Dikeva na iTuvatuva ni Keba

“Me na qai solia kina vei au na tamata yadua, e dua na itukutuku ni veiqaravi sa lesi vua” (Vunau kei na Veiyalayalati 104:12).

Ena nomuni soqoni me dikevi na ituvatuva ni keba, ko ni na dusimaki ena Yalotabu mo ni vakavinakataka ka vuli mai na veika ko ni sa sotava. Me ra na soqoni vata na qase kei na iliuliu ni keba ni itabagone ena veisiga yadua kei na kena sogo na keba me dikevi kina na itaviqaravi eso ni keba. Na kena dikevi e veisiga me lekaleka walega ka vukea na kena vakavinakataki na ivakarau ni veika e sotavi.

Ni ko vakadikeva na veika e sotavi ena keba, vakasamataka na veitaro oqo:

Ea vakayacori beka na itaviqaravi ena sala ea tuvanaki kina? Cava na vuna se cava me sega kina?
Na cava e rawa ni vakavuna me vinaka cake kina na siga nikua?
Na cava a cakacaka vakavinaka?
Na ivakavuvuli cava eda a vakavulica, kei na lesoni cava era a vulica na goneyalewa?
E tiko beka eso na leqa e gadrevi meda walia?
Era a vakila beka na goneyalewa na Yalotabu nikua? Ke sega, na ka vou cava eda rawa ni cakava ni mataka?

Ena itini ni nomuni soqoni ena dikevi ni keba, taroga na veitaro oqo kei na so tale me laurai kina na veika a lako vinaka kei na ivakarau o ni rawa ni vakavinakataka kina ena yabaki ka tarava:

Eda sa rawata beka na veika eda lalawataka? Cava na vuna se cava me sega kina?
A vinaka tu vakacava na noda vakavakarau vakayalo?
A vinaka tu vakacava na noda veivakasalataki vakayalo?
Na cava era sa vulica na goneyalewa me baleta na veiqaravi vakai ira?
Era a vakayacora rawa vakacava na iliuliu ni keba ni itabagone na nodra ilesilesi?
Era a vaqaqacotaki vakacava na nodra matavuvale na goneyalewa?
Ena vanua cava kei na gauna cava ena keba era a vakila kina na Yalotabu na goneyalewa?
Na cava eda rawa ni cakava mera vukei kina na goneyalewa mera kila ka muria tikoga na Yalotabu?
Na cava e sa yaco ki na nodra bula na goneyalewa ena vuku ni keba oqo?
Na vakasama cava sa tu vei keda me baleta na keba ni Goneyalewa ka tarava?

Na veika o ni sotava ena keba ena torocake tikoga ena nomuni maroroya vinaka na kena itukutuku. Me na okati ena veitukutuku oqo e dua na ivakaleka ni itaviqaravi, ripote ni ilavo vakayagataki, veilakoyaki kei na itukutuku ni icili, kakana, kedra iwiliwili na vakaitavi, itaba, kei na ivakadinadina ke rawa. Na veitukutuku oqo sa ivurevure yaga kivei ira ka tuvanaka na keba ena veiyabaki ka tarava.

Sureti ira na goneyalewa mera raica lesu na veika era a sotava ena keba. Vakayaloqaqataki ira mera wasea na veika era sa vulica ki na nodra matavuvale kei na itokani. Ena itaviqaravi ni Muavata, sa rawa mo tomana tiko na kilaka era sa vulica na goneyalewa ena keba. Sa rawa mo veivosakitaka talega na ivunau a vakavulici ena keba ena lesoni ni Sigatabu. Kevaka era sa rawa vakavinaka na nomu itaviqaravi, qai wasea vei ira tale eso.