Մտքեր ճամբարի ծառայության և միջոցառումների համար

Ստորև տրվում է հնարավոր հոգևոր, սոցիալական, ֆիզիկական և ինտելեկտուալ միջոցառումների գաղափարների ցանկը, որի շուրջ պետք է խորհել, մինչ դուք ծրագրում եք ճամբարը։

Նախապատրաստական միջոցառումներ

Ճամբարի միջոցառումները կարող են սկսվել նախքան ճամբար մեկնելը և շարունակվել ճամբարի ավարտից հետո։ Խորհեք միջոցառումներ ծրագրելու մասին, որոնք կմեծացնեն պատրաստվածությունը, կբարելավեն ուսումնառությունը և կառաջացնեն ակնկալիքներ ճամբարի հետ կապված։

• Կազմակերպեք նախապատրաստական միջոցառումներ երիտասարդ կանանց և նրանց ընտանիքների համար։ Կիսվեք ճամբարի թեմայով և մանրամասներով։

• Անցկացրեք պլանավորման միջոցառում, որտեղ դուք կկազմեք հանձնարարությունների օրակարգը։ Այդ հանձնարարություններից մի քանիսը կարող են ներառել՝ ուտելիքի պատրաստում, մաքրություն, աթոռների դասավորում և աղբահանություն։

• Կազմեք ճամբարի ճաշացանկ՝ սննդարար բաղադրատոմսերով։

• Սովորեք շրջակա միջավայրի պահպանման ձևերը, օրինակ՝ ինչպես խուսափել թափոններից, մաքուր պահել ջուրը և վերականգնել բնության այն տարածքները, որոնք վնասվել են։

• Վարժվեք ճամբարային հարմարանքներն օգտագործելու և դրսում ուտելիք պատրաստելու գործում։

• Սկսեք սովորել բնության մեջ գոյատևելու հմտությունները։

• Կազմեք ֆիզիկական պատրաստվածության ծրագիր և մասնակցեք արշավների, հեծանվավազքի կամ այլ միջոցառումների, որոնք կօգնեն ձեզ նախապատրաստվել ճամբարին:

«Բոլոր բաները մատնանշում են, որ կա՛ Աստված. այո, նույնիսկ երկիրը և բոլոր բաները, որ նրա երեսին են, այո, և նրա շարժումը, այո, և բոլոր մոլորակները, որոնք շարժվում են իրենց կանոնավոր ձևով, վկայում են, որ կա մի Գերագույն Ստեղծող» (Ալմա 30․44):

Հոգևոր աճ

• Նախատեսեք ժամանակ ամեն օր անհատապես սուրբ գրություններն ուսումնասիրելու, օրագրում գրառումներ կատարելու, աղոթելու և խորհելու համար։ Դուք կարող եք կենտրոնանալ այն սուրբ գրությունների վրա, որոնք կապված են ճամբարի թեմայի հետ:

• Ծրագրեք ամենօրյա ճամբարային հոգևոր հավաքներ։

• Գնացեք բնության գրկում զբոսնելու կամ գանձեր որոնելու։

• Նախապատրաստեք և տվեք դասեր կամ անցկացրեք հոգևոր հավաքներ, որոնց ժամանակ կկիսվեք ավետարանի սկզբունքներով և չափանիշներով։ Հյուր խոսնակների վերաբերյալ հրահանգների համար տեսGeneral Handbook: Serving in The Church of Jesus Christ of Latter-day Saints, բաժին 38.8.20։

• Անցկացրեք վկայության ժողովներ և օգնեք երիտասարդ կանանց հասկանալ ճշմարիտ վկայության էությունը (տես Հավատքին Հավատարիմ․ Ավետարանական վկայակոչում [2004], 178–80, Ավետարանի թեմաներ, «Վկայություն», topics.ChurchofJesusChrist.org and M. Russell Ballard, “Pure Testimony,” Liahona, Nov. 2004, 40-43)։

• Սերտեք սուրբ գրության հատված, բանաստեղծություն, օրհներգ, «Կենդանի Քրիստոսը․ Առաքյալների վկայությունը» (Լիահոնա, ապրիլ 2000, 2-3) կամ «Ընտանիք․ հայտարարություն աշխարհին» (Լիահոնա, նոյ․ 2010, 129), կամ “The Restoration of the Fulness of the Gospel of Jesus Christ: A Bicentennial Proclamation to the World,” ChurchofJesusChrist.org։

• Նախապատրաստվեք միսիայի այնպիսի միջոցառումների միջոցով, ինչպիսիք են միսիոներական ուսուցումը կամ միսիոներական բեմականացումները։

• Մասնակցեք ընտանեկան պատմության աշխատանքներին՝ կիսվելով պատմություններով, պատրաստելով ավանդական բաղադրատոմսերով ուտեստներ կամ ալբոմներ պատրաստելով։

