1 Ac sifilpac: Porongo, O kowos mwet Israel, kowos nuhkwewa suc itucklac liki ac lihsyucklac ke srihpen ma koluk luhn pahstuh luhn mwet luhk; ahok, kowos nuhkwewa suc itucklac, suc fahsrelihk nuh sahyac, suc ma luhn mwet luhk, O mwet Israel. Lohngyuc, O fintuhka uh, ac porongeyuc kowos mwet suc muhta loesuhlah; Leum El tuh pahngonyuc ke nga srwackna oasr ke insiacn ninac; ke insiacn ninac kiyuck El tuh pahngon inek.

2 Ac El tuh oruh oalihk in oacna sie katlas kohsroh; ke lulin pahol El lihsrihngyucyak, ac oraclah sie suhkan pihsr kohsroh; ke kusrusr Lal El lihsrihngyucyak;

3 Ac fahk nuh sihk: Kom mwet kuhlwacnsap Luhk, O Israel, suc oruh Nga fah kaksakihnyuck.

4 Na nga fahk, nga orekma ke wacngihn srihpac, nga sang kuhiyuck ke wacngihn ac wacngihn ma nga oraclah; pwacyena lah nuhnuhnkuh luhk oasr yurun Leum, ac orekma luhk oasr yurun God luhk.

5 Ac inge, Leum El fahk—suc luhmweyuclac e ke na insiacn ninac tuh nga in mwet kuhlwacnsap Lal, in sifilpac fohlohkohnuhlma Jacob nuh yohrohl—finne mwet Israel tiac toweni, tuh nga fah eis wolacna ye muhtuhn Leum, ac God luhk El fah kuh luhk.

6 Ac El fahk: Ma kahlwem se tuh kom in mwet kuhlwacnsap Luhk in karuhnguhnwacng sruf lal Jacob, ac in fohlohkohnwack mwet moliyucklac luhn Israel. Nga fah oruh pac kom in sie kahlwem nuh sin mwet Gentile, tuh kom in mwe molwelah Luhk fin facluh nohfohn.

7 Ohinge Leum El fahk, Mwet in Molwelah luhn Israel, El suc Muhtahl, nuh Sel suc mwet uh koase, nuh Sel suc muhtuhnfacl uh sruhnga, nuh sin mwet kuhlwacnsap luhn mwet kol: Tohkohsrah uh ac fah liye ac tuyak, fihsrack uh ac fah oacyacpac ahkfuhlwact, ke srihpen Leum suc oaru.

8 Ohinge Leum El fahk: Ke pacl fal Nga tuh lohngkowos, O mwet fin tuhka in meoa uh, ac ke lwen in molwelah Nga kahsrekowos; ac Nga ac fah molikowoslac, ac usot nuh suwos mwet kuhlwacnsap Luhk sie wuhlweacng ke mwet uh, in akwucki facluh, in oruh in usrui acn ma wacngihn mwet we;

9 Tuh kowos in kuh in fahk nuh sin mwet srohoh: Som, nuh yohrohlos suc muhta in lohsr: Ahkkahlwemye kowos sifacna. Elos fah kihteyuck ke ohiyac, ac innimac lalos ac fah oan ke acn fuhlwact nuhkwewa.

10 Elos fah tiac masrinsrwacl kuh maluh, tiacpac na fulen fol kuh faht ac ahkkweokyaclos; tuh El suc pahkotwen nuh selos El ac fah kohlohlos, finne ke sisken unohn in kof El fah kohlohlos.

11 Ac Nga fah oraclah soko inkacnek ke finohl nuhkwewa Luhk, ac inkacnek Luhk ac fah kaksakihnyuck.

12 Ac na, O mwet Israel, liye, mwet srohoh inge ac fah tuhkuh me ke acn loeloes; ac liye, mwet srohoh inge ac fah tuhkuh me acir ac rohtoh; ac mwet srohoh inge ac fah tuhkuh liki acn Sinim.

