O Sauaga
E le i pine ae ou iloa…ua avea la’u tala ma mea e tauleagaina ai au e tagata fai lotu, ma ua mafua mai ai foi sauaga mamafa ma sa oo ina matua faateleina; ae ui lava foi ina o au o se tama le taulia e na o le sefulufa i le sefululima tausaga, ma e leai foi se mea i lo’u tulaga faaleolaga nei o le a tausaafia ai e tagata se tama faatauvaa faapei o au, ae sa matua uunaiina tagata e tagata maualuluga ia tetee ia te au, ma faatupuina sauaga faigata; ma sa i ai i ituaiga uma lea tulaga–sa au faatasi uma i latou ia sauaina au.
Sa avea ia mea ma mea sa ou mafaufau loloto ai i lea vaitaimi, ma isi aso fai soo talu mai lea vaitaimi, i le uiga ese o le avea o se tama le taulia, e sili laitiiti atu i le sefulufa ona tausaga, ma o se tama foi e faatauvaa lava nai mea na te maua mai ana galuega i aso taitasi, ma se tagata taua ma amanaia e tagata maualuluga o lotu eseese i ia ona po, i se auala na faaosoina ai ia i latou le agaga o le taufaifai ma sauaga malolosi. Ae e ui lava ina sa uiga ese ia mea, ae sa faapea lava ona faia, ma sa avea soo lava ma mea sa ou faanoanoa tele ai.
E ui i lea, o le mea moni lava na ou vaai i se faaaliga. Talu ai lea mea, sa ou manatu ua pei lava au o Paulo, ina ua ia tu i luma o le Tupu o Akeripa ma fai lana faamatalaga e uiga i le faaaliga na oo ane ia te ia na ia vaaia ai se malamalama ma faalogoina se leo; peitai, e toaitiiti lava i latou na talitonu ia te ia; sa fai ane nisi e pepelo o ia, ae fai ane isi ua valea o ia; sa tauemuina foi o ia ma sauaina. Peitai sa le i mafai ona aveesea e ia mea uma, le moni o le faaaliga na oo ia te ia. Na ia mautinoa lava na ia vaai i se faaaliga, ma e le mafai e sauaga uma o le lalolagi ona liua le moni o lena faaaliga; ma e tusa pe latou te sauaina ai o ia seia oo i le oti, sa ia mautinoa, ma na ia mautinoa lava e oo i lana toe manava, sa ia vaai lava i se malamalama ma faalogoina se leo o fetalai mai ia te ia, ma e le mafai lava e le lalolagi atoa ona liliu lona manatu, po o lona talitonuga.
Sa faapena foi ia te au. Sa ou vaai moni lava i se malamalama, ma sa ou vaaia foi i totonu o lea malamalama ni Tagata se toalua, ma e moni lava sa Ia fetalai mai ia te au; ma e ui ina inosia ma sauaina au i lo’u fai atu na ou vaai i se faaaliga, ae o se mea moni lava; ma a o latou sauaina au, ma tauemuina au, ma tauleagaina ma tuuai pepelo au i lo’u fai atu sa ou vaai i se faaaliga, sa oo ina ou faapea ifo i lo’u loto: Aisea ua sauaina ai au i lo’u tau atu o le mea moni? E moni lava sa ou vaai i se faaaliga; ma o ai ea au ou te tetee atu ai i le Atua, ma aisea foi ua manatu ai tagata o le lalolagi ia latou faia ia te au ina ia ou faafitia ai le mea na ou vaai tino lava i ai? Aua sa ou vaai lava i se faaaliga; sa ou mautinoa lava lena mea, ma sa ou mautinoa foi ua silafia e le Atua le moni o lena mea, ma e le mafai lava ona ou faafitia, ua ou fefe e faia lena mea; ma sa ou mautinoa a ou faafitia lea mea, o lona uiga ua ou faatausuai i le Atua, ma o le a ou nofosala ai.
Ua faamalieina nei lo’u loto e faatatau i ituaiga lotu—e le tatau ona ou auai i se tasi o ia lotu, a ia ou tumau pea i le tulaga sa ou i ai i lena taimi, seia oo ina toe faatonuina mai au. Ua ou iloa e moni le molimau a Iakopo—e mafai e se tagata ua leai se poto ia te ia ona ole atu i le Atua, ma e tuuina mai e le Atua ia te ia lea poto, ma le le toe tautaua.
Sa faaauau pea ona fai au galuega e masani ai o le olaga, seia oo i le aso luasefulu ma le tasi o le masina o Setema, i le tausaga e tasi le afe valu selau luasefulu ma le tolu, ma sa ou mafatia lava i lena vaitaimi atoa i sauaga mamafa mai lima o ituaiga tagata eseese, o tagata lotu ma tagata le lotu, ona o lo’u tautino atu pea na ou vaai i se faaaliga.
I le va o le tausaga na ou maua ai le faaaliga ma le tausaga e afe valuselau luasefulu ma le tolu— ina ua faasaina au e aua nei ou auai i soo se lotu e tasi o ia aso, ma a ou itiiti lava, ma sauaina e i latou o e sa tatau ona avea ma au uo ma agalelei mai ia te au, ma afai foi sa latou manatu ua faaseseina au, sa tatau lava ona latou taumafai i le agalelei ma le alofa e faatonu ia te au—sa oo mai lava ia te au ituaiga faaosoosoga eseese; ma a ou faatasi ma ituaiga tagata eseese, sa oo ina ou faia i lea taimi ma lea taimi mea faaletatau, ma vaivaiga faatamaiti, atoa ma sese faaletagata; ma ou te tau atu ma le faanoanoa tele o lo’u loto, sa oo ina taitaiina au e ia mea i ituaiga faaosoosoga eseese, e inosia i le silafaga a le Atua. I lo’u tauina atu o lenei mea, aua nei manatu ane se tasi sa ou faia se agasala mamafa. Sa lē ia te au lea uiga.