1 At milyari a miglakbe keng pasibayu king ilang; at miglakbe ke malapit king aslagan manibatan king panaun a ita. At miglakbe kami at menamdaman keng lubus a kasakitan king ilang; at ding kekaming babai menganak la king ilang.

2 At karagul da ring biyaya ning Guinu kekami, a kabang mebie ke king sagiwang karne king ilang, ding kekaming babai miniye lang dakal a pasusu kareng karelang anak a mangalati; at mengasikan la, wa, kalupa da reng lalaki; at megumpisa dang pibata ing karelang pamaglakbe alang pamamulung.

3 At kanita ikit tamu a ding kautusan ning Dios dapat lang matupad. At nung malyari a ding anak da ring tau tupad la king kautusan ning Dios pakanan nala, at pasiknangan na la, at miye yang paralan nung makananu dang agampanan ing bage inutus na karela; anya pin, miniye yang paralan para kekatamu kabang menuknangan tamung pansamantala king ilang.

4 At migdatun kami kilub ning dakal a banua, wa, anggiyang walung banua king ilang.

5 At dinatang kami king gabun a ausan dang Masagana, uli ning keang dakal a bunga, at liling pulut; at ing eganaganang bage iti sidia ning Guinu, bang ekami mangamate. At ikit miya ing dayatmalat, a inaus ming Irreantum, a, mangabaldugan, dakal a danum.

6 At milyari a telakad mila ring kekaming tolda king pampang ning dayatmalat; at anggiyang dinanas keng dakal a kalungkutan at kasakitan, wa, anggiyang dakal at e mi na asulat ngan, labis keng metula anyang datang ke king pampang ning dayatmalat; at inaus miya ing lugal Masagana, uli ning keang dakal a bunga.

7 At milyari a kaibat ku, i Nephi, menatili king gabun a Masagana king kilub ning dakal a aldo, ing siwala ning Guinu dinatang ya kanaku, a sasabing: Tikdo ka, at mukiat ka king bunduk. At milyari a tinikdo ku at minukiat ku king bunduk at mengadi ku king Guinu.

8 At milyari a ing Guinu mengamanu ya kanaku, a sasabing: Gawa kang metung a barko, agpang king pangayaring ipakit ku keka, bang kanita dalan ko ring kekang tau sumangid da rening danuman.

9 At sinabi ku: Guinu, nukarin ku munta bang manakit kung mina para lasawan, bakung makagawang kasangkapan para makagawang barko agpang keng paralan a pepakit mu kaku?

10 At milyari a ing Guinu sinabi na kaku nung nukarin ku dapat munta para manakit mina, bakung makagawang kasang kapan.

11 At milyari a aku, i Nephi, ginawa kung tiupan nung kesanu labulan ya ing api, gawa kareng balat da ring animal; at kaibat kung mekagawang tiupan, para mika paralan kung labulan ing api; pipukpukan ko ring aduang batu para makagawa kung api.

12 Uling ing Guinu ena bayu ing panaun a iti pepaburen ing gawa tamung marakal a api, kabang maglakbe tamu king ilang; uling sinabi na: Gawan kung maniaman ing pamangan yu, bang eyu na ilutu;

13 At aku mu naman ing maging sala yu king ilang; at isadia ke ing dalan yu, nung pamintuan yo ring kakung kautusan; anya pin, kabang pamintuan yula ding kakung kautusan midala kayu king pangakung labuad; at abalu yu a aku ing mamatnube kekayu.

14 Wa, at ing Guinu sinabi na naman a: Kaibat yung miras king pangakung labuad, abalu yu a Aku, ing Guinu, Dios ku; at Aku, ing Guinu, linigtas da kayu king pangalasak; wa, a dela dakayu palual king gabun ning Jerusalem.

15 Anya pin, aku, i Nephi, migsikap kung tuparan ding kautusan na ning Guinu, at inamuyut ko ring kapatad ku king katapatan at pamagsikap.

