iVakamacala Taumada ni Keba ni Goneyalewa

“Io, dou lako mai vei Karisito, ka mo dou vakataucokotaki vua” (Moronai 10:32).

“E dua na mata ni wai makare sara” kei na “veikau lalai ka ra veidrigidrigiti sara” (Mosaia 18:5)—a vakayagataka o Momani na veivosa oqo me vakamacalataka kina na vanua a vuni kina o Alama ni a dro tiko mai vei Tui o Noa. Na veivunikau oqori kei na wai “sa ka totoka dina” vei ira na tamata era mai tiko e kea kei Alama. Na cava na vuna? Baleta ni vanua o ya, a yaco kina vei Alama kei ira na nona tamata “era sa mai veikilai kina kei na nodra Dauveivueti” (Mosaia 18:30).

Na vanua ni nodra keba na nomu Goneyalewa—ena loma ni veikau, se ena dua na rara ni gade, ena baravi, se ena dua na valenilotu—sa rawa ni ka totoka dina ki na matadra na tiko taucoko kina. Me vakataki Alama kei ira na nona tamata, era na gadreva na goneyalewa e dua na vanua mera na soqoni vata kina, ka vakatikitiki tani mai na veivakayarayarataki ni vuravura, vakila na Yalo ni Turaga, tubu cake ena duavata kei na veilomani, ka vaqaqacotaka na nodra vakabauta kei na ivakadinadina baleta na Tamada Vakalomalagi kei Jisu Karisito.

Sa dau vakauqeta na Lotu na nodra keba na goneyalewa. Ena nodra veidusimaki na iliuliu ni matabete kei na raici ni nodra gagadre na matavuvale, sa navuca na mataveiliutaki ni Goneyalewa ena iteki kei na tabanalevu na gauna cava soti kei na balavu ni parokaramu ni keba. Sa dau vakayacori raraba tu na keba ni vica na siga ena veiyabaki ena dua na tabanalevu se iteki. Sa rawa me vakayacori na keba ena siga se na bogi ena nodra lewa na iliuliu ni matabete me sotava na nodra gagadre kei na malele na lewenilotu. Na ivakavuvuli eso ena ivola oqo sa dodonu me vakayagataki ena ituvatuva kecega.

Na keba e sa baleti ira taucoko na goneyalewa sa ganiti mera vakaitavi ena parokaramu ni Goneyalewa. Sa rawa ni ra okati talega o ira ka sega ni lewenilotu ka sa lomasoli mera muria na ivakatagedegede ni Lotu. Mera na vakadeitaka na iliuliu na goneyalewa cava soti sa na matua cake ena tikinisiga ni keba ka sureti ira mera vakaitavi. Sa rawa mera veivakasalataki na itubutubu kei ira na iliuliu me baleta na veivakadonui ena idusidusi ni yabaki ni bula ni raici vata kei na yalomatua kei na veimaliwai vakaicaba sa tiko rawa. (Raica na iVoladusidusi Raraba: Veiqaravi e Na Lotu i Jisu Karisito ni Yalododonu Edaidai, 11.2.1.3, ChurchofJesusChrist.org.)

Yabaki ni bula Lavaki: Ena veivakadonui ni nodra itubutubu, sa rawa ni ra lako na goneyalewa ena keba bogidua ni Goneyalewa me tekivu ena Janueri ni yabaki era na yabaki 12 kina.

Mera na vakayagataka na mataveiliutaki ni Goneyalewa, iliuliu ni keba, kei na iliuliu itabagone ni keba na ivakavuvuli era tiko ena idusidusi oqo mera tuvanaka ka vakayacora kina na keba. Na veivakavuvuli oqo ena vukei ira na qase kei na iliuliu itabagone ni keba mera tuvanaka e dua na gauna ni keba baleti ira na goneyalewa ena veitaba ni Lotu yadua, se vanua cava ga kei na ituvaki. Na keba e tuvanaki ka vakayacori ena ituvatuva ni ivakavuvuli veivakauqeti oqo ena vukei ira na goneyalewa mera tubu ena kosipeli i Jisu Karisito, tauyavutaka na veitokani, ka vakalevutaka na bula rawati koya kei na kilaka eso e tautuba.

A sega ni tiko o Alama kei ira na nona tamata ena Wai o Momani, ia na veika era a sotava ena Wai o Momani sa tiko vata kei ira. Sa vakakina, ni ra sa lesu na goneyalewa ki na nodra itikotiko, na veika era a sotava ena keba ena tiko vata ka vaqaqacotaki ira baleta ni ra sa kila vakalevu cake na nodra Dauveivueti.