1 Ao ngkai e koro bukina bwa Ngai, ae Nibwaai, I a katoka au kakarabakau nakoia tariu, ao taraia, a taku nakoiu: Ko a tia n tuangira bwaai aika matoatoa, aika matoatoa riki nakon aika ti kona ni karaoi.

2 Ao e koro bukina bwa I tuangiia bwa I ataia ae I a tia n taekin bwaai aika a matoatoa ni kaaitaraia aika buakaka, n aron te koaua; ao aika a raoiroi I a tia ni karoiroiaa, ao ni kakoaua bwa a na uotaki rake n te kabanea ni bong; mangaia ae taan bure e matoatoa butimwaean te koaua irouia, bwa a ewaraki kabin nanoia iai.

3 Ao ngkai tariu, ngke arona bwa kam raoiroi ao ni kukurei n ongo nakon te koaua, ao n tau mwiia, bwa kam aonga ni kona n eti raoi n nakonako imatan te Atua, ao kam na bon aki ngurengure ibukin te koaua, ao ni kangai: Ko a tia n taekin bwaai aika matoatoa ni kaaitaraira.

4 Ao e koro bukina bwa Ngai ae Nibwaai, I a kairoroia tariu, ma te nano ae korakora, bwa a na kaawakin ana tua te Uea.

5 Ao e koro bukina bwa a kamangoria imatan te Uea; n te aro are I a namakina te kimwareirei ma kaantaninga aika a bati ibukiia, bwa a na nakonako n te kawai ae raoiroi.

6 Ao a bane n taekinaki ma ni karaoaki bwaai aikai n ana tai ni maeka tamau i nanon te umwanrianna n te mwarua are e aranna bwa Remuera.

7 Ao e koro bukina bwa Ngai ae Nibwaai, I anaa natin Itimaera te aine temanna bwa buu; ao tariu naba, a anaia natin Itimaera aine bwa kaainabaia; ao Tioram naba, e a ana natin Itimaera are te karimoa bwa buuna.

8 Ao ikai are e a kakoroi iai bukin taian tua tamau ake e a tia n anganaki iroun te Uea. Ao ngai naba ae Nibwaai, I a tia ni kakabwaiaki n ae korakora iroun te Uea.

9 Ao e koro bukina bwa e taetae bwanaan te Uea nakon tamau n te tairiki, ao e tuangnga bwa n te ingabong ao e na mwananga nako nanon te rereua.

10 Ao e koro bukina bwa ngke e uti tamau n te ingabong, ao e a nako nakon mataroan te umwanrianna ao e a mimi ngke e a noora te booro ae mronron i aontano ae kamimi aron karaoana; ao e karaoaki man te buraati ae tamaroa. Ao i nanon te booro bon kainikoto aika uoua; ao teuana mai buakoia e a kotea te kawai are ti riai n toua i nanon te rereua.

11 Ao e koro bukina bwa ti a ikoti ni kabane bwaai ni kabane ake ti na uoti nako nanon te rereua, ao nikiran naba bwaai ake ti kainnanoi ake e a tia n anganiira te Uea; ao ti uoti naba koraa n aekaia nako bwa uotara nako nanon te rereua.

12 Ao e koro bukina bwa ti a anai ara umwanrianna ao ti a mwananga nako nanon te rereua, rinanon te karaanga are Reimwan.

13 Ao e koro bukina bwa ti mwananga inanon te maan ae aua te bong, n te kawai ae kaineti nako maiaki-maiakimainiku, ao ti a manga katei ara umwanrianna; ao ti arana te tabo arei bwa Tieta.

14 Ao e koro bukina bwa ti a anai ara kainikatebe ma kanoaia, ao ti a nako nakon te rereua bwa ti na tiriman ibukin kanaia ara utu; ao ngke ti a tia ni kamatei maan ibukiia ara utu ao ti a manga okiria ara utu inanon te rereua, nakon te tabo are Tieta. Ao ti waaki nako riki nako rinanon te rereua, n ira te kawai are mai mwaaina, n rinanon taabo ake a maiu riki i nanon te rereua, ake a uakaan ma mataniwin Taari are Uraura.

