma o tagata aoga ma faiaoga o le talalelei a Iesu Keriso. O le mea e soofaatasi ai i matou o lo matou alolofa lea i le Faaola ma fanau a Lona Tama ma la matou molimau e faapea, o loo tu o Ia o le ao o le Ekalesia.

“E toetoe lava o le Toasefululua uma e o mai mai ni amataga faatauvaa, e pei lava ona sa i ai ao i ai o Ia iinei. Ua fusimauina faatasi le Toasefululua o loo soifua i le galuega o le talalelei a Iesu Keriso. Ina ua oo mai le valaaulia, na lafoai e le tagata lana upega e pei ona ta’ua, o se faatusa i ai, ma mulimuli atu i le Alii.

“E manatuaina lava Peresitene Kimball i lana saunoaga, E pei lava lo’u olaga o o’u seevae—ia uma lava le aoga i le galuega.’ O lena saunoaga ua faatatau lava i sui uma o le Toasefululua. E uma foi o matou aoga i le galuega a le Alii ma matou te faia ma le loto i ai” (“O Le Toasefululua,” Ensign po o le Liahona, Me 2008, 86; tagai foi i le Aoaoga a Peresitene o le Ekalesia: Spencer W. Kimball [2006],xxxvi).

Ao e suesue i le mataupu lenei, saili e faamalosia lau lava molimau e uiga i Aposetolo e ala i le aoao e uiga i o latou matafaioi ma tiutetauave. Latou te taitaia le Ekalesia i le pule o ki o le perisitua paia, lea e faatagaina ai i latou e ave atu le talalelei i le lalolagi ma ia avea ma molimau faapitoa mo Iesu Keriso.

Faamatalaga

5.1

O Aposetolo O Se Vaega o le Faavae o le Ekalesia Moni a le Alii

Na aoao mai le Aposetolo o Paulo e faapea, o le Au Paia faamaoni o “le aiga foi o le Atua; o loo ua atiina ae i luga o le faavae o le au aposetolo atoa ma le au perofeta, o le maa tulimanu o Iesu Keriso lava lea” (Efeso 2:19–20; ua faaopoopo le faamamafa).

I se folafolaga i le aso 6 Aperila, 1980, na folafola mai ai e le Au Peresitene Sili ma le Korama a Aposetolo e Toasefululua e faapea:

“Matou te faamaonia ma le faamaoni e faapea, O Le Ekalesia a Iesu Keriso o le Au Paia o Aso e Gata Ai, e moni lava o se toefuataiga o le Ekalesia na faatuina e le Alo o le Atua, a o i ai i le olaga nei sa ia faatulagaina ai lana galuega i luga o le fogaeleele; o loo tauavea lona suafa paia, o le suafa lava o Iesu Keriso; [ma] o loo ua atiina ae i luga o se faavae o Aposetolo ma perofeta, ae o ia o le maa tulimanu autu” (“Proclamation,” Ensign, Me 1980, 52).

5.2

E Silafia ma Tuuina Mai e Aposetolo le Molimau Faapitoa O Iesu o le Keriso

O Le Korama a Aposetolo e Toasefululua, 1979

Na faasoa mai ePeresitene Harold B. Lee (1899–1973) se aafiaga na i ai a o fesoasoani atu i ni faifeautalai se toalua ia malamalama i le moni o le molimau a se Aposetolo e uiga ia Iesu Keriso:

“O ni tausaga ua mavae na o mai ai ni faifeautalai se toalua ia te au ma se mea, ia te i laua, na pei o se fesili faigata tele. Na amuamu ia i laua se faafeagaiga talavou Metotisi ina ua la fai atu, sa manaomia aposetolo i aso nei ina ia mafai ona i ai le ekalesia moni i luga o le fogaeleele. Sa la fai mai na faapea mai le faafeagaiga, ‘E te lua iloa, ina ua faatasi le au aposetolo e filifili se tasi e faatumuina le avanoa na i ai ona o le maliu o Iuta, sa latou faapea mai, o lea tagata e tatau ona o faatasi ma i latou ma sa molimau i mea uma e faatatau i le misiona ma le toetu mai o le Alii? E faapefea la ona oulua fai mai o loo i ai a outou aposetolo, pe afai o tulaga manaomia na e avea ai ma se aposetolo?’

“Ma sa faapea mai nei alii talavou, ‘O le a la se ma tali i ai?’

“Sa ou fai atu ia i laua, ‘Toe foi ma fai atu i le lua uo faafeagai ni fesili se lua. Muamua, na faapefea ona maua e le Aposetolo o Paulo mea na manaomia na valaauina ai e avea o se aposetolo? Na te lei iloa le alii, sa lei masani i ai Sa lei feoai faatasi i latou ma le au aposetolo. Sa lei avea o ia o se molimau i le galuega po o le toetu mai o le Alii. Na faapefea ona maua lana molimau na talafeagai e avea ai ma se aposetolo? Ma le fesili lona lua e fai atu ia te ia o le, E faapefea ona ia iloa, e lei maua foi e i latou o e ua avea ma aposetolo i aso nei lena molimau?’

“Ou te molimau atu ia te outou, e mafai, ma ua iloa e i latou o loo umia le valaauga faaaposetolo le moni o le misiona a le Alii” (Stand Ye in Holy Places [1974], 64–65).

Ua iloa ma le mautinoa e Aposetolo e ala i faaaliga patino, o Iesu o le Keriso ma o loo soifua o Ia o se tagata toetu. Ua faamalamalama mai i tusitusiga paia e faapea, “ua molitino atu e le au aposetolo ma le mana tele i le toetu mai o le Alii o Iesu” (Galuega 4:33). Ua faamalamalama mai ePeresitene Iosefa F. Samita (1838–1918) le natura paia o lo latou valaauga:

“O le maua o se molimau ia Iesu, o le mauaina lea o se malamalama e ala mai i le Agaga Paia e uiga i le paia o le misiona a Iesu Keriso. E le faatagaina ona latou faapea mai, ua ou talitonu ona; ua ou taliaina ona ua ou talitonu i ai. Faitau i le faaaliga, ua tau mai e le Alii ia i tatou, e tatau ona latou iloa, e tatau ona latou maua le malamalama mo i latou lava. E tatau ona i ai ia i latou e pei na latou vaai i ai i o latou lava mata, ma faalogo i ai i o latou lava taliga ma ua latou iloa le moni. O le latou misiona lena, ia molimau atu e uiga ia Iesu Keriso ma Lona faasatauroina ma le toetu mai le oti, ma ua laei nei i le mana silisili ese i le itu taumatau o le Atua, o le Faaola o le lalolagi. O le latou misiona ma lo latou tiute lena, ma o le aoaoga faavae ma le upumoni lena e faapea, o le latou tiute o le talai atu i le lalolagi ma ia mautinoa ua talaiina atu i le lalolagi” (i le Conference Report, Ape. 1916, 6).

