1 Vim tau muaj tias tom qab uas kuv tau xav pom tej yam uas kuv txiv tau pom lawm, thiab ntseeg tias tus Tswv yeej muaj peev xwm ua tau tej ntawd rau kuv pom, thaum kuv tseem zaum xav ntsoov hauv kuv nruab siab tus Tswv tus Ntsuj Plig tau coj kuv tawm mus, muaj tseeb tiag, coj kuv mus rau puag saum ib lub ncov roob uas siab kawg, lub uas kuv tsis tau pom dua ib zaug li, thiab lub uas kuv txhais ko taw tsis tau mus txog dua ib zaug li.

2 Thiab tus Ntsuj Plig tau hais rau kuv tias: Saib seb, koj xav tau dab tsi?

3 Thiab kuv tau hais tias: Kuv xav pom tej yam uas kuv txiv tau pom lawm.

4 Thiab tus Ntsuj Plig tau hais rau kuv tias: Koj puas ntseeg tias koj txiv tau pom tsob ntoo uas nws tau hais?

5 Thiab kuv tau hais tias: Muaj tseeb tiag, koj yeej paub tias kuv ntseeg kuv txiv txhua lo lus.

6 Thiab thaum uas kuv tau hais cov lus no tas lawm, tus Ntsuj Plig tau ua ib lub suab qw nrov nrov hais tias: Hauxanas rau tus Tswv, Vajtswv tus uas muaj hwj chim loj kawg nkaus; vim nws yog Vajtswv tus uas kav lub ntiaj teb tag nrho, muaj tseeb tiag, yeej muaj hwj chim tshaj ib puas yam tsav. Thiab koj tau koob hmoov kawg, Nifais, vim yog koj ntseeg Vajtswv tus uas muaj hwj chim loj kawg nkaus leej Tub; yog li ntawd, koj yuav tau pom tej uas koj tau xav pom.

7 Thiab saib seb yam no yuav muab ua ib lub cim rau koj, tias tom qab uas koj tau pom tsob ntoo uas tau txi cov txiv uas koj txiv tau noj, koj kuj yuav pom ib tug txiv neej nqes saum ntuj ceeb tsheej los, thiab koj yuav pom nws; thiab tom qab uas koj tau pom nws lawm koj yuav ua tim khawv hais tias nws yog Vajtswv leej Tub.

8 Thiab tau muaj tias tus Ntsuj Plig tau hais rau kuv tias: Ntsia seb! Thiab kuv tau ntsia thiab tau pom ib tsob ntoo; thiab nws zoo li tsob ntoo uas kuv txiv tau pom; thiab qhov zoo nkauj ntawm tsob ntoo mas zoo nkauj tshaj, muaj tseeb tiag, zoo nkauj tshaj txhua yam tsav uas zoo nkauj huv tib si li; thiab qhov dawb ntawm tsob ntoo tseem dawb tshaj qhov dawb ntawm cov dau uas cua muab ntsawj ya.

9 Thiab tau muaj tias tom qab uas kuv tau pom tsob ntoo lawm, kuv tau hais rau tus Ntsuj Plig hais tias: Kuv pom koj tau muab tsob ntoo uas muaj nuj nqis tshaj dua li lwm tsob ntoo rau kuv pom.

10 Thiab nws tau hais rau kuv tias: Koj xav tau dab tsi?

11 Thiab kuv tau hais rau nws hais tias: Xav paub saib tej ntawd txhais li cas—vim kuv tau hais lus rau nws ib yam li ib tug tib neeg hais lus; vim kuv tau pom tias nws zoo li ib tug neeg; tiam sis, kuv yeej paub lawm hais tias nws yog tus Tswv tus Ntsuj Plig; thiab nws tau hais lus rau kuv ib yam li ib tug tib neeg hais lus nrog rau lwm tus.

12 Thiab tau muaj tias nws tau hais rau kuv hais tias: Ntsia seb! Thiab kuv tau tig hlo mus ntsia nws, thiab kuv tsis pom nws; vim nws tau ncaim ntawm kuv mus lawm.

13 Thiab tau muaj tias kuv tau ntsia thiab tau pom lub nroog Yeluxalees uas loj, thiab lwm cov nroog thiab. Thiab kuv tau pom lub nroog Naxales; thiab nyob hauv lub nroog Naxales no kuv tau pom ib tug nkauj xwb uas tsis tau deev dua hluas nraug li, thiab nws yog ib tug ntxhais uas zoo nkauj thiab dawb huv heev.

