1 Tuh tukun ma inge nga kena in etuh ke ma suc pahpah tuhmuhk el tuh liye ah, ac luhlahlfongi lah Leum El tuh kuh in oruh nga in etuh ke ma inge, ke nga muhta motko ke insiyuck nga tuh utucklac ke Nguhn luhn Leum, ahok, nuh ke soko finohl fuhlwactlacna, ma nga tiac liye met me, ac yac nga soenna fihliyac falkuck we.

2 Ac Nguhn fahk nuh sihk: Liye, meac kom luhngse?

3 Ac nga fahk: Nga luhngse liye ma suc pahpah tuhmuhk el liye ah.

4 Ac Nguhn fahk nuh sihk: Yac kom luhlahlfongi lah pahpah tomom el liye sahk soko ma el sramsramkihn ah?

5 Ac nga fahk: Ahok, kom etuh lah nga luhlahlfongi nohfohn kahs luhn pahpah tuhmuhk.

6 Ac ke nga sramsramkihn kahs inge, Nguhn wowoyak ke sie puhsra luhlahp, fahk: Osana nuh sin Leum, God fuhlwactlacna; tuh El God fin facluh nohfohn, ahok, finne fin ma nuhkwewa. Ac insewowo nuh sum, Nephi, ke srihpen kom luhlahlfongi ke Wen nuhtin God fuhlwactlacna; ohinge, kom fah liye ma suc kom kena kac.

7 Ac liye ma se inge fah utuckot nuh sum in sie mwe akucl, tuh tukun kom liye sahk soko ma oraclah fahko ma pahpah tomom ah emweyac ah, kom fah oacyacpac liye sie mukul oactui liki inkuhsrao, ac kom fah loh Kacl; ac tukun kom fah loh Kacl kom fah lohoh kac in fahkwack lah El inge Wen nuhtin God.

8 Ac tukun ma inge Nguhn el fahk nuh sihk: Ngwetlah! Ac nga ngwetlah ac liye soko sahk; ac ma inge oacna sahk soko ma pahpah tuhmuhk el tuh liye ah; ac kahtoiyac ah kahto na pwacye, ahok, ahluhkwelah kahto nuhkwewa; ac fasrfasriyac ah ahluhkwelah fasrfasriyacn sno uh.

9 Ac tukun ma inge ke nga liye sahk soko ah, nga fahk nuh sin Nguhn: Nga liye kom ahkkahlwemye nuh sihk ke sahk soko ma sacohk liki nuhkwewa.

10 Ac el fahk nuh sihk: Meac kom luhngse?

11 Ac nga fahk nuh sel: In etuh kalmeyac—tuh nga sramsram nuh sel oacna ke sie mukul sramsram uh; tuh nga liye lah el oacna luhman sie mukul; tuhsruhk ne ohinge, nga etuh lah Nguhn luhn Leum; ac el sramsram nuh sihk oacna sie mukul sramsram nuh sin sie pac.

12 Ac tukun ma inge el fahk nuh sihk: Ngwetlah! Ac nga ngwetlah oacna fin nga ngwetwacng liyacl, ac nga tiac liyacl; tuh el wacngihnlac liki ye muhtuhk.

13 Ac tukun ma inge nga ngwetlah ac liye siti luhlahp Jerusalem, ac oacyacpac siti sahyac. Ac nga liye siti Nazareth; ac ke siti Nazareth nga liye sie muhtwacn nwacsnwacs, ac el arulacna oaskuh ac fasrfasr.

14 Ac tukun ma inge nga liye inkuhsrao ikacklah; ac sie lipufacn oactui nuh ten ac tu ye muhtuhk; ac el fahk nuh sihk: Nephi, meac kom liye?

15 Ac nga fahk nuh sel: Sie muhtwacn nwacsnwacs, arulacna fucng ac oaskuh liki muhtwacn nwacsnwacs nuhkwewa sahyac.

16 Ac el fahk nuh sihk: Yac kom etuh ke puhsisacl luhn God?

17 Ac nga fahk nuh sel: Nga etuh lah El luhngse tuhlihk nahtuhl; ne ohinge, nga tiac etuh kalmeyacn ma inge nuhkwewa.

18 Ac el fahk nuh sihk: Liye, muhtwacn nwacsnwacs se suc kom liye inge pa ninac kiyacn Wen nuhtin God, tukun ohiyacn mahno.

19 Ac tukun ma inge nga liye lah el utucklac ke Nguhn; ac tukun el utucklac ke Nguhn ke lusacn sie pacl lipufacn sac sramsram nuh sihk, fahk: Ngwetlah!

20 Ac nga ngwetlah ac sifilpac liye muhtwacn nwacsnwacs sac, sruok sie tuhlihk in pahol.

21 Ac lipufacn sac fahk nuh sihk: Liye Lahm nuhtin God, ahok, finne Wen Nuhtin Pahpah Ma Pahtpaht! Yac kom etuh kalmeyacn sahk soko ma pahpah tomom ah liye ah?

