iVakavuvuli ni Veiliutaki ena Keba

“Mo yalomalumalumu; ena tuberi iko e ligamu na Turaga na nomu Kalou, ka sauma vei iko na nomu masu.” (Vunau kei na Veiyalayalati 112:10).

Sa rawa vei ira na qase kei ira na itabagone mera iliuliu qaqa ni keba nira vakamuria na ivakavuvuli ni veiliutaki e tiko ena iVoladusidusi Raraba: Veiliutaki e Na Lotu i Jisu Karisito ni Yalododonu Edaidai: vakarau vakayalo, vakaitavi ena veimatabose, qaravi ira eso, ka vakavulica na kosipeli i Jisu Karisito (raica na iVoladusidusi Raraba, 4.2 vata kei na lesoni ena kalasi ni veiliutaki ni mataveiliutaki e tiko ena Helps for Presidencies).

Vakavakarau Vakayalo

Me vaka ni ko dua na iliuliu, sa rawa mo ciqoma na veivakauqeti vakayalo ni ko masu, vulica na ivolanikalou, ka lolo ni ko vakananumi ira tiko na goneyalewa. Vakasamataka mo na tiko ena valetabu, ni sa rawa vei iko. Na nomu vakavakarau vakayalo ena dusimaka na nomu sasaga ni ko tuvanaka ka vakavakarau ki na keba.

Vakaitavi ena Matabose

Era na bose vata na mataveiliutaki ni goneyalewa, iliuliu qase ni keba, kei ira na iliuliu itabagone ni keba mera veivakasalataki me baleta na keba. Na veivakasalataki vakaoqo ena sureta na veivakauqeti ni Yalo Tabu ka na vukei iko mo raica na sala mana eso me sotava na nodra gagadre na goneyalewa kei na nodra vuvale ena vuku ni keba. O ira kece era vakaitavi ena veimatabose oqo mera kila tiko ni nodra nanuma kei na ivakasala sa ka bibi sara (raica na Vunau kei na Veiyalayalati 88:122; iVoladusidusi Raraba, 4.2.5).

iLiuliu ni Matabete

Sa nodra ilesilesi taumada na iliuliu ena tabanalevu kei na iteki o ira na goneyalewa ka sa gadrevi mera vakadonuya na ituvatuva taucoko ni nodra keba. Sa itavi ni mataveiliutaki ni Goneyalewa me ratou vakacavara na iTuvatuva ni Soqo kei na iTaviqaravi ka veivakasalataki vata kei na nodratou veidusimaki na iliuliu ni matabete me baleta na inaki, lalawa, vanua ni keba, matailalai ni itaviqaravi, kei na ituvatuva ni keba. Me ra na vakadonuya talega na iliuliu ni matabete na idusidusi ni ilavo me vakayagataki kei na ituvatuva ni veitaqomaki kei na veimaroroi, ka oka kina na nodra digitaki na marama dauveituberi ni goneyalewa kei na vakadeitaki ni ivakatagedegede ni keba me baleta na itovo kei na isulusulu.

Sa rawa vei ira na iliuliu ni matabete mera kaciva na marama eso mai na tabanalevu kei na iteki mera veivuke ena kena tuvanaki ka qaravi na keba (ke ra lewena tiko na keba na goneyalewa mai na tabanalevu duadua ga, mera na qai kacivi ga na iliuliu qase mai na tabanalevu o ya ka sega mai na iteki). E dodonu mera tuvanaka tale tikoga e dua na iwiliwili vakarauta ni iliuliu ni matabete mera tiko ka dau sikova na keba. Ena gadrevi kina e rua se sivia na lewe ni Matabete i Melikiseteki mera dau tiko ena gauna taucoko sara ni keba mera na veitokoni ka veitaqomaki kina (raica na iVoladusidusi Raraba, 20.5.5). Me baleta na itaviqaravi ena bogi taucoko, sa rawa vei ira na iliuliu ni matabete oqo mera tiko ena vale vakarautaki e duidui mai na nodra na goneyalewa kei ira na iliuliu marama qase. Mera kakua ni veivosaki taurua na iliuliu ni matabete kei na dua na iliuliu yalewa se goneyalewa vakavo ga ni rau tu e matadra eso tale.

iLiuliu Goneyalewa ni Keba

E dodonu mera na kacivi na marama ena iteki kei na tabanalevu mai vei ira na nodra iliuliu ni matabete mera mai iliuliu ni keba ni Goneyalewa. O ira na iliuliu ni keba oqo era na cakacaka vata kei ira na iliuliu itabagone ni keba mera tuvanaka ka liutaka na keba ena nodratou veidusimaki na mataveiliutaki ni Goneyalewa.