• Նախապատրաստվեք տաճարային արարողություններ ստանալուն այնպիսի միջոցառումների միջոցով, ինչպիսիք են հավատքով քայլելը կամ չափանիշների վերաբերյալ խաղերը։

• Անցկացրեք հոգևոր երաժշտության երեկոներ։

• Խաղացեք խաղ, պատրաստեք ներկայացում կամ հումորային համար, որն ուսուցանում է սուրբ գրություն կամ ավետարանի սկզբունք։

Հրավիրեք երիտասարդ կանանց անդրադառնալ իրենց ճամբարային փորձառություններին: Հորդորեք նրանց կիսվել իրենց սովորածով իրենց ընտանիքի և ընկերների հետ։

Ֆիզիկական վարժություններ և առողջություն

Երբ դուք ընտրեք այս ցուցակից կամ ընտրեք այլ միջոցառումներ, հիշեք, որ բոլոր ֆիզիկական վարժությունները պետք է համապատասխանեն մասնակիցների տարիքին և ֆիզիկական ու մտավոր կարողություններին։ Հատուկ միջոցառումների ժամանակ, ինչպիսիք են արագահոս գետում նավարկելը կամ ժայռեր մագլցելը, ներգրավեք պատշաճ վերապատրաստում անցած մասնագետների կամ որակավորում ունեցող ուղեկցողների։ Միջոցառումների ժամանակ պահպանեք անվտանգության բոլոր կանոնները և օգտագործվող շինությունների ապահովության կարգավորումները:

• Ծրագրեք սպորտային կամ ֆիզիկական վարժություններ՝ համաձայն ճամբար այցելող երիտասարդ կանանց հետաքրքրության։

• Խաղացեք խմբակային սպորտաձևեր, ինչպես օրինակ՝ ֆուտբոլ, վոլեյբոլ կամ բասկետբոլ։

• Ծրագրեք և մասնակցեք երկարատև կամ շուրջօրյա ուսապարկով զբոսաշրջության։

• Մասնակցեք էքսկուրսիայի, հեծանվավազքի կամ բնության գրկում զբոսանքների։

• Գնացեք նավարկելու արագահոս գետում։*

• Մասնակցեք ջրային միջոցառումների, ինչպես օրինակ լողը, սուզալողը,* ջրասուզակային լողը,* մակույկավարումը,* առագաստանավային սպորտը* և այլն։

• Մագլցեք ժայռերը* և վայրէջք կատարեք պարանի օգնությամբ։*

• Հրավիրեք որևէ մասնագետի ուսուցանել անձնական անվտանգության և ինքնապաշտպանության մասին։*

• Կազմեք առողջ ապրելակերպի ծրագիր և փորձարկեք ու զարգացրեք ճիշտ մարզվելու և ուտելու սովորություններ։

• Ուսումնասիրեք Իմաստության Խոսքը և սովորեք սննդագիտության մասին։ Ուսումնասիրեք այն վարքագիծն ու հատկանիշները, որոնք կարող են հանգեցնել անառողջ սովորությունների, այդ թվում՝ ստամոքսի խանգարումների։

• Հրավիրեք մասնագետ, ով կսովորեցնի մտավոր առողջության, զգացմունքային առողջության և հաղթահարելու հմտությունների մասին։

• Սովորեք համացանցի և պոռնոգրաֆիայի վտանգների մասին և սովորեք, թե ինչպես պաշտպանել ինքներդ ձեզ և ձեր ընտանիքին։

Արտակարգ իրավիճակների պատրաստվածություն և գոյատևման հմտություններ

• Հրավիրեք վերապատրաստված մասնագետների, որպեսզի ուսուցանեն հիմնական առաջին օգնության կամ արտակարգ իրավիճակներում արձագանքելու, ինչպես նաև կյանքին սպառնացող իրավիճակներում գործելու, վերքեր կապելու և վիրավորներին փրկելու մասին։

• Սովորեք, թե ինչպես պատրաստել և կիրառել առաջին օգնության պարագաները։

• Սովորեք և կիրառեք կրակ ստանալու և այն ապահով պահպանելու տեխնիկան։

• Հրավիրեք վերապատրաստված կամ փորձառու որևէ մեկի ուսուցանել ձեզ հնարավոր բնական աղետների, ռեսուրսների պակասի և աղտոտման մասին, որոնք հատուկ են ձեր համայնքին։

• Սովորեք, թե ինչպես կողմնորոշվել անծանոթ տեղանքում, օգտագործելով կողմնացույց, տարբեր տեսակի քարտեզներ և արևի, լուսնի և աստղերի դիրքերը։

• Սովորեք ամպագոյացությունների մասին։

• Սովորեք բնության մեջ գոյատևելու հիմնական ունակությունները։

• Կառուցեք շտապ օգնության ապաստարաններ։

• Սովորեք, թե ինչպես գտնել և մաքրել ջուրը։

• Հրավիրեք մասնագետի, ով կսովորեցնի ձեզ, թե ինչպես զանազանել վայրի բնությունը, միջատները և բույսերը։ Նաև սովորեք, թե ինչպես զանազանել բույսերը և կենդանիները, որոնք կարելի է օգտագործել սննդի մեջ։

