Inisitituti
Mataupu 3: Soloa’iga i le Au Peresitene

Mataupu 3

Soloa’iga i le Au Peresitene

O Le Faatomuaga

O le soloa‘iga i le Au Peresitene o le Ekalesia na faavaeina e le Alii. E leai lava se taimi e lei i ai se taitaiga musuia i le Ekalesia, ma e leai foi se pogai mo ni masalosaloga po o ni feeseeseaiga i le po o ai o le a avea ma Peresitene e sosoo ai o le Ekalesia. Na faamalamalama mai ePeresitene Harold B. Lee (1899–1973): ““Ua silafia [e le Alii] le ua finagalo e pulefaamalumalu i lana ekalesia, ma o le a na le faia lava se mea sese. E le faafuasei ona faia e le Alii ni mea. E lei faafuasei lava ona ia faia se mea” (i le Conference Report, Oct. 1970, 153; po o le Improvement Era, Dec. 1970, 127). Na aoao maiPeresitene Ezra Taft Benson (1899–1994), “Ua silafia e le Atua mea uma, o le iuga mai le amataga, ma e leai se tagata e avea ma peresitene o le ekalesia a Iesu Keriso i se ala faafuasei, pe tumau ai iina ona o se laki, pe maliu ona o se mea tupu fua” (“Jesus Christ—Gifts and Expectations,” New Era, Me 1975, 16–17).

Na folafola mai e le Atua e ala mai i le Perofeta o Iosefa Samita (1805–44), o le a Ia “tuu atu e ia i e faamaoni lea fasifuaitau ma lea fasifuaitau, o le mataupu i lea mataupu” (MF&F 98:12; tagai foi i le MF&F 42:61; 128:21). O lenei faagasologa o le faailoa malie mai o aoaoga faavae ma faiga faavae o loo vaaia i le atinaega musuia o mataupu faavae mo le soloaiga i le Au Peresitene o le Ekalesia.

A o e suesue i lenei mataupu, mafaufau loloto po o le a le eseesega o le faagasologa o le valaauina o se Peresitene fou o le Ekalesia mai le faagasologa faapolokiki o le filifiliga o taitai faalemalo. O le malamalama i le ala e filifili ai e le Alii se Peresitene fou o le Ekalesia, o le a faateleina ai lou faatuatuaina ma le talitonu i le Peresitene o loo i ai nei o le Ekalesia.

Faamatalaga

3.1

O le Peresitene Lagolago o le Ekalesia

“I le aso 5 o Tesema 1834, na faauu ai e le Perofeta o Iosefa Samita ia Oliva Kaotui e avea ma Peresitene Lagolago o le Ekalesia [tagai i le History of the Church, 2:176]. Sa i ai faatasi o ia ma le Perofeta i le taimi na toefuatai mai ai le Perisitua Arona ma le Perisitua Mekisateko. Ina ua faatulagaina le Ekalesia a Iesu Keriso i le 1830, Sa tu ai Oliva i talane o Iosefa i le avea ai ma ‘toeaina lona lua’ i le pule [tagai i le MF&F 20:2–3]. O le mea lea, soo se taimi lava na toefuatai mai ai le pule po o ki o le perisitua, sa i ai lava Oliva faatasi ma le Perofeta o Iosefa. ‘Sa alagatatau e tusa ai ma le tulafono faalelagi o molimau, le i ai o se soa mo Iosefa Samita e umia na ki’ [Joseph Fielding Smith, Doctrines of Salvation, comp. Bruce R. McConkie (1954), 1:211]. Sa le gata ina ia fesoasoani Oliva Kaotui ia Iosefa i le pulefaamalumalu ai i le Ekalesia, ae sa tatau foi ona tu o ia faatasi ma le Perofeta o se molimau lona lua o le Toefuataiga [tagai i le MF&F 6:28; tagai foi i le 2 Korinito 13:1]. E oo ane i le 1838 ua aveesea le tofi o Oliva Kaotui o le Peresitene Lagolago ona o le liliuese ma le tape o lona igoa, ae peitai, i le 1841 na valaauina ai e le Alii ia Ailama Samita e tauavea lenei tofi (tagai i le MF&F 124:94–96). O le Peresitene ma le Peresitene Lagolago, po o le molimau muamua ma le lona lua, o le a faamauina a laua molimau i o laua toto i le Falepuipui i Karefasi” (Church History in the Fulness of Times, 2nd ed. [Church Educational System manual, 2003],153; ua faaopoopo le faamamafa).

Na faamatala ePeresitene Iosefa Filitia Samita (1876–1972) le ala na faataunuuina ai le tulafono o molimau (tagai i le 2 Korinito 13:1) i le i ai lea o Oliva Kaotui i taimi uma na toefuatai mai ai ki o le perisitua:

“Na valaauina e le Alii ia Oliva Kaotui e avea ma molimau lona lua e tu i le ulu o lenei tisipenisione e fesoasoani i le Perofeta i le taulimaina o ki. Ua faailoa mai e faamaumauga e faapea, o taimi uma lava na maua ai e le Perofeta le pule ma ki o le perisitua mai le lagi, sa faapena foi ona i ai Oliva Kaotui faatasi ma le Perofeta i le tuuina mai o na mana. Pe ana tumau faamaoni Oliva Kaotui ma pe ana umi atu lona soifua nai lo le Perofeta i lalo o na tulaga, semanu o ia e sosoo e avea ma Peresitene o le Ekalesia e tusa ai ma le uiga tonu o lenei valaauga faalelagi” (Doctrines of Salvation, comp. Bruce R. McConkie [1954], 1:213; ua faaopoopo le faamamafa). I le aso 19 o Ianuari, 1841, ona sa lei tumau Oliva i le faamaoni, “na poloaiina ai e le Alii ia Iosefa Samita e faauu Ailama Samita ma tuu atu i ona luga ki uma, pule, ma aia na tuuina i luga o le ulu o Oliva Kaotui, ma fai ai o ia ma ‘Peresitene Lona Lua’ o le Ekalesia” (Doctrines of Salvation, 1:220).

Iosefa ma Ailama Samita

Iosefa ma Ailama Samita

Na saunoaPeresitene Polika Iaga (1801–77):

Ana faapea na soifua Ailama, semanu e leai sona tofi i le va o Iosefa ma le Toasefululua, ae semanu e suitulaga mo Iosefa.—Pe na faauu la e Iosefa se tagata e suitulaga ia te ia? Ioe, sa ia faia. O ai la? O Ailama, ae peitai, na maliufasia o Ia ao lei faia e Iosefa. Ana faapea na soifua pea Ailama, semanu e fai o ia ma sui mo Iosefa” (“Conference Minutes,” Times and Seasons, Oke. 15, 1844, 683).

Na faamalamalama mai ePeresitene Iosefa Filitia Samita (1876–1972) le pogai ua le toe i ai ai se Peresitene Fesoasoani i le Ekalesia:

“O nisi taimi na fesiligia ai le fesili: Afai sa faauuina Oliva Kaotui la te umia faatasi ma le Perofeta ia ki, ma ina ua aveese ana ki ona o le solitulafono, ona tuuina atu lea o lenei pule ia Ailama Samita, aisea la ua le faia ai i nei aso i le Ekalesaia lea lava faiga e tasi, ma se Peresitene Fesoasoani faapea ai ma fesoasoani e toalua i le Au Peresitene Sili?