Ua silafia e Aposetolo o Iesu o le Keriso.

I le Mataupu Faavae ma Feagaiga 107:23 tatou te faitau ai, “O fautua femalagaai e toasefululua ua valaaulia e avea ma Aposetolo e Toasefululua, po o molimau faapitoa o le suafa o Keriso i le lalolagi atoa.” Na saunoaPeresitene Boyd K. Packer (1924–2015) o le Korama a Aposetolo e Toasefululua, e uiga i le natura paia o se molimau faaaposetolo e uiga ia Iesu Keriso:

“Sa i ai ni taimi i le tausaga ua tea na tuuina mai ai se fesili ia te au. E masani lava ona oo mai o se fesili fia iloa, e toetoe lava o se fesili e leai se aoga, e faatatau i tulaga e agavaa ai e avea o se molimau mo Keriso. O le fesili latou te fesili mai ai o le, ‘Na e vaai ia te Ia?’

“O se fesili lena ou te lei fesili lava i se isi e uiga i ai. Ou te lei fai atua lena fesili i ou uso i le Korama, sa ou manatu, o le a matuai paia ma patino naua o lea, e tatau ai i se tagata ona maua ni musumusuga faapitoa, o le mea moni, o se faatagaga, e fai atu ai.

“E i ai nisi o mea e paia naua mo le talanoaina. …

“E i ai i latou o e faalogologo i molimau e tuuina mai i le Lotu e i latou e i tulaga maualuluga ma tagata o le uarota ma paranesi, e tutusa faaupuga latou te faaaogaina uma—‘Ua ou iloa o loo soifua le Atua; Ua ou iloa o Iesu o le Keriso,’ ae oo ina fesiligia, ‘Pe aisea e le mafai ai ona fai mai i ni upu e manino atu? Aisea e le faamanino ma faamalamalama atili mai ai? Pe le mafai ona talanoa atili mai i ai le au aposetolo?’

“E faapefea ona avea e pei o le aafiaga paia i le malumalu ma a tatou molimau patino. E paia, ma i taimi e masani ona tatou faaupuina ai, tatou te faia i le faiga lava e tasi—e tutusa lava upu e faaaoga e i [tatou] uma. E tutusa lava fuaitau e folafola mai ai e aposetolo ma tamaiti laiti i le Peraimeri po o le Aoga Sa. ‘Ou te iloa o loo soifua le Atua ma ou te iloa o Iesu o le Keriso.’ …

“Na ou fai atu, sa i ai se fesili e le mafai ona manatu mama i ai pe taliina e aunoa ma se uunaiga a le Agaga. Ou te lei fesili atu i isi i lena fesili, ae ua ou faalogo o latou taliina—ae le o taimi na fesiligia ai. Na latou taliina i lalo o uunaiga a le Agaga, i faamoemoega paia, pe a ‘ua molimau ai le Agaga.’ (MF&F 1:39.)

“Na ou faalogo o tautino mai e se tasi o ou uso: ‘Ua ou iloa mai aafiaga ua paia naua mo le faamatalaina atu, o Iesu o le Keriso.’

“Na ou faalogo o molimau mai le isi: ‘Ua ou iloa o loo soifua le Atua; ua ou iloa o loo soifua le Alii. Ma e sili atu i lo o lena, Ua ou iloa le Alii.

“Sa le o a latou upu na i ai le uiga po o le mana. O le Agaga. ‘… ona pe a tautala se tagata e ala i le mana o le Agaga Paia, e molioo e le mana o le Agaga Paia i loto o le fanauga a tagata.’ (2 Ni. 33:1.)

“Ou te tautala ma le lotomaualalo i lenei mataupu, ma ou te lagona i taimi uma lo’u faatauvaa ia i latou uma o e ua valaauina i lenei tofi paia. …

“O lenei, ua tatou tau fai mafaufau faatasi lava pe aisea ua tatau ai ona valaauina se tasi e pei o au nei i le tofiga paia o le aposetolo. O loo i ai le tele o tulaga e agavaa ai e le o mafai ona ou maua. O loo ou matuai mafaufau lava ina ia auauna atu e tusa ma le mea o loo manaomia. E pei lava ona sa ou mafaufau i ai, sa na o le tasi lava le mea na ou iloa, o le pogai lea, ona o loo ia te au lena molimau.

“Ou te tau atu ia te outou ua ou iloa o Iesu o le Keriso. Ua ou iloa o loo soifua o Ia. Sa soifua o Ia i le vaeluaga o taimi. Sa Ia aoao mai Lana talalelei, sa faaosoosoina, ma sa faasatauroina. Sa toetu o Ia i le aso lona tolu. O ia o le faapolopolo o le toetutu. Ua ia te Ia se tino o aano ma ivi. Ou te molimau atu ai e tusa ma lenei tulaga. O au o se molimau ia te ia” (“The Spirit Beareth Record,” Ensign, June 1971, 87–88).

Na faasoa mai ePeresitene Howard W. Hunter 1907–95) lana molimau o se aposetolo:

“I le avea ai o se Aposetolo faauuina ma se molimau faapitoa a Keriso, ou te tuuina atu la’u molimau maua’i o Iesu Keriso e moni lava o le Alo o le Atua. O Ia o le Mesia na molimau ai perofeta o le Feagaiga Tuai. O Ia o le Faamoemoega o Isaraelu, o le na tatalo ai le fanau a Aperaamo, Isaako, ma Iakopo mo lona afio mai i seneturi e tele o tapuaiga ua faamatalaina.