15 Ao e koro bukina bwa ti mwananga i nanon te maan ae boong aika a mwaiti, n tiriman iaon kawaira, ma ara kainikatebe ma kanoaia ao ma ara atibu ao ara bana.

16 Ao ti ira te kawai are koteaki iroun te booro, are e a kairira nakon taabo aika maiu riki i nanon te rereua.

17 Ao ngke ti a tia ni mwananga i nanon te maan ae boong aika mwaiti, ao ti a katei ara umwanrianna i nanon te tai ae aki maan, bwa ti aonga ni kona ni motirawa ao ni karekei amwarake ibukiia ara utu.

18 Ao e koro bukina bwa ngke I a nako Ngai ae Nibwaai n tiriman, taraia, I a urua au kainikatebe, ae karaoaki man te biti ae tamaroa; ao ngke I a tia n urua au kainikatebe, ao taraia, a un tariu irou ibukin akean au kainikatebe, bwa e a aki reke kanara.

19 Ao e koro bukina bwa ti a okiria ara utu ma akea konara, ao ibukin taonakiia n te kua ae korakora, ibukin mwaamwanangaia, ao a taonaki n te kainnano ibukin tangiran te amwarake.

20 Ao e koro bukina bwa a korakora naba ngurengureia Reimwan ma Remuera ao natin naba Itimaera aika mwaane, ibukin kainnanoia ma korakaia i nanon te rereua; ao e a ngurengure naba tamau nakon te Uea ae Atuana; eng, ao a bon bane n taonaki n te nanokawaki ae korakora, n te aro are a bon ngurengure ni kaitara aia Uea.

21 Ao e koro bukina bwa Ngai ae Nibwaai, I a tia n rootaki n te karawawataki ma tariu ibukin uruakin au kainikatebe, ao ibukin aia kainikatebe aika a tia n toki korakoraia, ao e a bon moanna ni korakora te kaangaanga, eng, n te aro are ti aki kona ni karekea te amwarake.

22 Ao e koro bukina bwa Ngai ae Nibwaai, I a manga kakarabakau riki ma tariu, ngkai a tia ni manga kamatoai riki nanoia, n te aro are a tia n ngurengure ni kaitara te Uea ae Atuaia.

23 Ao e koro bukina bwa Ngai ae Nibwaai, I a karaoa te kainikatebe man te kai, ao kanoan te kainikatebe man te kai ae eti; mangaia ael I a tauraoi ma te kainikatebe ao kanoana, ma te bana ma atibu. Ao I taku nakon tamau: E ngaara te tabo are N na nako iai ni karekea te amwarake?

24 Ao e koro bukina bwa e a titirakina te Uea, bwa a tia ni kamangoria ibukin taeka ake I taekin; bwa a mwaiti bwaai ake I a tia n taekin nakoia ma korakoran nanou.

25 Ao e koro bukina bwa e a roko bwanaan te Uea nakon tamau; Ao e a korakora takuana ibukin ngurengurena nakon te Uea, n te aro are e a rootaki n te nanokawaki ae korakora.

26 Ao e koro bukina bwa e taku bwanaan te Uea nakoina: Taraa te booro, ao ko na noori bwaai ake a tia ni koreaki.

27 Ao e koro bukina bwa ngke e a tia tamau n noori bwaai ake a tia ni koreaki iaon te booro, ao e a rootaki n te maaku ma te ruru ae korakora, ao a rootaki naba iai tariu ao natin Itimaera mwaane ao buura.

28 Ao e koro bukina bwa Ngai ae Nibwaai, I a noori kainikoto ake a mena i nanon te booro, ae a mwakuri n aron waakin te onimaki ma te nanomatoa ao te ongeaba nakon bwaai ake a tuangira.