“E faigofie lava le tali i lenei mea. Ona o le tulaga ese lava o le manaomia o molimau e toalua i le faavaega o le galuega, ua le toe manaomia ina ua uma ona faavaeina le galuega. O Iosefa ma Ailama Samita ua tutu i le ulu o lenei tisipenisione, e umia faatasi ki, e avea ma molimau e toalua na manaomia e faataunuu ai le tulafono e pei ona faatulaga mai e lo tatou Alii i lana tali i tagata Iutaia [tagai i le Mataio 18:16]. Talu ai o le a le toe fuataiina lava le ekalesia, o le a le toe i ai se taimi e toe aliae mai ai lenei tulaga. Tatou te vaavaai uma atu i tua i molimau faapitoa e toalua, na valaauina e fai ma molimau ua talafeagai ai ma le tulafono faalelagi” (Doctrines of Salvation, 1:222; ua faaopoopo le faamamafa).

3.2

O Le Korama a Aposetolo e Toasefululua

“O le tasi o mea aupito taua na tupu i le toefuataiga o le ekalesia a le Faaola, o le faatulagaina lea o le Korama a Aposetolo e Toasefululua. Ae a o lei faatulagaina foi le Ekalesia, sa faatalitali lava le au paia i lenei laasaga taua. … [Ia Iuni 1829] na faatonuina ai i se faaaliga ia Oliva Kaotui ma Tavita Uitimera e saili mai le toasefululua o e o le a ‘ua valaaulia i latou e o atu i le lalolagi atoa ma talai atu laʼu talalelei i tagata uma’ [tagai i le MF&F 18:26–37]. Mulimuli ane, na valaauina ai foi Matini Harisi e fesoasoani i lenei filifiliga. O le uiga o lenei mea, o molimau e toatolu o le Tusi a Mamona, i lalo o le faatonuga ma le maliega a le Au Peresitene Sili, o le a latou filifilia Aposetolo e Toasefululua o e na tatau ona auauna atu o ni molimau faapitoa o le Faaola i lenei tisipenisione” (Church History in the Fulness of Times,153–54). O lenei filifiliga sa faia i le taimi o se konafesi faapitoa i le aso 14 o Fepuari, 1835.

“Mo ni nai tausaga sa … tapenaina ai ma le faaeteete e le Alii le Korama a Aposetolo e Toasfululua e tauavea tulaga faaleautaitai o le Ekalesia. Ina ua valaauina le Toasefululua mo le uluai taimi i le 1835, sa faatapulaaina o latou tiute i eria i fafo atu o siteki na faatulagaina, peitai sa lei umi ae faalautele atu o latou tiutetauave ina ia aofia ai le pule i luga o tagata uma o le Ekalesia. …

Iosefa Samita o loo aoaoina le Toasefululua

O le Perofeta o Iosefa Samita o loo aoaoina le Toasefululua

© 1998 Paul Mann

“O le misiona a le Toasefululua i Peretania Tele na tuufaatasia ai i latou o se korama soofaatasi i lalo o le taitaiga a Polika Iaga. Ina ua latou toe taliu mai i Amerika, sa faaopoopoina e le Perofeta o Iosefa o latou tiutetauave i mataupu faaletino ma faale-ekalesia. … O le Toasefululua sa i ai faatasi ma i latou o e na muamua maua faatonuga mai ia Iosefa Samita e uiga i autaunonofo ma sauniga o le malumalu. Sa tuuina atu i sui o le Toasefululua le tiutetauave i lomiga a le Ekalesia, na latou faatonutonuina le valaauina, tofiaina, ma le aoaoina o faifeautalai, sa latou pulefaamalumalu i konafesi i totonu o le galuega ma i Navu, ma sa latou vaaia paranesi i atunuu i fafo.

“O le mea aupito taua, i le iite ai o Iosefa Samita e faapea, atonu e le o mamao ae maliu [o lea], i le fitu masina mulimuli o lona soifua, sa ia matuai faatoatoaina ai le tapenaga o le Toasefululua. Sa toetoe lava o aso uma na latou fono ai ma le korama e aoao i latou ma tuu atu ia i latou ni tiutetauave faaopoopo. I se fonotaga na ese lava a le aufono i le faaiuga o Mati 1844, sa ia tau atu ai ma le faamaoni i le Toasefululua e faapea, na mafai nei ona ia tuua i latou aua ua maea lana galuega ma ua faataatia le faavae ina ia mafai ona fausiaina ai le malo o le Atua” (Church History in the Fulness of Times, 293–94).

Sa aveaPeresitene Uilifoti Uitilafi (1807–98) ma se tasi o le Korama a Aposetolo e Toasefululua i le 1844. Sa ia faamanatu mai aoaoga a Iosefa Samita i Aposetolo e Toasefululua i lena taimi:

“O au o se molimau ola i le molimau na tuuina atu e [Iosefa Samita] i Aposetolo e Toaseululua i le taimi na maua uma ai e i matou o matou faaeega paia mai i lalo o ona aao. Ou te manatua le tautalaga faaiu na tuuina mai e [Iosefa Samita] ia i matou a o lumanai lona maliu. O le taimi lea ae matou te lei o atu i a matou misiona i Sasae. E tusa ma le tolu itula o tu o ia. Na faatumuina le potu e pei o se afi mumu, o ona fofoga na manino e pei o le pulu manino samasama o le laau o le paina, ma na faaofuina o ia i le mana o le Atua. Na ia faamalamalamaina mai ia i matou o matou tiute. Na ia faataatia mai i o matou luma le atoatoaga o lenei galuega taua a le Atua; ma i lana saunoaga ia i matou na ia faapea mai ai: ‘Na faamauina i luga o lo’u ulu ki uma, o mana uma, ma aoaoga faavae uma o le ola ma le faaolataga ia na tuuina mai e le Atua i soo se tagata o e na ola i luga o le fogaeleele. Ma o nei mataupu faavae ma lenei Perisitua ma le mana a lenei augatupulaga faaiu ma le maoae lea na finagalo le Atua o le Lagi e tuuina mai Lona aao e faatuina i le lalolagi. O lenei,’ na ia saunoa mai ai, e faasino i le Toasefululua, ‘Ua ou faamauina i luga o o outou ulu ki uma, mana uma, ma mataupu faavae uma ia na faamauina i luga o lo’u ulu.’ …

“Ina ua maea ona laugaina i matou i lenei mea na ia saunoa mai: ‘Ou te tauina atu ia te outou, o avega mamafa o lenei malo ua taatia nei i luga o o outou tauau; ua matua tatau ona outou tauaveina i le lalolagi atoa’” (Deseret Weekly, Mar. 19, 1892, 406; tagai foi Teachings of Presidents of the Church: Wilford Woodruff [2004], xxxii)

Iosefa Samita o loo aoaoina Aposetolo

A o lumanai lona maliu, na saunia ai e le Perofeta o Iosefa Samita le Au Aposetolo e taitaia le Ekalesia. Sa faamautinoa i lenei mea, o le a faaauau pea le galuega a le Alii i lalo o le taitaiga ai latou o loo i ai le pule.

Sa faamalamalama mai eElder Parley P. Pratt (1807–57), o le sa avea foi ma se tasi o le Korama a Aposetolo e Toasefululua i lena vaitau e faapea, i le fonotaga lava lea e tasi, sa faaauau ai e le Perofeta o Iosefa Samita “ona tuu atu i luga o le toeaina o [Polika] Iaga, o le Peresitene o le Toasefululua, ia ki o le mana o faamauga …

“O le ki mulimuli lenei o le perisitua e aupito paia i ki uma, ma ua na o le au peresitene sili o le ekalesia e faatatau i ai” (“Proclamation,” Millennial Star, Mar. 1845, 151).