• Ճամբարի ընթացքում կիրառեք շրջակա միջավայրի բարելավման ուղիները։ Սովորեք ճամբար կառուցել։

• Սովորեք և կիրառեք տարբեր տեսակի հանգույցներ ստանալու և դրանք միմյանց ամրացնելու հմտություններ։

• Փորձեք դրսում ուտելիք պատրաստելու տարբեր մեթոդներ, ինչպես օրինակ՝ ռեֆլեկտորային վառարաններ, հոլանդական վառարաններ կամ կիրառեք ճամբարային խարույկ։

• Սովորեք, թե ինչպես պահել սնունդը և ջուրը։

• Սովորեք դանակն օգտագործելու հմտություններ և անվտանգություն։

Ընկերակցելու և ղեկավարելու հմտություններ

• Ճամբար այցելող յուրաքանչյուր երիտասարդ աղջիկ կունենա «գաղտնի քույր», ում նա պետք է ծառայի ճամբարում գտնվելիս։ Նա կարող է ծառայել բարեմաղթանքներ պարունակող բացիկներ գրելով կամ համոզվելով, որ «գաղտնի քույրը» ներգրավված է բոլոր միջոցառումներում։

• Հրավիրեք Եկեղեցու ղեկավարների, որպեսզի ուսուցանեն վստահություն ձեռք բերելու և կոնֆլիկտները հարթելու մասին։

• Ծրագրեք տաղանդների շոու, որտեղ յուրաքանչյուր երիտասարդ աղջիկ կարող է մասնակցել։

• Մասնակցեք մարդասիրական կամ բնապահպանման ծառայությունների։

• Երախտագիտություն ցուցաբերեք ճամբարում ձեր չափահաս ղեկավարների հանդեպ։

• Կազմակերպեք պարզ մրցանակաբաշխություն, որի ժամանակ կնշվեն ճամբարի յուրաքանչյուր մասնակցի նվաճումները և ներդրումները։

• Կազմակերպեք և անցկացրեք երեկոյան ճամբարային խարույկի ծրագրեր։

Տաղանդների և հմտությունների զարգացում

Այս գաղափարները ավանդական բացօթյա ճամբարի միջոցառումներ չեն, բայց կարող են օգնել ձեզ բավարարել ձեր երիտասարդ կանանց կարիքները:

• Սովորեք և զարգացրեք երաժշտական տաղանդներ, ինչպես օրինակ՝ երգելը կամ գործիքներ նվագելը։

• Փորձեք հմտանալ արվեստի և արհեստի տարբեր ճյուղերում, ինչպես օրինակ՝ զամբյուղ գործել, նկարել, քանդակել կամ շյուղերով գործել։

• Սովորեք խմբավարել երաժշտությունը։

• Հրավիրեք մասնագետի, ով կսովորեցնի ձեզ պարզ ատաղձագործական, վերանորոգման կամ տուն կառուցելու այլ հմտություններ։ Օգտագործեք այդ հմտությունները ուրիշներին ծառայելու համար։

• Սովորեք ծախսերը պլանավորելու և միջոցների կառավարման հիմունքները։

• Հրավիրեք փոքր երեխաներ ունեցող մորը սովորեցնել երեխայի խնամքի հիմունքները։

• Սովորեք, թե ինչպես աճեցնել և պահածոյացնել ձեր իսկ մթերքը։ Սա կարող է ներառել, թե ինչպես տնկել և մշակել այգի։

• Սովորեք կարելու հիմունքները՝ հագուստի մի պարզ նմուշ կարելով։ Դուք կարող եք նաև սովորել, թե ինչպես կարկատել հագուստը։

• Սովորեք, թե ինչպես ճանաչել և բացահայտել տարբեր համաստեղությունները, մոլորակները և գիշերային երկնքի այլ առանձնահատկությունները։

• Նախապատրաստեք և ներկայացրեք կարճ բեմադրություն կամ հումորային համար ճամբարի համար։

• Փորձեք գրել և ելույթներ ունենալ հաղորդության ժողովի համար։ Կիսվեք ձեր ելույթով ուրիշների հետ:

• Շրջեք տեղի կրթական կամ մասնագիտական ուսուցման հաստատություններում։ Ծրագիր մշակեք ձեր կրթությունը շարունակելու համար: Սովորեք Եկեղեցու Կրթության մշտական ֆոնդի մասին։

• Սովորեք, թե ինչպես վերամշակել և կրկին կիրառել առարկաները։

* Այս միջոցառումները չափազանց վտանգավոր են, ուստի պահանջվում է պատշաճ ուսուցում կամ որակավորում ունեցող մասնագետների օգնությունը։