1 Ket mapasamakto, a no imdenganto dagiti Gentil ti Kordero ti Dios iti dayta nga aldaw a panagpakitananto kadakuada iti balikas, kasta met iti bileg, iti tunggal aramid, ken ti pannakaikkat dagiti lappedda—

2 Ket saanda a patangkenen dagiti pusoda a maibusor iti Kordero ti Dios, maibilangdanto kadagiti kaputotan ti amam; wen, maibilangdanto kadagiti balay ti Israel; ket nagasatdanto a tattao iti naikari a daga iti agnanayon; ket saandanton a maiturong iti pannakaadipen; ket saanton a malaokan ti sabali a tattao ti balay ti Israel.

3 Ket dayta nauneg nga abut, a kinali para kadakuada ti nabileg ken makarimon a simbaan, a binangon ti sairo ken dagiti annakna, tapno maiturongna iti impierno dagiti kararua dagiti tattao—wen, dayta nauneg nga abut a nakali a pakadadaelan dagiti tattao ket mapunnonto kadagiti nangkali iti daytoy, nga agbalin a naan-anay a pakadadaelanda, kinuna ti Kordero ti Dios; saan daytoy a pakadadaelan ti kararua, malaksid iti pannakaipuruak daytoy iti impierno nga awan ti patinggana.

4 Ta kitaen, mayannurot daytoy iti pannakaadipen ti sairo, ken mayannurot pay iti linteg ti Dios, kadagiti agaramid iti kinadakes ken kinaalas kenkuana.

5 Ket napasamak a nagsao ti anghel kaniak, a ni Nephi, a kinunana: Naimatangam a no agbabawi dagiti Gentil nasayaatto kadakuada; ken ammom met ti maipanggep kadagiti katulagan ti Apo iti balay ti Israel; ken nangngegmo met a dagiti saan nga agbabawi nasken a mapukaw.

6 Ngarud, kaasinto pay dagiti Gentil no kasta a patangkenenda dagiti pusoda a maibusor iti Kordero ti Dios.

7 Ta umayto ti panawen, kinuna ti Kordero ti Dios, nga agaramidakto iti naindaklan ken nakaskasdaaw nga aramid kadagiti annak ti tattao; aramid a mataginayonto, uray aniaman a panirigam—uray pay iti pannakaallukoy kadakuada iti kappia ken agnanayon a biag, wenno iti pannakapabus-oyda iti kinatangken dagiti pusoda ken ti kinabulsek ti pampanunotda a pakaiturongan iti pannakaadipen, ken iti pay pannakadadaelda, pada-pada a temporal ken naespirituan, a mayannurot iti pannakaadipen ti sairo, a nasaokon.

8 Ket napasamak a kalpasan ti panangibaga ti anghel kadagitoy a balikas, kinunana kaniak: Malagipmo kadi dagiti katulagan ti Ama iti balay ti Israel? Kinunak kenkuana, Wen.

9 Ket napasamak a kinunana kaniak: Kitaem, ket imatangam dayta nabileg ken makarimon a simbaan, nga ina dagiti naalas nga aramid, a binangon ti sairo.

10 Ket kinunana kaniak: Kitaen, dua laeng dagiti simbaan: maysa ti simbaan ti Kordero ti Dios, ken ti sabali isu ti simbaan ti sairo; gapuna, asino man a saan a kameng iti simbaan ti Kordero ti Dios ket kameng dayta nabileg a simbaan, nga ina dagiti makarimon nga aramid; ket isu ti balangkantis iti amin a daga.

11 Ket napasamak a kimmitaak ket naimatangak ti balangkantis iti amin a daga, ket nakatugaw isuna iti adu a dandanum; ket addaan isuna ti turay iti amin a dagdaga, iti amin a pagilian, puli, pagsasao, ken tattao.

12 Ket napasamak a naimatangak ti simbaan ti Kordero ti Dios, ket ti bilang ti kamengna bassit, gapu iti kinadakes ken makarimon nga aramid ti balangkantis a nakatugaw iti adu a dandanum; nupay kasta, naimatangak a ti simbaan ti Kordero, nga isu dagiti santo ti Dios, nga addada met iti rabaw ti amin a daga; ket bassit ti masakupanda iti rabaw ti daga, gapu iti kinadakes ti nabileg a balangkantis a nakitak.

