1 Ona sa oo ina ua uma ona ou fia iloa o mea sa vaai i ai lo’u tamā, ma lo’u talitonu e mafai e le Alii ona faailoa mai ia te a’u, a’o ou nofo ma mafaufau loloto i lo’u loto, sa segia ese a’u i le Agaga o le Alii, ioe, i se mauga maualuga lava, ou te lei vaai muamua i ai, ma e lei tu muamua ai foi i luga lo’u vae.

2 Ma sa fetalai mai le Agaga ia te a’u: Faauta, o le a le mea ua e manao i ai?

3 Ma sa ou fai atu: ou te fia vaai i mea sa vaai i ai lo’u tamā.

4 Ma sa fetalai mai le Agaga ia te a’u: E te talitonu ea sa vaai lou tamā i le laau lea sa tautala atu ai o ia?

5 Ma sa ou fai atu: Ioe, ua e silafia ua ou talitonu i upu uma a lo’u tamā.

6 Ma ina ua uma ona ou ta’uina atu o ia upu, sa alaga le Agaga ma le leo tele, fai mai: Osana ia i le Alii, le Atua silisili ese; ona o ia o le Atua i luga o le lalolagi atoa, ioe, i luga o mea uma lava. Ma amuia lava oe, Nifae, ona ua e talitonu i le Alo o le Atua silisili ese; o le mea lea, o le a e vaai ai i mea ua e manao i ai.

7 Ma faauta o le a tuu atu ia te oe lenei mea mo se faailoga, e faapea a uma ona e vaai i le laau sa fua mai ai le fua sa tofo i ai lou tamā, o le a e vaai foi i se tagata ua afio ifo mai le lagi, ma o ia o le a e vaai i ai; ma a uma ona e vaai ia te ia o le a e molimauina o ia o le Alo o le Atua.

8 Ma sa oo ina fetalai mai le Agaga ia te a’u: Vaai ia! Ma sa ou vaai ma iloa atu se laau; ma sa pei o le laau sa vaai i ai lo’u tamā; ma o lona matagofie sa sili mamao atu, ioe, silisili atu i matagofie uma; ma o lona pa’epa’e sa sili atu i le pa’epa’e o le kiona lelea i le matagi.

9 Ma sa oo ina ua uma ona ou vaai i le laau, sa ou faapea atu i le Agaga: Ua ou vaai ua e faaali mai ia te a’u le laau ua pele i mea uma.

10 Ma sa fetalai mai o ia ia te a’u: O le a le mea ua e manao i ai?

11 Ma sa ou fai atu ia te ia: Ina ia iloa lona uiga—ona sa ou tautala atu ia te ia e pei ona tautala se tagata; ona sa ou vaai atu sa tino mai o ia i se tagata; ae e ui i lea, sa ou iloa o ia o le Agaga o le Alii; ma sa fetalai mai o ia ia te a’u e pei ona fetautalatalaai se tasi tagata ma se isi.

12 Ma sa oo ina fetalai mai o ia ia te a’u: Vaai ia! Ma sa ou tepa atu e peiseai ou te vaai atu ia te ia, ae sa ou lē iloa atu o ia; ona ua maliu ese atu o ia mai o’u luma.

13 Ma sa oo ina ou vaai ma iloa atu le aai tele o Ierusalema, ma isi foi aai. Ma sa ou iloa atu le aai o Nasareta; ma i totonu o le aai o Nasareta sa ou vaaia ai se taupou, ma sa matua’i silisili ona lalelei ma pa’epa’e o ia.

14 Ma sa oo ina ou vaai atu ua avanoa le lagi; ma sa afio ifo se agelu ma ua tu i o’u luma; ma sa fetalai mai o ia ia te a’u: Nifae, o le a le mea ua e iloa atu?

15 Ma sa ou fai atu ia te ia: O se taupou, ua silisili ona aulelei ma lalelei i isi taupou uma.

16 Ma sa fetalai mai o ia ia te a’u: Pe ua e iloa ea le faamaualalo o le Atua?

17 Ma sa ou fai atu ia te ia: Ua ou iloa e alofa o ia i ana fanau; ae ui i lea, ou te le iloa le uiga o mea uma.

18 Ma sa fetalai mai o ia ia te a’u: Faauta, o le taupou ua e vaai atu i ai o le tinā lea o le Alo o le Atua, e tusa ma la le tino.

19 Ma sa oo ina ou vaai atu ua segia ese atu o ia i le Agaga; ma ina ua mavae ona segia atu o ia i le Agaga mo le va o se taimi, sa fetalai mai le agelu ia te a’u, e faapea: Vaai ia!

20 Ma sa ou vaai ma toe iloa atu le taupou, ua sapasapaia e ia se tamameamea i ona lima.

21 Ma sa fetalai mai le agelu ia te a’u: Faauta i le Tamai Mamoe a le Atua, ioe, o le Alo lava o le Tamā Faavavau! Ua e iloa ea le uiga o le laau sa vaai i ai lou tamā?

