1 Ac tukun ma inge tukun nga, Nephi, utucklac ke Nguhn, ac liye ma inge nuhkwewa, nga fohlohklac nuh ke lohm nuknuk sin pahpah tuhmuhk.

2 Ac tukun ma inge nga liye tamuhlwel wiyuck, ac elos akuhkuhin nuh sin sie sin sie ke ma suc pahpah tuhmuhk el sramsramkihn nuh selos ah.

3 Tuh pwacyena el sramsramkihn ma yohk pucspucs nuh selos, ma upac in kahlwem kac, sahyacn na sie mwet el siyuck sin Leum; ac ke upac insiaclos, ohinge elos tiac ngwet nuh sin Leum ke ma elos enenuh in oruh.

4 Ac inge nga, Nephi, suhpwacr ke srihpen upaciyacn insiaclos, ac oacyacpac, ke srihpen ma suc nga liye ah, ac etuh ke ma inge lah ac sikyak na pwacye ke srihpen ma koluk yohk luhn tuhlihk nuhtin mwet.

5 Ac tukun ma inge nga toasrlah ke srihpen mwe kweok luhk, tuh nga motko muh mwe kweok luhk yohk liki nuhkwewa, ke srihpen kuhnausyucklac luhn mwet luhk, tuh nga liye puhtatlac lalos.

6 Ac tukun ma inge tukun nga fokokoi nga sramsram nuh sin tamuhlwel wiyuck, kena in etuh kaclos ke srihpen akuhkuhin lalos.

7 Ac elos fahk: Liye, kuht tiac kuh in kahlwem ke kahs ma pahpah tuhmwacsr el sruhmuhn ke lah na pwacye ke sahk olive, ac oacyacpac ke mwet Gentile.

8 Ac nga fahk nuh selos: Yac kowos siyuck sin Leum?

9 Ac elos fahk nuh sihk: Kuht soenna; tuh Leum El tiac ahkkahlwemye kuhtwena ma inge nuh sesr.

10 Liye, nga fahk nuh selos: Fuhkah tuh kowos tiacna liyacacng masap luhn Leum? Fuhkah tuh kowos ac fah misac, ke srihpen upaciyacn insiowos?

11 Yac kowos tiac esam ma suc Leum El fahk ah?—Kowos fin tiac ahkkwekweye insiowos, ac siyuck Sihk ke luhlahlfongi, luhlahlfongi lah kowos ac fah eis, in oaru in liyacacng masap Luhk, pwacyena lah ma inge ac fah ahkkahlwemyeyuck nuh suwos.

12 Liye, nga fahk nuh suwos, lah mwet Israel kapsreyuck nuh ke soko sahk olive, ke Nguhn luhn Leum suc oasr yurun pahpah tuhmwacsr; ac liye yac kuht tiac kotkotlah mwet Israel, ac yac kuht tiac sie lah ke mwet Israel?

13 Ac inge, kalmeyacn ma suc pahpah tuhmwacsr el sruhmuhn ke kuhpahsryang luhn lah na pwacye ke fohnlah luhn mwet Gentile, pa, ke lwen sahflah, ke fihtac lasr ac muhnahslah ke suhlahlahlfongi, ahok, ke lusen yac pucspucs, ac fihl pucspucs tukun Messiah El fah sifacna sikyak in mahno nuh sin tuhlihk nuhtin mwet, na fohnlah luhn wosasuc Lal Messiah fah tuhkuh nuh yurun mwet Gentile, ac liki mwet Gentile nuh sin mwet luhlah sin fihtac lasr—

14 Ac ke lwen sac mwet luhlah sin fihtac lasr fah etuh lah elos ma ke mwet Israel, ac lah elos mwet wuhlweacng luhn Leum; ac na elos fah etuh ac etwacack ke pahpah mahtuh tuhmwaclos, ac oacyacpac etwacack ke wosasuc luhn Mwet in Molwelah lalos, suc tuh lutiyuck nuh sin pahpah tuhmwaclos Sel; ohinge, elos fah etwacack ke Mwet in Molwelah lalos ac ip yohk ke mwe luti Lal, tuh elos in muh kuh in etuh lah elos ac tuhkuh fuhkah nuh Yohrohl ac moliyucklac.

