1 Ket napasamak a kinuna ti anghel kaniak: Kitaem, ken imatangam ti kaputotam, ken kasta met ti kaputotan dagiti kakabsatmo a lallaki. Ket kimmitaak ken naimatangak ti naikari a daga; ken naimatangak dagiti ummong ti tattao, wen, a kas iti kaadu ti darat iti baybay.

2 Ket napasamak a naimatangak a nagtitipon dagiti ummong a makigubat, ti maysa maibusor iti sabali; ket naimatangak dagiti gubat, ken dagiti sayangguseng ti gubgubat, ken dagiti nakaro a pannakapapatay iti espada kadagiti tattao.

3 Ket napasamak a naimatangak ti adu a henerasion a limmabas, babaen ti wagas dagiti gubat ken panagsusupanget iti daga; ket naimatangak ti adu a siudad, wen, uray pay saanko a binilang ida.

4 Ket napasamak a nakakitaak iti nasipnget nga angep iti rabaw ti naikari a daga; ken nakitak dagiti kimat, ken nangngegko dagiti gurruod, ken dagiti ginggined, ken amin a kita ti makariribuk nga arimbangaw; ken nakitak ti daga ken dagiti bato, a nagrengngat; ken nakitak ti pannakareggaay dagiti bantay; ken nakitak dagiti kapatagan ti daga, a nawarawara; ken nakitak ti adu a siudad a limned; ken adu ti nakitak a napuoran; ken adu ti nakitak a natuang iti daga, gapu iti nasao a ginggined.

5 Ket napasamak kalpasan ti pannakakitak kadagitoy a bambanag, a nakitak ti nasipnget a sengngaw, a nagpukaw iti rabaw ti daga; ket kitaen, nakitak dagiti ummong a saan a natuang gapu kadagiti nakaro ken nakaam-ames a panangukom ti Apo.

6 Ket nakitak ti panaglukat ti langit, ken ti ibababa ti Kordero ti Dios manipud iti langit; ket bimmaba ken impakitana ti bagina kadakuada.

7 Ken nakitak met ken paneknekak a bimmaba ti Espiritu Santo kadagiti sabali pay a sangapulo-ket-dua; ket inordenan ida ti Dios, ken napilida.

8 Ket nagsao ti anghel kaniak, a kinunana: Immatangam dagiti sangapulo ket dua a disipulo ti Kordero, a napili nga agserbi iti kaputotam.

9 Ket kinunana kaniak: Malagipmo kadi dagiti sangapulo ket dua nga Apostol ti Kordero? Kitaen isudanto ti mangukom kadagiti sangapulo ket dua a tribu ti Israel; gapuna, isudanto ti mangukom kadagiti sangapulo ket dua a ministro ti kaputotam; gapu ta maibilangka iti balay ti Israel.

10 Ket dagitoy sangapulo ket dua a ministro a makitkitam ti mangukomto iti kaputotam. Ket, kitaen, nalintegdanto iti agnanayon; ta gapu iti pammatida iti Kordero ti Dios mapapudawto dagiti kawesda babaen iti darana.

11 Ket kinuna ti anghel kaniak: Kitaem! Ket kimmitaak, ket naimatangak dagiti tallo a henerasion a pimmusay a sililinteg; ket puraw dagiti kawesda a kas iti Kordero ti Dios. Ket kinuna ti anghel kaniak: Naaramid a puraw dagitoy babaen iti dara ti Kordero, gapu iti pammatida kenkuana.

12 Ket siak, ni Nephi, nakitak met iti adu kadagiti maikapat a henerasion a pimmusay a sililinteg.

13 Ket napasamak a nakitak ti panagtitipon dagiti ummong iti daga.

14 Ket kinuna ti anghel kaniak: Adtoy ti kaputotam, ken kasta met ti kaputotan dagiti kakabsatmo a lallaki.

15 Ket napasamak a kimmitaak ken naimatangak dagiti tattao ti kaputotak a naguummong a sangkamaysa a maibusor iti kaputotan dagiti kabsatko; ket nagtitiponda a sangkamaysa a makigubat.

16 Ket nagsao ti anghel kaniak, a kinunana: Immatangam ti ubbog ti narugit a danum a nakita ti amam; wen, uray pay iti karayan nga insaona; ket dagiti tukotna isu iti tukot ti impierno.

17 Ket dagiti pannulisog ti sairo dagiti nasipnget nga angep, a mangbulsek kadagiti mata, ken mangpatangken kadagiti puso dagiti annak ti tattao, ket mangiturong kadakuada kadagiti nalawa a kalsada, tapno matay ken mapukawda.

18 Ket ti dakkel ken nalawa a pasdek, a nakita ti amam, ti awan kaes-eskanna nga arapaap ken pagtangtangsit dagiti annak ti tattao. Ket pinagsisina ida ti dakkel ken nakaam-amak a dan-aw; wen, uray pay ti balikas ti linteg ti Agnanayon a Dios, ken ti Mesias a Kordero ti Dios, nga isu ti paneknekan ti Espiritu Santo, manipud iti punganay ti lubong agingga ita a panawen, ken manipud ita a panawen nga agtultuloy ken awan patinggana.

19 Ket bayat ti panangisao ti anghel kadagitoy a balikas, naimatangak ken nakitak a nakisinnupanget ti kaputotan dagiti kakabsatko iti kaputotak, kas maibatay iti balikas ti anghel; ket gapu iti kinamanagpannakkel ti kaputotak, ken dagiti pannulisog ti sairo, naimatangak a pinarmek ti kaputotan ti kakabsatko dagiti tattao ti kaputotak.

20 Ket napasamak a naimatangak, ken nakitak a pinarmek dagiti tattao ti kaputotan dagiti kakabsatko ti kaputotak; ket nagtultuloy nga immaduda a naiwaras iti rabaw ti daga.

21 Ket nakitak ida a naguummong a sangsangkamaysa; ket nakitak dagiti gubat ken dagiti sayangguseng iti gubgubat kadakuada; ket nakitak ti adu a henerasion a pimmusay kadagiti gubat ken sayangguseng ti gubgubat.

22 Ket kinuna ti anghel kaniak: Kitaen kumapoyto ti pammatida.

23 Ket napasamak a naimatangak, kalpasan iti panagkapsut ti pammatida a nagbalinda a nangisit, ken naalas, ken narugit a tattao, napeklan ti kinasadut ken amin a kita ti nakaal-alas nga aramid.