14 Thiab tau muaj tias kuv tau pom rooj ntug qhib; thiab ib tug tim tswv tau nqis saud los thiab tau los sawv ntawm kuv xub ntiag; thiab nws hais rau kuv hais tias: Nifais, koj pom dab tsi?

15 Thiab kuv tau hais rau nws hais tias: Kuv tau pom ib tug nkauj xwb, tus uas zoo nkauj thiab dawb huv tshaj plaws dua lwm tus nkauj xwb.

16 Thiab nws tau hais rau kuv hais tias: Koj puas paub hais tias Vajtswv twb yuav nqis los nrog neeg nyob?

17 Thiab kuv tau hais rau nws hais tias: Kuv paub tias nws yeej hlub nws cov me nyuam; txawm li ntawd los, kuv twb tsis paub tej ntsiab lus ntawm txhua yam.

18 Thiab nws tau hais rau kuv hais tias: Saib seb, tus nkauj xwb uas koj pom yog Vajtswv tus Tub leej niam, raws li ntawm sab cev nqaij daim tawv.

19 Thiab tau muaj tias kuv tau pom tias nws raug tus Ntsuj Plig muab coj lawm; thiab tom qab uas nws raug tus Ntsuj Plig muab coj mus tau ib ntus lawm tus tim tswv tau hais rau kuv hais tias: Ntsia seb!

20 Thiab kuv tau ntsia thiab tau pom dua tus nkauj xwb, nws tab tom puag ib tug me nyuam mos hauv nws caj npab.

21 Thiab tus tim tswv tau hais rau kuv hais tias: Saib seb Vajtswv tus Me Nyuam Yaj, muaj tseeb tiag, twb yog Leej Txiv tus uas nyob mus ib txhis leej Tub! Koj puas paub lub ntsiab ntawm tsob ntoo uas koj txiv tau pom?

22 Thiab kuv tau teb nws, hais tias: Muaj tseeb tiag, nws yog kev hlub los ntawm Vajtswv, uas tau nthuav kom dav rau txhua txhia qhov chaw nyob rau hauv noob neej tej siab tej ntsws; yog li ntawd, nws yog yam uas xav tau tshaj plaws txhua txhia yam huv tib si.

23 Thiab nws tau hais rau kuv, hais tias: Muaj tseeb tiag, thiab nws yog ib qho kev zoo siab tshaj plaws rau tus ntsuj plig.

24 Thiab tom qab uas nws tau hais cov lus no tas lawm, nws hais rau kuv tias: Ntsia seb! Thiab kuv tau ntsia, thiab kuv tau pom Vajtswv leej Tub tau tawm mus rau tej neeg sawv daws; thiab kuv tau pom coob leej tau qhau cev rau ntawm nws ko taw thiab teev tiam nws.

25 Thiab tau muaj tias kuv tau pom tias tus pas hlau, uas kuv txiv tau pom, yog Vajtswv txoj lus, uas coj mus rau cov dej uas txhawv cawm neeg txoj sia, los yog coj mus rau tsob ntoo uas cawm neeg txoj sia; cov dej no piv txog Vajtswv txoj kev hlub; thiab kuv kuj tau pom tias tsob ntoo uas cawm neeg txoj sia los kuj piv txog Vajtswv txoj kev hlub ib yam.

26 Thiab tus tim tswv tau hais rau kuv dua: Ntsia thiab saib txoj kev uas Vajtswv los nrog neeg nyob!

27 Thiab kuv tau ntsia thiab tau pom ntiaj teb no tus Txhiv Dim, tus uas kuv txiv tau hais txog; thiab kuv kuj tau pom tus yaj saub uas los npaj txoj kev ua ntej nws. Thiab Vajtswv tus Me Nyuam Yaj tau mus thiab tau ua kev cai raus dej los ntawm nws; thiab tom qab uas nws tau ua kev cai raus dej tas lawm, kuv tau pom rooj ntug qhib, thiab tus Vaj Ntsuj Plig Dawb Huv tau nqis saum ntuj ceeb tsheej los thiab tsaws nyob saum nws zoo li ib tug nquab.