“O Iesu o le Alo Pele o le na lolo atu i le finagalo o lona Tama, e ala i le papatisoina e Ioane i le vaitafe o Ioritana. Sa faaosoosoina o ia e le tiapolo i le vao, ae sa lei gauai atu i faaosoosoga. Sa Ia talai atu le talalelei, o le mana lava lea o le Atua e ola ai, ma poloaiina tagata uma i nofoaga uma e salamo ma ia papatisoina. Na Ia faamagaloina agasala, e fetalai o se tasi ua i ai le pule, ma sa ia faaalia lona mana e fai ai, e ala i le faamaloloina o le pipili ma le faalepa, ma e ala i le faapupulaina o mata o e tauaso ma faafaalogo taliga o e tutuli. Na Ia suia le vai i le uaina, faatoafilemu le sousou o vai i Kalilaia, ma savali i luga o lena lava vai e pei o se eleele malo. Sa Ia faafememeaiina taitai amioleaga o e na sailia lona ola ma aumai le filemu i loto atuatuvale.

“Ma le mea mulimuli, sa mafatia o Ia i le Faatoaga o Ketesemane, ma maliu i luga o le satauro, i le tuuina atu o lona soifua e leai se agasala, o se togiola mo agaga taitasi e ulufale mai i le olaga faitino. Sa Ia toetu moni mai i le oti i le aso tolu, ma avea ai ma uluai fua o le toetu ma faatoilaloina ai le oti.

“Na faaauau e le Alii toetu lana galuega o le faaolataga e ala i le faaali mai, i lea taimi ma lea taimi, i tamalii faitino ua filifilia e le Atua e avea ma ana molimau, ma e ala i le faaali mai o lona finagalo e ala i le Agaga Paia.

“E ala i le mana o le Agaga Paia ou te tuuina atu ai la’u molimau. Ou te iloa le moni o Keriso e pei lava na vaai i ai o’u mata ma faalogo i ai o’u taliga. Ua ou iloa foi o le a faamautu e le Agaga Paia le moni o la’u molimau i loto o i latou uma o e faalogo ma se taliga o le faatuatua” (“An Apostle’s Witness of Christ,” Ensign, Jan. 1984, 70).

5.3

Ua Umia e Aposetolo Ki Uma o le Perisitua o le malo o le Atua

Na toefuatai mai e avefeau faalelagi ki O nei ki o loo umia e sui o le Au Peresitene Sili ma le Korama a Aposetolo e Toasefululua.

Na molimau maiPeresitene Henry B. Eyring o le Au Peresitene Sili i le taua o ki o le perisitua o aposetolo:

“Sa molimau atu Paulo i Efeso o Keriso sa tu i le ao o Lana Ekalesia. Ma sa ia aoao atu sa fausia e le Faaloa Lana Ekalesia i luga o se faavae o aposetolo ma perofeta o loo umia ki uma o le perisitua . …

“Sa tulimatai atu Paulo i le galuega a le Perofeta o Iosefa Samita, i le taimi o le a toe matala ai le lagi. Sa tupu. Sa oo mai Ioane le Papatiso ma faaee i luga o tagata soifua le Perisitua o Arona ma ki o le galuega a agelu, ma le papatisoga i le faatofuina mo le faamagaloga o agasala.

“Sa toe foi mai aposetolo anamua ma perofeta ma faaee mai i luga o Iosefa ia ki sa latou umia i le olaga nei. Sa faauuina tagata soifua i le tofi paia faaaposetolo ia Fepuari o le 1835. Sa tuuina mai ki o le perisitua i Aposetolo e Toasefululua i le taufaaiuiuga o Mati i le 1844.

“Sa silafia e le Perofeta o Iosefa Samita ua lalata mai lona maliu. Sa ia silafia e le tatau ma o le a le toe leiloloa lava ia ki taua o le perisitua ma le tofi faaaposetolo.

“Sa tuua e se tasi o Aposetolo, o Uilifoti Uitilafi, le faamatalaga lenei i le mea na tupu i Navu a o saunoa le Perofeta i le Toasefululua:

“‘I lena taimi sa tulai le Perofeta o Iosefa ma saunoa mai ia te i matou: ‘Uso e, ou te manao lava ia ou ola e vaai i le fausiaina o lenei malumalu. O le a le mafai ona ou ola e vaai atu i ai, ae o le a outou vaai i ai. Ua ou faamauina i o outou luga ia ki uma o le malo o le Atua. Ua ou faamauina i o outou luga ia ki uma, o mana, o mataupu faavae ua faaalia mai e le Atua o le lagi ia te au. O lea la, po o fea lava ou te alu i ai po o le a se mea ou te faia, o le a faalagolago le taunuuga o le Ekalesia ia te outou.”’

“O perofeta uma na mulimuli mai ia Iosefa, e amata mai ia Polika Iaga e oo mai ia Peresitene Hinckley, sa umia ma faaaoga na ki ma sa umia foi le tofi paia faaaposetolo” (“Faatuatua ma Ki,” Ensign po o le Liahona, Nov. 2004, 27–28).

Na faauu e le Perofeta o Iosefa Samita, Oliva Kaotui, ma Tavita Uitimera ia Parley P. Pratt e avea ma sui o le Korama a Aposetolo e Toasefululua.

Sa faamalamalama mai eElder Bruce R. McConkie (1915–85) o le Korama a Aposetolo e Toasefululua e faapea, e na o le Aposetolo sinia i luga o le fogaeleele e mafai ona faaaogaina uma ki faaaposetolo o le perisitua:

“O ki o le malo o le Atua—o le aia tatau ma le mana o le au peresitene e faavavau lea e pulea ai le malo faalelalolagi—o nei ki, ia na muai faaalia mai le lagi, e tuuina mai e ala i le agaga o faaaliga i alii taitoatasi o e ua faauuina o se Aposetolo ma vaetofia o se tasi o le Aufono a le Toasefululua.

“Ae talu ai o ki o le aia tatau i le au peresitene, o le mea lea, e nao le toatasi i le taimi le tamalii i luga o le lalolagi e mafai ona faaaogaina uma ia ki. O ia lea, i taimi uma lava, o le Aposetolo sinia, o le Aposetolo pulefaamalumalu, o le faitaulaga sili pulefaamalumalu, o le toeaina pulefaamalumalu. Ua nao ia e toatasi e mafai ona tuuina atu le taitaiga i isi tagata uma, le taitaiga lea e leai se tasi e mafai ona alo ai.

“O le mea lea, o ki, e ui ina tuuina atu i le Toasefululua uma, ae e tapulaa le faaaogaina e soo se tasi o i latou, sei vagana ma seiiloga e oo se tasi o i latou i lena tulaga sinia lea e fai ai o ia ma auauna faauuina a le Alii i luga o le fogaeleele” (“The Keys of the Kingdom,” Ensign, Me 1983, 22–23; ua faaopoopo le faamamafa).