16 At milyari a ginawa kung kasangkapang gawa king mina a linaso ku ibat king batu.

17 At anyang ding kakung kapatad ikit dang babalak na kung gawang barko, megumpisa lang binulung laban kaku, a sasabing: Ing kapatad tamu mangmang ya, uling ya isipan na makagawa yang barko; wa, ya isipan na naman alipatan ne ing maragul a dayatmalat.

18 At anya pin ding kapatad ku migreklamu la laban kaku, at ela bisang magobra, uling ela meniwala a makagawa kung barko; ni meniwala la a aku tiruanan naku ning Guinu.

19 At ngeni milyari a aku, i Nephi, masyadu kung melungkut uli ning kasiasan ning karelang pusu; at ngeni uling ikit da ing megumpisa kung melungkut metula la king pusu da, at angga king keilian daku, a sasabing; Balu mi eka makagawang barko, uling balu mi kulang ka beluan; anya pin, eka makagawang makanian a karagul a obra.

20 At ika kalupa me ing kekatamung tata, a mitake king kalokuan a kaisipan ning keang pusu; wa, petnubayan nakatamu palual king labuad ning Jerusalem, at melili tamu keng ilang kilub ning dakal a banua; at ding kekatamung babai megobra lang mabayat, kabang mabuktut la; at memanganak la king ilang at denasan da ngan ing eganaganang kasakitan, bukud king kamatayan; at mayap pa sigurung mengamate la bayu la linual king Jerusalem kesa keng danasan dala dening kasakitan.

21 Lawan, karing dakal a banuang deni migkasakit kami king ilang, a panaung malyaring metula kami karing kekaming pibandian at ing labuad a kekaming pekamana; wa, at malyaring meging masaya kami.

22 At balu mi a ding tau a atiu king labuad ning Jerusalem mangayap lang tau; uling tiparan dala ring batas at kayatulan na ning Guinu, at ding keang eganaganang kautusan, agpang king batas nang Moises; anya pin, balu mi ing mayap lang tau; at ing kekaming tata inatulan na nala, at petnubayan na kaming parayu uling mamintu kami kareng keang amanu; wa, at ing kapatad mi kalupa ne. At kening paralan a ini ning pamagsalita ding kapatad ku binulung la at migreklamu laban kekami.

23 At milyari a aku, i Nephi, migsalita ku karela, a sasabing: Maniwala kayung deng kekatamung ninunu, a anak nang Israel, mipatnubayan lang parayu kareng tau Ehipto nung ela mekiramdam kareng amanu na ning Guinu?

24 Wa, keng palage yu milako la keng karelang pangaalipan, nung ing Guinu ene inutus kang Moises a dapat nalang panimunan king pangalako da king pangaalipan?

25 Ngeni balu yu na a ding anak nang Israel atiu la king pangaalipan; at balu yu na ing papagobran dong mabayat, a nung sanung masakit gawan; anya pin, balu yu ing mayap a bage para karela, a dapat lang milako king pangaalipan.

26 Ngeni balu yu na a i Moises inutus ne ning Guinu para daptan ing dakilang obrang ita; at balu yu a kapamilatan ning keang amanu ding danum ning Dayatmalat a Malutu mepitna la at mikawani, at linakad la king malanging gabun.

27 Dapot balu yu a ding tau Ehiptong mengalumud king Dayatmalat a Malutu, ilapin ding ukbu nang Faraon.

28 At balu yu mu naman ing pepakanan da lang mana keng ilang.

29 Wa, at balu yu mu naman a i Moises, king amanu na agpang keng upaya ning Dios a atiu kea, berug ne ing batu, at linual ing danum, bang kanita ding anak nang Israel ayampat ra ing kawa dang danum.

