Mataupu 2

O Le Perofeta Soifua: O Le Peresitene o le Ekalesia

O Le Faatomuaga

O le Peresitene o le Ekalesia e pulefaamalumalu i korama uma o le perisitua ma tagata auai lautele o le Ekalesia. Na faamalamalama mai ePeresitene James E. Faust (1920–2007) o le Au Peresitene Sili: “O ia o le Aposetolo sinia i luga o le fogaeleele. Ua faauuina ma vaetofia o ia o se perofeta, tagatavaai, ma talifaaaliga i le lalolagi. Ua lagolagoina o ia o le Peresitene o le Ekalesia. O ia o le faitaulaga sili pulefaamalumalu i le perisitua atoa i luga o le fogaeleele. Ua na o ia lava e umia ma faaaogaina uma ki o le malo i lalo o le Alii o Iesu Keriso, o le o le faaao ma o le maatulimanu autu o lenei Ekalesia” (“Continuing Revelation,” Ensign, Aok. 1996, 5).

Na tautino mai eElder Mark E. Petersen (1900–1984) o le Korama a Aposetolo e Toasefululua e faapea, o le perofeta soifua o le fofoga taumomoli lea o le Alii i le Ekalesia ma i le lalolagi: “Atonu e le lagona e tagata e le auai i lenei ekalesia le taua naua o loo i ai i lana galuega. E i ai lava foi ni isi o le Au Paia o Aso e Gata Ai latou te lei iloaina lea mea. Ae o le mea moni, o le peresitene o le Ekalesia o se perofeta ua faatuina i nei aso e gata ai e tuuina mai taitaiga musuia, e le gata i le Au Paia o Aso e Gata Ai, ae faapea foi i tagata uma o loo i soo se mea” (“A People of Sound Judgment,” Ensign, July 1972, 40).

O le suesueina ma le totoa o lenei mataupu, o le a faalolotoina ia lou talisapaia o le Peresitene o le Ekalesia ma ki o le pule o le perisitua o loo ia umia, ma o le a fesoasoani e te malamalama ai i le ala e oo mai ai le saogalemu ia i latou o e filifili e usitai i lana fautuaga.

Faamatalaga

2.1

O Le Perofeta Soifua ua I Ai Ki Uma o le Perisitua

Sa faamatala ePeresitene Boyd K. Packer (1924–2015) o le Korama a Aposetolo e Toasefululua, se aafiaga i le taimi na tautino atu ai e Peresitene Spencer W. Kimball (1895–1985) o ia, i le avea ai ma Peresitene o le Ekalesia, na umia ki o le perisitua:

“I le 1976 ina ua maea se konafesi i Copenhagen, Tenimaka, sa valaaulia ai i matou e Peresitene Spencer W. Kimball i se tamai falesa e matamata i faatagata o Keriso, ma le Au Aposetolo e Toasefululua na faia e Bertel Thorvaldsen. O le faatagata o le Christus e tu i se tama’i potu i luga a’e o le fatafaitaulaga. E tutu faasolosolo i itu o le falesa ia faatagata o le Toasefululua, faatasi ai ma Paulo ua sui ia Iuta le Sekara.

“Sa ta’u atu e Peresitene Kimball i le tausifale toeaina e faapea, o le taimi lava na gaosia ai e Thorvaldsen na faatagata matagofie i Tenimaka, sa tupu ai i Amerika le toefuataiga o le talalelei a Iesu Keriso, ma sa maua ai e Aposetolo ma perofeta le pule mai ia te i latou sa umia ki i aso anamua.

“Ina ua ia faapotopoto atu i latou na i ai ia latalata atu ia te ia, sa ia saunoa atu ai i le tausifale, ‘O i matou o Aposetolo soifua a le Alii o Iesu Keriso,’ ma sa tusi atu lona lima ia Elder Pinegar, ma faapea atu, ‘O se Fitugafulu lea, e pei o i latou o loo ta’ua i le Feagaiga Fou.’

“Sa matou tutu i autafa o le faatagata o Peteru, lea na faaalia e le vaneata o loo umia ki i lona lima, e faatusa i ki o le malo. Sa saunoa Peresitene Kimball, ‘O loo matou umia ki moni, e pei ona sa faia ai e Peteru, ma e matou te faaaogaina i aso uma.’

“Ona oo mai ai lea o se aafiaga o le a le galo lava ia te au. Sa faliu atu Peresitene Kimball, lenei perofeta agamalu ia Peresitene Johan H. Bentin, o le Siteki a Copenhagen, ma i se leo faapoloaiga ma faapea atu, ’Ou te manao ia e ta’u atu i faifeau uma [taitai faale-lotu] i Tenimaka latou te le o umia ni ki! Ua ou umia ia ki!’

“O iina na oo mai ai ia te au lena molimau ua lauiloa i le Au Paia o Aso e Gata Ai ae faigata ona faamatala atu i se tasi e lei masani ai—o se malamalama, o se mana e liligi mai i le loto o se tagata—ma sa ou iloaina, le mea moni lava, o loo tuu iinei le perofeta soifua ua umia ia ki” (“O Le Ufifatafata o le Faatuatua,” Ensign, Me 1995, 8).

Ua i ai i le perofeta mana, meaalofa, ma faamanuiaga e mafai ai ona ia taitai i soo se tofi o le Ekalesia (tagai MF&F 46:29; 107:91–92). Na faailoa mai eElder Bruce R. McConkie (1915–85) o le Korama a Aposetolo e Toasefululua, tiutetauave o le Peresitene o le Ekalesia, le perofeta soifua:

“O ia o le ao o le malo o le Atua i le lalolagi, o le taitai aupito maualuga o le Ekalesia, o le ‘Peresitene o le Perisitua Maualuga o le Ekalesia; Po o le, i se isi faaupuga, o le Faitaulaga Sili Pulefaamalumalu e vaaia le Perisitua Maualuga o le Ekalesia.’ (M.F & F. 107:65–66.) O lona tiute o le, ‘ia pulefaamalumalu i luga o le ekalesia atoa. …’ (MF. & F. 107:91.)

“O ia o le tagata e toatasi i le taimi e tasi i luga o le fogaeleele, o le e mafai ona umia ma faaaoga ki o le malo i lo latou atoatoa. (MF. & F. 132:7.) E ala i le pule ua tuuina mai ia te ia, e faataunuuina ai sauniga uma o le talalelei, e faatagaina ai aoaoga uma o le upumoni o le faaolataga, ma e ala atu i ki ua ia umia, ua avanoa ai le faaolataga lava ia i tagata o lona vaitaimi” (Mormon Doctrine, 2nd ed. [1966], 591–92; ua faaopoopo le faamamafa).

O ia lava ki ma mana o le perisitua na umia e le Perofeta o Iosefa Samita, o loo faaauau pea [ona i ai] i le fogaeleele i aso nei.

Na faamalamalama mai ePeresitene Gordon B. Hinckley (1910–2008) le auala o loo faaauau mai ai ki o le perisitua mai le Perofeta o Iosefa Samita e oo mai i le perofeta soifua o loo i ai nei i lenei tisipenisione:

“O lena lava pule e tasi lea sa umia e Iosefa, o na lava ki ma mana sa avea ma aano moni o lona aia tatau na tuuina mai le lagi e pulefaamalumalu ai, lea na ia faaeeina atu i luga o Aposetolo e Toasefululua ma na faapea ona faauluulu ai Polika Iaga. O peresitene uma lava o le Ekalesia talu mai lena taimi, ua oo mai i lena tofi aupito maualuga ma paia, mai le Aufono a le Toasefululua. Ua faamanuiaina nei tamalii taitoatasi i le agaga ma le mana o faaaliga mai luga. Ua i ai se faasologa e le i motusia mai ia Iosefa Samita, le Itiiti, e tau mai ia Spencer W. Kimball [o le sa avea ma perofeta i lena vaitaimi]. Ou te tautino atu ma molimau faamaoni atu e uiga i lenei mea i o outou luma i lenei aso. O lenei Ekalesia ua atiina ae i luga o le upu moni o valoaga ma faaaliga—ua atiina ae, e pei ona tusi atu ai Paulo i Efeso, ‘i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.’ (Efe. 2:20.)” (“The Joseph Smith III Document and the Keys of the Kingdom,” Ensign, Me 1981, 22).

