Te u tokoniʻi fēfē nai ha taha ke ne ongoʻi ʻoku ʻofaʻi, fakamahuʻingaʻi, mo fie maʻu ia?

Naʻe vahevahe ʻa Palesiteni Sini B. Pingihami ʻo pehē: “Ko e taha ʻo e ngaahi founga mahuʻinga taha ʻe lava ke tau fakatupulaki mo fakahaaʻi ai ʻetau ʻofa ki hotau kaungāʻapí, ʻoku fakafou ia heʻetau fakakaukau mo lea ʻofá. … ʻOku fakaofo ʻa e mālohi ʻoku maʻu ʻe heʻetau ngaahi leá, fakatouʻosi ki hono langa hake pea mo holoki hifo ha moʻuí. Mahalo te tau lava ʻo manatuʻi kotoa ʻa e ngaahi lea holoki moʻui naʻá ne fakalotomamahiʻi kitautolú kae pehē ki he ngaahi lea ʻofa naʻá ne langaki hake hotau laumālié. ʻI heʻetau fili pē ke lea ʻaki ha meʻa lelei kau ki he niʻihi kehé—ʻokú ne langaki hake mo fakamālohia ai ʻa e niʻihi ʻoku tau feohí pea faitokonia ai ʻa e niʻihi kehé ke nau muimui ki he founga ʻa e Fakamoʻuí.” (“Te u ‘Omi e Maama ‘o e Ongoongoleleí ki Hoku ʻApí, “ Liahona, Nōvema 2016, 6, 7).

Naʻe fakamatala ʻa Sisitā Seiloni ʻIupengi ʻoku ʻi ai ha niʻihi ʻoku ʻikai ke nau ongoʻi ʻoku tali kinautolu pe ʻoku nau feʻunga: “ʻOku lahi ʻa e ngaahi ʻuhinga ʻoku tau ongoʻi ʻoku ʻikai ke tali pe fakahoungaʻi kitautolú. ʻOku fakahā mai ʻe he Fuakava Foʻoú ʻa e ngāue lahi naʻe fai ʻe Sīsū ke aʻu ki he faʻahinga kakai kotoa pē: ʻa e kau kilia, tānaki tukuhau, fānau, kau Kālelí, kau paʻumutú, houʻeiki fafiné, kau uitoú, kau Samēliá, kau Fālesí, kau sōtia Lomá, kau tonó, mo kinautolu ʻoku faiangahalá mo e kau taʻemaʻá. ʻI he meimei talanoa kotoa pē, ʻokú Ne tokoniʻi ha taha ne ʻikai ke tali lelei ʻe he sosaietí koeʻuhí ko e tukufakaholó. … Ko ha fiemaʻu ia ʻe ʻikai lava ke liliu ki he kau ākonga faka-Kalisitiané mo e Kāingalotú ke feʻofaʻaki moʻoní”(“Ko Kalaisi ʻa e Maama ʻOku Ulo ʻi he Fakapoʻulí, ” Liahona, Mē 2019, 74).