1 Ac tukun ma inge elos alu nuh sin Leum, ac wiyuc som; ac kuht oruh orekma usrnguck ke kain in sroasr nuhkwewa ke ipin sahk. Ac Leum El ahkkahlwemye nuh sihk ke pacl nuh ke pacl ke ohiyac ma nga enenuh in oruh nuh ke sroasriyacn oak soko ah.

2 Inge nga, Nephi, tiacna orekmakihn ipin sahk in sroasr in ukwe ma lutiyuck sin mwet, nga tiacpac na muhsahi oak soko ah in ukwe ke ohiyac luhn mwet; tuhsruhk nga muhsahelah in ukwe ohiyac ma Leum El ahkkahlwemye nuh sihk; ohinge, tiacna oacna ohiyac luhn mwet uh.

3 Ac nga, Nephi, tuh som pacl puhkantwen nuh finohl ah, ac nga pruhe pacl puhkantwen nuh sin Leum; ohinge Leum El ahkkahlwemye nuh sihk ma wo.

4 Ac tukun ma inge tukun nga ahksahfyelah oak soko ah, fal nuh ke kahs luhn Leum, tamuhlwel wiyuck elos liye lah wo, ac lah usrnguckiyacn oreklac la arulacna wo; ohinge, elos sifilpac ahkpuhsisaclyeloslac sifacna ye muhtuhn Leum.

5 Ac tukun ma inge puhsren Leum tuhkuh nuh yurun pahpah tuhmuhk, tuh kuht in mukwiyak ac som nuh lun oak soko ah.

6 Ac tukun ma inge ke lwen tohkoh ah, tukun kuht ahkolah ma nuhkwewa, fukun sahk ac ikoac pucspucs ke yen mwesis, ac honey puhkantwen, ac ma lasr in oacna ma suc Leum El sapkihn nuh sesr, kuht som nuh lun oak soko ah, weacng ma nuhkwewa lasr ac fihtac suhnwacsr, ac kuhtwena ma ma kuht us tuhkuh, mwet nuhkwewa in oacna matwacl; ohinge, kuht nohfohn som nuh lun oak soko ah, weacng muhtwacn kiyacsr ac tuhlihk nahtuhsr.

7 Ac inge, wen luo isuslac nuhtin pahpah tuhmuhk ke yen mwesis; ma mahtuh sac pahngpahng Jacob ac ma fuhsr sac pa Joseph.

8 Ac tukun ma inge tukun kuht nuhkwewa som nuh lun oak soko ah, ac kuht us ma lasr ac ma ma sapkihnyuck nuh sesr kac, kuht pahtokyac nuh in kof ah ac kuht paht nuh met ke eng ah nuh ke acn wihlwihl.

9 Ac tukun kuht paht nuh met ke eng ah ke lusen lwen pucspucs, liye, tamuhlwel wiyuck ac wen nahtuhl Ishmael ac oacyacpac muhtwacn kiyaclos muhtwacwacack in sifacna ahkpwacryelos, yohkna oruh elos muhtwacwacack in tacn, ac in on, ac enuhm in sramsram, ahok, oruh elos muhlkuhnlah lah ke kuh fuhkah se tuh elos utuckuh nuh inge; ahok, elos tuh upaclah na in oruh ma koluk ahluhkwelah.

10 Ac nga, Nephi, muhtwacwacack in sahngweng na upac fin Leum El ac kasrkuhsrak sesr, ac kalyei kuht ke srihpen ma koluk lasr, tuh kuht ac kuh in ukumyucklac ke acn loal in meoa uh; ohinge, nga, Nephi, muhtwacwacack arulacna puhlaik in sramsram nuh selos; tuhsruhk liye elos kasrkuhsrak sihk, fahk: Kuht ac fah tiac lwelah tuh tamuhlwel fuhsr wiyacsr in tuh fah sie mwet kol lasr.

11 Ac tukun ma inge Laman ac Lemuel elos sruokyucwi ac kapriyucwi ke mwe kapihr, ac elos arulacna koluk nuh sihk; ne ohinge, Leum El lwelah ma inge Elan muh kuh in ahkkahlwemye kuh Lal, in ahkpwacyeiye kahs Lal ma El sramsramkihn ke mwet koluk.

12 Ac tukun ma inge tukun elos kapriyucwi upac oruh nga koflah in mukwikwi, kampahs sac, ma ahkkweyeyucklac sin Leum ah, tui tilac orekma.

13 Ohinge, elos tiac etuh lah elos ac kihfucs oak ah fuhkah, yohkna oruh oasr sie pahkah luhlahp tuhyak, ahok, sie eng af lohsr na upac, ac kuht paht fohlohk nuh tok fin kof uh ke lusen lwen tolu; ac elos muhtwacwacack arulacna sahngweng fin elos ac walomlah in meoa uh; ne ohinge elos tiacna tuhlweyuclac.

