1 Ac ma inge fah sikyak, tuh fin mwet Gentile fah porongo Lahm nuhtin God ke lwen se ma El fah sifacna ahkkahlwemyacl nuh selos ke kahs, ac oacyacpac ke kuh, ke orekma, in eislah mwe ahktikuclkucl lalos—

2 Ac tiac ahkkwekweye insiaclos lain Lahm nuhtin God, elos fah oacwaclah inmahsrlon fihtac luhn pahpah tomom; ahok, elos fah oacwaclah inmahsrlon mwet Israel; ac elos fah mwet insewowo fin acn wihlwihl ne tok ma pahtpaht; elos fah tiac sifilpac utucklac srohoh; ac mwet Israel ac fah tiac sifilpac ahkfohsyeyuck.

3 Ac luhf luhlahp sac, ma pihkihnyuckyak nuh selos sin alu luhlahp ac sruhngwacyuck sac, ma sramtweyuckyak sin devil ac tuhlihk nahtuhl, tuh el in muh kuh in kohllah moul luhn mwet uh nuh ke hell—ahok, luhf luhlahp se ma pihkihnyuckyak nuh ke kuhnausyucklac luhn mwet ac fah nwekyucklac kaclos suc puhkanwack, nuh ke kuhnausyucklac lalos, Lahm nuhtin God El fahk; tiac nuh ke kuhnausyucklac luhn moul, tuhsruhk tolyucklac luhn ma inge nuh ke hell sac ma wacngihn sahflahiyac.

4 Tuh liye, ma se inge fal nuh ke srohoh luhn devil, ac oacyacpac fal nuh ke nuhnuhnkuh suwohs luhn God, nuh selos nuhkwewa suc ac fah oruh ma koluk ac ma sruhngwacyuck ye Muhtahl.

5 Ac tukun ma inge lipufacn sac sramsram nuh sihk, Nephi, fahk: Kom liye lah mwet Gentile fin auliyak ac fah wo nuh selos; ac kom oacyacpac etuh ke wuhlweacng luhn Leum nuh sin mwet Israel; ac kom oacyacpac lohng lah elos suc tiac auliyak ac fah misac.

6 Ohinge, we nuh sin mwet Gentile elos fin ahkkwekweye insiaclos lain Lahm nuhtin God.

7 Tuh pacl se ac tuhkuh, Lahm nuhtin God El fahk, tuh Nga fah oruh sie orekma na yohk ac wolacna inmahsrlon tuhlihk nuhtin mwet; sie orekma ma ac fah wacngihn sahflahiyac, ke lacpo se kuh lacpo se sahyac ah—in kihfasalos nuh ke mislac ac moul ma pahtpaht, kuh nuh ke kolyucklac lalos liki inse upac ac lohsriyacn nuhnak lalos in pa oruh utucklac lalos in srohoh, ac oacyacpac oruh nuh ke kuhnausyucklac, kwewana ke mahno ac nguhn, fal nuh ke srohoh luhn devil, suc Nga sramsramkihn.

8 Ac tukun ma inge ke lipufacn sac sruhmuhn kahs inge, el fahk nuh sihk: Yac kom esam wuhlweacng luhn Pahpah nuh sin mwet Israel? Nga fahk nuh sel, Ahok.

9 Ac tukun ma inge el fahk nuh sihk: Ngwetlah, ac liye alu luhlahp ac sruhngwacyuck sac, suc pa ninac kiyacn ma sruhngwacyuck, suc mwet in sramtweack la uh pa devil.

10 Ac el fahk nuh sihk: Liye oasr alu luoiyacna; sie pa alu luhn Lahm nuhtin God, ac ma se sahyac an pa alu luhn devil; ohinge, elos suc tiac wi alu luhn Lahm nuhtin God wi alu luhlahp sac, suc pa ninac kiyacn ma sruhngwacyuck; ac el pa muhtwacn kosro se fin facluh uh nohfohn.

11 Ac tukun ma inge nga ngwetlah ac liye muhtwacn kosro se luhn facluh uh nohfohn, ac el muhta ke inkof yohk; ac oasr kuh lal fin facluh nohfohn, inmahsrlon muhtuhnfacl nuhkwewa, kain in mwet, kahs, ac mwet.

12 Ac tukun ma inge nga liye alu luhn Lahm nuhtin God, ac suhpuhs suhna, ke srihpen ma koluk ac ma sruhngwacyuck luhn muhtwacn kosro se suc muhta ke inkof yohk; ne ohinge, nga liye lah alu luhn Lahm, suc pa mwet luhlahlfongi luhn God, elos oacyacpac oasr fin facluh nohfohn; ac kuh lalos fin facluh srihklac, ke srihpen kolukiyacn muhtwacn kosro se suc nga liye ah.

