O Lē Fea Ekalesia e Sa’o?
Sa ou matua mafaufau loloto lava i aso o lea fefinauaiga tele, ma sa ou atuatuvale tele ai, … sa ou faapea ifo ai ia te au lava: O le a se mea e ao ina ou faia? O ai o nei lotu uma ua sao; po o ua sese i latou uma? Afai foi ua sao se tasi o i latou, o le fea, ma pe faapefea foi ona ou iloa?
A o tau fuafua po o le fea ekalesia e auai, o lea sa liliu atu ai Iosefa i le Tusi Paia mo se taitaiga. O iina na ia faitau ai, “Ina ole atu ia i le Atua.”
A o ou suesue ma mafaufau e tusa ma tulaga faigata ua mafua mai fefinauaiga a tagata o ituaiga lotu eseese, sa ou faitau ai i le tasi aso i le Tusi a Iakopo, mataupu muamua, a o le fuaiupu e lima, e faapenei: “Ae afai ua leai se poto i so outou, ina ole atu ia i le Atua, o le foai tele mai i tagata uma, ma le le toe tautaua; ona foaiina mai lea ia te ia.”
E leai se isi lava mau mai tusitusiga paia na matua ootia ai se loto o se tagata i le mana malosi nai lo le ootia o lou loto i lea mau i lea lava taimi. Sa foliga mai na matua ootia ma faagaeetia ai lo’u lava loto. Sa oo ina ou mafaufau pea lava i ai ma lo’u iloa, afai e i ai se tagata na te manaomia le poto mai le Atua, o au lava lea; aua sa ou le iloa le mea e tatau ona fai, ma a le mafai ona ou maua se poto e sili atu nai lo le poto na ia te au i lena lava taimi, o le a ou leiloaina lava; aua sa matua eseese malamalamaga o faiaoga o lotu eseese i se mau e tasi mai tusitusiga paia, sa matua faafaigata ai lava ona tapa i le Tusi Paia mo se tonu.
Sa iu ina oo ifo i lou mafaufau le tonu e faapea, e lua mea e ao ina ou filifili i ai, o lo’u nofo pea i le pouliuli ma le fenumiai, po o lo’u faia e pei ona faatonu mai e Iakopo, o le ole atu lea i le Atua. Sa oo ina tonu ia te au ou te “ole atu i le Atua” ma lo’u manatu afai na te foaiina fua mai le poto ia i latou ua leai se poto, ma le le toe tautaua, o le a ou taumafai i ai.