15 Ac na ke lwen sac yac elos ac tiac engan ac kaksakihn God ma pahtpaht lalos, yot lalos ac molwelah lalos? Ahok, ke lwen sacn, yac elos ac tiac eis kuh ac mwe kahsruh ke oa in grape pwacye? Ahok, yac elos fah tiac tuhkuh nuh ke u pwacye luhn God?

16 Liye, nga fahk nuh suwos, Ahok; elos fah sifilpac esamyuck inmahsrlon mwet Israel; elos ac fah kuhpahsriyuckyang, in oacna sie lah na pwacye ke sahk olive, nuh ke sahk olive na pwacye soko ah.

17 Ac pa inge kalmeyac sin pahpah tuhmwacsr; ac kalmeyac sel pa ma inge ac tiac sikyak ne ke na tukun elos fahsrelihk sin mwet Gentile; ac kalmeyac sel pa ma inge ac fah sikyak ke inkacnek luhn mwet Gentile, tuh Leum Elan muh kuh in ahkkahlwemye kuh Lal nuh sin mwet Gentile, nuh ke srihpac se na ma El fah sruhngwacyuck sin mwet Jew, kuh sin mwet Israel.

18 Ohinge, pahpah tuhmwacsr el tiac sramsramkihn fihtac lasr uh muhkwena, tuhsruhk oacyacpac ke mwet Israel nohfohn, in srihsrngi wuhlweacng ma ac fah ahkpwacyeiyeyucklac ke lwen sahflah; suc wuhlweacng ma Leum El oraclah nuh sin pahpah tuhmwacsr Abraham, fahk: Ke fihtac lom kain in mwet nuhkwewa fin facluh fah ahkinsewowoyeyuck.

19 Ac tukun ma inge nga, Nephi, sramsram yohk nuh selos ke ma inge; ahok, nga sramsram nuh selos ke fohlohkyak luhn mwet Jew ke lwen sahflah.

20 Ac nga kalweni nuh selos kahs lal Isaiah, suc sruhmuhn ke fohlohkyak luhn mwet Jew, kuh luhn mwet Israel; ac tukun elos fohlohkweni elos fah tiac sifilpac ahkfohsyeyuck, elos ac tiac pac sifilpac fahsrelihk. Ac tukun ma inge nga sramsramkihn kahs pucspucs nuh sin mwet wiyuck, oruh elos mihsi ac ahkpuhsisaclyelos sifacna ye muhtuhn Leum.

21 Ac tukun ma inge elos sifilpac sramsram nuh sihk, fahk: Meac kalmeyacn ma se inge ma pahpah tuhmwacsr el liye ke sie mwemwe? Meac kalmeyacn sahk soko el liye ah?

22 Ac nga fahk nuh selos: Ma se inge pa sie mwe akucl ke sahk in moul.

23 Ac elos fahk nuh sihk: Meac kalmeyacn osra soko ma pahpah tuhmwacsr el liye, ma kohllah nuh ke sahk soko ah?

24 Ac nga fahk nuh selos lah ma sacn pa kahs luhn God; ac elos suc porongo kahs luhn God, ac lihksreni na sruokyac, elos ac tiacna misac; ac mwe sruhf ac mwe pihsr fihrihr luhn mwet lain tiac pac kuh in kuhtanguhltahllah elos in lohsrlah, in kohlohloslac nuh ke kuhnahoslah.

25 Ohinge, nga, Nephi, kwacfelos in lohacng nuh ke kahs luhn Leum; ahok, nga kwacfelos ke kuhiyacn nguhnihk nohfohn, ac ke kuhiyuck kwewa, tuh elos in lohacng nuh ke kahs luhn God ac esam in liyacacng masap Lal pacl nuhkwewa ke ma nuhkwewa.

