‘Oku tokoni nai ʻa e faleʻi fakapalōfesinalé ki he kakai ʻoku nau pehē kuo nau liliu tangata pe fefiné pe ki honau ngaahi fāmilí?

Kapau ‘okú ke faingataʻaʻia ʻi ha faʻahinga tafaʻaki pē ʻi hoʻo moʻuí, mahalo ʻe lava ʻo tokoni atu ha faleʻi fakapalōfesinale ke mahino kiate koe peá ke tali ia ʻi ha ngaahi founga lelei. ʻOku faʻa ʻi ai ha ngaahi makatuʻunga tanumaki kehekehe ki he ngaahi tūkunga ʻo e moʻuí, pea ʻe lava ke faingataʻa ke tau vakai kiate kitautolu ‘i hotau tuʻunga totonú. ‘E lava ke ʻomi ʻe ha tokotaha faleʻi fakapalōfesinale ha ngaahi fakakaukau ʻe ala ʻaonga.

‘I he taimi ʻokú ke hohaʻa ai ki ha ngaahi meʻa fekauʻaki mo e tuʻunga tangata pe fefiné, ʻoku totonu ke ke mātuʻaki tokanga ʻi hono fili ha tokotaha faifaleʻi ʻokú ne fakaʻapaʻapaʻi ho ngaahi tuʻunga ʻulungaanga mahuʻingá pea ʻikai feinga ke fakamālohiʻi ha faʻahinga ola pau. ‘Oku totonu ke fakaʻapa‘apaʻi ‘e he kau faifaleʻí ʻa hoʻo totonu ke fakapapauʻi ho ngaahi tu‘unga ʻulungaanga mahu‘ingá mo e ngaahi taumuʻa ki ho‘o moʻuí.

Vakai foki, “Kakai ʻOku Mahino Kuo Liliu Tangata pe Fefiné,” Tohi Tuʻutuʻuni Fakakātoá: Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.6.23.