2.2

O le Perofeta O le Fofogataumomoli o le Alii

Na maua e le Perofeta o Iosefa Samita faaaliga mai le Atua.

Na faailoa mai ePeresitene Harold B. Lee (1899–1973) e faapea, e le manaomia lava ona faaseseina le Au Paia, aua ua faavaeina e le Alii se ala o aoaoga e le mafaaseseina:

“Pe a i ai lava se mea e ese mai mai le mea ua uma ona tau mai e le Alii ia i tatou, o le a ia tuuina mai i lana perofeta ae le o Pai ma Lafai po o se isi lava o loo suesue auala e oo mai ai e pei ona sa i ai tagata e faamatalaina mai le tala; ma e le ala mai i se tasi, e pei ona faamatala mai e se isi tala, o le sa matapogia ma toe tu mai ma tuuina mai se faaaliga. Na ou fai atu, ‘Pe tou te manatu ea, e i ai le perofeta a le Alii i luga o le fogaeleele, ae o le a ia uia se auala taamilo e faaali mai ai mea i lana fanau? O le pogai lena ua i ai lana perofeta, ma pe a i ai se mea na te tuuina mai i lenei Ekalesia, o le a ia tuuina mai i le Peresitene, ma o le a mautinoa e le Peresitene e maua e peresitene o siteki ma misiona, faapea ai ma le Au Pulega Aoao; ma o le a latou mautinoa foi e logoina tagata e uiga i soo se suiga fou’” (“The Place of the Living Prophet, Seer, and Revelator” [address to Church Educational System religious educators, July 8, 1964], 11; ua faaopoopo le faamamafa).

Na aoao maiPeresitene Ezra Taft Benson (1899–1994) e tatau ona sili atu lo tatou faatauaina o upu a perofeta nai lo o upu a se isi lava tagata:

“Mai tagata uma o le olaga nei, e tatau ona taulai atu la tatou vaai i le kapeteni, o le perofeta, tagatavaai ma talifaaaliga, ma o le peresitene o Le Ekalesia a Iesu Keriso o le Au Paia o Aso e Gata Ai. O le tagata lenei e sili ona tu latalata atu i le punavai o le vai ola. O loo i ai nisi o faatonuga faalelagi mo i tatou, e na o le perofeta lava e mafai ona tatou maua mai ai. O se auala lelei e fua ai lou tulaga ma le Alii, o le vaai po o a ou lagona e uiga i le, ma le galue ai, i saunoaga musuia a lona sui i le lalolagi, o le perofeta-peresitene. O saunoaga musuia a le peresitene e le tatau ona manatu mama i ai. E agavaa tagata uma i musumusuga, ma e i ai ni tamalii e agavaa i faaaliga mo o latou tofiga faapitoa. Ae e na o le tasi lava le tamalii e tu e avea ma fofoga taumomoli o le Alii i le Ekalesia ma le lalolagi, o ia lea o le peresitene o le Ekalesia. O upu a isi tamalii uma e tatau ona fuaina agai i ana upu musuia” (“Jesus Christ—Gifts and Expectations,” New Era, May 1975, 16).

2.3

E Taitai e le ALii le Ekalesia e ala i Faaaliga Faifaipea i Lana Perofeta

E faaalia mai e le Alii Lona mafaufau ma Lona finagalo i Lana perofeta. Na molimau maiPeresitene Spencer W. Kimball (1895–1985) o loo avanoa pea le lagi ma e taitai e le Alii Lana Ekalesia mai lea aso ma lea aso:

“Ou te molimau atu i le lalolagi i le aso, ua silia ma se seneturi ma le afa ua mavae, na nutililiiina ai le taualuga uamea; na toe tatala ai le lagi, ma talu mai lena taimi ua faaauau mai ai lava faaaliga. …

“Talu mai lena aso taua i le 1820, ua faaauau ai ona oo mai tusitusiga paia faaopoopo, e aofia ai faaaliga e tele ma le taua ua tafe mai i se auvai e le mate mai le Atua i ana perofeta i luga o le fogaeleele. …

“… Matou te molimau atu i le lalolagi o loo faaauau pea faaaliga ma o potu tetele ma faila a le Ekalesia o loo i ai nei faaaliga lea e oo mai i lea masina ma lea masina, ma i lea aso ma lea aso. Matou te molimau atu foi e faapea, o loo i ai, talu mai le 1830 ina ua faatulagaina Le Ekalesia a Iesu Keriso o le Au Paia o Aso e Gata Ai, ma o le a faaauau pea ona i ai, po o le a lava le umi o le a i ai, se perofeta, ua silafia e le Atua ma lona nuu, o le o le a faaauau pea ona faamatalaina mai le mafaufau ma le finagalo o le Alii.

“O lenei la, o se upu o le lapataiga: Ia aua nei o tatou toe faia le mea sese a i latou anamua. E toatele tagata lotu i onaponei ua talitonu i le au Aperaamo, le au Mose, ma le au Paulo, ae le talitonu i perofeta o aso nei. E mafai foi e tagata o anamua ona talia perofeta o se vaitaimi na muamua atu, ae faitioina ma upuvale i perofeta o e o le latou augatupulaga.

“I o tatou aso, e pei foi o aso ua mavae, e toatele tagata ua manatu, afai e i ai ni faaaliga, o le a oo mai i se faailoaga maoae, ma luluina ai le laueleele. Mo le toatele o tagata, e faigata ona talia o ni faaaliga na faaaliga e tele i le vaitaimi o Mose, i le vaitaimi o Iosefa, ma i lo tatou lava vaitaimi—na faaaliga ia e oo mai i perofeta o ni faalogona loloto ma le le fesiligia ia e oo ifo i le mafaufau ma le loto o le perofeta, e pei o le sau mai le lagi po o le, e pei o le tafiesea e le tafa o ata o le pogisa o le po.

“O le faamoemoe mo ni faaaliga ofoofogia, atonu o le a le atoatoa ai le mataala o se tagata i le tafe mai i taimi uma o fesootaiga e faaaliaina mai. Ou te faapea atu, ma le lotomaualalo tele, ae faapea foi ma le mana ma le malosi o se molimau mumu i lou loto e faapea, mai lava i le perofeta o le Toefuataiga e oo mai i le perofeta o lo tatou lava vaitaimi, e le i motusia lava le laina o le fesootaiga, o loo faaauau pea le pule, o loo faaauau pea ona susulu se malamalama, manino ma ati. O le leo o le siufofoga o le Alii o se fati faaauau pea ma o se augani mamana. Ua toeitiiti atoa le seneturi ma le afa e le o motusia lava” (“Revelation: The Word of the Lord to His Prophets,” Ensign, Me 1977, 77–78; ua faaopoopo le faamamafa).

2.4

O le Afioga a le Alii i Perofeta Soifua Ua Fetaui Lelei ma e Matuai Taua ia i Tatou i le Taimi Nei

O le lalolagi e fesuisuiai i taimi uma. O faafitauli fou ma eseese ma le tele o suiga o faafitauli tuai o loo faaauau ona luiina ai i tatou. Ua silafia e lo tatou Tama Faalelagi poto ma le agaalofa mea uma a o lei tutupu, ma ua Ia faaali mai tali ma fofo e ala i Lana perofeta e pei ona manaomia ai. E faaopoopo atu i le faamatalaina ma le toefaamautuina mai o tusitusiga paia ua i ai, e avea se perofeta ma auala e mafai ai e le Alii ona tuuina mai tusitusiga paia fou, e tusa ai ma manaoga o tagata. O le saunoa mai i lalo o le taitaiga a le Agaga Paia, e ave ai le faamuamua i upu a le perofeta soifua nai lo o isi faamatalaga e uiga i lea lava mataupu e tasi. O lana fautuaga musuia ua ogatasi lava ma upumoni e faavavau o loo i tusitusiga faavae ma o loo taulai atu i manaoga ma tulaga o lona vaitaimi.