O ki o loo umia e le Toasefululua e avea ai ma aposetolo, tagatavaai, ma talifaaaliga, e agavaa ai i latou e faataunuu tiute e tuuina atu ia i latou e le Peresitene o le Ekalesia. Na faamalamalama mai ePeresitene Iosefa Filitia Samita (1876–1972):

“E mafai ona maua e Aposetolo e Toasefululua ia faaaliga e taiala ai i latou i a latou galuega ma ia fesoasoani ia i latou i le faatulagaina o le perisitua ma faalapotopotoga o le Ekalesia. A auina atu i latou e ala i le pule i se siteki, ua ia i latou le mana uma e maua ai faaaliga, e fai ai suiga, ma taulima ai mataupu uma e tusa ai ma le finagalo o le Alii. Ae latou te le maua faaaliga mo le taitaiga o le Ekalesia atoa, seiiloga e oo se tasi o i latou i le Au Peresitene. I se isi faaupuga o le aia tatau e maua ai faaaliga ma le taitaiga mo le Ekalesia atoa ua i ai ia i latou taitoatasi o le Toasefululua, lea e mafai ona ia faaaogaina pe a faapea e oo o ia i le Au Peresitene. Ae o lenei mana e faapafala a o soifua le Peresitene o le Ekalesia” (Doctrines of Salvation, comp. Bruce R. McConkie [1956], 3:157; ua faaopoopo le faamamafa).

5.4

Tiute o Aposetolo e Toasefululua

O Le Korama a Aposetolo e Toasefululua, 1997.

“O fautua femalagaai e toasefululua ua valaaulia e avea ma Aposetolo e Toasefululua, po o molimau faapitoa o le suafa o Keriso i le lalolagi atoa—ua faapea ona ese ai mai i isi mautofi i le ekalesia i tiute o lo latou valaauga. …

“O le Toasefululua o se Aufono Maualuga Femalagaai Pulefaamalumalu, e galulue i le suafa o le Alii, i lalo o le taitaiga a le Au Peresitene o le Ekalesia, e tusa ai ma le faatulagaga a le lagi; e ati aʼe le ekalesia, ma pulea mataupu uma o lea lava ekalesia i atunuu uma, muamua i Nuuese ma lona lua i tagata Iutaia.

“O le Toafitugafulu e galulue i le suafa o le Alii, i lalo o le taitaiga a le Toasefululua po o le aufono maualuga femalagaai, i le atiina aʼe o le ekalesia ma le pulea o mataupu uma o lea lava ekalesia i atunuu uma, muamua i Nuuese ona oo atu ai lea i tagata Iutaia—

“Aua ua auina atu le Toasefululua, ua umia ki, e tatala le faitotoa e ala i le folafola atu o le talalelei a Iesu Keriso, ma e muamua i Nuuese ma ona oo atu ai lea i tagata Iutaia.

“O le tiute foi o le Toasefululua, le faauuina ma faatulagaina tatau o isi mautofi uma o le ekalesia, e tusa ma le faaaliga ua fai mai” (MF&F 107:23, 33–35, 58).

Sa saunoaPeresitene Russell M. Nelson o le Korama a Aposetolo e Toasefululua e uiga i tiute o le Au Aposetolo:

“Na faaali mai e le Alii le pogai ‘na ia tuuina mai foi nisi e fai ma aposetolo; o isi foi e fai ma perofeta.’ Ina ‘ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso:

“‘Seia tatou oo atu o i tatou uma lava ma le lotogatasi i le faatuatua ma le iloa lelei o le Alo o le Atua’ [Efeso 4:11–13].

“O lea la, o le galuega a le au Aposetolo—o le Au Peresitene Sili ma le Toasefululua—o le aumaia o lena lotogatasi i le faatuatua ma ia folafola atu lo tatou iloa lelei o le Matai. O la tatou galuega o le faamanuiaina o olaga o i latou o e o le a aoao ma mulimuli i le ‘ala e silisili lava’ a le Alii [1 Korinito 12:31; Eteru 12:11]. Ma e tatau ona tatou fesoasoani atu i tagata e saunia mo o latou faaolataga ma faaeaga folafolaina” (Faaolataga ma le Faaeaga Ensign po o le Liahona, Me 2008, 7–8).

Na faataoto mai ePeresitene Gordon B. Hinckley (1910–2008) ia tiute faavae o le Au Aposetolo i le ala lenei:

“O le Au Peresitene Sili ma le Aufono a Aposetolo e Toasefululua, ua tofia ma faauuina e umia ki o le perisitua, ua i ai le pule ma le tiute e taitai ai le Ekalesia, ma faia ai ona sauniga, ma faamalamalama ona mataupu, ma faatuina ma faamautuina ona aoaoga. O tamalii taitoatasi ua faauuina o se Aposetolo ma lagolagoina o se tasi o le Aufono a le Toasefululua ua lagolagoina o se perofeta, tagatavaai, ma le talifaaaliga” (“God Is at the Helm,” Ensign, Me 1994, 54; ua faaopoopo le faamamafa).

Ina ua uma ona filifilia ma faauuina sui o le Korama a le Toasefululua, ona tuuina atu lea ia i latou e Peresitene Oliva Kaotui (1806–50), o le sa avea i lena vaitaimi ma Peresitene Fesoasoani o le Ekalesia le poloai lenei:

“Ua faauuina outou i lenei Perisitua paia, ua outou mauaina mai ia i latou o e ua i ai le mana ma le pule mai se agelu; e tatau ona outou talai atu le Talalelei i atunuu uma. Afai e le faataunuuina o outou tiute i se tikeri itiiti lava, o le a mamafa lo outou tausalaga; aua o le maualuga lava o le valaauga o le mamafa foi lea o le tausalaga. O lea ou te lapataia ai outou ia atinae le lotomaualalo tele; aua ua ou iloa le faamaualuga o le loto o le tagata. Ia faaeteete, ina ia faafefeteina outou e tagata taufaasee o le lalolagi; ia faaeteete, ina nei taulai atu o outou manaoga i mea o le lalolagi. Ia faamuamua la outou galuega. Ia manatua, ua tuuto atu agaga o tagata i la outou vaaiga; ma afai e te faautauta i lou valaauga, o le a e manuia i taimi uma.