29 Ao e a koreaki te koroboki ae boou i aoia, ae e maataata aron warekana, are e anganiira te atatai n aron ana mwakuri te Uea; ao e a koreaki ma ni bibitaki man te tai teuana nakon teuana, ni boraoi ma waakin te onimaki ao te nanomatoa are ti anganna. Ao ti a nooria ikai bwa man bwaai aika uarereke ao e a kona iai te Uea ni karaoi bwaai aika korakora.

30 Ao e koro bukina bwa Ngai ae Nibwaai, I a nako taubukin te maunga, n aron taian kaetieti ake a tia ni kaotaki i aon te booro.

31 Ao e koro bukina bwa I a tiring maan aika moaanti, n te aro are I a karekea te amwarake ibukiia ara utu.

32 Ao e koro bukina bwa I a okira ara umwanrianna, ma uotau maan are I a tia n tiring; ao ngke a nooria ae iai te amwarake ae I uotia, ao a onrake n te kimwareirei! Ao e koro bukina bwa a kamangoria imatan te Uea, ao a anganna aia kaaitau.

33 Ao e koro bukina bwa ti a manga waakina riki mwanangara, n reita nako te kawai are ti a tia n toua mai mwaaina; ao ngke ti a tia ni mwananga i nanon te maan ae boong aika mwaiti ao ti a manga katei naba ara umwanrianna, bwa ti aonga n tiku i nanon te tai ae aki maan.

34 Ao e koro bukina bwa e a mate Itimaera, ao e a taunaki n te tabo are e aranaki bwa Naom.

35 Ao e koro bukina bwa a tang n rawawata natin Itimaera aine ibukin buan tamaia, ao ibukin naba kainnanoia i nanon te rereua, ao a ngurengure iroun tamara, ibukin ae e a tia ni kairia nako man aban Ierutarem, ni kangai: E a tia ni mate tamara; eng, ao ti a tia n tiotio nako i nanon te rereua n te tai ae maan, ao n rootaki n te rawawata, te baki, te taka, te kua; ao n tokin taian korakai aikai ti na mate i nanon te rereua ma te baki.

36 Ao n te aro aei a ngurengure nakon tamau, ao nakoiu naba; ao a kan nako n okira Ierutarem.

37 Ao e taku Reimwan nakon Remuera ao nakoia natin Itimaera mwaane: Taraia, ti a tiringa tamara, ao tarira naba ae Nibwaai, are e a tia ni motikia i bon irouna bwa e na riki bwa te tia tautaekanira ao ara tia reirei, ngaira aika karimoana.

38 Ao ngkai, e taku bwa e a tia te Uea n taetae ma ngaia, ao a tia naba n roko n ibuobuoki nakoina taian anera. Ma taraia, ti ataia bwa e kewe nakoira; ao e tuangira bwaai aikai, ao man karaoi bwaai aika mwaiti n aron ana mwakuri ni kamwane, bwa e aonga ni kewe imatara, ma ni iangoia, bwa tao e aonga ni kairira nakon te rereua teuana ae ti iruwa iai; ao ngkana e tia ni kairira nako, ao e a tia ni baireia bwa e na riki bwa te uea ao n tautaeka iaora, bwa e aonga ni karaoa takun nanona nakoira. Ao aio aron tariu ae Reimwan ni kakiriwei nanoia bwa a na un.

39 Ao e koro bukina bwa e mena te Uea iroura, eng, e a bon roko naba bwanaan te Uea ao e taekin taeka aika mwaiti nakoia, ao e korakora katuaeakiia; ao ngke a tia ni katuaeaki ni bwanaan te Uea ao a toki uniia, ao a rairi nanoia man aia bure, n te aro are e a manga kakabwaiaira te Uea n te amwarake, ao ti aki mate.