O aoaoga faavae e faavavau ma e le suia; ae peitai, e mafai e le Alii, e ala mai i Lana perofeta, ona suia faiga masani ma polokalama, e tusa ai ma manaoga o tagata. O nisi nei o faataitaiga e faapupula ai lenei mataupu faavae:

1. O le tulafono a Mose sa tuuina mai i le fanauga a Isaraelu o se “taitaitama e aumai ai i [latou] ia Keriso” (Kalatia 3:24; tagai foi i le Faaliliuga a Iosefa Samita, Kalatia 3:24 [i le Kalatia 3:24, vaefaamatalagae]) ae sa faataunuuina ina ua tuuina mai le tulafono o le talalelei e Iesu Keriso (tagai i le Kalatia 3:23–25; Mosaea 13:27–35; 3 Nifae 9:15–20).

2. A o i ai Iesu i luga o le fogaeleele, sa masani ona aoao atu le talalelei i le na o le aiga lava o Isaraelu (tagai i le Mataio 10:5–6; 15:24; Mareko 7:25–27). Ina ua mavae Lona Toetu, sa poloaiina e le Faaola le Au Aposetolo e ave atu le talalelei i tagata uma lava (tagai i le Mareko 16:15; Galuega 10).

3. I le vaitaimi o Mose, sa aveesea ai le Perisitua Mekisateko mai tagata lautele o Isaraelu ae sa na o Sa Levi na tuuina atu i ai le Perisitua Arona (tagai i le MF&F 84:24–26; tagai foi i le Numera 8:10–22; Eperu 7:5). I onapo o Keriso ma Ana Aposetolo, sa toe maua ai le Perisitua Mekisateko ae o le Perisitua Arona sa tuuina atu i alii sa le o ni Sa Levi (tagai i le Luka 6:13–16; Filipi 1:1; Eperu 7:11–12). I aso nei “e mafai ai ona maua e alii faamaoni ma agavaa uma o le Ekalesia le perisitua paia, faatasi ma le mana e faaaoga ai lona pule paia” (Folafolaga Aloaia 2).

E pei foi o onapo o Noa, o perofeta i aso nei e tuuina mai se leo o le lapataiga.

Sa taua ePeresitene John Taylor (1808–87) perofeta i le Feagaiga Tuai e faamalamalama mai ai, o faaaliga fou e alagatatau mo augatupulaga fou:

“Tatou te manaomia se laau ola—se punavai ola—atamai ola, e amata mai i le perisitua ola i le lagi, e oo mai i le perisitua ola i le lalolagi. … Ma e mai lava i le taimi na uluai maua ai e Atamu se fesootaiga mai le Atua, i le taimi na i ai Ioane i le Motu o Patamo ma maua ai ana fesootaiga, po o Iosefa Samita foi lea na tatala i ai le lagi ia te ia, e manaomia e le aunoa ni faaaliga fou, e fetuunai lava ia talafeagai ma tulaga uiga ese o i ai ekalesia po o tagata taitoatasi.

“O faaaliga a Atamu e le’i faatonuina mai ai Noa e fau lona vaa; e le’i ta’u atua foi i faaaliga ia Noa e fai ia Lota e lafoai Sotoma; e le o tautala foi se tasi o ia faaaliga i le aveeseina mai o le fanauga a Isaraelu mai Aikupito. Na tofu uma nei tagata ma faaaliga mo i latou lava, e faapena foi Isaia, Ieremia, Esekielu, Iesu, Peteru, Paulo, Ioane, ma Iosefa. Ma e tatau foi ona faapena i tatou” (Aoaoga a Peresitene o le Ekalesia: Ioane Teila [2001],169-70).

Sa saunoaPeresitene Uilifoti Uitilafi (1807–98) e uiga i se fonotaga na auai ai le Perofeta o Iosefa Samita ma Polika Iaga:

“Sa faliu atu Uso Iosefa ia Uso Polika Iaga ma faapea atu, ‘Uso Polika, ou te manao e te tulai i le tulaga ma tau mai ou manatu e uiga i faaaliga tusitusia ma le upu tusitusia a le Atua.’ Sa alu Uso Polika i le tulaga, ma uu mai le Tusi Paia, ma faataatia i lalo; sa ia uuina le Tusi a Mamona, ma faataatia i lalo; ona ia aumaia lea o le Tusi o Mataupu Faavae ma Feagaiga, ma faataatia i ona luma, ma fai mai: ‘O upu tusitusia na a le Atua ia i tatou, e faatatau i le galuega a le Atua mai lava i le amataga o le lalolagi, toetoe lava, tau mai i o tatou aso.’ ‘Ma o lenei la,’ sa ia faapea mai ai, ‘pe a faatusatusa atu i faaaliga ola [perofeta soifua], o na tusi o ni mea noa ia te au; e le o aumaia e na tusi le upu a le Atua e fitoitonu ia i tatou i le taimi nei, e pei ona faia e upu a se perofeta po o se tamalii ua umia le Perisitua Paia i o tatou aso ma le augatupulaga. E sili atu ia te au le i ai o faaaliga ola nai lo o tusitusiga uma o i ni tusi.’ O le mea lena sa ia tulitulimatagauina. Ina ua maea lana tautalaga, sa fai atu Uso Iosefa i le faapotopotoga: ‘Ua tau atu e Uso Polika ia te outou le upu a le Alii, ma ua ia tau atu ia te outou le mea moni’” (i le Conference Report, Oct. 1897, 22–23; ua faaopoopo le faamamafa).

Na aoao maiPeresitene Boyd K. Packer (1924–2015) o le Korama a Aposetolo e Toasefululua e faapea, o mataupu faavae ma aoaoga faavae o le talalelei e tumau pea, e ui lava e i ai taimi e ao ai ona fetuunai faiga masani a le Ekalesia: “O taualumaga, polokalama, ma aiaiga o le taitaiga, e oo lava i nisi o mataupu i le faatulagaga, e ono suia. E fai lava si o tatou saoloto, ioe, e fai si alagatatau ona suia ia mea mai lea taimi i lea taimi. Ae peitai o mataupu faavae, o aoaoga faavae, e le suia lava” (“Principles,” Ensign, Mat. 1985, 8).

2.5

O Le a Lē Faatagaina Lava e le Alii le Perofeta Soifua e Taitai Ese le Ekalesia

Ua folafola mai ePeresitene Uilifoti Uitilafi (1807–98) e faapea, e mafai ona i ai so tatou talitonuga atoatoa i le taitaiga a le perofeta o loo taitaia le Ekalesia:

“O le a le faatagaina lava e le Alii a’u po o soo se tasi tagata e tu e avea ma peresitene o le Ekalesia lenei ina ia taitai ese outou. Ua lē i ai lena mea i le polokalama. Ua lē o i ai i le mafaufau o le Atua. Afai ou te taumafai e fai lena mea, o le a aveesea a’u e le Alii mai lo’u tulaga, ma o le a faapea foi ona Ia faia i soo se isi lava tagata e taumafai e taitai sese le fanauga a tagata mai faaaliga a le Atua ma mai i lo latou tiute” (Folafolaga Aloaia 1, “Excerpts from Three Addresses by President Wilford Woodruff Regarding the Manifesto”; ua faaopoopo le faamamafa).