O le Korama a Aposetolo e Toasefululua e umia uma ki, pule ma le mana o le perisitua e manaomia e taitai ai le Ekalesia (tagai i le MF&F 107:23–24; 112:14–15). O sui taitoatasi o le Korama a Aposetolo e Toasefululua ua tuuina atu i ai ki o le perisitua i le taimi o lona faauuga o se Aposetolo ma le valaauga i le Korama. E nao le Peresitene o le Ekalesia e i ai le pule e faaaoga ai ki uma o le perisitua, ae, e pei ona faamalamalama mai e Peresitene Gordon B. Hinckley (1910–2008), o sui taitoatasi o le Korama a le Toasefululua “ua umia ki o lenei tisipenisione e faaagaaga mo le lumanai. O tulaga faavae o loo i ai i lena faaagaaga paia, o le mautinoa lea le faaauau pea o le tulaga faaleautaitai o le Ekalesia” (“He Slumbers Not, nor Sleeps,” Ensign, Me 983, 6; ua faaopoopo le faamamafa).

3.3

Sa faamaonia mai e le Alii i le Au Paia e Faapea o Polika Iaga o le Sui lea o Iosefa Samita.

Sa foliga Polika Iaga ia Iosefa Samita

E faitau selau le Au Paia na auai i le taimi na foliga ai Polika Iaga ia Iosefa Samita O lenei tino mai na faailo manino mai ai sa i ai ia Polika Iaga ki o le perisitua e taitai ai le Ekalesia.

Ina ua mavae le maliu o le Perofeta o Iosefa Samita, sa i ai ni vevesi i le po o ai e tatau ona taitaia le Ekalesia O Sidney Rigdon, o se tasi o le Au Peresitene Sili, sa i ai i le vaega o i latou na matuai mananao e sui ia Iosefa. I le aso 8 o Aokuso, 1844, na faaali tino faalauaitele mai ai e le Alii i le Au Paia, o Polika Iaga, le Peresitene o le Korama a Aposetolo e Toasefululua, na filifilia e avea ma perofeta fou o le Ekalesia.

Na faamatalaina ePeresitene George Q. Cannon (1827–1901), o le sa tautua mulimuli ane i le Au Peresitene Sili, lenei faaali tino mai faavavega mai le Alii:

“Ina ua mavae le maliufasia o le Perofeta, sa vave ona toe foi mai le Toasefululua i Navu, ma iloa ai losilosiga a Sidney Rigdon. Sa ia fai mai na manaomia se tagata e vaaia le Ekalesia, ma o ia lea o lena tagata. Sa ia atofaina le aso o le a filifilia ai le tagata e vaai [le Ekalesia], ma ioe, sa i ai o ia i lena fonotaga, lea sa fai i fafo. Sa malosi le agi a le savili agai atu i le tulaga i lea taimi, o lea sa lei fuafuaina ai le faia o se tulaga i se taavaletoso, lea na toso atu i le itu i tua o le faapotopotoga, ma na faapea ona nofoia e ia, o [Viliamu] Mareko, ma nisi o tagata. Sa taumafai o ia e tautala, ae sa matamuli tele. Sa avea o ia ma tulafale a le Ekalesia; peitai, i lenei aso, sa le manuia ai lana lafolafo, ma sa matuai tautoai ma le lelei lana tautalaga. A o le taimi lea, na oo mai ai Peresitene Iaga ma nisi o le usoga ma o atu i le tulaga. E oo ane i le taimi lenei ua le toe agi le savili. Ina ua uma ona tautala Sidney Rigdon, na tulai Polika Iaga ma saunoa atu i le faapotopotoga, lea na faliu atu e vaai ma faalogo ia te ia, ma u ai o latou tua i le taavaletosolima na nofoia e Sidney” (Deseret News, Fep. 21, 1883, 67).

“O le taimi muamua lea na faalogoina ai e tagata lona leo [Polika] talu mai ona alu i sasae i lana misiona, ma o le aafiaga ia i latou sa matuai sili ona matagofie. O ai na i ai i lena aso e mafai ona faagaloina le lagona na oo ifo i o latou luga! Afai na toetu Iosefa mai le oti ma toe saunoa mai ia i latou, atonu o le a le sili atu le tulaga faateia nai lo le tulaga na oo i ai le toatele na i ai i lena faatasiga. O le leo lava o Iosefa lava ia; ma na le gata o le leo lava o Iosefa na faalogoina; ae na foliga mai i le vaai a tagata faapei o le tagata lava lea o Iosefa lea na tu mai i o latou luma. Matou te lei faalogo lava i se isi mea na tupu e sili atu lona matagofie ma le faavavega nai lo le mea na tupu i lena aso i luma o lena faapotopotoga. Sa tuuina mai e le Alii i Lona nuu se molimau na leai ai se avanoa e masalosalo ai po o ai le tagata na Ia filifilia e taitaiina i latou. Sa latou vaaia ma faalogoina i o latou lava mata ma taliga moni, ona oo mai lea o upu na fofogaina, lea na oo mai faatasi ma le mana faatalitonuina o le Atua, i o latou loto, ma na faatumulia i latou i le Agaga ma le olioli tele. Sa i ai le faanoanoa, ma, atonu foi i nisi o loto, sa i ai le masalosalo ma le le mautonu; ae o lenei sa manino mai i tagata uma o le tamalii lenei o le na faaeeina mai i ai e le Alii le pule na tatau ai, e galue ai i lo latou lotolotoi e suitulaga ia Iosefa” (“Joseph Smith, the Prophet,” Juvenile Instructor, Oct. 29, 1870, 174–75).

E faitau selau tagata o le Ekalesia na molimauina le vavega, lea na faamatalaina e Zera Pulsipher (1789–1872) o le Au Peresitene o Fitugafulu, na faapea ona tupu i le fonotaga:

“Na amata ona saunoa Polika Iaga, ma o le taimi lena sa ou saofai ae u atu lou tua i le tulaga e pei ona sa faia e le toatele. Ma ina ua saunoa Polika sa saunoa mai i le leo o Iosefa ma sa matou faliu atu e vaai ia Polika o saunoa mai i le leo o Iosefa ma vaaia le tuuina ifo o le ofutele o Iosefa i ona luga. Sa tutusa lava le uiga na malamalama i ai tagata. Na tu Polika i le taumua o le Toasefululua o le mea lea, na liliu atu ai le ekalesia ia te ia” (i le Lynne Watkins Jorgensen and BYU Studies staff, “The Mantle of the Prophet Joseph Passes to Brother Brigham: A Collective Spiritual Witness,” BYU Studies, vol. 36, no. 4 [1996–97], 173; ua faaopoopo le faamamafa).

Sa faamaumauina foi eDrusilla Dorris Hendricks lona aafiaga:

“Sa amata ona saunoa Peresitene Polika Iaga. Sa ou tu faafuasei i luga e autilo ma vaai pe sa le o Uso Iosefa ona o lona leo ma ana taga uma lava. Sa faigofie lava ona iloa e tagata uma o le Au Paia o Aso e Gata Ai, le, o ona luga na tuu ifo i ai le perisitua aua na umia e Polika Iaga ia ki” (i le Jorgensen and BYU Studies staff, “The Mantle of the Prophet Joseph,” 163; ua faaopoopo le faamamafa).

