1 Ug nahitabo nga human ako, si Nephi, gidala sa Espiritu ug nakakita niining tanan nga butang, mibalik ako ngadto sa tolda sa akong amahan.

2 Ug nahitabo nga nakakita ako sa akong mga igsoong lalaki, ug nanaglalis sila mahitungod sa mga butang nga gipamulong sa akong amahan ngadto kanila.

3 Kay sa pagkatinuod daghan siya og gipamulong nga mga butang nga mahinungdanon ngadto kanila, nga lisod sa pagsabot, gawas kon ang tawo mangutana gayod sa Ginoo; ug kay sila tig-a og mga kasingkasing, busa sila wala mosalig sa Ginoo nga mao unta ang angay nilang buhaton.

4 Ug karon ako, si Nephi, naguol tungod sa katig-a sa ilang mga kasingkasing, ug usab, tungod sa mga butang nga akong nakita, ug nahibalo nga dili gayod kapugngan nga manghitabo kini tungod sa hilabihang kadaotan sa mga anak sa katawhan.

5 Ug nahitabo nga nabug-atan ako tungod sa akong mga kasakit, kay akong gihunahuna nga ang akong mga kasakit bug-at kaayo sa tanan, tungod sa pagkalaglag sa akong katawhan, kay ako nakakita sa ilang pagkapukan.

6 Ug nahitabo nga human ako nakadawat og kalig-on akong gipakigsultihan ang akong mga igsoong lalaki, nagtinguha nga masayod gikan kanila sa hinungdan sa ilang mga panaglalis.

7 Ug miingon sila: Tan-awa, dili kami makasabot sa mga pulong nga gipamulong sa atong amahan mahitungod sa kinaiyanhon nga mga sanga sa kahoy nga oliba, ug usab mahitungod sa mga Hentil.

8 Ug miingon ako kanila: Kamo ba nangutana sa Ginoo?

9 Ug miingon sila ngari kanako: Wala; kay ang Ginoo dili mopahibalo og ingon niana nga mga butang ngari kanamo.

10 Tan-awa, miingon ako kanila: Nganong kamo dili man motuman sa mga sugo sa Ginoo? Nganong kamo kinahanglan pa man nga malaglag, tungod sa katig-a sa inyong mga kasingkasing?

11 Wala ba kamo mahinumdom sa mga butang nga gisulti sa Ginoo?—Kon kamo dili mopatig-a sa inyong mga kasingkasing, ug mohangyo kanako pinaagi sa pagtuo, magatuo nga kamo makadawat uban sa kakugi sa pagtuman sa akong mga sugo, sa pagkatinuod kini nga mga butang ipahibalo nganha kaninyo.

12 Tan-awa, sultihan ko kamo nga ang balay ni Israel gitandi ngadto sa kahoy nga oliba, pinaagi sa Espiritu sa Ginoo nga anaa sa atong amahan; ug tan-awa wala ba kita mahibulag gikan sa balay ni Israel, ug dili ba kita sanga sa balay ni Israel?

13 Ug karon, ang butang nga buot ipasabot sa atong amahan bahin sa pagsumbak sa kinaiyanhon nga mga sanga pinaagi sa kahingpitan sa mga Hentil, mao, nga sa ulahing mga adlaw, kon ang atong mga binhi mokunhod ngadto sa pagkawalay pagtuo, oo, sulod sa daghan nga katuigan ug sa daghan nga henerasyon human ang Mesiyas matawo dinhi sa kalibotan, nga mangalagad sa mga anak sa katawhan, niana ang kahingpitan sa ebanghelyo sa Mesiyas moabot ngadto sa mga Hentil, ug gikan sa mga Hentil ngadto sa salin sa atong mga binhi—

14 Ug niana nga adlaw ang mga salin sa atong mga binhi mahibalo nga sakop sila sa balay ni Israel, ug nga sila ang katawhan sa pakigsaad sa Ginoo; ug unya mahibalo sila ug makakat-on bahin sa ilang katigulangan, ug makahibalo usab sa ebanghelyo sa ilang Manunubos nga gipangalagad ngadto sa ilang mga amahan pinaagi kaniya; mao nga, makahibalo sila bahin sa ilang Manunubos ug sa matag piho nga elemento sa iyang doktrina, nga sila masayod unsaon pagdangop ngadto kaniya ug maluwas.

15 Ug dayon niana nga adlaw dili ba sila malipay ug modayeg ngadto sa ilang walay kataposan nga Dios, nga ilang kalig-on ug ilang kaluwasan? Oo, niana nga adlaw, dili ba sila makadawat og kalig-on ug kahimsong gikan sa tinuod nga ubas? Oo, dili ba sila moduol ngadto sa tinuod nga panon sa Dios?

16 Tan-awa, sultihan ko kamo, Oo; sila pagahinumdoman pag-usab taliwala sa balay ni Israel; sila isumbak pagbalik, isip usa ka kinaiyanhon nga sanga sa kahoy nga oliba, ngadto sa tinuod nga kahoy nga oliba.

17 Ug mao kini ang buot ipasabot sa atong amahan; ug ang buot niyang ipasabot nga dili kini mahitabo hangtod mahuman ang pagtibulaag kanila sa mga Hentil; ug buot niyang ipasabot nga moabot kini pinaagi sa mga Hentil, nga ang Ginoo mopakita sa iyang gahom ngadto sa mga Hentil, tungod kay sa mao gayod nga hinungdan siya isalikway sa mga Judeo, o sa balay ni Israel.