Na aoao mai ePeresitene Harold B. Lee (1899–1973) lenei lava mataupu faavae e tasi:

“Ia taulai atu lau vaai ia te ia o le ua valaauina e le Alii, ma ou te fai atu ia te outou i le taimi nei, i le iloa ai o loo ou tu i lenei tulaga, e le tatau ona e popole e uiga i le ono taitai ese o tagata e le Peresitene o le Ekalesia, aua o le a aveese o ia e le Alii mai lona tulaga ao lei ona Ia faatagaina lena mea e tupu” (The Teachings of Harold B. Lee, ed. Clyde J. Williams [1996], 533).

Na tuuina mai ePeresitene Gordon B. Hinckley (1910–2008) se faamautinoaga faapena i tagata o le Ekalesia:

“E moni le Ekalesia. O i latou e taitaia ua na o le tasi lava lo latou manao, o lena mea, o le faia lea o le finagalo o le Alii. Latou te sailia lana taitaiga i mea uma. E leai se faaiuga taua e aafia ai le Ekalesia ma ona tagata e faia e aunoa ma le agaga tatalo, o le o atu i le punavai o le poto uma mo le taitaiga. Mulimuli i le autaitai o le Ekalesia. O le a le faatagaina e le Atua lana galuega ia taitaieseina” (“Be Not Deceived,” Ensign, Nov. 1983, 46; ua faaopoopo le faamamafa).

2.6

O Nisi Tagata O le A Talitonu i Perofeta ua Mavae ae Teena Perofeta Soifua

E toatele tagata e faaaloalo i perofeta ua mavae ae mumusu e talia le perofeta ua auina mai e le Alii e taiala i latou i o latou vaitaimi (tagai i le Helamana 13:24–26). Na faasoa mai ePeresitene Harold B. Lee (1899–1973) se aafiaga e tau mai ai se faataitaiga o lenei lilifaga:

“E i ai sau uo e i ai sana faletupe i Niu Ioka. I tausaga ua mavae, ina ua matou feiloai ma Peresitene Jacobson, o le sa pulefaamalumalu i le taimi lena i le Misiona a Setete i Matu, sa malie lava se matou talanoaga. Sa tuuina atu ia te ia e Peresitene Jacobson se kopi o le Tusi a Mamona lea sa ia faitauina, ma sa ia talanoa mai ma le naunautai tele e uiga i le mea na ia taua o filosofia maoae. Ina ua lata ina manava galuega o le aso, sa ia valaaulia i maua matou te tietie atu i le fale o le misiona i lana taavale limosini, ma sa faapea ona ma taliaina. A o matou malaga atu, a o ia talanoa mai e uiga i le Tusi a Mamona ma lona faaaloalogia o ona aoaoga, sa ou faapea atu, ‘Ia, aisea la e te le faia ai loa se mea e uiga i ai? Afai ua e talia le Tusi a Mamona, o le a se mea o taofia oe? Aisea e te le auai ai i le ekalesia. Aisea la e te le talia ai Iosefa Samita, o se perofeta?’ Ma sa ia fai mai, ma le totoa ma le faaeteete, ‘Ia, ou te matea o le mafuaaga atoa lava ona ua lata tele mai Iosefa Samita ia te au. Ana faapea na soifua o ia i le lua afe tausaga ua mavae, atonu o le a ou talitonu. Ae ona e lata mai tele o ia, ou te matea o le pogai lena e le mafai ai ona ou talia [o ia o se perofeta].’

“O se tagata lenei ua faapea mai, ‘Ou te talitonu i perofeta ua maliliu ia na soifua i le afe ma ona tupu tausaga ua mavae, ae faigata tele ona ou talitonu i se perofeta soifua.’ E faatatau foi lena uiga faaalia i le Atua. O le faapea mai o loo tapunia le lagi ma e leai ni faaaliga i aso nei, o le fai mai lea, tatou te le talitonu i se Keriso soifua i aso nei, po o se Atua soifua i aso nei—tatou te talitonu i se [Atua] ua leva ona maliu ma mavae atu. O lenei la faaupuga, ‘perofeta soifua’ e i ai sona taua moni” (“The Place of the Living Prophet, Seer, and Revelator,” [address to Church Educational System religious educators, July 8, 1964], 2).

O le tautino mai o se talitonuga i perofeta ua maliliu ae teena le perofeta soifua, o se faafitauli ua leva tele. Sa teena e nisi o Faresaio i onapo o Iesu Keriso le Keriso soifua, ae na taliaina le perofeta o Mose, o le sa taitaia Isaraelu i le silia ma le 1,000 tausaga na muamua atu. Sa latou inosia se tagata na faamaloloina e Iesu, fai mai:

“O oe lona soo; a o i matou nei, o soo o Mose i matou.

“Ua matou iloa na fetalai mai le Atua ia Mose: a o lena tagata [o Iesu], matou te le iloa pe maifea ia” (Ioane 9:28–29; tagai foi i le Mataio 23:29–30, 34; Helamana 13:24–29).

O tagata faatupu vevesi o loo siomia le Falepuipui o Karefasi

Na aoao maiPeresitene Harold B. Lee (1899–1973) e faapea, o se talitonuga i faaaliga e tatau ona aofia ai aoaoga a lo tatou perofeta o i ai nei:

“E lei leva ona uma ona fofogaina e Peresitene David O. McKay i le Ekaleisa e faapea, o le Uluai Aufono a Fitugafulu ua faauuina o ni faitaulaga sili ina ia faalautele atu lo latou aoga, ma ia tuuina atu ia i latou le pule e galue ai pe afai e le mafai ona auai se isi Pulega Aoao, sa ou feiloai ai i se fitugafulu … sa matuai popole lava. Sa ia fai mai ia te au, ‘Pe sa lei fai mai le Perofeta o Iosefa Samita, o lenei mea sa le fetaui ma le faatulagaga a le lagi, le tofia o faitaulaga sili e avea ma ni peresitene o le Uluai Aufono a Fitugafulu?’ Ma sa ou faapea atu, ‘O loo ou malamalama sa ia fai mai ai, ae pe ua e mafaufau ea o le mea sa le fetaui ma le faatulagaga a le lagi i le 1840 atonu e le fetaui i le faatulagaga a le lagi i le 1960?’ Sa lei mafaufau o ia i lena mea. Sa mulimuli foi o ia i se perofeta ua maliu, ae na galo ia te ia o loo i ai se perofeta soifua i onaponei. O le mea lena e taua ai lo tatou faamamafaina o le upu soifua.

“I ni tausaga ua leva ao avea ai ma se faifeautalai talavou, sa matou asiasi atu ai i Navu ma Karefasi faatasi ma lou peresitene o le misiona, ma sa matou faia ai se fonotaga a faifeautalai i le potu o le falepuipui lea na maliliu ai Iosefa ma Ailama. Sa faamatala mai e le peresitene o le misiona mea na tutupu anamua lea na oo atu ai i le maliufasia, ona ia faaiuina lea i le faamatalaga taua tele lenei: ‘Ina ua maliufasia le Perofeta o Iosefa Samita, sa toatele le au paia o e na maliliu faaleagaga faatasi ma Iosefa.’ Sa faapena foi ina ua maliu Polika Iaga: na faapena foi ina ua maliu Ioane Teila. … Sa maliliu faaleagaga nisi o tagata o le Ekalesia faatasi ma Uilifoti Uitilafi, faatasi ma Lorenzo Snow, faatasi ma Iosefa F. Samita, faatasi ma Heber J. Grant, faatasi ma Siaosi Alapati Samita. Ua i ai nisi o i tatou i aso nei ua mananao e talitonu i se tasi ua maliu ma mavae atu, ma ia talia ana upu e faapea, ua sili atu lana pule nai lo o upu a se pulega [taitai] soifua i aso nei” (Stand Ye in Holy Places [1974], 152–53; ua faaopoopo le faamamafa).

Manatu e Mafaufau Loloto i Ai

• Aisea e taua ai le malamalama o ki uma o le perisitua o loo umia ma faatonutonuina e le tagata e toatasi i le taimi i luga o le fogaeleele?

