1 Ao e na koro bukina bwa ngkana a ongo Tientaire iroun Ana Tiibu te Teei te Atua n te bong arei are e na kaoti nakoia n te taeka, ao ni mwaakana naba, n aron ana mwakuri, ao n anaan bwaai ake a na tatanako iai—

2 Ao a na aki kamatoai nanoia ni kaitaraa Ana Tiibu te Teei te Atua, ao a na warekaki i buakoia kanoan tamam; eng, a na warekaki i buakon te bata are Iteraera; ao a na riki bwa aomata aika kakabwaiaki i aon te aba ni berita n aki toki; a na aki manga uotaki rikaaki nakon te tautaekanaki; ao te bata are Iteraera e na aki manga kamangaoaki.

3 Ao te rua ae nano, are e a tia ni kenaki bukiia iroun te ekaretia ae korakora man ribaki, are e kateaki iroun te riaboro ma natina, bwa e aonga ni kairia nako iai tamneia aomata nako moone—eng, te rua ae nano are e a tia ni kenaki ibukin tiringakia aomata e na kanoaki irouia ake a kekenna, man riki bwa tokin maiuia, e taku Ana Tiibu te Teei te Atua; tiaki tiringan te tamnei, ma ti tewenakoana nako moone ae akea tokina.

4 Bwa taraia, aio aron te tautoronaki iroun te riaboro, ao n aron naba ana motiraoi te Atua nakoia ni kabane ake a mwakuria ae buakaka ma n ribaki imatana.

5 Ao e koro bukina bwa e taetae te anera nakoiu, ae Nibwaai, ni kangai: Ko a tia n nooria ae ngkana a rairinanoia Tientaire ao a na akea te kaangaanga ae e na reke nakoia; ao ko atai naba bwaai aika a kaineti ma ana berita aika tabu te Uea nakon te bata are Iteraera; ao ko a tia naba n ongo bwa ane e aki raira nanona e na mate.

6 Mangaia ae, a na reke kaia Tientaire ngkana a kamatoai nanoia nakon Ana Tiibu te Teei te Atua.

7 Bwa e na roko te tai, e taku Ana Tiibu te Teei te Atua, are N na karaoi iai mwakuri aika korakora ao a kamiimi i buakoia natiia aomata; te mwakuri ae e aki totoki, n angana aei ke n angana teuana riki—ibukin kakoauan te rau ke te maiu are akea tokina nakoia, ke ibukin kamaiuaia man matoan nanoia ma aki nooraban aia kantaninga are a na reke iai bwakaia nakon te tautaekanaki, ao riki nakon mateia, n te maiu n rabwata ao n tamnei, n aron ana tautaeka te riaboro i aoia, ake I a tia n taekin.

8 Ao e koro bukina bwa ngke e a tia n taekin taeka aika i te anera, ao e taku nakoiu: Ko uringi ana berita aika tabu te Tama nakon te bata are Iteraera? I taku nakoina, Eng.

9 Ao e koro bukina bwa e taku nakoiu: Taraia, ao noora te ekaretia ae korakora ma n ribaki, are bon tinan taian waaki aika ribaki, are e kateaki iroun te riaboro.

10 Ao e taku nakoiu: Taraia bon ti uoua taian ekaretia; teuana bon ana ekaretia Ana Tiibu te Teei te Atua, ao are teuana bon ana ekaretia te riaboro; mangaia ane tiaki kaain ana ekaretia Ana Tiibu te Teei te Atua ao bon kaain te ekaretia are korakora, are bon tinan mwakuri aika a bati n ribaki ae bon kabekaaun te aonaba ni kabuta.

11 Ao e koro bukina bwa I a noora kabekaaun te aonaba ngke I taraia, ae e tekateka i aon marawa aika a mwaiti; ao e korakora mwaakana i aon te aonaba ae bwanin, i aoia aaba, reeti, neewe, ao aomata ni kabane.

12 Ao e koro bukina bwa I a noora naba ana ekaretia Ana Tiibu te Teei te Atua, aika a karako, ibukin buakakan ma ana mwakuri aika a bati n ribaki te kabekaau ae e tekateka iaon marawa aika a mwaiti; e ngae n anne, ao I noora ana ekaretia te Tiibu te Teei, aika bon ana aomata aika a itiaki te Atua, aika a mena naba iaon te aonaba ni kabuta; ao e uarereke korakoraia iaon te aonaba, ibukin korakoran kammairan te kabekaau are I a tia n nooria.

