1 Ut anajwan laa’in, aj Nefi, nin’ok wi’chik chixk’eeb’al chiruheb’ li perel ch’iich’ a’in resil lin b’aanuhom, ut lin awa’b’ejil ut lin k’anjel sa’ li paab’aal; jo’kan ut, re xtikib’ankil wi’chik li esil nink’e, tento tin’aatinaq ka’ch’inaq chirix li k’a’aq re ru re lin yuwa’, ut reheb’ ajwi’ li was.

2 Xb’aan naq k’ehomaq reetal, kik’ulman chirix naq lin yuwa’ kixk’e xraqik xyeeb’al li aatin sa’ lix matk’, ut xtz’aamankil ajwi’ chiruheb’ naq yalb’ilaqeb’ tz’aqal xq’e, kiraatinaheb’ chirixeb’ laj Judio—

3 Naq chirix naq te’sachmanq, relik chi yaal, anchal lix nimal ru tenamit a’an Jerusalen, ut naab’al k’amb’ilaqeb’ chi preexil Babilonia, jo’ chanru li kutan k’oxlanb’il xb’aan li Qaawa’, te’sutq’iiq wi’chik, relik chi yaal, te’sutq’isiiq wi’chik chaq chi preexil; ut chirix naq te’sutq’isiiq chaq chi preexil, te’reechani wi’chik lix ch’och’il li reechanihomeb’.

4 Relik chi yaal, naq waqib’ cient chihab’ relik chaq lin yuwa’ Jerusalen, jun profeet li Qaawa’ Dios tixwaklesi sa’ xyanqeb’ laj Judio—a’anaq jun li Mesias, malaj sa’ jalan chik aatin, jun aj Kolol re li ruchich’och’.

5 Ut ki’aatinak ajwi’ chirixeb’ li profeet, jo’ xk’ihal rajlankileb’ li xe’ch’olob’ank re xyaalal li k’a’aq re ru a’in, chirix li Mesias a’in li ki’aatinak wi’, malaj a’an laj Tojol rix li ruchich’och’.

6 Jo’kan ut, chixjunileb’ li winq wankeb’ chaq chi sachenaq ut chi t’anenaq, ut jo’kan raj te’wanq chi junajwa wi ta ink’a’ te’xkanab’ rib’ chiru laj Tojol-ix a’in.

7 Ut ki’aatinak ajwi’ chirix jun li profeet li taak’ulunq xb’een wa chiru li Mesias, re tixkawresi xb’e li Qaawa’—

8 Relik chi yaal, a’an taaxik ut tixjap ajwi’ re sa’ li yamyookil ch’och’: Kawresihomaq lix b’e li Qaawa’, ut tiikob’resihomaq ru li ruq’ xb’e; xb’aan naq xaqxo sa’ eeyanq jun li moko nawb’il ta ru eeb’aan; ut q’axal kaw wi’chik xmetz’ew chiwu laa’in, moko k’ulub’ejin ta chixhitb’al lix tz’apb’al lix xaab’. Ut naab’al ki’aatinak lin yuwa’ chirix li na’leb’ a’in.

9 Ut lin yuwa’ kixye naq a’an taakub’sinq ha’ aran Betabara, chi xjunpak’alil li Jordan; ut kixye ajwi’ naq taakub’sinq ha’ rik’in ha’; naq tixkub’si ajwi’ xha’ li Mesias rik’in ha’.

10 Ut chirix naq akaq xkub’si xha’ li Mesias rik’in ha’, tixk’e reetal ut tixch’olob’ xyaalal naq xkub’sihom xha’ lix Karneer li Dios, li taa’isinq re lix maak li ruchich’och’.

11 Kik’ulman ut chirix naq lin yuwa’ kixye li aatin a’in, kiraatinaheb’ li was chirix li evangelio li taajultikamanq sa’ xyanqeb’ laj Judio, ut jo’kan ajwi’ chirix lix lajikeb’ laj Judio chi maak’a’aqeb’ xpaab’aal. Ut chirix naq akaq xe’xkamsi li Mesias li taak’ulunq, ut chirix naq ak xkamsiik, taawakliiq chaq sa’ xyanqeb’ li kamenaq, ut tixk’utb’esi rib’, rik’in li Santil Musiq’ej, chiruheb’ laj Gentil.