• O a ni itulelei e maua mai i upu a se perofeta soifua pe afai ua uma ona tatou maua upu a perofeta anamua?

• Ua folafola mai e le Alii, o le a Ia le faatagaina Lana perofeta e taitaieseina le Ekalesia. E mafai faapefea e lenei upumoni ona aafia ai le ala e te faalogo, faitau, ma mulimuli ai i aoaoga a perofeta soifua?

Galuega Fautuaina

• Saunia se lesona puupuu o le afiafi faaleaiga e faaaoga ai (1) mea ua e aoaoina mai i lenei mataupu, (2) o mau o loo taua i lenei mataupu, ma le (3) faamatalaga lenei mai ia Peresitene Gordon B. Hinckley: “A le o le i ai o se tatou perofeta po o le leai foi; ma o le i ai o se perofeta, ua tatou maua ai mea uma” (“We Thank Thee, O God, for a Prophet,” Ensign, Ian. 1974, 122).

• A uma ona faitau mau nei, ia faamatala atu i se uo po o se tagata o le aiga, po o auala ua pei ai le perofeta soifua o Mose: Mataupu Faavae ma Feagaiga 28:2; 107:91–92; Mose 1:3, 6.

Anomea mo le Faatamaoaigaina

Mataupu Faavae e Sefulufa o le Mulimuli i le Perofeta

Peresitene Ezra Taft Benson, 1980 Devotional Speeches of the Year (1981), 26–30; ua faaopoopo le faamamafa.

Ou uso e ma tuafafine, ua faamamaluina lava au i le faatasi ai ma outou i le aso. O outou tagata aooga ua o se vaega o se tupulaga talavou filifilia—o se tupulaga e ono molimauina lelei le toe foi mai o lo tatou Alii.

E le gata ina faateleina le fuainumera o le Ekalesia i aso nei, ae ua tuputupu ae foi i le faamaoni ma, o le mea e sili atu le taua, o o tatou tupulaga talavou, o se vaega, ua sili atu le faamaoni nai lo o le tupulaga matutua atu. Ua faapolopoloina outou e le Atua mo le itula lona sefulutasi—o le aso sili ma le matautia o le Alii. O le a fai ma ou tiutetauave e le gata o le fesoasoani e taitai ma le manumalo le malo o le Atua, ae ia laveai foi lo oe lava agaga ma taumafai e laveai agaga o lou aiga, ma ia faamamalu i mataupu faavae o lo tatou faavae musuia.

Ina ia fesoasoani ia outou pasia suega taua o loo i le lumanai, o le a ou tuuina atu ia te outou i le aso ni nai vaega o se ki tulaga ese lea, afai o le a outou faamamaluina, o le a faapaleina ai outou i le mamalu o le Atua ma aumai ai outou i fafo ma le manumalo e ui lava i le matamataita o Satani.

E le o toe umi ae tatou faamamaluina lo tatou perofeta [Spencer W. Kimball] i lona aso soifua e valusefulu ma le lima ai. I le avea ai o se Ekalesia, tatou te pepese ai i le pese, “Ia Viia Oe, Le Atua, Mo se Perofeta.” “Ia o le ki tulaga ese lenei—mulimuli i le perofeta—ma o vaega autu nei e sefulufa e mulimuli ai i le perofeta, le Peresitene o Le Ekalesia a Iesu Keriso o le Au Paia o Aso e Gata Ai.

Muamua: Ua na o le perofeta lava le tagata e saunoa mo le Alii i mea uma.

I le vaega 132, fuaiupu e 7, o le Mataupu Faavae ma Feagaiga o loo fetalai mai le Alii e uiga i le Perofeta—o le Peresitene—ma faapea mai: “E lē sili atu lava i le toatasi lē e i luga o le lalolagi e faaee atu i ai lenei mana ma ki o le perisitua i le taimi e tasi.”

Ma i le vaega e 21 fuaiupu e 4–6, o loo ta’u mai ai e le Alii:

“O le mea lea, ia outou, o lona uiga o le ekalesia, uai atu i ana upu uma ma poloaiga o le a ia tuu atu ia te outou e pei ona maua e ia, ma savavali i le paia atoa i oʼu luma;

“Ona o lana upu ia outou talia, e pei lava ua mai i lo’u lava gutu, i le onosai ma le faatuatua atoa.

“Ona o le faia o nei mea o le a le manumalo ai faitotoa o seoli ia te outou.”

Na e faalogo i le mea na fai mai ai le Alii e uiga i upu a le perofeta? E tatau ona tatou “uai atu i ana upu uma”—e pei o loo sau mai i “lo’u [Alii] lava gutu.”

Lua: E sili atu le taua ia i tatou o le perofeta soifua nai lo o tusitusiga faavae.

Sa faamatala Peresitene Uilifoti Uitilafi e uiga i se mea malie na tupu i le vaitaimi o le Perofeta o Iosefa Samita.

“O le a ou taua se fonotaga faapitoa na ou auai i le aai o Katelani i aso o ou talavou. I lena fonotaga, na faia ai nisi o faamatalaga ia na faia foi iinei i aso nei, e faatatau i perofeta soifua ma e faatatau i le afioga tusitusia a le Alii. Sa tuuina mai ai lea lava mataupu faavae e tasi, e ui e lei umi e pei ona faia ai iinei, ona tulai ae lea o se alii taitai o le Ekalesia ma talanoa mai e uiga i le mataupu, ma faapea mai: ‘Ua i o outou luma nei le upu a le Atua, le Tusi Paia, Tusi a Mamona, ma le Mataupu Faavae ma Feagaiga; ua ia te outou upu tusitusia a le Atua, ma o outou o e tuuina mai faaaliga, e tatau ona tuuina mai faaaliga e faatatau i na tusi, ona o mea ua tusia i na tusi o le upu lea a le Atua. E tatau ona tatou tamau i ai.’

“Ina ua uma lana faamatalaga, sa faliu atu Uso Iosefa ia Uso Polika Iaga ma faapea atu, ‘Uso Polika, ou te manao e te tulai i le tulaga ma tau mai ou manatu e uiga i faaaliga tusitusia ma le upu tusitusia a le Atua.’ Sa alu Uso Polika i le tulaga, ma uu mai le Tusi Paia, ma faataatia i lalo; sa ia uuina le Tusi a Mamona, ma faataatia i lalo; ona ia aumaia lea o le Tusi o Mataupu Faavae ma Feagaiga, ma faataatia i ona luma, ma fai mai: ‘O upu tusitusia na a le Atua ia i tatou, e faatatau i le galuega a le Atua mai lava i le amataga o le lalolagi, toetoe lava, tau mai i o tatou aso. Ma o lenei la,’ sa ia faapea mai ai, ‘pe a faatusatusa atu i faaaliga ola [perofeta soifua], o na tusi o ni mea noa ia te au; e le o aumaia e na tusi le upu a le Atua e fitoitonu ia i tatou i le taimi nei, e pei ona faia e upu a se perofeta po o se tamalii ua umia le Perisitua Paia i o tatou aso ma le augatupulaga. E sili atu ia te au le i ai o faaaliga ola nai lo o tusitusiga uma o i ni tusi.’ O le mea lena sa ia tulitulimatagauina. Ina ua maea lana tautalaga, sa fai atu Uso Iosefa i le faapotopotoga: ‘Ua tau atu e Uso Polika ia te outou le upu a le Alii, ma ua ia tau atu ia te outou le mea moni.’” [I le Conference Report, Oketopa 1897, pp. 22–23]

Tolu: E sili atu le taua ia i tatou o le perofeta soifua nai lo se perofeta ua maliu.

