1 Ao e koro bukina bwa ngke I a tia ni uotaki nako Ngai ae Nibwaai, n Tamneiu, man noori bwaai aikai ni kabane, ao I a oki nakon ana umwanrianna tamau.

2 Ao e koro bukina bwa I nooriia tariu, ao a kauntaeka imarenaia ni kaineti ma bwaai ake e a tia n taekin tamau nakoia.

3 Bwa e koaua ae e a tia n taekin bwaai aika mwaiti aika a kakawaki nakoia, aika a kangaanga nanoia, ma ti ngkana te aomata e butiia te Uea; ma ngkai a matoa nanoia, ngaia are a aikoa butiia te Uea n aron are a riai ni karaoia.

4 Ao ngkai, Ngai ae Nibwaai, e a rawawata nanou ibukin matoan nanoia, ao riki ibukin bwaai ake I a tia n noori, ao a na koro bukiia ngkai e korakora buakakaia natiia aomata.

5 Ao e koro bukina bwa I a konaaki ibukin karawawatakiu, bwa I taku inanou bwa a korakora riki karawawatakiu nakon bwaai ni kabane, ibukin tiringakia au botanaomata, bwa I a tia n noora bwakaia.

6 Ao e koro bukina bwa ngke e a tia n oki korakorau ao I a taetae nakoia tariu, ni butiia bwa a na tuangai bukin aia kauntaeka.

7 Ao a taku: Taraia, ti aki ota n taian taeka ake e taekin Tamara ni kaineti ma mwangan raoi te kai te oriwa, ao ni kaineti naba ma Tientaire.

8 Ao I taku nakoia: Kam a tia n titirakina te Uea?

9 Ao a taku nakoiu: Ti tuai; bwa te Uea e tuai ni kaoti bwaai n aron aikai nakoira.

10 Taraia, I taku nakoia: Bukin teraa ngkai kam tuai ni kaawakin ana tua te Uea? Bukin tera ngkai kam na mate ibukin matoan nanomi?

11 Kam aki uring bwaai ake e taekin te Uea?—Ngke arona bwa kam aki kamatoai nanomi, ao n titirakinai ma te onimaki, ni kakoaua bwa e na reke iroumi, ma n teimatoa ni kaawakin au tua, ao e koaua bwa a na bon kaotaki nanon bwaai aikai nakoimi.

12 Taraia, I taku nakoimi, bwa e kabotauaki te bata are Iteraera ma te kai te oriwa, iroun Tamnein te Uea are e mena i nanon tamara, ao taraia, ti raure nako ma te bata are Iteraera ke ti aki, ao tiaki ngaira mwangan te bata are Iteraera?

13 Ao ngkai, nanon te bwai are taekinna tamara are e kabootauaki ma kanimwan taian mwanga rinanon bwaninia Tientaire, are ni boong aika kaitira, n te tai are a na tia kanoara ni kerikaki n aia aki onimaki, eng, i nanon te maan ae ririki aika mwaiti, ma rooro aika mwaiti i mwin rokon te Mesia n rabwata nakoia natia aomata, ao ngkanne e nang roko bwaninin ana euangkerio te Mesia nakoia Tientaire, ao mai irouia Tientaire nakoia nikiraia kanoara—

14 Ao n te bong arei a na ataia nikiraia kanoara ae ngaia kaain te bata are Iteraera, ao bon ngaia ana aomata i nanon te berita ae tabu te Uea; ao a na ataa taekaia aia bakatibu, ao taekan naba ana euangkerio aia Tia Kaboia, ake a reiakinaki irouna nakoia tamaia; mangaia ae a na ataa taekan aia Tia Kaboia ma nanon ana reirei bwa a aonga n rabakau ni kawaria ao ni kamaiuaki.

15 Ao n te bong arei, e koaua bwa a na bon aki kimwareirei man anga aia nebonebo nakon Atuaia ae e aki totoki, ae aia bwaa ma kamaiuaia? Eng, n te bong arei, e koaua ae a na aki reke irouia te korakora ma kanan rabwataia man kain te kurebe ni koaua? Eng, e koaua bwa a na aki botaki ma ana nanai ni koaua te Atua?

16 Taraia, I tuangkami aio, Eng; a na manga uringaki i buakon te bata are Iteraera; a na manga katomaki, ngkai bon ngaia mwangan raoi te kai ae te oriwa, nakon te kai ae te oriwa ni koaua.

17 Ao aio are e kananonaa tamara; ao e kananonaa ae e na aki riki ni karokoa ae a tia ni kamaenakoaki irouia Tientaire; ao e kananonaa are e na riki aio mai irouia Tientaire, ao e na kaota mwaakana te Uea nakoia Tientaire, ngkai e na aki butimwaeaki irouia Iutaia, ke man te bata are Iteraera.

18 Mangaia ae e aki ti taekinia kanoara tamara, ma e taekinia naba kain te bata are Iteraera ni kabane, ni katereterea te berita ae tabu are e na kakoroaki bukina ni boong aika kaitira; are te berita are e tabu are e karaoia te Uea nakon tamara ae Aberaam, ni kangai: A na kabwaia kaain aonaba ni kabaneia i nanon am kariki.