13 Ac tukun ma inge nga liye ninac yohk se kiyacn ma sruhngwacyuck el oracni un mwet pucspucs fin facluh nohfohn, inmahsrlon muhtuhnfacl nuhkwewa luhn mwet Gentile, in acnwuck lain Lahm nuhtin God.

14 Ac tukun ma inge nga, Nephi, liye kuh luhn Lahm nuhtin God, puhtati nuh fin mwet luhlahlfongi ke alu luhn Lahm, ac nuh fin mwet wuhlweacng luhn Leum, suc fahsrelihk nuh fin facluh nohfohn; ac elos nuklac ke suwohswohs ac ke kuh luhn God ke wolacna yohk.

15 Ac tukun ma inge nga liye kasrkuhsrak luhn God kahklah nuh fin alu luhlahp ac sruhngwacyuck sac, yohkna oruh oasr mweun ac kihsen mweun inmahsrlon muhtuhnfacl ac kain in mwet fin facluh nuhkwewa.

16 Ac ke muhtwacwacack in oasr mweun ac kihsen mweun inmahsrlon muhtuhnfacl nuhkwewa ma wi ninac kiyacn ma sruhngwacyuck, lipufacn sac sramsram nuh sihk, fahk: Liye, kasrkuhsrak luhn God oasr yurun ninac kiyacn muhtwacn kosro; ac liye, ma inge nuhkwewa kom liye—

17 Ac ke lwen sac tuhkuh ke kasrkuhsrak luhn God kahklah nuh fin ninac kiyacn muhtwacn kosro, suc pa alu luhlahp ac sruhngwacyuck se luhn facluh nohfohn, suc mwet sramtweack la uh pa devil, na, ke lwen sacn, orekma luhn Pahpah ac fah muhtwacwacack, in ahkolah inkacnek in ahkpwacyeiye wuhlweacng Lal, suc El oraclah nuh sin mwet Lal suc pa ma ke mwet Israel.

18 Ac tukun ma inge lipufacn sac sramsram nuh sihk, fahk: Ngwetlah!

19 Ac nga ngwetlah ac liye sie mukul, ac el nukum sie nuknuk loeloes fasrfasr.

20 Ac lipufacn sac fahk nuh sihk: Liye sie sin mwet sap singucul luo luhn Lahm.

21 Liye, el fah liye ac suhmuhslah ma luhlah ke ma inge; ahok, ac oacyacpac ma pucspucs ma sikyak inge.

22 Ac el fah oacyacpac sihmihs ke sahflahiyacn facluh.

23 Ohinge, ma suc el ac fah sihmihs uh pa ma suwohs ac pwacye; ac liye ma inge kwewa sihmihsyucklac ke puk se ma kom liye tuhkuh liki oalin mwet Jew; ac ke pacl se ma inge tuhkuh liki oalin mwet Jew, kuh, ke pacl se puk sac tuhkuh liki oalin mwet Jew uh, ma suc sihmlac ah ma kahlwem ac nwacsnwacs, ac arulacna sacohk ac fihsrwacsr nuh ke etatwen luhn mwet nuhkwewa.

24 Ac liye, ma suc mwet sap se luhn Lahm ah el fah suhmuhslah uh ma ke ma pucspucs ma kom liye; ac liye, kom fah liye ma luhlah kac ah.

25 Tuhsruhk ma suc kom fah liye ingena fahlac uh kom fah tiac sihmihs; tuh Leum God El ahkkweyelah mwet sap se luhn Lahm nuhtin God tuh elan sihmihs ma inge.

26 Ac oacyacpac mwet sahyac met ah, nuh selos El ahkkahlwemye ma inge nuhkwewa, ac elos suhmuhslah; ac ma inge siliyucki in tuhkuh ke nwacsnwacsiyac, fal nuh ke ma pwacye ma oasr yurun Lahm, ke pacl pakpucki sin Leum, nuh sin mwet Israel.

27 Ac nga, Nephi, lohng ac fahkwack, lah inen mwet sap se luhn Lahm uh pa John, oacna ke kahs luhn lipufacn sac.

28 Ac liye, nga, Nephi, sruhngwacyuck nga in sihmihs ma luhlah ke ma suc nga liye ac lohng; ohinge ma suc nga suhmuhslah uh ma na fal nuh sihk; ac nga suhmuhslah kihtin na ip ke ma suc nga liye ah.

29 Ac nga fahkwack lah nga liye ma suc pahpah tuhmuhk el liye ah, ac lipufacn luhn Leum el ahkkahlwemye ma inge nuh sihk.

30 Ac inge nga ahksahfye sramsram ke ma suc nga liye ke nga utucklac ke Nguhn; ac fin ma nuhkwewa nga liye ah tiac sihmihsyucklac, na ma suc nga suhmuhslah uh pwacye. Ac oreklac ohinge. Amen.