Ua i ai i le perofeta soifua le mana o le TNT [TFA]. O le uiga o lau tala o le “Today’s News Today [Tala Fou o le Aso].” O faaaliga a le Atua ia Atamu sa lei faatonuina ai Noa i le auala e fau ai le vaa. Sa manaomia e Noa ana lava faaaliga. O le mea lea, o le perofeta aupito taua e oo mai i le taimi nei ia te oe ma au o ia lea o loo soifua mai i o tatou aso ma le augatupulaga, o le o loo faaalia mai i ai e le Alii Lona finagalo mo i tatou. O le mea lea, o le faitauga aupito sili ona taua e mafai ona tatou faitau i ai, o soo se upu lava lea a le perofeta o loo i ai i …mekasini a le Ekalesia i masina taitasi. O faatonuga mo la tatou savaliga mo le tai ono masina o loo maua i saunoaga o le konafesi aoao, ia o loo lomia i le mekasini o le Liahona .

Ou te matuai faafetai ona o le suesueina o le lipoti o le konafesi talu ai nei, o se vaega o se tasi o vasega o mataupu faalelotu—o le kosi ua faaautuina “Aoaoga a Perofeta Soifua,” numera 333. Ou te fia tau atu lena vasega ia te outou ma fautuina ia i ai sau kopi o le tusi lesona a le vasega mai le tou faletusi e tusa pe mafai ona e aveina le vasega pe leai. …

Ia faaeteete ia i latou o e faatuina mai perofeta maliliu e faasaga tau mai ai i perofeta soifua, aua e sili i taimi uma lava perofeta soifua.

Fa: O le a le taitaieseina lava le Ekalesia e le perofeta.

Na saunoa Peresitene Uilifoti Uitilafi: “Ou te fai atu ia Isaraelu, E lē tuua lava e le Alii aʼu po o se isi lava tagata e tu e avea ma Peresitene o le Ekalesia na te taitai ese outou. Ua lē i ai lena mea i le fuafuaga. Ua lē o i ai i le mafaufau o le Atua.” (The Discourses of Wilford Woodruff, selected by G. Homer Durham [Salt Lake City: Bookcraft, 1946], pp. 212–213.)

Na faamatala e Peresitene Marion G. Romney le mea lenei na tupu ia te ia:

“Ou te manatua lava ni tausaga ua leva, a o avea au ma se Epikopo sa ou valaaulia ai Peresitene [Heber J.] Grant e lauga i le matou uarota. Ina ua uma le sauniga, sa ou momolia o ia i le fale. … “O le tu ai i o’u tafatafa, sa tuu mai ai lona lima i luga o lo’u tauau ma fai mai: ‘Lo’u atalii e, ia taulai atu lau vaai i le Peresitene o le Ekalesia, a i ai se taimi e fai atu ai ia te oe e fai soo se mea, ae e sese, ia e faia, o le a faamanuia oe e le Alii ona o lena mea.’ Ma faatasi ai ma se faaivi o lona mata, sa ia faapea mai, ‘Ae aua la e te popole. O le a le faatagaina lava e le Alii ia lona fofoga taumomoli e taitai ese tagata.’ (I le Conference Report, Oketopa 1960, i. 78.)

Lima: E le manaomia ona i ai i le perofeta se aoaoga faapitoa faalelalolagi po o ni faailoga e saunoa atu ai i soo se mataupu pe faatino ai soo se mea i soo se taimi.

O nisi taimi, e i ai i latou o e manatu ua sili atu lo latou malamalama faalelalolagi e uiga i se mataupu faapitoa, nai lo o le malamalama faalelagi ua tuuina mai e le Atua i Lana perofeta e faatatau i lea lava mataupu. Latou te manatu e tatau i le perofeta ona i ai ni ona faailoga po o ni aoaoga faalelalolagi ia ua latou mauaina, ona faatoa latou talia lea o soo se mea e saunoa mai ai le perofeta, lea e ono feteenai ma o latou aoaoga faalelalolagi. O le a se tele o ni aoaoga faalelalolagi na i ai o Iosefa Samita? A o lea na ia tuuina mai faaaliga e uiga i soo se ituaiga mataupu. E lei i ai lava se tatou perofeta na maua sona faailoga faafomai i soo se mataupu, ae e pei ona fai mai se tasi o tagata, “Atonu e le o i ai se faailoga Ph.D o le perofeta, ae e mautinoa ua i ai lona LDS.” Tatou te uunaia [le maua o le] malamalama faalelalolagi i le tele o itu, ae ia manatua, afai e i ai se feteenaiga i le va o le malamalama faalelalolagi ma upu a le perofeta, ia outou tutu faatasi ma le perofeta, ma o le a faamanuiaina ai oe, ma e i ai le taimi o le a tauamiotonuina ai oe.

Ono: E le tau saunoa mai le perofeta, “Ua faapea ona fetalai mai o le Alii” ina ia tuuina mai ia i tatou ni tusitusiga paia.

O nisi taimi e i ai i latou o e faafinau i faaupuga. Latou te ono fai mai, na tuuina mai e le perofeta le fautuaga ia i tatou, ae e le faapea e tatau lava ona tatou mulimuli ai, seiiloga e faapea mai o se poloaiga. Ae ua fetalai mai le Alii e uiga i le Perofeta o Iosefa, “Ia outou uai atu i ana upu uma ma poloaiga o le a ia tuu atu ia te outou” (MF&F 21:4; ua faaopoopo faatusilima).

Ma i le saunoa ai e uiga i le talia o fautuaga mai le perofeta, i le MF&F 108:1, ua fetalai mai le Alii: “E Moni ua faapea ona fetalai mai o le Alii ia te oe, laʼu auauna Laimani: Ua faamagaloina oe i au agasala, ona ua e usiusitai i lou sau i luga nei i le taeao nei e maua atu fautuaga mai ia te ia o lē ua Ou tofia” (ua faaopoopo faatusilima).

Na saunoa mai Polika Iaga, “Ou te lei faia lava se lauga ma auina atu i le fanauga a tagata, ina ia latou le tauina o ni tusitusiga paia” (Journal of Discourses, 26 vols. [London: Latter-day Saints’ Book Depot], 13:95).

Fitu: E ta’u mai e le perofeta mea e tatau ona tatou iloa, ae le o taimi uma e ta’u mai ai mea tatou te fia iloa.

Sa faasea uso o Nifae e faapea, “Ua e taʼu mai ia te i matou ni mea faigata, ua sili atu nai lo mea e mafai ona matou gafatia.” Ae sa tali Nifae i le faapea atu, “E ave e tagata ua sala le upumoni o se mea faigata, ona e tuia ai i latou i le totonugalemu lava” (1 Nifae 16:1, 3). Po o le, pe a tuu i upu a se isi perofeta, “Ua tau tonu lava i le ulu.”

Na saunoa Peresitene Harold B. Lee:

“Atonu o le a e le fiafia i le mea e sau mai le pulega o le Ekalesia. E ono feteenai ma ou taofi faapolokiki. E ono feteenai ma ou taofi faaleagafesootai. E ono faalavelave ma nisi o tulaga o lou olaga tafao. … O lou saogalemu ma lo tatou saogalemu e faalagolago lea i le, pe tatou te mulimuli [i le perofeta soifua] pe leai. Ia taulai atu la tatou vaai i le Peresitene o le Ekalesia.” [I le Conference Report, Oketopa 1970, i. 152–153]

Ae o le perofeta soifua lea e le fiafia moni i ai le lalolagi. Na saunoa Peresitene Kimball, “E oo lava i totonu o le Ekalesia, e toatele ua matele e teuteu tuugamau o perofeta ua mavae ae fetogia faalemafaufau ia perofeta soifua” (Instructor, 95:257.)

Aisea? Aua o le perofeta soifua na te ta’u sa’o mai mea e tatau ona tatou iloa i le taimi nei, ae e mananao le lalolagi i perofeta lea ua maliliu, pe ia popole pea i mataupu e fitoitonu ia i latou lava. Ua mananao nisi e faapea o tagata atamamai i le saienisi o faiga faaupufai, e aua le saunoa le perofeta i mea tau polokiki. E mananao nisi ua fai mai o pulega o le tuputupu ae, e aua le saunoa le perofeta i mea e faatatau i le tuputupu ae. Ma faapena ona alu pea le lisi.