19 Ao e koro bukina bwa Ngai ae Nibwaai, I taetae nakoia ni kaineti ma bwaai aikai; eng, I taetae nakoia ni kaineti ma ikotakiia Iutaia ni boong aika kaitira.

20 Ao I taekin nakoia kanoan ana taeka Itaia, are e taekin bwaai aika a kaineti ma ikotakiia Iutaia, ke te bata are Iteraera; bwa i mwin ikotakiia ao a na aki manga kamangaoaki, ke ni manga kamaenakoaki riki. Ao e koro bukina bwa a mwaiti bwaai ake I taekin nakoia tariu, n te aro are a rau nanoia ao a karinanoia imatan te Uea.

21 Ao e koro bukina bwa a manga taetae riki nakoiu, ni kangai: Tera nanon are nooria tamara n te mii? Tera nanon te kai are e nooria?

22 Ao e koro bukina nakoia: Bon katotongan te kai ni kamaiu.

23 Ao a taku nakoiu: Tera nanon te kai te biti are nooria tamara, are a tiki nakon te kai?

24 Ao I tuangiia ae bon ana taeka te Atua; ao ane e ongo nakon ana taeka te Atua, ao n taua ni kamatoa, ao a na bon aki maamate; ao a na aki kona naba n rootaki n taian kariri ao kanoan ana kai ni katebe aika ura teuare e buakaka ma ni kamatakiaki, ni kairia nakon te mate.

25 Mangaia ae Ngai ae Nibwaai, I a kaungaia bwa a na ongo ana taeka te Uea; eng, I kabonganai korakoran tamneiu ni kabane ni kaungai nanoia, ao riki ma au kona ni kabane, bwa a na ongo ana taeka te Atua ao n uringnga ni kaawakin ana tua ni kabane n taai nako ao ni bwaai ni kabane.

26 Ao a taku nakoiu: Tera nanon te karaanga n ran are e nooria tamara?

27 Ao I tuangiia ae te ran are e nooria tamau bon te kammaira; ao a mwaiti bwaai ake a katabea ana iango n te aro are e aki noora kammairan te ran.

28 Ao I tuangiia bon te marenaua ae buakaka, are karaureia aika buakaka man te kai ni kamaiu, ao mai irouia naba ana aomata aika itiaki te Atua.

29 Ao I tuangiia ae bon katotongan moone ae kamwara, are e tuangai te anera bwa e a tia ni katauraoaki ibukiia aika buakaka.

30 Ao I tuangiia naba ae e a tia tamara n noora aron ana motiraoi te Atua are e karaureia aika buakaka mai irouia aika raoiroi; ao ootana bon titebo ma ootan te ai ae e ura, are e waerake nakon te Atua n aki toki, ao akea tokina.

31 Ao a taku nakoiu: Nanon aei bon karawawatan te rabwata i nanon ana bong ni kataki, ke nanona te bwai are e na riki nakon te tamnei i mwin maten te rabwata, ke e ti taekinaki iai baika a kaineti ma te maiu n rabwata?

32 Ao e koro bukina bwa I tuangiia bwa a kananonaaki iai aron te maiu n rabwata ao n tamnei; bwa ane e na roko te bong are a motikaki iai taekaia man aron aia mwakuri, eng, are taian mwakuri ake e karaoi te rabwata n tain te kataki.

33 Mangaia ae ngkana a mate i nanon aia buakaka ao a na riai n teweaki nako naba ni kaineti ma bwain te maiu n tamnei, aika a kaineti ma te raoiroi; mangaia ae a na kateaki imatan te Atua, bwa a na motikaki taekaia n aron aia mwakuri; ao ngkana aia mwakuri a tia ni kammaira ao a bon kammaira; ao ngkana a kammaira ao a na aki kona ni maeka n uean te Atua; bwa ngkana a kona, ao nanona e kammaira naba uean te Atua.

34 Ma taraia, I tuangkami aio, e aki kammaira uean te Atua, ao bon akea te bwai ae bareka ae e kona n rin n uean te Atua; mangaia ae e na iai te tabo ae kammaira are e a tia ni katauraoaki ibukin te bwai ae kammaira.

35 Ao bon iai te tabo are e a tia ni katauraoaki, eng, are bon moone are kamwara are I a tia n taekinna, ao te riaboro ae te tia katauraoia; mangaia ae nnen tamneia aomata i mwin te mate bon te maeka n uean te Atua, ke te teweaki nako ibukin te motiraoi are I a tia n taekinna.

36 Mangaia ae a na tukaki aika buakaka mai i buakoia aika a raoiroi, ao man te kai ni kamaiu naba, are moan te tangiraki riki uaana nakon uaanikai nako; eng, ao bon te kabanea ni korakora mai buakon ana bwai n tangira nako te Atua. Ao aikai bwaai ake I taekin nakoia tariu. Amen.