1 At ngeni aku, i Nephi e ke kukuwentu ing istorya ning lahi da ring kakung ninunu kening parting ini ning kakung kasulatan; ni kapilanman eke ikuwentu iti karing laminang deni a kakung susulat; uling iti makasulat ya king kasulatan a sinulat ning kakung tata; anya pin eke susulat kening obrang ini.

2 Uling ustu nang sabian ku a ikami lahi na kaming Jose.

3 At alang ulaga kanaku a aku sumulat kung mabilug a istorya da ring anggang bage tungkul kang tata ku, uling ela malyaring isulat karening lamina, uling pagnasan ku mika lugal ku bang asulat kula ding bage tungkul king Dios.

4 Uling ing mabilug kung kapagnasan ya ing ayamuyut ku la ding tau bang maniwala king Dios nang Abraham, at king Dios nang Isaac, at king Dios nang Jacob, at miligtas la.

5 Anya pin, ding bage a makalugud king yatu eku la sinulat, dapot ding bage a makalugud king Dios at karela a e makayatu.

6 Anya pin, mamiye kung kautusan karing kakung bini, a ela susulat karening laminang deni karing bage a alang ulaga karing tau.