Sa tusia eNancy Naomi Alexander Tracy :

“E mafai ona ou tautino atu, o le ofutele o Iosefa na pau ifo i luga o Polika i lena aso, e pei foi ona pau ifo [le ofutele] o Elia ia Elisaia [tagai 1 Tupu 19:19; 2 Tupu 2:11–15], aua na pei uma lava lona leo, ana taga, ma mea uma o Iosefa. Sa foliga mai sa matou toe i ai faatasi ma ia. Sa lagolagoina o ia e le leo o tagata e fai ma perofeta, tagatavaai, ma talifaaaliga” (i le Jorgensen and BYU Studies staff, “The Mantle of the Prophet Joseph,” 177; ua faaopoopo le faamamafa).

3.4

Mataupu Faavae Taua o le Soloaiga

Peresitene Spencer W. Kimball faatasi ma Peresitene Gordon B. Hinckley

O Peresitene Spencer W. Kimball, faatasi ma Peresitene Gordon B. Hinckley o loo uuina lona lima ma Peresitene Ezra Taft Benson o loo talanoa atu ia te ia

Sa faamamafaina i se tusiga i le Ensign i le 1996, ia mataupu faavae taua o le soloaiga mai le tasi Peresitene i le isi e sosoo ai:

“E ui ina i ai nai eseesega i faiga ma aiaiga faavae faapitoa o soloaiga eseese i au peresitene talu ona maliu le Perofeta o Iosefa Samita mai le tasi ma le isi, ae e tutusa lava mataupu faavae autu ma o loo mausali ona faavae i faaaliga. E fa mataupu faavae autu ma faiga masani sa faagaoioia i le 1844 ma sa faaali tino mai talu mai soloaiga uma lava.

“1. Ua tuuina atu ki o le malo i le Toasefululua. O le mataupu faavae po o le laasaga muamua i le soloaiga, o le tuuina atu o ki o le malo i alii uma o e ua faauuina i le tulaga paia faaaposetolo ma vaetofia o se sui o le Korama a Aposetolo e Toasefululua (tagai i le MF&F 27:12–13). …

“2. Tulaga Sinia: o se mataupu faavae autu o le au peresitene. O le vaega e iloilo ai po o ai e pulefaamalumalu i le Toasefululua ma le e mafai ona faaaogaina ma le naunautai ki uma o le malo i le maliu ai o le Peresitene o le Ekalesia, o le mataupu faavae lea o le tulaga sinia. I le 1835, ina ua valaauina le uluai Korama e Toasefululua, o le tulaga sinia sa faavasegaina i tausaga o le soifua. Talu mai lena taimi, ua iloiloina ai le tualga sinia i le aso o le faauuga i le Korama a le Toasefululua. …

“3. A maliu le Peresitene, ua leai se Au Peresitene SIli i le Toasefululua. O le mulimuli ai i mataupu faavae na aoao mai e le Perofeta o Iosefa Samita, pe a maliu le Peresitene o le Ekalesia, e otometi lava ona soloia le korama a le Au Peresitene Sili ma o fesoasoani, afai sa latou i ai muamua i le Korama a Aposetolo e Toasefululua, e toe foi atu i o latou tulaga o le leva ona i ai i lena korama. O le Aposetolo sinia, i le avea ai ma Peresitene o le Toasefululua, e otometi lava, e ala i le tulaga o le leva, ona avea ma ‘Faitaulaga Sili Pulefaamalumalu’ o le Ekalesia ma, faapena ona umia ma faaaoga ai ma le naunautai ki uma o le malo ma ‘pulefaamalumalu ai i le ekalesia atoa’ (tagai i le MF&F 107:65–66, 91). ‘E tutusa lava le pule’ ma le Au Peresitene Sili, o lenei korama pulefaamalumalu o Aposetolo e Toasefululua, e tutusa lava le avea o se Au Peresitene o le Ekalesia e pei o le Au Peresitene Sili pe a faatulagaina ma faagaoioia atoatoa (tagai i le MF&F 107:23–24). E faapena foi, o le Peresitene o le Toasefululua i le taimi lena, e tutusa lava le avea ma Peresitene o le Ekalesia i le faamoemoegaa ma le pule, pe a oo ina lagolagoina o ia i se Au Peresitene fou faatoa faatulagaina. …

“4. Toefaatulagaina o le Au Peresitene Sili. I le avea ai ma taitai pulefaamalumalu o le Ekalesia, o le Peresitene o le Korama a le Toasefululua ua i ai le aia tatau e maua ai faaaliga e faatatau i le taimi e toefaatulaga ai le Au Peresitene Sili. O lenei faaiuga e faia i le feutagai faatasi ma e ala i le lagolago autasi o le Korama a le Toasefululua. …

“I le aso na lagolagoina ai Peresitene Howard W. Hunter [1907–95] o se Peresitene o le Ekalesia, sa ia molimau mai:

“‘O alii taitoatasi ua faauuina o se Aposetolo ma vaetofia o se uso o le Korama a le Toasefululua, e lagolagoina o se perofeta, tagatavaai, ma talifaaaliga. O le Au Peresitene Sili ma le Korama a Aposetolo e Toasefululua ua tofia ma faauuina e umia ki o le perisitua, ua i ai le pule ma le tiutetauave e pulea ai le Ekalesia, e taitaia ai ona sauniga, e aoao atu ai ana aoaoga faavae, ma faatuina ma tausisia ana faiga masani.

“‘A gasegase se Peresitene o le Ekalesia pe ua le mafai foi ona galue atoatoa i tiute uma o lona tofi, o ona Fesoasoani e toalua, o e o faatasi ma ia, e aofia ai i se Korama a le Au Peresitene Sili, e tauaveina le galuega a le Au Peresitene. Soo se fesili faigata, aiaiga faavae, polokalama, po o aoaoga faavae e mataituina ma le lototatalo i le fono a Fesoasoani i le Au Peresitene Sili ma le Korama a Aposetolo e Toasefululua. E leai se faaiuga mai le Au Peresitene Sili ma le Korama a le Toasefululua e aunoa ma le finagalo autasi o i latou uma e tatau ai.

“‘I le mulimuli ai i lea mamanu musuia, o le a agai ai i luma le Ekalesia e aunoa ma se faalavelaveina. O le puleaina o le Ekalesia ma le faaaogaina o meaalofa faaperofeta, o le a tuuina atu e le aunoa i na taitai o le au aposetolo o e umia ma faaaogaina uma ki o le perisitua’ [i le Conference Report, Oct. 1994, 6–7; or Ensign, Nov. 1994, 7]” (Brent L. Top and Lawrence R. Flake, “‘The Kingdom of God Will Roll On’: Succession in the Presidency,” Ensign, Aug. 1996, 29, 31–34).

3.5

Na Faavaeina e le Alii le Faasologa o le Soloaiga i le Au Peresitene o le Ekalesia

Ina ua lagolagoina Harold B. Lee o se Peresitene o le Ekalesia ina ua mavae le maliu o Peresitene Iosefa Filitia Samita, sa taua ai e Peresitene Spencer W. Kimball (1895–1985) le matafaioi a le Atua i le tofiaina o se Peresitene o le Ekalesia:

“O se mea e fiafia ai le iloa, sa lei filifilia Peresitene Lee e ala i ni komiti ma ni faafaletui ma o latou feteenaiga uma, faitioga, ma e ala i le palota o tagata, ae na valaauina e le Atua ona lagolagoina lea e tagata. …

“O le mamanu faalelagi e leai se mea sese, leai ni feteenaiga, leai ni tausinioga, ma leai ni faamoemoega natia e faatagaina ai. Ua faapolopolo e le Alii mo ia lava le valaauga o ona taitai e taitaia lana ekalesia” (“We Thank Thee, O God, for a Prophet,” Ensign, Jan. 1973, 33; ua faaopoopo le faamamafa).