30 At anggiyang panimunan da la, ing Guinu dang Dios, ing karelang Tagayatbus, a mumuna karela, manimuna karela neng aldo at bibiye sala karela neng bengi, at gagawan ing eganaganang bage para karela a mayap para keng tau bang tanggapan, pepasias dala reng pusu da at binulag dala deng karelang kaisipan, at muang migsalita laban kang Moises at laban king tune at mabieng Dios.

31 At milyari a agpang keng keang amanu lesakan na la; at agpang king keang amanu penimunan na la; at agpang keng keang amanu gewa na ngan ing eganaganang bage para karela; at alang megawa nung e kapamilatan ning keang amanu.

32 At kaibat deng alipatan ing ilug Jordan gewa nong masikan ba dong apalakwan ding tau king gabun, wa, para mikalat la at malasak.

33 At ngeni, isipan yu a deng manuknangan keng labuad a ini, a atiu keng labuad a pangaku, a tinabi dang palual ding kekatamung ninunu, isipan yu mangayap la? Makiramdam, sasabian ku kekayu, Ali.

34 Isipan yu ding kekatamung ninunu mas pinili dala kesa karela nung meging mayap la? Sasabian ku kekayu, Ali.

35 Oini, ing Guinu kikilalanan no ngan ding tau bilang metung; ya a mayap pipilinan ne ning Dios. Dapot oini, deng taung deni tinggian da ing balang amanu ning Dios, at makasalanan na la; at ing kabilugan nang mua ning Dios atiu ne karela; at ing Guinu sinumpa ne ing labuad laban karela, at penuanan ne para kareng kekatamung ninunu; wa, sinumpa ne laban karela angga keng ikalasak da, at penuanan ne para kareng kekatamung ninunu angga king mika upaya la babo kaniti.

36 Lawan, ing Guinu lelangan ne ing yatu bang atuknangan ya; at lelangan no ring anak na bang bandian de iti.

37 At linalang yang metung a mayap a bansa, at lesakan nala ding bansa da ring mangarok.

38 At tinaid no ring mangayap king mangasanting a labuad, at ding mangarok lesakan na la, at simpa na ing labuad laban karela uli ning depatan da.

39 Memuntukan yang matas karing banua, uling iti yang tronu na, at ining yatu yang patungan da ring talampakan na.

40 At kaluguran na la detang tatanggap kea bilang karelang Dios. Lawan, kaluguran nala deng kekatamung ninunu, at mengaku ya karela, wa anggiyang i Abraham, i Isaac, at i Jacob; at gaganakan nala ring pangaku a gewa na; anya pin, dela nalang palual keng labuad ning Ehipto.

41 At pepasakitan nala king ilang; uling pepasias do ring pusu ra, anti mo ikayu; at ing Guinu pepasakitan nala uli ning karelang kasalanan. Pepadala yang mangabagsik a susulapo ubingan busal da; at kaibat dang mengaket misadia yang paralan bang kumayap la; at ing bukud a bage a dapat dang gawan ya ing lumawe; at uli ning kasimplian na ning paralan, o ing pangamayan na niti, dakal lang mengamate.

42 At pepasias do ring karelang pusu king anggang panaun, at migsalita lang laban kang Moises, at laban mu naman king Dios; makanian man, balu yu mipatnubayan la king alang katumbas nang upaya king labuad a pangaku.

43 At ngeni, kaibat da ring anggang bage deni, ing panaun dinatang na at meging mangarok na la, wa, malapit na king mitmung karokan; at eku balu dapot keng aldo iti malapit na lang malasak; uling balu ku ing aldo siguradu yang datang a dapat lang malasak, maliban mu karing ditak, a midayu king pangarakap.

44 Anya pin, ing Guinu inutusan ne ing tata ku na dapat yang munta king ilang; at ding Judio pagnasan de mu namang paten; wa, at ikayu mu naman pagnasan ya namang paten; anya pin, ikayu makamate kayu king pusu yu at kalupa yu la.