13 On, O inkuhsrao; ac engan, O facluh; tuh niyaclos suc oasr kuhtuhlacp ac fah muhsahiyuckyak; ac wowoyak in on, O finohl uh; tuh elos fah tiac sifilpac ahkkweokyeyuck; tuh Leum El ahkwoye mwet Lal, ac El fah pahkotwen nuh sin mwet kweok Lal.

14 Tuhsruhk, liye, Zion el fahk: Leum El som likiyuc, ac Leum luhk El muhlkihnyuclac—tuhsruhk El fah ahkkahlwemye lah El ac tiacna.

15 Tuh yac sie muhtwacn kuh in muhlkuhnlah tuhlihk katiti nahtuhl, tuh elan tiac pahkomuhta wen se ke insiacl? Ahok, elos kuh in muhlkuhnlah, tuhsruhk Nga fah tiacna muhlkihnkowoslac, O mwet Israel.

16 Liye, Nga sihmihskowoslac lun pouk; pot lowos oasr ye muhtuhk pacl nuhkwewa.

17 Tuhlihk nuhtuwos ac fah sa in lain mwet ahkkolukye kowos; ac elos suc kuhnauskowoslac ac fah som liki kowos.

18 Ngwetwack raunyak ac liye; mwet nuhkwewa inge sifacna fahsreni, ac elos fah tuhkuh nuh yuruwos. Ac ke Nga moul, Leum El fahk, pwacyena kowos ac fah nuknukyang in weluhlos nuhkwewa, oacna sie mwe nahweyuck, ac nahweyucklac ke ma inge oacna sie muhtwacn suc ac macruht.

19 Tuh acn suwos muhsahllah ac wacngihnlac ma fac, ac acn kuhnausyucklac suwos, finne inge ac fah arulacna srihklac ke srihpen mwet muhta we; ac elos suc oruh kowos in muhsahlwelihk ac fah som loes liki kowos.

20 Tuhlihk suc ac fah nuhtuwos, tukun misac ma se emet nuhtum an, ac fah sifilpac fahk nuh ke insrem: Acn uh arulacna srihklac nuh sihk; use nuh sihk sie acn ah nga in muhta we.

21 Na fah kom fahk ke insiom: Suc oswelah nuh sihk tuhlihk inge, liye lah wacngihnlac tuhlihk nuhtihk, ac nga tilac kuh in orek tuhlihk, sie mwet srohoh, ac utuckot nuh ngoh ac utuckuh nuh inge? Ac suc tuhfahlah tuhlihk inge? Liye, nga tuh muhkwefanna muhta; tuhlihk inge, elos tuhkuh oyac me?

22 Ohinge Leum God El fahk: Liye, Nga fah kohlwack pouk nuh sin mwet Gentile, ac oakiyac akwuck Luhk nuh sin mwet uh; ac elos fah us wen nuhtuwos ke paholos, ac acn nuhtuwos ac fah utuck fin pihsaclos.

23 Ac tohkohsrah uh fah oacna pahpah in karuhnguhnuhlos, ac kasra lalos ac oacna ninac in karuhnguhnuhlos; elos ac fah epahsrlah nuh sum ac muhtahlos kuhi nuh infohk uh, ac lohelah puhkpuhk ke niowos; ac kowos fah etuh lah Nga pa Leum; tuh elos suc tuhpanyuc uh ac fah tiac mwekihnlac.

24 Tuh yac ma wap uh kuh in utucklac liki mwet mweun, kuh mwet srohoh in moliyucklac?

25 Tuhsruhk ohinge Leum El fahk, finne mwet srohoh luhn mwet mweun ac fah utucklac, ac ma wap luhn mwet koluk ac fah moliyucklac; tuh Nga fah lainuhl suc lain kowos, ac Nga fah molwelah tuhlihk nuhtuwos.

26 Ac Nga fah kihte mwet ahkkweokye kowos ke mahnolos sifacna; elos ac fah sruhi ke srah lalos sifacna oacna wine emwem; ac mahno nuhkwewa ac fah etuh tuh Nga, suc Leum, pa Mwet Lahngo lom ac Mwet in Molwelah lom, El Suc Kuhlacna lal Jacob.