Ua Toefuataiina Mai le Perisitua

A o ma galulue pea i le faaliliuina o le tusi, sa oo ina ma o atu i le vao i se tasi aso o le masina na sosoo ai (Me, 1829), ma te tatalo atu ai i le Atua e uiga i le papatisoga mo le faamagaloina o agasala, na taua mai i le faaliliuga o papatusi. A o ma tatalo ma valaau atu i le Alii, sa oo ina afio ifo mai le lagi se avefeau i se ao malamalama tele, ma faaee ona lima i luga o i maua, ma a o faaee ona lima i luga o i maua, sa ia faauuina i maua ma faapea mai:

“I luga o oulua ou uso a auauna e, i le suafa o le Mesia, ou te faaee atu le Peirsitua o Arona, o loo i ai ki o galuega a agelu, ma le talalelei o le salamo, ma le papatisoga i le faatofuina mo le faamagaloina o agasala; e le toe aveesea lava mai le lalolagi seia toe faia e le fanauga a Levi se taulaga i le Alii i le amiotonu.”

Sa ia fai mai e le o i ai i lena Perisitua faa-Arona mana o le faaee atu o lima mo le mea foaifua o le Agaga Paia, a o le a tuuina mai ia i maua lea lava pule ma le mana i se aso lata mai; ona ia poloaiina lea o i maua ia ma o e papatisoina, ma sa ia faatonu mai i maua ia ou papatisoina Oliva Kaotui, ma a uma lena, ona papatiso lea o au e Oliva.

Ma sa ma o ane loa ma ua papatisoina. Sa ou papatisoina muamua Oliva, ona ia papatisoina ai lea o au—ina ua maea lea, ona faaee atu lea o ou lima i luga o le ulu o Oliva, ma faauuina o ia i le Perisitua faa-Arona, ma ina ua maea lena, ona ia faaee mai foi lea o ona lima i ou luga ma ua faauuina foi au i lea lava Perisitua—aua sa faapea ona poloaiina ai i maua.

Sa tau mai e lea avefeau na oo mai ia i maua i lea aso ma faaee lea Perisitua i o maua luga, o lona igoa o Ioane, o ia lava lea ua taua i le Feagaiga Fou, o Ioane le Papatiso, ma ua ia faia ia mea i lalo o le taitaiga a Peteru, ma Iakopo, ma Ioane, o e o loo i ai Ki o le Perisitua Mekisateko, ma o le Perisitua lea na ia fai mai o le a oo mai le aso o le a tuuina mai ai ia i maua, ma o le a taua a’u o le uluai Toeaina o le ekalesia, a o (Oliva Kaotui) o le toeaina lona lua lea. O le aso sefulu ma le lima o Me, 1829, na faauuina ai i maua i lima o lena avefeau, ma papatisoina ai.

Sa oo mai ia i maua ni faamanuiaga mamalu ma le ofoofogia mai lo tatou Tama o i le Lagi, ina ua ma o ae nai le vai, ua uma ona papatisoina i maua. O le taimi lava na maea ai ona ou papatisoina Oliva Kaotui, o le taimi foi lena na oo ifo ai i ona luga le Agaga Paia, ona ia tulai lea ma perofeta ane i mea ua lata ona oo mai. E le gata i lea, ae ina ua uma foi ona papatisoina au e ia, sa oo mai foi ia te au le agaga o valoaga, ma ina ua ou tulai atu, sa oo ina ou vavalo atu e uiga i le faatupulaia o lenei Ekalesia, ma isi mea e tele e uiga i le Ekalesia, atoa ma lenei tupulaga o le fanauga a tagata. Sa faatumuina i maua i le Agaga Paia, ma sa ma olioli i le Atua o lo ma faaolataga.

O le molimau faigofie lenei, ma le tuusa’o a Iosefa Samita, o loo tuuina atu ai nisi o mea na tutupu seia oo atu ai i le Toefuataiina o le talalelei ma le faavaeina O Le Ekalesia a Iesu Keriso o le Au Paia o Aso e Gata Ai.

Mo se atoatoaga o le tala a Iosefa Samita, tagai i le Talafaasolopito—Iosefa Samita i le Penina Tau Tele po o le Talafaasolopito o le Ekalesia, 1:2–79.