E lei leva ona avea Peresitene Gordon B. Hinckley (1910–2008) ma Peresitene o le Ekalesia, ae ona faamalamalamaina mai le mamanu paia na faavaeina e le Alii:

“Ona o le maliu o Peresitene Hunter, na faamaapeina ai loa le Au Peresitene Sili. O i ma’ua ma Uso Monson, sa ma auauna atu o ni ona fesoasoani, sa toe nofoia o ma tulaga i le Korama a le Toasefululua, lea na avea ma pulega faamalumalu o le Ekalesia.

“O le aso ua atoa i ai le tolu vaiaso talu ai, na faapotopoto faatasi uma ia Aposetolo soifua ua faauuina i se agaga o le anapogi ma le tatalo i le afeafe pito i luga o le malumalu. O iinei sa matou lagiina ai se viiga paia ma tatalo faatasi. Sa matou auai i le faamanatuga o le talisuaga a le Alii, ma faafouina i lena molimau paia ma faafaatusa a matou feagaiga ma a matou sootaga ma Ia o le o lo tatou Togiola paia.

“Ona toe faatulagaina ai lea o le Au Peresitene, i le mulimuli ai i se faataitaiga na faavaeina lelei mai lava i augatupulaga ua mavae.

“Sa leai se faiga faatosina, leai se tauvaga, leai se tausinio mo le tofi. Sa o se [faagasologa] filemu, toafimalie, faigofie, ma paia. Sa faia i le mamanu na faatulagaina e le Alii lava Ia” (“This Is the Work of the Master,” Ensign, Me 1995, 69; ua faaopoopo le faamamafa).

Sa fautuaina mai ePeresitene Harold B. Lee (1899–1973) e faapea, o le taumatemate i le soloaiga i le Au Peresitene e “le o se mea lelei lea i le silafaga a le Alii.” Na ia saunoa, “o i latou o e taumafai e taumatemate a o lei oo i le taimi [e iloa ai] po o ai o le a avea ma Peresitene e sosoo ai o le Ekalesia, ua na ona petipeti e faapei o loo latou i ai i se tuuga solofanua, aua ua nao le Alii lava o loo i ai le taimi atofaina” (“Admonitions for the Priesthood of God,” Ensign, Jan. 1973, 107).

3.6

Tulaga Sinia i le Korama a Aposetolo e Toasefululua

O le Peresitene o le Ekalesia o le Aposetolo lea ua aupito sili ona leva. O le Aposetolo o loo sosoo ai le leva, o le Peresitene lea o le Korama a Aposetolo e Toasefululua, sei vagana ai o loo tautua o ia i le Au Peresitene Sili, o le tulaga la lea, o le isi Aposetolo e sosoo ai le leva, e auauna atu o le Sui Peresitene o le Korama a Aposetolo e Toasefululua. O le tulaga sinia o le Au Aposetolo e le faia lea i le tausaga o soifua, ae e ala i le aso ma le faasologa o le faauuina o i latou o ni Aposetolo. Mo se faataitaiga, sa faauuina faatasi Spencer W. Kimball ma Ezra Taft Benson o ni Aposetolo i le aso 7 o Oketopa, 1943, ae o Spencer W. Kimball sa faauuina muamua. Ona o lenei mea, na avea ai Peresitene Kimball ma Peresitene o le Ekalesia i le 1973 ina ua maliu Harold B. Lee.

Sa faamalamalama mai ePeresitene Spencer W. Kimball (1895–1985) e faapea, ona o le soloaiga i le Au Peresitene e fai i le leva, ua na o le Alii lava Ia e pulea le faasologa o le soloaiga:

“Ua tusa ma le valusefulu aposetolo [e tau mai i le 1972] na faauuina [i ki o le pule] talu mai Iosefa Samita, e ui e na o le sefulutasi ua nofoia le nofoaga o le Peresitene o le Ekalesia, ona o le faasalavei a le oti; ma talu ai, ua i ai i le Alii le pule i le maliliu o ana auauna, ua ia faatagaina ai le ua ia atofaina e sau i le tulaga muamua e tauave lena tulaga faaletaitai. O le maliu ma le oti ua avea ma tulaga e puleaina. O aposetolo fou taitoatasi e faasolo mai ai, e filifilia e le Alii ma faaali mai i le perofeta soifua i lena taimi, o le e faauuina o ia” (“We Thank Thee, O God, for a Prophet,”34; ua faaopoopo le faamamafa).

Keriso o loo valaauina Peteru ma Aneterea

O le Faaola o loo valaauina Ana Au Aposetolo

Na faamatalaina ePeresitene Gordon B. Hinckley (1910–2008) le faagasologa o le leva ma le soloaiga, lea e amataina pe a valaauina se tamalii i le Korama a le Toasefululua:

“O lenei suiga o le pule [i se Peresitene fou o le Ekalesia], lea sa ou auai i ni nai taimi, e matagofie ona o lona faigofie. O se faaaliga lea o le ala e fai ai e le Alii se mea. O le mulimuli ai i Lana faiga, e filifili ai e le perofeta se tamalii e avea ma se sui o le Aufono a le Au Aposetolo e Toasefululua. Na te le filifilia lenei mea e avea ma se matata. E valaauina o ia, e pei ona sa faia i le Au Aposetolo i le vaitaimi o Iesu, o e na fetalai atu i ai le Alii, ‘Ua le filifilia a’u e outou, a ua filifilia outou e a’u’ (Ioane 15:16). E mavae atu tausaga. E aoaoina ma aoaiina o ia i tiute o lona tofi. E femalagaa’i o ia i le lalolagi i le faataunuuina o lona valaauga faaaposetolo. E umi lava le ala o tapenapenaga, lea e oo ina ona masani ai i le Au Paia o Aso e Gata Ai i soo se mea lava e i ai i latou, ma faapea ona latou iloa o ia. E suesueina e le Alii lona loto ma lona agaga. I le faiga masani o mea e tutupu, e tulai mai ai avanoa i lena aufono ma e faia foi ni tofiga fou. O le mulimuli ai i lenei faiga e avea ai se tamalii faapitoa ma Aposetolo sinia. O ki uma o le perisitua sa i ai ia te ia faapea foi i ona uso o le Usoga, ae sa lei aliali ae lava, e tuuina atu ia i latou taitoatasi i le taimi e faauuina ai. Peitai o le pule e faaaoga ai ia ki, e tapulaa lava mo na’o le Peresitene o le Ekalesia. A maliu, ona pau atu lea o le pule e faaaoga ai ia ki uma i le Aposetolo sinia, o le e faailoa mai, vaetofia, ma faauu o se perofeta ma Peresitene e ona uso o le Aufono o le Toasefululua” (“O Mai ma Taumamafa,” Liahona, Iulai 1986, 41).

Peresitene Gordon B. Hinckley ma Peresitene Thomas S. Monson

Ina ua mavae le maliu o Peresitene Gordon B. Hinckley (taumatau), ona avea lea o Thomas S. Monson ma Peresitene o le Ekalesia.