26 Ac elos fahk nuh sihk: Meac kalmeyacn infacl in kof soko ma pahpah tuhmwacsr el liye ah?

27 Ac nga fahk nuh selos lah kof soko ma pahpah tuhmuhk el liye ah pa fohkfohk; ac nuhnak lal yohk nuhnkuh ke kuhtwepacna ma oruh el tiacna liye fohkfohkiyacn kof sac.

28 Ac nga fahk nuh selos lah luhf na koluk se, ma srwaclihk mwet koluk liki sahk in moul, ac oacyacpac liki mwet luhlahlfongi luhn God.

29 Ac nga fahk nuh selos lah ma se inge pa sie mwe akucl ke hell na koluk sac, ma lipufacn sac fahk nuh sihk muh ahkoeyuck nuh sin mwet koluk uh.

30 Ac nga fahk nuh selos lah pahpah tuhmwacsr el liye pac nuhnuhnkuh suwohs luhn God lah oacyacpac srwaclihk mwet koluk liki mwet suwohswohs; ac kahlwemiyac ah oacna kahlwemiyacn e fihrihr, ma som nuh lucng nuh yurun God ne tok ma pahtpaht, ac wacngihn sahflahiyac.

31 Ac elos fahk nuh sihk: Yac kalmeyacn ma se inge pa kweok luhn mahno ke pacl in srihkeyuck, kuh yac kalmac pa sahflahiyacn moul uh tukun misac luhn mahno, kuh yac ma inge sramsramkihn ma suc suhkawihl?

32 Ac tukun ma inge nga fahk nuh selos lah ma se inge pa sie mwe akucl ke ma ma kwewana suhkawihl ac kawihl; tuh lwen se ac fah tuhkuh tuh elos ac enenuh in nuhnuhnkweyuck ke orekma lalos, ahok, finne ke orekma ma oreklac ke mahno suhkawihl ke pacl in srihkeyuck lalos.

33 Ohinge, elos fin misac ke ma koluk lalos elos enenuh in sisilac pac, ac nuh ke ma suc kawihl, suc ma ke suwohswohs; ohinge, elos enenuh in utucklac nuh ye muhtuhn God, in nuhnuhnkweyuck ke orekma lalos; ac orekma lalos fin fohkfohk elos enenuh in fohkfohk; ac elos fin fohkfohk enenuh se na tuh elos in tiacna kuh in muhta ke tohkohsrahi luhn God; fin ohinge, tohkohsrahi luhn God ac oacyacpac fohkfohk.

34 Tuhsruhk liye, nga fahk nuh suwos, tohkohsrahi luhn God tiacna fohkfohk, ac tiacna kuh in oasr kuhtwena ma fohkfohk ilyak nuh ke tohkohsrahi luhn God; ohinge enenuh in oasr sie acn fohkfohk ma ahkoeyucklac nuh ke ma fohkfohk.

35 Ac oasr sie acn ahkoeyucklac, ahok, finne hell na koluk se ma nga sramsramkihn ah, ac devil pa ahkno hell inge uh; ohinge sahflahiyacn moul luhn mwet uh pa in muhta ke tohkohsrahi luhn God, kuh in sisilac ke srihpen nuhnuhnkuh suwohs se ma nga sramsramkihn ah.

36 Ohinge, mwet koluk uh lihsyucklac liki mwet suwohswohs, ac oacyacpac liki sahk in moul, suc fahko kac pa sacohk emet ac luhngkihnyuck emet liki na fukun sahk nuhkwewa sahyac; ahok, ac ma se inge pa mwe sang yohk se emet ke mwe sang nuhkwewa luhn God uh. Ac nga sramsram ohinge nuh sin tamuhlwel wiyuck. Amen.