O le auala tatou te tali atu ai i saunoaga a se perofeta soifua pe a ia ta’u mai ia i tatou mea e manaomia ona tatou iloa, ae tatou te le fia faalogo i ai, o se suega lea o lo tatou faamaoni.

Na saunoa Peresitene Marion G. Romney, “O se mea faigofie le talitonu i perofeta ua maliliu.” Ona ia tuuina mai lea o le faamalamalamaga lenei:

“I se tasi o aso ina ua tuumuli Peresitene Grant, sa ou saofai ai i lou ofisa i le isi itula i le maea ai o se konafesi aoao. Sa sau se alii e vaai au, o se toeaina. Sa matuai le fiafia lava e uiga i mea sa tautalagia i lenei konafesi e nisi o le Usoga, e aofia ai ma au. Sa ou iloa mai lana tautala na sau o ia mai i se atunuu ese. Ina ua uma ona ou tau faatoatoaina o ia ina ia mafai ona faalogo mai, sa ou fai atu loa, ‘Aisea na e malaga mai ai i Amerika?’ ‘Ua ou iinei ona sa fai mai se perofeta a le Atua ou te sau.’ ‘O ai le perofeta,’ sa faaauau ona ou fai atu ai. ‘Uilifoti Uitilafi.’ ‘E te talitonu o Uilifoti Uitilafi o se perofeta a le Atua?’ ‘Ioe, o lea lava.’ ‘E te talitonu o Peresitene Iosefa F. Samita o se perofeta a le Atua?’ ‘Ioe, lau susuga.’

“Ona sau ai lea o le fesili e sili ona taua. ‘E te talitonu o Heber J. Grant o se perofeta a le Atua?’ O lana tali, ‘Ou te manatu e tatau ona tapuni lona gutu e uiga i fesoasoani [tupe] mo tagata matutua.’

“Ou te fai atu ia te outou, o le tulaga o lena alii, ua agai atu i le liliuese. Ua ia lafoaiina ona avanoa mo le ola e faavavau. E faapena foi i tagata uma o e e le mafai ona mulimuli i le Perofeta soifua a le Atua.” [I le Conference Report, Aperila 1953, i. 125.]

Valu: E le faapea e vaivai le perofeta ona o manatu o tagata.

O le a i ai taimi o le a tatau ai ona outou filifili i le va o faaaliga a le Atua ma manatu o tagata—i le va o le perofeta ma se sui i upufai faalemalo po o se polofesa. Na saunoa le Perofeta o Iosefa Samita, “Soo se mea e finagalo i ai le Alii ua tonu, e tusa lava pe o le a, e ui lava atonu e le mafai ona tatou malamalama i le mafuaaga ae seiloga lava ua tupu mai ia tulaga ona tatou iloa ai lea o le pogai” (Scrapbook of Mormon Literature, vol. 2, p. 173).

Mata e foliga talafeagai i se fomai mata le fai atu i ai e faamalolo se tagata tauaso e ala i le feanu i le palapala, ma fai ai se pauta, ma nini ai mata o le tagata, ona fai atu lea i ai e fufulu i se vaitaele le mama? Ae o le mea tonu lea na fai e Iesu i se tasi o tagata, ma sa faamaloloina o ia. (Tagai Ioane 9:6–7.) Mata e talafeagai le fofo o le lepela i le fai atu i se tagata e tofu faafitu i se vaitafe patino? Ae o le mea tonu lea na tau atu e le perofeta o Elisaia i le lepela e fai, ma sa faamaloloina o ia. (Tagai 2 Tupu 5.)

“Aua o o’u manatu e le o outou manatu, o o’u ala e le o outou ala, ua fetalai mai ai Ieova. Auā e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu.” [Isaia 55:8, 9]

Iva: E mafai e le perofeta ona maua faaaliga mo soo se mataupu lava—faaletino pe faaleagaga.

Na saunoa Polika Iaga:

“Sa tetee malosi nisi o alii taitai i Katelani ia Iosefa le Perofeta, ona o le aia fua i mataupu faaletino. …

“I se fonotaga faitele a le Au Paia, sa ou fai atu ai, ‘Outou e, Toeaina o Isaraelu, … e mafai lava e nisi o outou ona tusi se laina tavavae, i le va o le faaleagaga ma le faaletino i le Malo o le Atua, ina ia mafai ona ou malamalama i ai?’ Na leai se tasi o i latou na mafai ona faia. …

“Ou te luiina soo se tagata i luga o le fogaeleele e faasino mai le ala e tatau ona ui ai se Perofeta a le Atua, pe tau mai lona tiute, ae po o le a tonu le mamao e tatau ona alu ai, i le faatonuina mai o mea faaletino pe faaleagaga. O mea faaletino ma faaleagaga e le fesootai e le mafai ona tuueseeseina, ma o le a i ai pea lava faapena.” [Journal of Discourses, 10:363–364]

Sefulu: E mafai ona aafia le perofeta i mataupu faitele.

A amiotonu se nuu latou te mananao i se tagata e sili ona lelei e taitaia i latou i le faigamalo. Sa avea Alema ma ulu o le Ekalesia ma le malo i le Tusi a Mamona, sa avea Iosefa Samita ma pulenuu o Navu, ae o Polika Iaga sa avea ma kovana o Iuta. Sa aafia malosi tele Isaia i le tuuina atu o fautuaga e uiga i mataupu faaupufai, ma o ana upu na fetalai mai ai le Alii lava Ia, “Ua silisili lava upu a Isaia” (3 Nifae 23:1). O i latou o e aveeseina perofeta mai i faiga faaupufai, o le a latou aveesea le Atua mai i faigamalo.

Sefulutasi: O vaega e lua e sili ona faigata ona mulimuli i le perofeta, o e faamaualuluga ona ua atamamai, ma e faamaualuluga ona ua mauoa.

Atonu e manatu le au popoto, e pau le taimi e musuia ai le perofeta o le taimi lea e tutusa ai lona finagalo ma o latou manatu, a le o lena, na pau le mea o loo faia e le perofeta o le faailoa mai o lona manatu—talanoa mai o se tagata masani. Atonu e manatu le au mauoa latou te le manaomia se fautuaga mai se perofeta faatauvaa.

I le Tusi a Mamona, tatou te faitau ai:

“E, lena fuafuaga faatogafiti e a lē ua leaga! E, le fiatagata e, ma vaivaiga, ma le valelea o tagata! Pe a aoaoina i latou ua latou manatu ua popoto i latou, ma latou lē faalogologo ai i le fautuaga a le Atua, ona ua latou tuueseina, i le manatu ua latou iloa mo i latou lava, o le mea lea, o lo latou poto o le valea lea, ma o le a lē aoga ia te i latou. Ma o le a fano i latou.

“Peitai e lelei le aoaoina pe afai latou te faalogologo i fautuaga a le Atua.

“Ma ai se e tuitui atu, o ia e tatala mai i ai e ia; ma o e ua popoto, ma e ua aoaoina, ma i latou o e ua mauoa, o e ua faafefeteina ona o lo latou aoaoina, ma lo latou popoto, ma a latou ʼoa—ioe, o i latou ia o i latou o e ua inosia e ia; ma vagana ai ua latou lafoai ese ia mea, ma manatu o i latou o ni vale i luma o le Atua, ma o ifo i lalo i le loloto o le lotomaualalo, e lē tatala mai e ia ia te i latou.” [2 Nifae 9:28, 29, 42; ua faaopoopo le faatusilima.]

Sefululua: O le a le lauiloa tele le perofeta i le lalolagi po o mea faalelalolagi.