Sa saunoaPeresitene Boyd K. Packer (1924–2015) o le Korama a Aposetolo e Toasefululua i le mautinoa o le avea o le Aposetolo sinia ma Peresitene o le Ekalesia:

“I se taimi e le’i mamao ina ua mavae le tuumalo o Peresitene Gordon B. Hinckley, na faapotopoto faatasi ai alii e toa 14, o Aposetolo, o e ua uma ona faaee atu i o latou luga ia ki o le malo, i le afeafe aupitoaluga o le malumalu ina ia mafai ona toe faatulaga le Au Peresitene Sili a le Ekalesia. Sa le fesiligia lava le mea o le a fai, leai se faatuai. Na matou iloa lava o le Aposetolo sinia o le Peresitene lea o le Ekalesia. Ma i lena fonotaga paia, na lagolagoina ai e le Korama a Aposetolo e Toasefululua ia le Susuga a Peresitene Thomas S. Monson o le Peresitene o le Ekalesia” (“O Le Toasefululua,” Ensign po o le Liahona, Me 2008, 83; ua faaopoopo le faamamafa).

3.7

Taitaiga e le Korama a Aposetolo e Toasefululua ma le Taimi o le Soloaiga

Sa faamalamalama mai ePeresitene Spencer W. Kimball (1895–1985) le suiga o le pule i le Korama a Aposetolo e Toasefululua i le mavae ai o le maliu o le perofeta o i ai nei:

“E le uma le galuega a le Alii. E tusa lava pe maliu se taitai malosi, e leai ma se taimi se tasi e aunoa ai le Ekalesia ma ni tulaga faaleautaitai, e faafetai ai i le finagalo agalelei o le Atua o le na tuuina mai lona malo ia faaauauina ma ia faavavau. …

“O le taimi lava e maliu ai se Peresitene o le Ekalesia, e faapea loa ona avea se tino o ni alii ma taitai tuufaatasi—ua uma ona taoso nei alii i le potomasani ma aoaoga faamasani. Ua leva ona uma ona fai tofitofiga, ua uma ona tuuina mai le pule, ua uma ona momoli mai ki. … E agai i luma le malo i lalo o lenei aufono ua uma ona faamaoniaina. E leai ni ‘tauvaga’ mo le tofi, leai ni faiga faatosina, leai ni lauga faapolokiki. E maeu lea fuafuaga mamalu! E ese le poto o lo tatou Alii, ma le faatulagaina atoatoa lelei [o lona malo] e sili atu i le vaivai o tagata le atoatoa ma faaloloto” (i le Conference Report, Apr. 1970, 118; or Improvement Era, June 1970, 92).

Au Peresitene Sili ma le Korama a le Toasefululua, (1870)

O le Au Peresitene Sili ma le Korama a Aposetolo e Toasefululua (pe a o le 1870), ma se ata o le Perofeta o Iosefa Samita (laina pito i luga, lona lua mai le agavale)

“I le avea ai ma taitai pulefaamalumalu o le Ekalesia, o le Peresitene o le Korama a le Toasefululua ua i ai le aia tatau e maua ai faaaliga e faatatau i le taimi e toefaatulaga ai le Au Peresitene Sili. O lenei faaiuga e faia i le soalaupule faatasi, ma e ala i le lagolago autasi a le Korama e Toasefululua” (Top and Flake, “The Kingdom of God,”33; ua faaopoopo le faamamafa). Ina ua mavae le maliu o le Perofeta o Iosefa Samita, ona taitai ai lea e le Korama a Aposetolo e Toasefululua le Ekalesia mo le tolu ma le afa tausaga, ona faatoa toe faatulagaina ai lea o le Au Peresitene Sili. Sa taitai e le Korama a le Toasefululua le Ekalesia mo le silia teisi ma le tolu tausaga ina ua maliu Peresitene Polika Iaga, ae mo le toeitiiti lua tausaga ina ua maliu Peresitene Ioane Teila. I se taimi talu ai nei, na taitaia ai e le Korama a Aposetolo e Toasefululua le Ekalesia, e masani lava mo na o ni nai aso ao lei toefaatulagaina le Au Peresitene Sili ma vaetofia ai se Peresitene fou.

I le aso 18 o Setema, 1898, na saunoa ai Peresitene George Q. Cannon (1827–1901) o le Au Peresitene Sili e uiga i le faatulagaga o le Au Peresitene Sili i le mavae ai o le maliu o Peresitene Uilifoti Uitilafi i le aso 2 o Setema:

“I le aso 13 o Setema, i se fonotaga a le Au Aposetolo, a o soalaupule le manaomia ona tofia se tagata e pulea fanua ma fale mo le Ekalesia, sa manino foi i le usoga le manaomia ona faatulagaina le Au Peresitene Sili, ma sa saunoa taitoatasi le Toasefululua e lagolagoina le faia o lena faatinoga i lena taimi. Ina ua uma ona faalogologo atu i o latou manatu, ona tulai lea o Peresitene Snow ma tau atu i le usoga e faapea, na ia lagonaina talu ona maliu Peresitene Uitilafi, le taitaia o ia e tuuina atu o ia lava i luma o le Alii, na laei i ona ofutalaloa faaositaulaga, i totonu o le Malumalu, ma na faaali mai e le Alii ia te ia, e tatau ona faatulaga le Au Peresitene Sili, ma faaali mai foi ia te ia ona fesoasoani e tatau ona i ai. Ae peitai, na te lei tuuina atu se faamatalaga i lenei mea, seia oo ina uma ona saunoa le Au Aposetolo e uiga i le mataupu. O le faamatalaga lenei a Peresitene Snow, sa avea ma faamaoniga ia i latou, na musuia e le Agaga o le Atua ia manatu na latou faia, ma faamaoniaina ai le galuega lea na latou fautuaina e fai, ma o le mafuaaga lea na latou olioli tele ai. Ia te au lava ia, sa o se mea sa matuai ou lei mafaufauina le faia o se faatinoga i lena taimi, e ui ina sa ou matuai loto atoa i ai, ma sa ou lagonaina lava e tatau ona vave faatulagaina le Au Peresitene i se vave e mafai ai po o le taimi lava foi e musuia ai e le Alii se faatinoga faapea” (Deseret News, Oct. 8, 1898, 514).

3.8

Toefaatulagaina o le Au Peresitene Sili

I le 1974, na faamatala ai e Peresitene N. Eldon Tanner (1898–1982) o le Au Peresitene Sili le suiga o le pule ma le faiga faavae lea e lagolagoina ai se Peresitene fou o le Ekalesia e le Korama a Aposetolo e Toasefululua, ma faatulagaina ai le Au Peresitene Sili, e ala i le toe faamatalaina o mea na muai ma muliai tutupu ina ua mavae le maliu o Peresitene Harold B. Lee:

“E taua le tau o le maitau o le mea na tupu i le taimi o le maliu o Peresitene Harold B. Lee. Na aami atu Peresitene Romney i le falemai, ma a o laua talanoa, sa iloa e Peresitene Lee, e ono vaivai o ia mo se taimi umi, sa ia faapea atu ai ia Peresitene Romney: ‘E le o iinei Peresitene Tanner, ma ou te manao e te sui ma taulima mataupu a le Ekalesia.’ Sa ofoina atu e Peresitene Kimball, o le na taunuu mulimuli ane, lana auaunaga ia Peresitene Romney. Ae peitai, o le taimi lava na fofogaina ai le maliu o Peresitene Lee, sa liliu atu Peresitene Romney ia Peresiene Kimball ma faapea atu: ‘Lau susuga, i le avea ai ma peresitene o le Korama a le Toasefululua, o oe lea ua taitai. O le a ou faasee tuagalu ma sauniuni e faia soo se mea e mafai ona ou fesoasoani atu ai.’