22 Ma sa ou tali atu ia te ia, ua faapea atu: Ioe, o le alofa lea o le Atua, ua faasafua faalauaitele ifo o ia lava i loto o le fanauga a tagata; o lea, o le mea lea ua silisili atu ona manaomia i mea uma.

23 Ma sa fetalai mai o ia ia te a’u, e faapea: Ioe, ma le silisili ona olioli i le agaga.

24 Ma ina ua uma ona fetalai mai e ia o nei upu, sa fetalai mai o ia ia te a’u: Vaai ia! Ma sa ou vaai, ma sa ou iloa atu le Alo o le Atua ua femaliuai i totonu o le fanauga a tagata; ma sa ou vaai i le toatele ua faapa’u’ū ifo i ona aao ma tapuai atu ia te ia.

25 Ma sa oo ina ou iloa o le āi uamea, lea sa vaai i ai lo’u tamā, o le afioga lea a le Atua, lea sa tau atu i le punavai o vai ola, po o i le laau o le ola; o vai ia o se faatusa o le alofa o le Atua; ma sa ou iloa foi o le laau o le ola o se faatusa o le alofa o le Atua.

26 Ma sa toe fetalai mai le agelu ia te a’u: Vaai ia ma faauta i le faamaualalo o le Atua!

27 Ma sa ou vaai ma iloa atu le Togiola o le lalolagi, o lē sa tautala i ai lo’u tamā; ma sa ou vaai foi i le perofeta o lē o le a teuteuina le ala i ona luma. Ma sa afio atu le Tamai Mamoe a le Atua ma ua papatisoina e ia; ma ina ua uma ona papatisoina o ia, sa ou iloa atu ua avanoa le lagi, ma ua afio ifo le Agaga Paia mai le lagi ma ua afio i luga o ia e peiseai o se lupe.

28 Ma sa ou iloa atu ua afio atu o ia ma auauna atu i tagata, i le mana ma le mamalu tele; ma sa faapotopoto motu o tagata e faalogologo ia te ia; ma sa ou uloa atu ua latou tuli ese o ia i fafo mai totonu o i latou.

29 Ma sa ou iloa atu foi isi e toasefululua o mulimuli atu ia te ia. Ma sa oo ina segia ese atu i latou i le Agaga mai luma o o’u mata, ma sa ou lē vaai atu ia te i latou.

30 Ma sa oo ina toe fetalai mai le agelu ia te a’u, e faapea: Vaai ia! Ma sa ou vaai, ma ou iloa atu ua toe avanoa le lagi, ma sa ou vaai atu ua afifio ifo agelu i luga o le fanauga a tagata; ma ua latou auauna atu ia te i latou.

31 Ma sa toe fetalai mai o ia ia te a’u, e faapea: Vaai ia! Ma sa ou vaai, ma ou iloa atu ai le Tamai Mamoe a le Atua ua afio atu i totonu o le fanauga a tagata. Ma sa ou iloa atu le motu o tagata o e sa mama’i, ma e sa puapuagatia i ituaiga uma o faama’i eseese, ma tiapolo ma agaga lē mamā; ma sa fetalai ma faaali mai e le agelu nei mea uma ia te a’u. Ma sa faamaloloina i latou i le mana o le Tamai Mamoe a le Atua; ma sa tutuli ese tiapolo ma agaga lē mamā.

32 Ma sa oo ina toe fetalai mai le agelu ia te a’u, e faapea: Vaai ia! Ma sa ou vaai ma iloa atu ai le Tamai Mamoe a le Atua, ua ave o ia e le nuu; ioe, o le Alo o le Atua tumau e faavavau ua faamasinoina e le lalolagi; ma sa ou vaaia ma molimauina.

33 Ma o a’u, o Nifae, sa ou vaai ua siitia a’e o ia i luga o le satauro ma fasiotia mo agasala a le lalolagi.

34 Ma ina ua uma ona fasiotia o ia sa ou vaaia motu o tagata o le lalolagi, ua latou faapotopoto faatasi e faasagatau i aposetolo a le Tamai Mamoe; aua sa faapea ona ta’ua ai le toasefululua e le agelu a le Alii.

35 Ma sa faapotopoto faatasi le motu o tagata o le lalolagi; ma sa ou vaai ua latou i ai i totonu o se fale tele ma le laolao, e pei o le fale sa vaai i ai lo’u tamā. Ma sa toe fetalai mai le agelu a le Alii ia te a’u, e faapea: Faauta i le lalolagi ma lona poto; ioe, faauta ua faapotopoto faatasi le aiga o Isaraelu e faasagatau i aposetolo e toasefululua a le Tamai Mamoe.

36 Ma sa oo ina ou vaaia ma molimauina, o le fale tele ma le laolao o le faamaualuga lea o le lalolagi; ma sa pa’ū, ma o lona pa’ū sa matuā tele lava. Ma sa toe fetalai mai le agelu a le Alii ia te a’u, e faapea: O le a faapea lava le faaumatiaga o atunuu uma, ituaiga, gagana, ma tagata, o e e faasagatau i aposetolo e toasefululua a le Tamai Mamoe.