A o faaali mai e se perofeta le upumoni, e vaeluaina ia tagata. E faalogo tagata loto faamaoni i ana upu, ae o tagata le amiotonu a le o le le amanaiaina o le perofeta po o le tau foi ma ia. Ina ua ta’u atu e perofeta agasala a le lalolagi, o tagata o le lalolagi, a le o le manao e faatapuni le fofoga o le perofeta po o le amio foi e pei lava e le’i i ai le perofeta, nai lo le salamo i a latou agasala. O le lauiloa e le’i avea lava ma se suega o le mea moni. E toatele perofeta ua fasiotia pe tutulia i fafo. A o tatou latalata atu i le afio mai faalua o le Alii, e mafai ona e iloa, a o faateteleina le amioleaga o tagata o le lalolagi, o le a faaitiitia ai foi le lauiloa o le perofeta ia i latou.

Sefulutolu: O le perofeta ma ona fesoasoani o le Au Peresitene Sili lea—o le korama aupito maualuga i le Ekalesia.

I le Mataupu Faavae ma Feagaiga, na taua ai e le Alii le Au Peresitene Sili o le “aufono aupito maualuga lenei o le Ekalesia” (107:80) ma fetalai mai, “o soo se tasi e talia aʼu, ua talia e ia i latou na, o le Au Peresitene Sili, o e ua Ou auina atu” (112:20).

Sefulufa: O le perofeta ma le au peresitene—o le perofeta soifua ma le Au Peresitene Sili—a tatou mulimuli ia i latou, o le a tatou manuia, a tatou teena i latou o le a tatou puapuagatia.

Na faamatala mai e Peresitene Harold B. Lee le mea lenei na tupu mai le talafaasolopito o le Ekalesia:

“Sa faamatalaina le tala i aso popofou o le Ekalesia—ae maise lava, ou te manatu, i Katelani—lea sa fono faalilolilo ai nisi o le usoga o taitai i aufono pulefaamalumalu o le Ekalesia, ma taumafai e taupulepule pe faapefea ona latou aveesea le tulaga faaletaitai o le Perofeta o Iosefa. Sa latou faia le mea sese o le valaaulia o Polika Iaga i se tasi o nei fonotaga faalilolilo. Sa ia aoaiina i latou, ina ua ia faalogo i le faamoemoega o le latou fonotaga. O le vaega lenei o lana upu na fai atu: ‘E le mafai ona outou faatamaia le tofiaina o se perofeta a le Atua, ae e mafai ona outou motusia noataga o loo fusia ai outou i le perofeta a le Atua ma faagogoto ai outou lava i seoli.’” [I le Conference Report, Aperila 1963, i. 81.]

I se konafesi aoao a le Ekalesia, na fai mai ai Peresitene N. Eldon Tanner:

“Sa saunoa manino atu le Perofeta i le taeao o le Aso Faraile, e tau mai ia i tatou o tatou tiutetauave. …

“Ina ua mavae lea, sa fai mai se alii ia te au, ‘E te silafia, e i ai tagata o le tatou setete e talitonu i le mulimuli i le Perofeta i mea uma latou te manatu e sao, ae a oo loa i se mea latou te manatu e le sao, ma e le manaia ia i latou, ona ese lea o lena mea.’ Sa ia faapea mai, ‘Ona perofeta loa lea o le tagata ia. Latou te filifili i mea e finagalo ai le Alii ma mea e le finagalo ai le Alii.’

“Sa ou mafaufau e ese le sao, ma e ese le ogaoga, pe a amata ona tatou filifili po o le fea o feagaiga, po o le fea o poloaiga o le a tatou tausia ma mulimuli ai. A tatou filifili e faapea, e i ai nisi o feagaiga ma poloaiga o le a tatou le tausia pe mulimuli ai, ua tatou taulimaina le tulafono a le Alii i o tatou lava lima ma avea ai ma o tatou lava perofeta, ma ia talitonu mai, o le a taitaieseina ai i tatou, aua o i tatou o perofeta pepelo ia i tatou lava pe a tatou le mulimuli i le Perofeta a le Atua. Leai, e le tatau lava ona tatou faailogaina le va o nei poloaiga, e faapea o mea na e tatau ma e le tatau ona tatou tausia.” [I le Conference Report, Oketopa 1966, i. 98; ua faaopoopo le faatusilima]

Na saunoa le Perofeta o Iosefa Samita, “Vaai atu i le Au Peresitene e maua mai ai faatonuga” (Teachings of the Prophet Joseph Smith, selected by Joseph Fielding Smith [Salt Lake City: Deseret Book Co., 1938], p. 161). Ae sa lei vaai atu Almon Babbitt [i le Peresitene], ma i le Mataupu Faavae ma Feagaiga vaega e 124, fuaiupu e 84, o loo tau mai ai e le Alii: “Ma i laʼu auauna o Almon Babbit, e tele mea ua Ou lē fiafia ai i ai; faauta, ua saili o ia e faatu lana fautuaga nai lo le fautuaga ua Ou faauuina, le fautuaga lava lea a le Au Peresitene o laʼu Ekalesia.”

O le faaiuga, sei o tatou aoteleina lenei ki maoae, o nei “Mataupu Faavae e Sefulufa o le Mulimuli i le Perofeta,” aua ua faalagolago i ai lo tatou faaolataga.

“Muamua: Ua na o le perofeta lava le tagata e saunoa mo le Alii i mea uma.

Lua: E sili atu le taua ia i tatou o le perofeta soifua nai lo o tusitusiga faavae.

Tolu: E sili atu le taua ia i tatou o le perofeta soifua nai lo se perofeta ua maliu.

Fa: O le a le taitaieseina lava le Ekalesia e le perofeta.

Lima: E le manaomia ona i ai i le perofeta se aoaoga faapitoa faalelalolagi po o ni faailoga e saunoa atu ai i soo se mataupu pe faatino ai soo se mea i soo se taimi.

Ono: E le tau saunoa mai le perofeta, “Ua faapea ona fetalai mai o le Alii” ina ia tuuina mai ia i tatou ni tusitusiga paia.

Fitu: E ta’u mai e le perofeta mea e tatau ona tatou iloa, ae le o taimi uma e ta’u mai ai mea tatou te fia iloa.

Valu: E le faapea e vaivai le perofeta ona o manatu o tagata.

Iva: E mafai e le perofeta ona maua faaaliga mo soo se mataupu lava, faaletino pe faaleagaga.

Sefulu: E mafai ona aafia le perofeta i mataupu faitele.

Sefulutasi: O vaega e lua e sili ona faigata ona mulimuli i le perofeta, o e faamaualuluga ona ua atamamai, ma e faamaualuluga ona ua mauoa.

Sefululua: O le a le lauiloa tele le perofeta i le lalolagi po o mea faalelalolagi.

Sefulutolu: O le perofeta ma ona fesoasoani o le Au Peresitene Sili lea—o le korama aupito maualuga i le Ekalesia.

Sefulufa: O le perofeta ma le au peresitene—o le perofeta soifua ma le Au Peresitene Sili—a tatou mulimuli ia i latou, o le a tatou manuia, a tatou teena i latou o le a tatou puapuagatia.

Ou te molimau atu e moni nei mataupu faavae e sefulufa o le mulimuli i le perofeta soifua. Afai tatou te fia iloa po o le a le lelei o lo tatou tulaga ma le Alii, ona tatou fesili ifo lea ia i tatou lava, po o le a se lelei o lo tatou tulaga ma Lana taitai i le olaga lenei. O le a le latalata o le ogatasi o o tatou olaga ma le auauna faauuina a le Alii—le Perofeta soifua—Peresitene o le Ekalesia, faapea ma le Korama a le Au Peresitene Sili?

O lau tatalo, ia faamanuia i tatou uma e le Atua ia tatou vaai atu i le perofeta ma le au peresitene i aso faigata ma sili ona taua o loo i lumanai. I le suafa o Iesu Keriso. Amene.