14 Ac ke lwen ahkahkosr, ma kuht paht fohlohk nuh tok ah, eng af lohsr sac muhtwacwacack in arulacna upaclah.

15 Ac tukun ma inge kuht apkuhran in ukumyucklac nuh ke acn loal in meoa uh. Ac tukun kuht paht nuh tok fin kof uh ke lusen lwen ahkosr, tamuhlwel wiyuck muhtwacwacack in liye lah nuhnuhnkuh luhn God oasr faclos, ac lah elos ac fah misac sahyacn elos auliyak ke ma koluk lalos; ohinge, elos tuhkuh nuh yuruk, ac tuhlahlah mwe kapihr ma oan ke pukun pouk, ac liye fahfwack na upac; ac fukun niyuck arulacna fahfwack pac, ac waek na upac.

16 Ne ohinge, nga ngwet nuh sin God luhk, ac nga kaksakuhnuhl ke lusen lwen na fohn se; ac nga tiacna tohrkahskahs lain Leum ke srihpen mwe kweok luhk.

17 Inge pahpah tuhmuhk, Lehi, el fahk ma pucspucs nuh selos, ac oacyacpac nuh sin wen nahtuhl Ishmael; tuhsruhk, liye, elos fahk kahs in ahksahngweng pucspucs in lain kuhtwena mwet suc ac aholyuc sramsram; ac ninac kiyuck ac pahpah tuhmuhk elos arulacna mahtuhoh, ac kweok ke ahsor yohk ke srihpen tuhlihk nahtuhlos, oruh elos itucki, ahok, finne nuh fin acn in oan mas lalos.

18 Ke srihpen ahsor ac suhpwacr yohk lalos, ac ma koluk luhn tamuhlwel wiyuck, elos apkuhran na in welah som liki pacl se inge in ohsun nuh sin God lalos; ahok, aunsucf fasrfasr lalos tuh kuhracnna fihliyucki nuh ten ye fohk uh; ahok, elos apkuhranyang na in sisyucklac ke ahsor nuh ke sie kuclyuck meoa uh.

19 Ac Jacob ac Joseph pac, elos fuhsr, enenuh mongo yohk, elos ahsor ke srihpen kweok luhn ninac kiyaclos; ac oacyacpac muhtwacn kiyuck ke sronin muhtahl ac pruhe lal, ac oacyacpac tuhlihk nuhtihk, ma inge tiacna ahkfihsrwacsryelah insiacn tamuhlwel wiyuck elos in muh tuhlweyuclac.

20 Ac wacngihn ma sahyacn kuh luhn God, ma ahksahngwengyaclos nuh ke kuhnahoslah, kuh in ahkfihsrwacsryelah insiaclos; ohinge, ke elos liye lah elos apkuhran in ukumyucklac ke acn loal in meoa uh elos auliyak ke ma suc elos oruh, yohkna oruh elos tuhlweyuclac.

21 Ac tukun ma inge tukun elos tuhlweyuclac, liye, nga eis kampahs sac, ac orekma oacna ke nga kena nuh kac ah. Ac tukun ma inge nga pruhe nuh sin Leum; ac tukun nga pruhe ah eng uh tui, ac pahkah sac tui, na arulacna mihs.

22 Ac tukun ma inge nga, Nephi, tuh kihfucs oak soko ah, na oruh kuht sifilpac oacyak nuh ke acn wihlwihl.

23 Ac tukun ma inge tukun kuht pahtpaht ke lusen lwen pucspucs kuht ai ke acn wihlwihl; ac kuht som nuh fin acn ah, ac tulohkohnwack lohm nuknuk sesr; ac kuht pahngon acn sac acn wihlwihl.

24 Ac tukun ma inge kuht muhtwacwacack in kihlihng fohk uh, ac kuht muhtwacwacack in yok fihtac; ahok, kuht ukwiyac nohfohn fihtac suhnwacsr nuh in fohk uh, ma kuht us tuhkuh liki acn Jerusalem ah. Ac tukun ma inge kapwack na pwacye; ohinge, kuht ahkinsewowoyeyuck ke ma pucspucs.

25 Ac tukun ma inge kuht konwacack fin acn wihlwihl, ke kuht fuhfahsryucsr ke innimac, oasr kain in kosro nuhkwewa ke innimac ah, kwewana kaho ac ox, ac donkey ac ohsr, ac nacni ac nacni lwemnak, ac kain in kosro lwemnak nuhkwewa, ma in orekmakihnyuck sin mwet. Ac kuht konwacack kain in ohr nuhkwewa, kwewana ke kol, ac ke selfuh, ac ke copper.