“…E alagatatau lo outou maua o se molimau mai le lagi mo outou lava.…

“… Ia faamalosia o outou faatuatua; ia lafoai ese o outou masalosaloga, a outou agasala, ma o outou le talitonu uma; ma e leai se mea e mafai ona taofia outou mai le o mai i le Atua. E le atoatoa ma maea o outou faauuga seia tuu atu e le Atua Ona aao i ou luga. E tele mea e manaomia ina ia tatou agavaa ai, e pei ona sa faia e i latou o e na muamua atu; o le Atua lava e tasi. Afai na tuu e le Faaola i aso ua mavae Ona aao i luga o Ona soo, aisea la e le faia ai i aso e gata ai?

“… O outou lava e tasi; tou te tutusa i le umiaina o ki o le Malo i atunuu uma. Ua valaauina outou e talai atu le Talalelei a le Alo o le Atua i atunuu o le lalolagi; o le finagalo lea o lou Tama faalelagi, ia outou folafola atu Lana Talalelei i tuluiga o le lalolagi ma i motu o le moana.

“Ia naunautai e laveai agaga. E tutusa lava le taua o le agaga o se tagata e toatasi ma le agaga o le isi [tagata]. … O loo saili i taimi uma e le fili soifua o auauna a le Atua; o le mea lea, e tatau ai ona outou saunia i taimi uma e faia se osigataulaga i o outou ola, pe afai e manaomia ai e le Atua i le faaalualuina i luma ma le atiina ae o Lona faamoemoe. Aua le faasea i le Atua. Ia agaga tatalo e le aunoa; ia mataala e le aunoa. …

“… Matou te apoapoai atu nei, ia outou faamaoni i le faataunuuga o o outou valaauga; e le tatau ona i ai se faatamala; e tatau ona outou faataunuuina mea uma; … e i ai le aia a atunuu uma ia te outou; ua fusia faatasi outou e pei ona sa i ai Molimau e Toatolu; e ui i lea, e mafai ona outou valavala ma feiloai, ma toe feiloai ma toe valavala, seia oo ina outou toeaiina” (i le History of the Church, 2:195–96, 198; ua faaopoopo le faamamafa).

5.5

Ua Auina Atu Aposetolo e Atina Ae le Malo o le Atua i le Lalolagi atoa.

Ata

O Keriso o loo faatonuina le Au Aposetolo e aoao atu i nuu uma lava

Ua faamalamalama mai ePeresitene Gordon B. Hinckley (1910–2008) le uiga o le upu aposetolo:

“O le upu aposetolo, i lona afuaga ma lona uiga moni ‘o le ua auina atu.’ Ana faapea mai lena faauigaga ‘o le ua auina atu faatasi ma se pule ma se tiutetauave faapitoa,’ atonu o le a faamatalaina ai le valaauga e pei ona sa tuuina mai i le vaitaimi na femaliuai ai le Alii i le lalolagi, ma e pei ona tuuina mai i o tatou aso” (“Special Witnesses for Christ,” Ensign, Me 1984, 50; ua faaopoopo le faamamafa).

Na faamalamalama mai ePeresitene Polika Iaga (1801–77) e faapea, o le atiina ae o le malo o le Atua i le lalolagi atoa o se tiute faaaposetolo:

“O le valaauga o se Aposetolo o le, ia atiina ae le Malo o le Atua i le lalolagi uma; o le Aposetolo na te umia ki o lenei mana, ae le o se isi lava tagata. Afai e faalautele e se Aposetolo lona valaauga, o lea o le fofoga o le Alii i lona nuu i taimi uma” (Discourses of Brigham Young, sel. John A. Widtsoe [1954], 139; ua faaopoopo le faamamafa; tagai foi i le Aoaoaga a Peresitene o le Ekalesia: Polika Iaga [1997],138-9).

Na taua eElder L. Tom Perry (1922–2015) o le Korama a Aposetolo e Toasefululua e faapea, o tiutetauave o le Au Aposetolo e ave atu ai i latou i le lalolagi atoa:

“O se aposetolo i aso nei, o loo faaauau pea [ona avea] o ‘le ua auina atu.’ O tulaga o loo matou feagai e eseese mai i le Usoga muamua pe a matou malaga e faataunuu o matou tofiga. E matua eseese foi le ala ua matou femalagaai ai i tulimanu uma o le lalolagi mai le uluai Usoga. E ui i lea, o loo tutusa lava o matou tofiga, e pei lava foi ona tuuina mai e le Faaola a o Ia faatonuina Lana Toasefululua na valaauina ina ia ‘o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia: ia outou aoao atu ia te i latou ia tausi i mea uma ua ou fai atu ai ia te outou: faauta foi, ou te ia te outou i aso uma lava, e oo lava i le gataaga o le lalolagi’ (Mataio 28:19–20)” (“O Le A ea Le Korama?” Ensign po o le Liahona, Nov. 2004, 24).

Na faasoa mai eElder Bruce C. Hafen o le Fitugafulu ia femalagaaiga i le lalolagi atoa a Elder Neal A. Maxwell (1926–2004) o le Korama a Aposetolo e Toasefululua i se tausaga e tasi:

“E ui lava i le fesuisuiai o tofiga a le tagata ia i se tausaga faapitoa, ae ua atili lagona ai e Aposetolo taitoatasi i le Ekalesia aoao se galuega i le lalolagi atoa, ma e le gata i le taliaina o polokalama uma a le Ekalesia, ae faapea foi i konetineta uma ma tagata uma. Mo se faataitaiga, tagai i le lisi aloaia o galuega atofaina a Elder Maxwell i konafesi ma fonotaga faapitoa mo le 1993 [tagai i le siata o loo avatu faatasi ai]. …

“Sa fai si eseese o tofiga tetele i le lalolagi atoa i se tausaga e tasi—e aofia ai le atunuu autu o Saina ma Monokolia. Peitai o le mamanu masani lea sa mulimuli uma ai le Toasefululua” (A Disciple’s Life: The Biography of Neal A. Maxwell [2002], 458–59).