“Sa talafeagai lelei lava lenei mea ma le faatulagaga o le Ekalesia, ma o se faataitaiga sili lea o le ala e lei tuua ai lava le Ekalesia e aunoa ma se au peresitene ma le solo lelei o le faasolo mai i le tasi i le isi. O le taimi lava lea, i le avea ai o Peresitene Kimball ma peresitene o le Toasefululua, na avea ai loa o ia ma taitai pulefaamalumalu o le Ekalesia.

“Ou te fia aoteleina faiga faavae na sosoo ai i le taimi na tofia ma faauuina ai o ia o se peresitene o le Ekalesia. …

“… O le fa o aso talu ona mavae le maliu o Peresitene, na valaauina faatasi ai e Peresitene Kimball, o le peresitene o le Toasefululua, ia sui o le Toasefululua i totonu o le afeafe aupitoaluga o le malumalu, mo le faamoemoe o le soalaupuleina o le toefaatulagaina o le Au Peresitene Sili, ma faia soo se faatinoga na tonu i ai. O e na avea ma fesoasoani i le Peresitene—o Peresitene Romney lea ma au—sa nofoia o laua tulaga e tatau ai i le Korama a le Toasefululua.

“Ina ua uma ona faailoa atu e Peresitene Kimball ona lagona faanoanoa tele i le maliu ai o Peresitene Lee, ma ona lagona o le le atoatoa, sa ia valaauina loa sui o le Toasefululua i le faasologa o lo latou leva e faailoa mai o latou lava lagona e uiga i le toefaatulagaina o le au peresitene o le Ekalesia.

“A o saunoa sui taitoatasi o le Toasefululua, sa ia faailoa mai ua ia lagona o le taimi lenei e toefaatulaga ai le Au Peresitene Sili, ma o Peresitene Spencer W. Kimball o le tagata lea na finagalo le Alii e pulefaamalumalu i lenei taimi. Sa matuai matagofie le Agaga o le Alii na i ai, ma sa i ai le lotogatasi ma tasi uma mafaufau ma upu na tautalagia e le Usoga. Na pau lava le faamoemoega ma le naunautaiga, o le faia lea o le finagalo o le Alii, ma sa lei i ai se fesili i mafaufau o soo se tasi po o le a le finagalo o le Alii na faailoa mai.

“Ona faatu atu lea e Elder Ezra Taft Benson le manatu aloaia ina ia toefaatulagaina le Au Peresitene Sili o le Ekalesia, ma ia faapea ona lagolagoina, faauuina, ma vaetofia Spencer W. Kimball e avea ma peresitene, perofeta, tagatavaai, talifaaaliga ma tagata e vaaia le Ekalesia. Sa faaluaina lenei manatu ma autasi i le faamaoniaina.

“Sa laa atu i luma Peresitene Kimball ma le faamaualalo tele, ma faia lana saunoaga o le taliaina [o le valaauga], ma tatalo ina ia i ai le Agaga ma faamanuiaga a le Alii ia te ia, ina ia mafai ona ia faatinoina le finagalo o le Alii. Fai mai a ia, sa le aunoa ona tatalo mo le soifua laulelei ma maloloina ma malosi mo Peresitene Lee, ma mo faamanuiaga a le Alii ia i ai ia te ia ao faaauau ona avea o ia ma peresitene o le Ekalesia. Sa ia faamamafaina mai le mea moni e faapea, sa la tatalo faamaoni ma lona faletua o Camilla, ina ia le oo mai lenei tofiga ia te ia, ma sa ia manatu moni lava o le a umi atu ona soifua Peresitene Lee nai lo o ia. …

“Ona ia filifilia lea ma tuuina mai N. Eldon Tanner e avea ma ona fesoasoani muamua ae o Marion G. Romney e avea ma fesoasoani lua, o i laua taitoatasi sa faaalia lo laua lotomaualalo ma tautino mai o ia lava e lagolago ma fesoasoani ia Peresitene Kimball o le peresitene o le Ekalesia, ma faatino lona tofiga i le lelei na te mafaia ai, ma tatalo ia i ai ia te ia faamanuiaga a le Alii.

“Ina ua mavae o lea, ona lagolagoina ai lea o Peresitene Benson e avea ma peresitene o le Aufono a le Toasefululua. Ona nofoia lea e Peresitene Kimball o lona nofoaga i le ogatotonu o le potu, ma a o tuu e i latou uma na auai o latou lima i luga o lona ulu, sa matou lagonaina sa i ai moni le Agaga o le Alii ma i matou, ma na faatumulia e lenei Agaga matagofie o matou loto. Ma o Peresitene Benson na fai ma fofoga taumomoli, i le tuuina atu o se talosaga ma se faamanuiaga matagofie, lea na faauuina ma vaetofia ai Spencer Woolley Kimball e avea ma perofeta, tagatavaai ma talifaaaliga ma peresitene O Le Ekalesia a Iesu Keriso o le Au Paia o Aso e Gata Ai” (“Chosen of the Lord,” Ensign, Me 1974, 84–85).

3.9

O Le a Le Potopotoga Paia?

potopotoga paia

O le lagolagoina i le taimi o se potopotoga paia a le Ekalesia.

E ui ina avea Peresitene Thomas S. Monson ma Peresitene o le Ekalesia i le aso 3 o Fepuari, 2008, i le mavae ai o le maliu o Peresitene Gordon B. Hinckley, ae o le faagasologa o le sauniga i le taeao o le Aso Toonai o le konafesi aoao ia Aperila, na atofaina o se potopotoga paia, lea na lagolagoina ai e tagata o le Ekalesia, e ala i korama ma vaega i le lalolagi atoa, o ia [Peresitene Monson] o le perofeta, tagatavaai, ma talifaaaliga ma Peresitene o le Ekalesia a Iesu Keriso o le Auj Paia o Aso e Gata Ai (tagai i le “O Le Lagolagoina o Taitai o le Ekalesia,” Ensign po o le Liahona, Me 2008, 4–6).

I le taimi o se potopotoga paia na muamua atu, na saunoa ai Elder David B. Haight (1906–2004) o le Korama a Aposetolo e Toasefululua e uiga i le mea e tau o le potopotoga paia ma le paia o lea faapotopotoga taua:

“O le aso, o i tatou o molimau i le, ma auai i se faamoemoega paia—o se potopotoga paia e faataunuu mea faalelagi. E pei foi o aso anamua, sa faia e le Au Paia i le lalolagi atoa ni anapogi ma ni talosaga e tele ina ia mafai ona latou maua le liligiina mai o le Agaga o le Alii, lea ua matuai molimauina iinei i lenei faamoemoe i lenei taeao.

“O se alofi sa [potopotoga paia], e pei ona ta’ua i le igoa, o se faailoga o se fuafuaga paia, mamalu, ma le migao, lea e faapotopoto ai le Au Paia i lalo o le taitaiga a le Au Peresitene Sili. O faapotopotoga paia e faaaogaina mo ni faamoemoega se tolu, o le faapaiaga o malumalu, faatonuga faapitoa i taitai perisitua, ma le lagolagoina o se Peresitene fou o le Ekalesia. O le sauniga lenei o le konafesi i le aso, o se potopotoga paia mo le faamoemoe o le lagolagoina o se Peresitene fou ua valaauina o le Ekalesia ma isi mautofi o le Ekalesia.