22 Ac nga tohpohkohl, fahk: Ahok, ma se inge pa luhngse luhn God, ma sifacna maelihk nuh ke insiacn tuhlihk nuhtin mwet; ohinge, ma se inge pa luhngkihnyuck emet liki ma nuhkwewa.

23 Ac el sramsram nuh sihk, fahk: Ahok, ac engankihnyuck emet nuh ke moul uh.

24 Ac tukun el fahk kahs inge, el fahk nuh sihk: Ngwetlah! Ac nga ngwetlah, ac nga liye Wen nuhtin God El som nuh inmahsrlon tuhlihk nuhtin mwet; ac nga liye mwet pucspucs puhtati nuh ten ke niyacl ac alu nuh Sel.

25 Ac tukun ma inge nga liye soko osra, ma pahpah tuhmuhk el tuh liye, pa kahs luhn God, ma kohllah nuh ke unohn in kof luhn moul, kuh nuh ke sahk in moul; ma kof kac pa sie mwe akucl ke luhngse luhn God; ac nga oacyacpac liye lah sahk in moul soko ah pa sie mwe akucl ke luhngse luhn God.

26 Ac lipufacn sac sifilpac fahk nuh sihk: Ngwetlah ac liye ke puhsisacl luhn God!

27 Ac nga ngwetlah ac liye Mwet in Molwelah luhn facluh, suc pahpah tuhmuhk el sramsramkihn; ac nga oacyacpac liye mwet pahluh suc fah ahkolah inkacnek uh met Luhkwel. Ac Lahm nuhtin God El som ac pacptaislac sel; ac tukun El pacptaislac, nga liye inkuhsrao ikacklah, ac Nguhn Muhtahl oactui nuh ten liki inkuhsrao ac tuhwi Facl ke sie luhmahn ule.

28 Ac nga liye lah El som luti mwet uh, ke kuh ac wolacna yohk; ac un mwet pucspucs elos tuhkweni nuh sie in porongel; ac nga liye lah elos luhsuhlwack liki inmahsrlolos.

29 Ac nga oacyacpac liye mwet singucul luo sahyac fahsr tohkohl. Ac tukun ma inge elos utucklac ke Nguhn liki ye muhtuhk, ac nga tilac liyaclos.

30 Ac tukun ma inge lipufacn sac sifilpac sramsram nuh sihk, fahk: Ngwetlah! Ac nga ngwetlah, ac nga liye inkuhsrao sifilpac ikacklah, ac nga liye lipufacn oactui nuh yurun tuhlihk nuhtin mwet; ac elos luti nuh selos.

31 Ac el sifilpac sramsram nuh sihk, fahk: Ngwetlah! Ac nga ngwetlah, ac nga liye Lahm nuhtin God El som nuh inmahsrlon tuhlihk nuhtin mwet. Ac nga liye un mwet pucspucs suc mas, ac suc kweok ke kain in mas pucspucs, ac ke devil ac nguhn fohkfohk; ac lipufacn sac sramsram ac ahkkahlwemye ma inge nuhkwewa nuh sihk. Ac elos inge unweyucklac ke kuh luhn Lahm nuhtin God; ac devil ac nguhn fohkfohk lihsyucklac.

32 Ac tukun ma inge lipufacn sac sifilpac sramsram nuh sihk, fahk: Ngwetlah! Ac nga ngwetlah ac liye Lahm nuhtin God, lah El utucklac sin mwet uh; ahok, Wen nuhtin God ma pahtpaht El nuhnuhnkweyuck sin facluh; ac nga liye ac fahkwack.

33 Ac nga, Nephi, liye lah El srihpsrihpyak fin sahkseng soko ac acnwucki ke ma koluk luhn facluh.

34 Ac tukun El acnwucki nga liye un mwet pucspucs fin facluh, lah elos tuhkweni nuh sie in mweun lain mwet sap luhn Lahm; tuh ohinge elos mwet singucul luo pahngpahng sin lipufacn luhn Leum.

35 Ac un mwet pucspucs fin facluh tuhkweni nuh sie; ac nga liye lah elos oasr lun sie lohm luhlahp ac mwesahs, oacna lohm se ma pahpah tuhmuhk el liye ah. Ac lipufacn luhn Leum el sifilpac sramsram nuh sihk, fahk: Liye facluh ac lahlmwetmwetiyac; ahok, liye mwet Israel tuhkweni nuh sie in mweun lain mwet sap singucul luo luhn Lahm.

36 Ac tukun ma inge nga liye ac fahkwack, lah lohm luhlahp ac mwesahs sac pa insefuhlwact luhn facluh; ac puhtatlac, ac puhtatlac kac arulacna upac. Ac lipufacn luhn Leum el sifilpac sramsram nuh sihk, fahk: Ohinge ac fah kuhnausyucklac muhtuhnfacl pucspucs, kain in mwet, kahs, ac mwet, suc ac fah mweun lain mwet sap singucul luo luhn Lahm.