Galuega Atofaina a Elder Neal A. Maxwell mo Konafesi ma Fonotaga Faapitoa: 1993

Aso	Nofoaga	Galuega Atofaina
30 Ianuari	Manti, Iuta	Konafesi a le Siteki
13 Fepuari	Provo, Iuta	Konafesi Faarisone (siteki o tagata ua faaipoipo a le IPI)
20 Fepuari	Aai o Sate Leki	Faapaiaga o le Malumalu a le Madeleine
27 Fepuari	El Paso, Texas	Konafesi a le Siteki
6 Mati	Hermosillo, Mekisiko	Konafesi Faarisone
13 Mati	Toronto, Kanata	Konafesi a le Siteki
9-19 Aperila	Monokolia ma Beijing, Saina	Faapaia Monokolia, asiasi i taitai o Saina
25-26 Aperila	San Diego, Kalefonia	Faapaiaga o le Malumalu o San Diego Kalefonia
1 Me	Ogden, Iuta	Konafesi Faarisone
22 Me	Pale, Farani	Konafesi a le Siteki
12 Iuni	Twin Falls, Idaho	Konafesi Faarisone
19 Iuni	Springville, Iuta	Toefaatulagaina o le Siteki
4 Iulai	Provo, Iuta	Fiafia o le Saoloto
22 Aokuso	Aai o Sate Leki	Aoaoga Faamasani o peresitene fou o siteki o le Eria a Iuta i Matu
28 Aokuso	Nyssa, Oregon	Konafesi a le Siteki
11 Setema	Montreal, Kanata	Konafesi Faarisone
16 Oketopa	Raleigh, Karolaina i Matu	Konafesi Faarisone
23 Oketopa	Hattiesburg, Misisipi	Konafesi Faarisone
6 Novema	Tokyo, Iapani	Semina a Peresitene o Misiona, aoaoga faamasani a le Eria
13 Novema	Seoul, Korea	Aoaoga Faamasani a le Eria
17 Novema	Hong Kong	Aoaoga Faamasani a le Eria
20 Novema	Manila, Filipaina	Semina a Peresitene o Misiona, aoaoga faamasani a le Eria
4 Tesema	Chicago, Ilinoi	fonotaga a tagata faigaluega o le Malumalu a Chicago

(Bruce C. Hafen, A Disciple’s Life: The Biography of Neal A. Maxwell [2002], 459.)

O nisi taimi e tofia ai e le Au Peresitene Sili sui o le Korama a Aposetolo e Toasefululua e vaaia le galuega a le Ekalesia i ni vaega faapitoa o le lalolagi mo se taimi: E ui i le agai i luma o auala o femalagaaiga ma tekinolosi o fesootaiga e mafai ai e le Au Aposetolo ona vaaia nei eria mai le laumua o le Ekalesia i le Iunaite Setete, ae e i ai taimi, na latou alaala ai i isi atunuu. Mo se faataitaiga, sa tautua ma alaala Elder Dallin H. Oaks ma Elder Jeffrey R. Holland o ni Peresitene o Eria i le Atu Filipaina ma Chile, mai le 2002 i le 2004, ae na tautua Elder L. Tom Perry o se Peresitene o le Eria a o alaala i Europa tutotonu mai le 2004 i le 2005.

Na aoao maiPeresitene Gordon B. Hinckley (1910–2008) e uiga i tiutetauave o le Au Aposetolo o le galulue i tagata ua aina ai le lalolagi:

“O le latou popole sili e tasi e tatau ona i ai, o le alualu i luma o le galuega a le Atua i le lalolagi. E tatau ona latou popole i le soifua manuia o fanau a lo tatou Tama i le Lagi, o i latou i totonu o le Ekalesia ma i latou i fafo atu o le Ekalesia. E tatau ona latou faia mea uma latou te mafaia e faamafanafana ai ia i latou o e faanoanoa, avatu ai le malosi ia i latou o e vaivai, e avatu ai le faamalosiauga ia i latou ua tautevateva, e faauo i e leai ni uo, e faafailele i le ua mativa, e faamanuia i le ua ma’i, e tuuina atu le molimau, e le mai se talitonuga ae mai se iloa mautinoa o le Alo o le Atua, o la latou Uo ma le Matai, o i latou o ana auauna” (“O Molimau Faapitoa mo Keriso,” 49–50).

O le asiasiga a Peresitene Thomas S. Monson i le misiona a Toga i le 1965. Ona o le tele o a latou femalagaaiga, ua silafia ai e le Au Aposetolo manaoga o le Ekalesia i le lalolagi atoa.

5.6

Ua I Ai i Aposetolo Ki e Tatala ai le Talaiga o le Talalelei i Atunuu

Na aoao mai lePerofeta o Iosefa Samita (1805–44) e faapea, o le Au Aposetolo e Toasefululua “e umia ki o le talaiga, e tatalaina faitotoa o le Malo o le lagi i atunuu uma, ma folafola atu le Talalelei i tagata uma. O le mana lea, pule, ma le paia o lo latou valaaugafaaaposetolo” (i le History of the Church, 2:200; tagai foi i le Aoaoga a Peresitene o le Ekalesia: Iosefa Samita [2007],149).

O le Toasefululua, i lalo o le taitaiga a le Au Peresitene SIli, e “tatalaina faitotoa” i le galuega faafaifeautalai e ala i soalaupulega ma taitai o malo ma isi taitai faaleatunuu. Latou te faaaogaina foi le mana o le perisitua e faapaia ma toe faapaia ai laufanua mo le talaiga o le talalelei. Na faamalamalama mai ePeresitene Ezra Taft Benson (1899–1994):

“E pau lava le taimi e talai atu ai le talalelei i atunuu o le lalolagi, pe a ua faapaia e se tasi o le Au Peresitene Sili po o le Toasefululua le laueleele mo lena faamoemoega. E galue le Ekalesia i totonu o tulafono a atunuu taitasi ina ia mautinoa ai e le feteenai fuafuaga a le Ekalesia ma le tulafono po o agaifanua a lena malo. Tatou te le talai i atunuu e faasa ai e tulafono o lena atunuu le fuafuaga” (“150th Year for Twelve: ‘Witnesses to All the World,’” Church News, Jan. 27, 1985, 3; ua faaopoopo le faamamafa).