28 Thiab kuv tau pom tias nws tau tawm mus qhuab qhia thiab foom koob hmoov rau tej neeg sawv daws, uas muaj hwj chim thiab muaj yeeb koob loj kawg; thiab muaj neeg coob tau tuaj sib sau ua ke mloog nws; thiab kuv tau pom tias lawv tau muab nws ntiab khiav tawm ntawm lawv mus.

29 Thiab kuv kuj tau pom kaum ob tug lawv nws qab. Thiab tau muaj tias tus Ntsuj Plig tau coj lawv cov no ncaim ntawm kuv lub qhov muag mus, thiab kuv txawm tsis pom lawv lawm.

30 Thiab tau muaj tias tus tim tswv rov qab hais rau kuv dua, hais tias: Ntsia seb! Thiab kuv tau ntsia, thiab kuv tau pom rooj ntug rov qab qhib dua, thiab kuv tau pom tej tim tswv tau nqis los nrog tej neeg nyob; thiab lawv cov no tau qhuab qhia thiab foom koob hmoov rau tej tib neeg.

31 Thiab nws rov qab hais rau kuv dua, hais tias: Ntsia seb! Thiab kuv tau ntsia, thiab kuv tau pom Vajtswv tus Me Nyuam Yaj mus thoob plaws rau tej neeg sawv daws. Thiab kuv tau pom muaj neeg coob cov uas muaj mob, thiab cov uas raug kev txom nyem los ntawm tej kab mob kev nkeeg, thiab ntawm tej dab thiab tej ntsuj plig tsis huv; thiab tus tim tswv tau hais thiab tau ua rau kuv pom tag nrho tej no. Thiab lawv zoo mob zoo nkeeg los ntawm Vajtswv tus Me Nyuam Yaj lub hwj chim; thiab nws tau ntiab tej dab thiab tej ntsuj plig tsis huv tawm mus.

32 Thiab tau muaj tias tus tim tswv rov qab hais rau kuv dua, hais tias: Ntsia seb! Thiab kuv tau ntsia thiab tau pom Vajtswv tus Me Nyuam Yaj, nws tau raug neeg muab txhom; muaj tseeb tiag, Vajtswv tus uas muaj txoj sia kav ib txhis leej Tub tau raug neeg ntiaj teb txiav txim rau; thiab kuv tau pom thiab ua tim khawv.

33 Thiab kuv, Nifais, tau pom tias nws tau raug luag muab ntsia rau saum tus ntoo khaub lig thiab muab nws tua theej neeg ntiaj teb tej kev txhaum.

34 Thiab tom qab uas nws raug luag muab tua lawm kuv tau pom muaj neeg ntiaj teb coob leej, lawv tau sau tuaj ua ke nkaug tawm tsam tus Me Nyuam Yaj cov thwj tim; yog vim li ntawd kaum ob leeg no thiaj raug hu los ntawm tus Tswv tus tim tswv.

35 Thiab cov neeg ntiaj teb coob leej tau tuaj sib sau ua ke; thiab kuv tau pom tias lawv nyob hauv ib lub tsev loj thiab dav, zoo li lub tsev uas kuv txiv tau pom lawm. Thiab tus Tswv tus tim tswv tau hais rau kuv dua, hais tias: Saib seb cov neeg ntiaj teb thiab lawv tej tswv yim ntawd; muaj tseeb tiag, saib seb cov neeg Ixayees tau sib sau ua ke tuaj nkaug tawm tsam tus Me Nyuam Yaj kaum ob tug thwj tim.

36 Thiab tau muaj tias kuv tau pom thiab ua tim khawv, tias lub tsev loj thiab dav ntawd yog tej neeg ntiaj teb txoj kev muab hlob; thiab nws tau raug puas tsuaj mus, thiab txoj kev puas tsuaj ntawd tau yog ib txog uas phem heev. Thiab tus Tswv tus tim tswv tau rov hais rau kuv dua, hais tias: Yog li ntawd txhua haiv neeg, txhua xeem neeg, txhua yam lus thiab tej tib neeg sawv daws yuav raug txoj kev puas tsuaj phem heev ntawd ntag, yog hais tias lawv sawv nkaug tawm tsam tus Me Nyuam Yaj kaum ob tug thwj tim.