13 Ket napasamak a naimatangak a pinagtitipon ti nabileg nga ina dagiti naalas nga aramid dagiti ummong iti rabaw ti amin a dagdaga, iti amin a pagilian dagiti Gentil, a makiranget iti Kordero ti Dios.

14 Ket napasamak a siak, ni Nephi, naimatangak ti bileg ti Kordero ti Dios, a bimmaba kadagiti santo ti simbaan ti Kordero, ken kadagiti natulagan a tao ti Apo, a naiwaraswaras iti rabaw ti amin a daga; ket naarmasanda ti kinalinteg ken addaanda iti nadayag a bileg ti Dios.

15 Ket napasamak a naimatangak a naibuyat ti pungtot ti Dios iti dayta nabileg ken makarimon a simbaan, isu nga naaddaan kadagiti gubat ken sayangguseng ti gubgubat kadagiti amin a pagilian ken agkakabagian iti daga.

16 Ket gapu ta nangrugi dagiti gubat ken dagiti sayangguseng ti gubgubat kadagiti amin a pagilian a kameng ti ina dagiti kinarimon, nagsao ti anghel kaniak, a kinunana: Kitaen, agpaay ti pungtot ti Dios iti ina dagiti balangkantis; ket kitaen, makitam amin dagitoy a banag—

17 Ket inton dumteng ti aldaw a maibukbok ti pungtot ti Dios iti ina dagiti balangkantis, nga isu ti nabileg ken makarimon a simbaan iti amin a daga, a binangon ti sairo, ket, iti dayta nga aldaw, mangruginto ti aramid ti Ama, iti panangisagana iti wagas ti panangipatungpal dagiti katulaganna, nga inaramidna kadagiti taona iti balay ti Israel.

18 Ket napasamak a nagsao ti anghel kaniak, a kinunana: Kitaen!

19 Ket kimmitaak ket nakitak ti maysa a lalaki, ket nakakawes isuna iti puraw a roba.

20 Ket kinuna ti anghel kaniak: Kitaen ti maysa kadagiti sangapulo ket dua nga apostol ti Kordero.

21 Kitaen, makitananto ken isuratnanto ti natda kadagitoy a banag; wen, ken kasta met dagiti banag a napasamaken.

22 Ken isuratnanto met ti maipanggep iti panungpalan ti lubong.

23 Gapuna, nalinteg ken pudno dagiti banag nga isuratnanto; ket kitaen naisuratda iti libro a naimatangam nga agtaud iti ngiwat ti Hudio; ket iti kanito a nagtaudda iti ngiwat ti Hudio, wenno, iti kanito a nagtaud ti libro iti ngiwat ti Hudio, nalawag ken umiso dagiti banag a naisurat, ken kapatgan ken nalaka a maawatan ti amin a tao.

24 Ken kitaen, dagiti banag nga isuratto daytoy nga apostol ti Kordero ket dagiti banag a nakitamon; ket kitaen, makitamto dagiti natda.

25 Ngem saanmonto nga isurat dagiti makitam pay a sumarsaruno; ta naordenanen ti Apo a Dios ti apostol ti Kordero ti Dios a mangisuratto kadagitoy.

26 Ken kasta met kadagiti sabsabali idi, a nangipakita kadakuada dagiti amin a banag, ket naisuratdan dagitoy; ket nairikepdan dagitoy tapno mairuardanto nga addaan kinatarnaw, a mayannurot iti kinapudno nga adda iti Kordero, iti naikeddeng a panawen ti Apo, iti balay ti Israel.

27 Ket siak, ni Nephi, nangngegko ken paneknekak a ti nagan ti apostol ti Kordero ket Juan, kas maibatay iti balikas ti anghel.

28 Ket kiaten, siak, ni Nephi, naparitanak a mangisurat iti nabati kadagiti banag a nakitak ken nangngegko; gapuna napnekakon kadagiti banag nga insuratko; ket bassit a paset laeng dagiti banag a nakitak ti insuratko.

29 Ket paneknekak a nakitak dagiti banag a nakita ti amak, ket ti anghel ti Apo ti nangipakaamo dagitoy kaniak.

30 Ket ita gibusakon ti panagsaok iti maipanggep kadagiti banag a nakitak bayat ti panangituray kaniak ti espiritu; ket no saan a naisurat amin dagiti banag a nakitak, dagiti banag nga insuratko ket pudno. Ket kastan. Amen.