Na faasoa mai eElder M. Russell Ballard o le Korama a Aposetolo e Toasefululua, le aafiaga a lona tamamatua i le faaaogaaga o ki e faapaia ai Amerika i Saute i le 1925:

“Sa asiasi atu Elder Parley P. Pratt i Amerika i Saute i le 1851. Sa toe taumafai le galuega i le 1925. I le Aso Kerisimasi o le 1925, i le paka o Tres de Febrero i Buenos Aires, Atenitina, na faapaia ai e lou tamamatua o Elder Melvin J. Ballard, Amerika i Saute mo le talaiga o le talalelei. Ou te sii mai i le tatalo o le faapaiaga:

“‘Faamanuia i peresitene, kovana, ma taitai o atunuu i Amerika i Saute, ina ia latou talia ma le agalelei i matou ma tuu mai le faatagaga ia i matou e tatala ai faitotoa o le faaolataga i tagata o nei atunuu. …

“‘Ma o lenei, le Tama e, e ala i le pule o le faamanuiaga ma le atofaina e le Peresitene o le Ekalesia, ma e ala i le pule paia faaaposetolo ua ia te au, ou te mimiloa ai le ki, matala, ma tatala ai le faitotoa mo le talaiga o le Talalelei i nei atunuu uma i Amerika i Saute, ma aoai ma poloaiina ia taofia mana uma o le a tetee i le talaiga o le Talalelei i nei laufanua; ma matou te faamanuia ma faapaia nei atunuu o lenei laueleele mo le talaiga o lau Talalelei. Ma ua matou faia nei mea uma ina ia oo mai le faaolataga i tagata uma, ma ina ia viia ma faamamaluina lou suafa i lenei itu o le nuu o Siona’ (Crusader for Righteousness [Salt Lake City: Bookcraft, 1966], p. 81; ua faaopoopo le faatusilima)” (“The Kingdom Rolls Forth in South America,” Ensign, Me 1986, 12).

5.7

E Autasi Faaiuga a le Korama a Aposetolo e Toasefululua

O Le Korama a Aposetolo e Toasefululua, 1984.

Ina ia aoao mai le auala e maua ai le autasi i aufono a taitai o le Ekalesia, ma faamalamalama mai e Peresitene Boyd K. Packer (1924–2015) o le Korama a Aposetolo e Toasefululua:

“E sili atu ona lelei lou tau atu ia te outou o le ala o loo taitaia ai outou i aso nei … i le faamalamalama atu o mataupu faavae ma faiga faavae matou te mulimuli ai i fonotaga a le Au Peresitene Sili ma le Korama a Aposetolo e Toasefululua. O nei faiga faavae e puipuia ai le galuega mai vaivaiga o le tagata lava ia lea o loo vaaia ia i matou taitoatasi.

“Pe a oo mai se mataupu i le Au Peresitene Sili ma le Korama a Aposetolo e Toasefululua i se fonotaga i totonu o le malumalu, o le mea e tasi e vave lava ona iloiloina, pe o se mea e ogaoga ona taunuuga pe leai. O le a vaaia e se tasi po o se tasi o i matou i se manatu mama moni ni faafitauli e i ai ni taunuuga maoae ma tumau.

“O loo ua manino mai i faaaliga e faapea, o faaiuga a korama pulefaamalumalu ‘e ao lava ina faia i le leo autasi o ia lava korama. … Vagana ai o le tulaga lea, e lē aiā a latou faaiuga i faamanuiaga tutusa’ (MF&F 107:27, 29). Ina ia mafai ona mautinoa o le tulaga lena e i ai, e seasea ai faia ni faaiuga e faatatau i mataupu aupito taua i le fonotaga lea e fautuaina mai ai. Ma, afai o le fautuaga o se vaega o se faafitauli tele atu, e lava se taimi e faaalu ia ‘matou te o mai faatasi uma ai’ ina ia manino ua ia i matou taitoatasi a le o se malamalamaaga manino i le faafitauli, po o le, e pei ona masani ai, ia i ai se lagona e sili ona manino e uiga i ai. …

“O se mea faavalevalea le tuuina mai ma le iloa lelei o se faafitauli, i se faiga lea e faalagolago ai le faamaonia i tagata na ui mai ai, o ai na tuuina mai, po o le, o ai na auai pe sa lei auai i le taimi na tuuina mai ai.

“E tele lava ina le auai se toatasi pe sili atu o i matou i le taimi o fonotaga masani. Ua matou iloa uma lava, e tatau ona faaauau le galuega ma o le a talia le faaiuga a le matou usoga. E ui i lea, afai na suesue auiliili e se toatasi o le Korama le mataupu nai lo o isi, pe e tele atu lona silafia i ai a le ona o se tofiga, aafiaga, po o le lagona patino, e masani lava ona tolopo le mataupu seia mafai ona auai o ia i le soalaupulega.

“Ma, o taimi uma lava, afai e i ai se tasi o i matou e le mafai ona malamalama i se faafitauli pe lagona le le fiafia e uiga i ai, e tolopo foi e talanoaina i le lumanai.

“Ou te manatua ni taimi e auina atu ai se usugafono i le falemai e talanoa ai ma se tasi o le Aufono o le sa gasegase, ia nisi o mataupu faavavave na le mafai ona tolopoina, ae sa manaomia ai lena ‘maliega autasi.’ E i ai foi taimi, e tulai ese ai se tasi o i matou mai le fonotaga mo se taimi le tumau, e valaau atu i se tasi o o matou sui o le, o loo i ai i se atunuu mamao e aumai ni ona lagona i se mataupu o soalaupuleina.

“E i ai se tulafono matou te mulimuli ai: E le maea se mataupu seiiloga ua i ai se faamaumauga o minute e faamaonia ai ua tasi le lagona o le Usoga uma o le aufono sa potopoto (e le na o le toatasi o i matou, e le na o se komiti). O le faamaonia o se mataupu i manatu e le faitaulia o se pule e faatino ai, seiiloga e faamaumau i minute o le fonotaga le faatinoga na fai—e masani lava pe a faamaonia minute i le fonotaga e sosoo ai.

“O nisi taimi o se manatu faaopoopo e le nofonofo lelei ai se tasi o i matou i se faaiuga. O lena mea e le mafai ona manatu mama i ai. E le mafai ona faapea, o lena uiga faaalia o le le nofonofo lelei e le o le Agaga moni lea o Faaaliga.

“O le auala lena matou te galulue ai—i faatasiga i aufono. O lena mea e tuuina atu ai le saogalemu mo le Ekalesia ma se tulaga lagolelei maualuga mo i matou taitoatasi o e tali atu mo le tagata lava ia. I lalo o le fuafuaga, e mafai ona taialaina ai alii ua i ai ni tomai masani e ala i le fefautuaai ma musumusuga ina ia ausia ai ni mea tulaga ese” (“I Say unto You, Be One” [Brigham Young University devotional, Feb. 12, 1991], 3–4, speeches.byu.edu; ua faaopoopo le faamamafa).