45 Mabilis kayu king pamangawang kasalanan dapot mabagal king pamanalala king Guinu yung Dios. Menakit na kayung anghel, at migsalita ya kekayu; wa, dimdam ye ing siwala na king anggang panaun; at migsalita ne kekayu king malumane, mainang siwala, dapot eyu apapansin ini, eyu panamdaman ing keang amanu; anya pin, migsalita ya kekayu anti mong duldul, a migpaugun keng yatu balamu mangapirasu ya.

46 At balu mu naman a king upaya ning keang mayupayang amanu agawa neng mapupus ing yatu; wa, at balu mu a kapamilatan na ning keang amanu agawa nang ding magaspang a lugal magawa lang mapinu, at ding mapinung lugal apamalbal na la. O, kanita, bakit, malyaring meging masias la reng kekayung pusu?

47 Lawan, ing kaladua ku mangagisi ya king sakit lub king uli yu, at ing pusu ku manasakit ya; tatakut ku a pota mitakwil kayu kapilanman. Lawan, mitmu ku king Espiritu ning Dios, angga king ing katawan ku ala yang sikanan.

48 At ngeni milyari a anyang asabi ko rening amanu mimua la kaku, at buri da kung ibasibas king malalam a dagat; at kabang lalapit la kanaku para panasakitan daku migsalita ku karela, a sasabing: King lagiu ning Mayupayang Dios, utusan da kayu ing eyu ku tatagkilan, uling mitmu ku king upaya ning Dios, anggang ing katawan ku malyari yang masilab; at ninuman ing maniakit kanaku, malanat ya anti mo ing malanging timbu; at mawala yang kuwenta arapan ning upaya ning Dios, uling parusan ne ning Dios.

49 At milyari a aku, i Nephi, sinabi ku karela ing eno bubulung laban keng karelang tata; ni ela tatangging magobrang kayabe ku, uling ing Dios inutusan nakung gawang barko.

50 At sinabi ku karela: Nung ing Dios inutus na kakung gawan ku ngan ing eganaganang bage, agawa ku la. Nung utusan na kung sabian ku kening danum, maging gabun ka, dapat yang maging gabun; at nung dapat kung sabian iti, iti malyari.

51 At ngeni, nung ing Guinu atin yang makanian a maragul a upaya, at makagawang dakal a milagru karing anak ning tau, bakit mo ena ku aturuanan, a dapat kung mitalakad barko?

52 At milyari a aku, i Nephi, dakal ku sinabi karing kapatad kung lalaki, angga king megulu la at ela makapakipate laban kanaku; ni eda pangangasan ing panasakitan daku o tagkilan daku kareng karelang taliri, e kilub ning dakal a aldo. Ngeni eno mangangas gawan da iti nung ali mangalanat la king arapan ku, kayupaya na ning Espiritu ning Dios; at anya penigobran na la.

53 At milyari a ing Guinu sinabi na kaku: Iatyat me ing kekang gamat pasibayu kareng kekang kapatad, at ela malanat king arapan mu dapot pagalgalan ku la, sinabi ning Guinu, at iti gawan ku, bang abalu da a aku ing Guinu dang Dios.

54 At milyari a inatyat ke ing gamat ku kareng kapatad ku, at ela melanat king arapan ku; dapot ing Guinu pegalgalan na la, anggiyang agpang king amanung sinabi na.

55 At ngeni, sinabi da: Balu ming maki kasiguraduan a ing Guinu atiu keka, uling balu mi a iti ing upaya na ning Guinu a migpaugun kekami. At sinakab la arapan ku, at malapit da nakung samban, dapot ekula paburen, a sasabing: Aku ing kekayung kapatad, wa, anggiyang ing kekayung waling kapatad, anya pin, samban ye ing Guinung kekong Dios, at igalang yula ding kekayung tata at kekayung ima, bang ding kekayung aldo kumaba la king labuad a ing Guinu ibiye na kekayu.