“O loo i ai se mamanu i faapotopotoga paia lea e tulaga ese ai i latou mai isi fonotaga aoao a le Ekalesia, lea tatou te lagolagoina ai le au mautofi o le Ekalesia. O lena mamanu lea na faavaeina e le Perofeta o Iosefa Samita, o korama o le perisitua, e amata atu i le Au Peresitene Sili, e tutulai ma faaali i le siitia o lima taumatau lo latou naunau e lagolago le Peresitene o le Ekalesia, o se perofeta, tagatavaai, ma talifaaaliga, ma sapasapai o ia e ala i lo latou talitonuina, faatuatua, ma talosaga. E faapena ona faaali mai e korama o le perisitua a le Ekalesia e ala i la latou palota. Ona tutulai lea o le tino aoao o le Au Paia uma ma faailoa atu lo latou naunautai e faia foi faapea. E faapena foi ona lagolagoina isi taitai o le Ekalesia i o latou tofi ma valaauga.

“Pe a tatou lagolagoina le Peresitene o le Ekalesia e ala i le siitia o o tatou lima, e le gata ina faaalia ai ua tatou faailoa atu i luma o le Atua o ia o le tagata sao e umia ki uma o le perisitua; o lona uiga foi, ua tatou osifeagaiga ma le Atua o le a tatou usitai i le taitaiga ma le fautuaga e oo mai e ala i Lana perofeta. O se feagaiga paia.

“I le aso na faatulagaina ai le Ekalesia, na tuuina mai ai e le Alii le poloaiga lenei i le Ekalesia:

“‘Ona o lana [le peresitene o le Ekalesia] upu ia outou talia, e pei lava ua mai i loʼu lava gutu, i le onosai ma le faatuatua atoa.

“‘Ona o le faia o nei mea o le a lē manumalo ai faitotoa o seoli ia te outou; ioe, ma o le a faamataa ese ai e le Alii le Atua mana o le pouliuli mai i o outou luma, ma faia ia luluina le lagi mo lo outou lelei, ma le mamalu o lona suafa.

“‘Ona ua faapea ona fetalai mai o le Alii le Atua: O ia ua Ou musuia na te uunai le faamoemoe o Siona i le mana malosi tele mo le lelei.’ (MF&F 21:5–7).

“O le uluai potopotoga paia sa faia i le Malumalu o Katelani i le aso 27 o Mati 1836. I le maea ai o le faiga faavae o le palota lea na ou faamatalaina, sa faamaumauina e le Perofeta o Iosefa, ‘Sa ou vavalo atu i tagata uma, afai o le a latou sapasapaia nei tamalii i a latou valaauga eseese, … o le a faamanuiaina i latou e le Alii; … i le suafa o[Iesu] Keriso, o faamanuiaga o le lagi o le a avea mo i latou’ (History of the Church, 2:418).

“O le aso, o le faaaogaina o le mataupu faavae o le maliega autasi, ua tatou faailoa atu ai o tatou loto. O le a le paia o lenei avanoa ma le tiutetauave? E matuai paia lava lea na fetalai mai ai le Alii i le faaaliga maoae o le perisitua e faapea, o nei mataupu ‘e mafai ona aumai lena faaiuga i luma o se faapotopotoga aoao a korama eseese, lea ua faia ma pule faaleagaga o le ekalesia’ (MF&F 107:32; ua faaopoopo le faatusilima)” (“Solemn Assemblies,” Ensign, Nov. 1994, 14–15; ua faaopoopo le faamamafa).

3.10

Auala Tatou te Lagolago ai le Peresitene o le Ekalesia

O tagata o le Ekalesia o loo lagolagoina taitai i le konafesi aoao

O se tasi o faamanuiaga o le avea ai ma tagata o le Ekalesia, o le avanoa lea e lagolago ai i latou ua valaauina e pulefaamalumalu i le Ekalesia?

I le faaiuga o le potopotoga paia lea na lagolagoina ai Thomas S. Monson e avea ma Peresitene lona 16 o le Ekalesia, sa saunoa ai Peresitene Henry B. Eyring o le Au Peresitene Sili i le faamanuiaga maoae ua tatou maua ma le folafolaga tatou te faia pe a sii o tatou lima e lagolago ai o tatou taitai:

“Sa lei agavaa pea tagata o le Atua e mauaina le aafiaga ofoofogia lea sa tatou faasoaina i lenei aso. Sa faaauau pea ona faaaogaina e Aposetolo ia ki na Ia tuuina atu ia i latou ina ua mavae le Afio Ae o Keriso. Ae ona o le le usiusitai ma le leai o se faatuatua i tagata, o lea na maliliu ai Aposetolo e aunoa ma le tuufaasoloina atu o ki i nisi e suitulaga i ai. Tatou te taua lena vaitau matautia ‘o le Liliuese.’ Ana fai e maua e tagata o le Ekalesia i na aso le avanoa ma le naunautaiga e faaaoga ai le faatuatua e pei ona outou maua i nei aso, semanu e le aveeseina e le Alii ia ki o le perisitua mai le lalolagi. O se aso la lenei e tulagaese ma faavavau lona taua i le talafaasolopito o le lalolagi ma le fanau a lo tatou Tama Faalelagi.

“O lenei, o la tatou matafaioi o le tumau lea i le agavaa mo le faatuatua e moomia mo i tatou ina ia faataunuuina ai la tatou folafolaga e lagolagoina i latou o e ua valaauina. … Mo i tatou e lagolagoina i latou o e ua valaauina i le asō e tatau ona tatou iloiloina o tatou olaga, salamo pe a talafeagai ai, ia folafola atu e tausia poloaiga a le Alii, ma mulimuli i Ana auauna. Ua lapatai mai le Alii e faapea afai tatou te le faia na mea, o le a alu ese le Agaga Paia, tatou te le toe maua le malamalama lea sa tatou mauaina, ma o le a le mafai ona tatou tausia le folafolaga ua tatou faia i lenei aso e lagolagoina ia auauna a le Alii i Lana Ekalesia moni” (“O Le Ekalesia Moni ma le Ola,” Ensign po o le Liahona, Me 2008, 21; ua faaopoopo le faamamafa).

Manatu e Mafaufau Loloto i ai

  • O a ni auala e mafai ai e le malamalama i le faiga faavae musuia faalelagi mo le soloaiga i le Au Peresitene ona faateleina lo tatou talitonu i le Peresitene o le Ekalesia?

  • E faapefea ona amatalia le faagasologa o le soloaiga e ala i le tuuina atu o ki o le perisitua i le taimi e faauuina ai se Aposetolo fou?

  • O a faamanuiaga e oo mai mai le lagolagoina ma le fesoasoani atu i le Aposetolo sinia i le avea ai ma perofeta ma Peresitene o le Ekalesia.

Galuega Fautuaina

  • I le faaaoga ai o le mataupu lenei e fai ma taiala, ia fai se auivi o laasaga ua faavaeina e le Alii i le filifilia o se Peresitene fou o le Ekalesia. E faapefea ona amata lenei faagasologa i le filifiliga o se Aposetolo fou?

  • Tusi au tali i fesili nei: O le a se mea ua faamoemoeina mai ia i tatou pe a tatou lagolagoina se Peresitene fou o le Ekalesia. Faamata e faapefea ona faatatau lenei mea i lo tatou lagolagoina o se epikopo po o isi taitai o le Ekalesia?

  • Faamatala puupuu atu i se uo po o se tagata o le aiga le auala e tuuitiitia ai e le faiga faavae musuia faalelagi mo le soloaiga i le Au Peresitene le tausinio mo le tofi, mea sese, ma feteenaiga.

  • Tusi ou lagona pe mafai faapefea e le malamalama i le mataupu faavae o le leva i le Korama a Aposetolo e Toasefululua ona faamalosia le talitonuga e faapea, o le taitaiga o le Ekalesia o loo i aao o le Alii ma ua Ia silafia ma saunia ia sui taitoatasi o le Toasefululua.