18 Mao nga, ang atong amahan wala lamang mamulong bahin sa atong mga binhi, apan usab sa tibuok balay ni Israel, nga naghisgot sa pakigsaad nga matuman sa ulahing mga adlaw; diin nga pakigsaad gihimo sa Ginoo ngadto sa atong amahan nga si Abraham, nga nag-ingon: Sa imong binhi ang tanan nga kaliwatan sa yuta mapanalanginan.

19 Ug nahitabo nga ako, si Nephi, namulong og daghan ngadto kanila mahitungod niini nga mga butang; oo, ako namulong kanila mahitungod sa pagpahiuli sa mga Judeo sa ulahing mga adlaw.

20 Ug akong gibalik sa pagsaysay kanila ang mga pulong ni Isaias, kinsa namulong bahin sa pagpahiuli sa mga Judeo, o sa balay ni Israel; ug human nga sila ipahiuli dili na sila pagalibogon ni sila pagatibulaagon pag-usab. Ug nahitabo nga namulong ako og daghan ngadto sa akong mga igsoong lalaki, nga sila nahupay ug mipaubos sa ilang kaugalingon atubangan sa Ginoo.

21 Ug nahitabo nga nakigsulti na usab sila kanako, nga nag-ingon: Unsa ang gipasabot niini nga butang nga nakita sa atong amahan sa usa ka damgo? Unsa ang gipasabot sa kahoy nga iyang nakita?

22 Ug miingon ako kanila: Usa kadto ka simbolo sa kahoy sa kinabuhi.

23 Ug miingon sila ngari kanako: Unsa ang gipasabot sa gunitanan nga puthaw nga nakita sa atong amahan, nga padulong sa kahoy?

24 Ug miingon ako kanila nga mao kadto ang pulong sa Dios; ug si kinsa kadtong mopatalinghog sa pulong sa Dios, ug hugot nga mogunit niini, sila dili gayod malaglag; ni ang mga pagtental ug ang nagdilaab nga mga pana sa kaaway makabuntog kanila ngadto sa pagkabuta, sa pagdala kanila ngadto sa kalaglagan.

25 Mao nga, ako, si Nephi, miawhag kanila sa pagpatalinghog sa pulong sa Ginoo; oo, ako miawhag kanila sa tanan nga kusog sa akong kalag, ug sa tanan nga galamhan nga akong naangkon, nga sila unta mopatalinghog sa pulong sa Dios ug mahinumdom sa pagtuman sa iyang mga sugo sa kanunay sa tanan nga butang.

26 Ug miingon sila ngari kanako: Unsa ang gipasabot sa suba sa tubig nga nakita sa atong amahan?

27 Ug miingon ako kanila nga ang tubig nga nakita sa akong amahan mao ang kahugaw; ug hilabihan ka linga sa iyang hunahuna sa uban nga mga butang hinungdan nga wala niya makita ang kahugaw sa tubig.

28 Ug miingon ako kanila nga makahahadlok kadto nga bung-aw, nga nagbulag sa mga daotan gikan sa kahoy sa kinabuhi, ug usab gikan sa mga santos sa Dios.

29 Ug miingon ako kanila nga simbolo kadto niana nga makahahadlok nga impyerno, nga gisulti sa anghel ngari kanako nga giandam alang sa mga daotan.

30 Ug miingon ako kanila nga ang among amahan nakakita usab nga ang kaangayan sa Dios mibahin usab sa mga daotan gikan sa mga matarong; ug ang kahayag niini sama niadtong kahayag sa nagdilaab nga kalayo nga misaka ngadto sa Dios sa kahangtoran, ug walay kataposan.

31 Ug miingon sila ngari kanako: Kini nga butang nagpasabot ba sa kahasol sa lawas sa mga adlaw sa pagsulay, o nagpasabot ba kini sa kataposang kahimtang sa kalag human mamatay ang temporal nga lawas, o naghisgot ba kini sa mga butang nga temporal?

32 Ug nahitabo nga miingon ako kanila nga simbolo kadto sa mga butang nga temporal ug espirituwal; kay ang adlaw moabot nga sila pagahukman sumala sa ilang mga buhat, oo, gani sa mga buhat nga nahimo sa temporal nga lawas sa mga adlaw sa ilang pagsulay.

33 Mao nga, kon sila mamatay diha sa ilang pagkadaotan sila usab isalikway gayod, bahin sa mga butang nga espirituhanon nga may kalabotan sa pagkamatarong; mao nga, sila pagadad-on gayod ngadto sa atubangan sa Dios aron mahukman sa ilang binuhatan; ug kon ang ilang binuhatan mga hugaw sigurado gayod nga sila hugaw; ug kon sila hugaw sigurado nga sila dili makapuyo sa gingharian sa Dios; kay kon makasulod man, ang gingharian sa Dios seguradong hugaw usab.

34 Apan tan-awa, sultihan ko kamo, ang gingharian sa Dios dili hugaw, ug walay hugaw nga butang nga makasulod sa gingharian sa Dios; mao nga kinahanglan gayod nga adunay usa ka dapit sa kahugaw nga giandam alang niana nga hugaw.

35 Ug adunay dapit nga giandam, oo, gani kana nga makahahadlok nga impyerno nga akong gipamulong, ug ang yawa mao ang tig-andam niini; mao nga ang kataposan nga kahimtang sa kalag sa mga tawo mao ang pagpuyo sa gingharian sa Dios, o isalikway tungod niana nga kaangayan nga akong gipamulong.

36 Mao nga, ang mga daotan isalikway gikan sa mga matarong ug gikan usab niana nga kahoy sa kinabuhi, kansang bunga labing bililhon ug labing madanihon labaw pa sa tanan nga bunga; oo, ug kini ang labing mahinungdanon sa tanan nga gasa sa Dios. Ug mao gayod kana ang akong gipamulong ngadto sa akong mga igsoong lalaki. Amen.