O Peresitene Howard W. Hunter, Elder Jeffrey R. Holland, ma Peresitene James E. Faust o loo fiafia i le latou faatasitasi

Na faamalamalama mai ePeresitene James E. Faust (1920–2007) o le Au Peresitene Sili le pogai e taua tele ai le autasi:

“O lenei manaomia o le autasi, e fesoasoani e taulima ai le faaituau ma mausa faaletagata lava ia. E mautinoa ai o loo taitai le Atua e ala i le Agaga, ae le o le tagata e ala i le toatele po o le fetuutuunai. E mautinoa ai o loo taulai atu le atamai ma aafiaga sili ona lelei i le faafitauli, ao lei maua mai uunaiga loloto ma le le fesiligia o le taitaiga faaalia mai. E puipui ai mai vaivaiga o le tagata” (“Continuous Revelation,” Ensign, Nov. 1989, 10; ua faaopoopo le faamamafa).

O tamalii o loo tautua i le Korama a le Toasefululua, o ni tamalii e maoae o latou manatu ma e eseese siosiomaga e o mai ai. E ui i lea, na saunoa Peresitene Gordon B. Hinckley (1910–2008) i le le i ai o se le malilie po o lagona o le ita i le va o le usoga:

“O soo se mataupu mamafa o aiaiga, tulafono, polokalama, po o aoaoga faavae, e iloiloina ma le agaga tatalo faatasi e le Au Peresitene Sili ma le Toasefululua. O nei korama e lua, o le Korama a le Au Peresitene Sili ma le Korama a le Toasefululua, e fono faatasi, ma ua i ai le saolotoga i tamalii uma lava e faailoa ai lona lava finagalo e uiga i mataupu mamafa uma. …

“Ou te sii … mai le afioga a le Alii: ‘Ma o faaiuga uma e faia e soo se tasi o nei korama e ao lava ina faia i le leo autasi o ia lava korama; o lona uiga, e ao i uso taitoatasi o korama taitasi ona ioe i faaiuga a le korama, ina ia faia a latou faaiuga i le mana po o le pule e tasi ia tasi ma le tasi’ (MF&F 107:27).

“E leai se tonu mai filifiliga a le Au Peresitene Sili ma le Toasefululua e faia e aunoa ma le autasi o le manatu o i latou uma. I le amataga o le talanoaina o se mataupu, atonu e i ai se eseesega o taofi. O se mea mautinoa lena mea. O nei tamalii e o mai mai siosiomaga eseese. O i latou o ni tamalii e mafaufau mo i latou lava. Peitai a o le’i faia se tonu faaiu, e i ai le autasi i o latou finagalo ma siufofoga.

“Ua faamoemoeina lena mea pe afai latou te mulimulitai i le afioga faaalia a le Alii. Ou te toe sii mai le faaaliga e faapea:

“‘O tonu a nei korama, po o se tasi o ia [korama], e tatau ona faia ma le amiotonu uma, i le paia, ma le maualalo o le loto, agamalu, ma le faapalepale, ma i le faatuatua, ma le loto mama, ma le poto, faautauta, onosai, amioatua, ma le agalelei ma le alofa faauso;

“‘Auā o le folafolaga e faapea, afai e faateleina ia mea ia te i latou o le a lē aunoa i latou ona fua tele mai i le malamalama o le Alii’ (MF&F 107:30–31).

“Ou te faaopoopo atu se molimau patino e faapea, i le luasefulu tausaga talu ona ou auauna o se tasi o le Aufono a le Toasefululua, ma faapea ma le toe itiiti ona atoa o le sefulutolu o tausaga o ou auauna i le Au Peresitene Sili, sa lei i ai lava se faatinoga taua na faia sa lei faia ai lenei auala. Ua ou vaai i le eseese o manatu na tuuina mai i nei soalaupulega. Mai i lenei ala o le faaalia e nei uso o o latou lava mafaufauga na ala mai ai le iloiloga ma le filiga o manatu ma mataupu. Peitai ou te lei vaai lava i se feeseeseaiga tele po o se feitagai o le tasi i le isi o ou Uso nei. Ae ua ou molimauina se mea matagofie ma ofoofogia—o le aumai faatasi lea, i lalo o le taitaiga a le Agaga Paia ma lalo o le mana o faaaliga, o taofi eseese seia oo lava ina i ai le autasi ma le maliliega atoatoa. Ona faatoa faia lea o se mea. Ou te molimau atu, o lena mea, o se faamaoniga a le agaga o faaaliga o faaalia mai pea lava pea i le taitaiga o le galuega lenei a le Alii” (“O Le Atua o Loo i le Ao o Lenei Ekalesia,” Liahona, Iulai 1994, 72; ua faaopoopo le faamamafa).

Manatu e Mafaufau Loloto i ai

O a ni auala e eseese ai tiutetauave o se Aposetolo mai i a i latou o pulega o isi Ekalesia?
O a ki o le perisitua o loo umia e sui o le Korama a Aposetolo e Toasefululua? Na faapefea ona faamanuiaina oe ma lou aiga i na ki?
E faapefea ona taofi i tatou e le Au Aposetolo mai le “felafoaiina e pei o peau, ma feaveaiina i matagi uma lava o mataupu, i le pepelo o tagata, i togafiti leaga”? (tagai i le Efeso 4:11–14).
O a ni tiutetauave ua i ai i tagata o le Ekalesia ina ia lagolago faatasi ai i le taitaiga a Aposetolo e Toasefululua ma le Au Peresitene Sili? O a ni a tatou tautinoga o i ai pe a oo ina tatou le tasi atoatoa ma i latou?

Galuega Fautuaina

I luga o se fasipepa po o totonu o le apitalaaga, ia tusi faapuupuu ai le valaauga ma tiutetauave o le Korama a Aposetolo e Toasefululua e pei ona aoaoina mai i le lesona lenei.
I luga o se fasipepa po o totonu o le apitalaaga, tusi ai ni aafiaga na e maua i se taimi na tuuina atu ai e upu a le Au Aposetolo le faamafanafanaga, taiala, po o se malamalamaaga faaleagaga ia te oe.
Aoao atu se lesona i le afiafi faaleaiga po o se talanoaga i le lumanai, faasoa atu i ai mea ua e aoaoina a o e suesue i le lesona lenei.