13 Ao e koro bukina bwa I a noora naba tinaia mwakuri aika bati n ribaki ae e botiia aomata aika a uanao iaon te aonaba, n abaia Tientaire ni kabane, bwa a na buakana Ana Tiibu te Teei te Atua.

14 Ao e koro bukina bwa Ngai ae Nibwaai, I a noora korakoran mwaakan Ana Tiibu te Teei te Atua, ae e ruo nako aoia aomata aika a itiaki aika kaain ana ekaretia te Tiibu te Teei, ma i aoia ana aomata i nanon te berita ae tabu te Uea, ake a maenako nako i aon te aonaba ni kabuta; ao a otangaia n te raoiroi ma mwaakan te Atua ao te mimitong ae korakora.

15 Ao e koro bukina bwa I noora unin te Atua are bwaro iaon te ekaretia ae korakora ma n ribaki, n te aro are a mwaiti buaka ma taekan taian buaka i buakoia aaba ma reeti ni kabane i aon te aonaba.

16 Ao ngke a moanaki taian buaka ma taekan taian buaka i buakoia aaba ni kabane ake a mena i aan tinan waaki aika ribaki, e taetae te anera nakoiu, ni kangai: Taraia, e a mena unin nanon te Atua iaon tinan te ribaki; ao taraia, ko noori ni kabane bwaai aikai—

17 Ao ngke e roko te bong are e nang bwaro nako iai unin te Atua nako aon tinan waki aika ribaki, are bon te ekaretia ae korakora man ribaki i aon te aonaba, are kateaki iroun te riaboro, ao n te bong anne, e nang moanaki ana mwakuri te Tama ibukin katauraoan te kawai ibukin kakoroan bukin ana berita aika tabu, ake e a tia ni karaoi nakoia ana aomata aika kaain te bata are Iteraera.

18 Ao e taetae nakoiu te anera, ni kangai: Nooria!

19 Ao ngke I taraia ao I noora te mwaane ae kunnikaiaki n te niinira ae mainaina.

20 Ao e taku te anera nakoiu: Taraia temanna mai buakoia ana abotoro ake tengaun ma uoman te Tiibu te Teei.

21 Taraia, e na noori ma ni koroi nikiran bwaai aikai; eng, ma bwaai riki aika a mwaiti ake a tia n riki.

22 Ao e na koroboki naba ni kaineti ma taekan tokin te aonaba.

23 Mangaia ae a bon eti ao a koaua bwaai ake e na koroi taekaia; ao taraia a na koreaki i nanon te boki are ko a tia n nooria are otinako mai wiia Iutaia; ao n te tai are a otinako iai mai i nanon wiia Iutaia, ke n te tai are e otinako iai te boki mai i nanon wiia Iutaia, a na maataata man itiaki bwaai ake a tia ni koreaki, ma ni moan kakawaki ao ni beebete nanoia nakoia aomata ni kabane.

24 Ao taraia, bwaai ake e na koroi ana abotoro aio te Tiibu te Tei bon bwaai aika a mwaiti ake ko a tia n noori; ao taraia ko na noori nikiraia.

25 Ma bwaai ake ko na noori i mwin aio ko na aki koroi taekaia; bwa e a tia te Uea ae te Atua ni katabua ana abotoro Ana Tiibu te Teei te Atua bwa e na koroi taekaia.

26 Ao aomata ake a tia ni maiu, e a tia ni kaoti nakoia bwaai ni kabane, ao a tia ni koroi taekaia, ao a tia ni kainaki bwa a na roko n aroia n itiakiia, ni boraoi ma te koaua are iroun te Tiibu te Teei, n nakon te tai are boraoi ma nanon te Uea, nakon te bata are Iteraera.

27 Ao Ngai, ae Nibwaai, I a ongo ma nikakoaua, bwa aran ana abotoro te Tiibu te Teei aio bon Ioane, n aron ana taeka te anera.

28 Ao taraia, Ngai ae Nibwaai, I aki kariaiakaki bwa N na koroi nikiran bwaai ake I noori ma n ongo taekaia; mangaia ae a tau bwaai ake I a tia ni koroi taekaia; ao bon ti tabeua bwaai ake I a koroi taekaia mai buakon bwaai ake I a tia n noori.

29 Ao I kakoaua bwa I a tia n noori bwaai ake e a tia n noori tamau, ao ake e kaoti nakoiu ana anera te Uea.

30 Ao ngkai I a katoki taekan bwaai ake a kaineti ma bwaai ake I noori ngke I uotaki nako n te tamnei; ao e ngae ngke aki bane ni koreaki taekan bwaai ake I noori, a bon koaua bwaai ake I koroi taekaia. Ao boni ngaia anne. Amen.