iVakatakilakila

ivava

iLiuliu iTabagone ni Keba

Na keba sa dua na gauna donu vei ira na goneyalewa mera tauyavutaka ka vakatovotovotaka kina na kila vakaveiliutaki ni ra tuvanaka ka veiliutaki ena keba. Sa rawa mera kacivi o ira na goneyalewa yabaki 16 kei na 17 mera iliuliu itabagone ni keba. Sa nodra ilesilesi taumada na iliuliu itabagone ni keba oqo mera tuvanaka, dusimaka, ka vakadikeva na keba. Era na veivakasalataki vata kei iratou na mataveiliutaki ni Goneyalewa, iliuliu ni keba ena iteki kei na tabanalevu, kei ira na iliuliu ni matabete. Ke ra sega ni tiko ena tabanalevu se iteki o ira na goneyalewa ena yabaki ni bula oqo, sa rawa vei ira na goneyalewa ena yabaki ni bula tale eso mera na taura na ilesilesi oqo. Sa rawa talega vei ira na mataveiliutaki ena kalasi mera veiliutaki ena keba. Me baleta na ivurevure mera vukei kina na goneyalewa mera vakavakarau ki na nodra ilesilesi ni veiliutaki, raica na iVoladusidusi Raraba iwasewase 4.2 kei na lesoni ni mataveiliutaki ni iliuliu ni kalasi kune ena Helps for Presidencies.

Na ilesilesi dina vaka iliuliu itabagone ni keba e oka kina na liutaki kei na tuvanaki ni bose, digitaki kei na tuvanaki na itaviqaravi, dusimaki kei na liutaki ni itaviqaravi digitaki, kei na kena dikevi na keba.

iVakatakilakila

ira na goneyalewa ena keba

Veiqaravi Vei Ira Eso Tale

“Era sa veivakatavulici, ka veiqaravi vakai ira” (3 Nifai 26:19).

Ni da sa veiqaravi, eda sa qarava ka vakavulica eso tale. Mai na veiqaravi, sa nodra madigi kece na iliuliu ena keba mera vaqaqacotaka na veimaliwai ka tauyavutaka na veivakabauti ena kedra maliwa na goneyalewa. Na veiqaravi ena gadrevi kina na loloma, veitokani dina, kei na gagadre mo vaqaqacotaki ira tale eso. Na keba ena vakarautaka e dua na ituvaki era na yaco kina na goneyalewa mera vakataka cake na iVakabula ni ra vulica mera veiqaravi vakai ira. Ni ko sa iliuliu, o sa na ivakaraitaki ni veiqaravi ni ko laveti ira na tamata, tara cake na nuidei ena vosa kei na cakacaka, digitaka mo vosota tiko, mo dua na dauveivakameautaki, kakua ni vosa kudrukudru, wasea nomu ivakadinadina, ka sudra yani vei ira kece na tamata.

Ke o sa dua na iliuliu itabagone ni keba, sa na cecere cake sara na nomu madigi mo veiqaravi vei ira na goneyalewa ena keba baleta ni ko sa vakaitavi vakavoleka sara ki na veika era sotava. Ni ko sa iliuliu itabagone ni keba, sa rawa mo veiqaravi vei ira na goneyalewa ena keba ena sala oqo:

Veivosaki vata kei ira vakayadua na goneyalewa. Mo na kilai koya vakavinaka ka vukea me kila na veika me namaka ena keba.
Ni bera na keba mo masulaka yadua na goneyalewa ka cavuta na yacadra kei na veisiga yadua ena gauna ni keba. Raica mera kauwaitaki na goneyalewa yadua ka vakila ni ra lomani tiko.
Vakayacora na veicakacaka rawarawa ni yalololoma kei na veiqaravi.
Vakavulici ira na goneyalewa ena veiqaravi. Sureti ira mera veiqaravi vakai ira. Ena icavacava ni veisiga yadua ni veiwaseitaka na veika o ni sa sotava.

iVakatakilakila

ira na goneyalewa ena keba

Vakavulica na Kosipeli i Jisu Karisito

O ira kece na iliuliu ni keba era sa qasenivuli ena ivakaraitaki kei na ivakadinadina. Sa dodonu me vutuniyau na keba ena vulici ni ka vakayalo kei na ka vakayago. Ni ko tuvanaka tiko na ka mo vakavulica ena keba, masulaka ka vakasamataki ira vakatitobu na goneyalewa yadua. Vakarautaka na goneyalewa yadua ena madigi eso mera vakila na Yalotabu. Vukei koya me vakayagataka na ivunau ni kosipeli ki na veika ena sotava e veisiga. Vakavulica vua na kila ka eso ena vakarautaki koya ki na nona veisiga ni mataka ka taqomaki koya kei na nona matavuvale ena gauna ni leqa tubukoso. Se cava ga na ivakavuvuli o digitaka mo vakavulica, nanuma tiko ni veika kece o cakava ena keba sa dodonu me vukea na goneyalewa yadua me rawata vinaka na veika sa lavaki oqo (raica talega na iVoladusidusi Raraba, 11.1.1):

Vaqaqacotaka na nona vakabauta kei na nona ivakadinadina me baleta na Tamada Vakalomalagi kei Jisu Karisito.
Me kila vinaka o koya na nona ivakatakilakila ni sa luvena yalewa na Kalou.
Me bula kilikili voli ni sa talairawarawa tiko ki na ivakaro ka bulataka na ivakatagedegede ni kosipeli.
Ciqoma, kila, ka vakararavi ki na veivakauqeti ni Yalo Tabu.
Vakavakarau ki na nona itavi vakalou vakailiuliu, vaka yalewa vakawati, ka tina.
Me kila vinaka ka maroroya tiko na veiyalayalati sa vakayacora.
Tauyavutaka na veitokani ka bula marau.