12 Relik chi yaal, naab’al ajwi’ ki’aatinak lin yuwa’ chirixeb’ laj Gentil, ut jo’kan ajwi’ chirix lix junkab’al laj Israel, naq te’juntaq’eetaaq rik’in jun xtoonal li che’ olivo, naq te’toqe’q li ruq’ ut te’jek’iiq chiru chixjunil lix b’een li ruchich’och’.

13 Jo’kan ut, kixye naq tento taa’uxq naq taak’ame’q qab’e sa’ junajil sa’ li ch’och’ li yeechi’inb’il, choq’ re xtz’aqob’resinkil ru li raatin li Qaawa’, naq jek’inb’ilaqo chiru chixjunil lix b’een li ruchich’och’.

14 Ut chirix naq te’jek’iiq lix junkab’al laj Israel te’ch’utub’aaq wi’chik; malaj ut naq ak xe’xk’ul laj Gentil lix tz’aqalil li Evangelio, li tz’aqal ruq’ lix toonal li che’ olivo, malaj eb’ li rela’ lix junkab’al laj Israel, te’letze’q wi’chik sa’ xtoonal, malaj te’k’ame’q chixnawb’al chirix li tz’aqal Mesias, a’an lix Qaawa’eb’ ut laj Tojol rixeb’.

15 Ut jo’ka’in li raatin lin yuwa’ naq kich’olob’ank jo’ profeet ut ki’aatinak chiruheb’ li was, ut jo’kan ajwi’ naab’al chik li k’a’ re ru li ink’a’ tintz’iib’a sa’ li hu a’in; xb’aan naq xintz’iib’a jo’ k’ihal ki’ajman chiwu sa’ lin hu jun chik.

16 Ut chixjunil li k’a’aq re ru a’in, li xin’aatinak wi’, kib’aanuman naq toj yoo chi wank lin yuwa’ sa’ jun muheb’aal t’ikr, sa’ li ru taq’a Lemuel.

17 Ut kik’ulman chirix naq laa’in, aj Nefi, ak wab’ihom chixjunil li raatin lin yuwa’, chirix li k’a’aq re ru kiril chaq sa’ li k’utb’esinb’il matk’, ut jo’kan ajwi’ li k’a’aq re ru kixye rik’in xwankil li Santil Musiq’ej, ut li wankilal a’an kixk’ul rik’in xpaab’ankil li Ralal li Dios—ut li Ralal li Dios a’an li Mesias li taak’ulunq—laa’in, aj Nefi, kiwaj ajwi’ naq tinwil, ut tinwab’i, ut tinnaw chirix li k’a’aq re ru a’in, rik’in lix wankil li Santil Musiq’ej, a’an li maatan naxk’e li Dios reheb’ chixjunil li neke’sik’ok re chi yalb’ileb’ xq’e, jo’ sa’ najter kutan jo’ sa’ li kutan naq tixk’utb’esi wi’ rib’ chiruheb’ li ralal xk’ajoleb’ li winq.

18 Xb’aan naq a’an juntaq’eet ewer, anajwan, ut chi junelik; ut li b’e kawresinb’il choq’ reheb’ chixjunil li winq chalen chaq sa’ xk’ojlajik li ruchich’och’, wi taa’uxq naq te’xjal xk’a’uxl ut te’chalq rik’in.

19 Xb’aan naq ani nasik’ok chi yalb’il xq’e, taatawoq; ut lix muqmuukil na’leb’ li Dios taateeliiq chiruheb’ rik’in lix wankil li Santil Musiq’ej, jo’ sa’ li kutan a’in jo’ sa’ najter kutan, ut jo’ sa’ najter kutan jo’ sa’ li kutan toj taachalq; jo’kan ut, lix b’e li Qaawa’ wan sa’ junaj chi xsutam li wan chi junelik.

20 Jo’kan ut, chijultiko’q aawe, at winq, rik’in chixjunil laa b’aanuhom tatk’ame’q chaq sa’ raqb’a-aatin.

21 Jo’kan ut, wi xasik’ xb’aanunkil li maa’usilal chiru xkutankil lix yalb’al aawix, rik’in a’an nakattawe’ chi tz’aj aawu chiru lix raqleb’aal aatin li Dios; ut maak’a’ k’a’ru tz’aj naru nawan rik’in li Dios, jo’kan naq tento tattz’eqe’q chi junelik.

22 Ut li Santil Musiq’ej nak’ehok wankilal re naq tinye li na’leb’ a’in, ut naq ink’a’ tinram xyaalal.