1 Ket napasamak a dinayawda iti Apo, ket kimmuyogda kaniak; ket nagaramidkami iti tarikayo a narikut ti pannakaaramidna. Ket masansan nga impakita kaniak ti Apo no kasano ti panangaramidko kadagiti tarikayo ti bapor.

2 Ita siak, ni Nephi, saanko nga inaramid dagiti tarikayo iti wagas nga inadal dagiti tattao, ket saanko met a binangon ti bapor iti wagas ti tao, ngem iti wagas nga impakita kaniak ti Apo; gapuna, saan nga iti wagas daytoy ti tao.

3 Ket siak, ni Nephi, masansan a mapanak iti bantay, ket kanayon nga agkararagak iti Apo; gapuna adu ti impakita ti Apo kaniak a naindaklan a bambanag.

4 Ket napasamak a kalpasan ti panangileppasko iti bapor, a mayannurot iti balikas ti Apo, nakita dagiti lallaki a kakabsatko a nasayaat daytoy, ket nalaus ti kinapulido ti pannakaaramidna daytoy; gapuna, nagpakumbabada manen iti Apo.

5 Ket napasamak a nangngeg ti amak ti timek ti Apo, a masapul nga agriingkami ket mapankami iti bapor.

6 Ket napasamak nga iti kabigatanna, kalpasan a naisaganami iti amin a banag, adu a bunga ken karne a naggapu iti langalang, ken nalabon a diro ti uyukan, ken dagiti abasto a maitutop iti imbilin ti Apo kadakami, limmugankami iti bapor, agraman ti amin nga awit ken bukbukelmi, ken ania man a banag nga intugotmi, ket maitutop iti tawen ti tunggal maysa; gapuna, naglugankami amin iti bapor, a kaduami dagiti assawa ken annakmi.

7 Ket ita, naaddaan ti amak iti dua nga annak a lallaki iti langalang, ket nanaganan ti inauna iti Jacob ket Jose ti inaudi.

8 Ket napasamak nga idi nakalugankami aminen iti bapor, ket naalamin dagiti abastomi ken bambanag a naibilin kadakami, naglayagkami iti taaw ket inturongnakami iti angin iti naikari a daga.

9 Ket kalpasan ti panaglayagmi babaen ti tulong ti angin iti adu nga aldaw, kitaen, rinugian dagiti lallaki a kakabsatko ken dagiti lallaki nga annak ni Ismael ken dagiti assawada ti nagragragsak, uray la a rinugianda ti nagsala, ken nagkanta, ken nagsao iti nakarasrasaw, wen, uray pay a nalipatandan no ania a bileg ti nangiturong kadakuada ditoy; wen, naitag-ayda iti napalalo unay a kinadursok.

10 Ket siak ni, Nephi, nangrugi ti napalaus a butengko ta amangan no makapungtot ti Apo kadakami, ket saplitannakami gapu iti kinadangkesmi, ket alun-onennakami iti kaadalman a paset ti baybay; gapuna, siak, ni Nephi, rinugiak ti nakisao kadakuada a sitatanang; ngem kitaen nagpungtotda kaniak, a kinunada: Saanmi nga ipalubos a ti inaudi a kabsatmi ti mangituray kadakami.

11 Ket napasamak a tinengngeldak ken pinungodak da Laman ken Lemuel iti tali, ket kasta unay ti kinasabrakda kaniak; nupay kasta impalubos ti Apo tapno maipakitana ti pannakabalinna, iti pannakatungpal dagiti balikas nga insaona maipapan kadagiti dakes.

12 Ket napasamak a kalpasan ti panangpungoda kaniak tapno saanak a makagunay, nagsardeng a nagandar ti kompas, nga insagana ti Apo.

13 Gapuna, saanda nga ammo no sadino ti pangituronganda iti bapor, uray pay a dimteng ti napigsa a bagyo, wen, napigsa ken nakabutbuteng a bagyo, ket naipasanudkami kadagiti danum iti tallo nga aldaw; ket nangrugi ti napalaus a butengda ta amangan no malmesda iti taaw; nupay kasta saandak a rinuk-atan.

14 Ket iti maikapat nga aldaw, a pannakaipasanudmi, nangrugi ti napalaus a rungsot iti bagyo.

15 Ket napasamak a dandanin nga alun-onennakami iti kaadalman a paset ti baybay. Ket kalpasan ti pannakaipasanudmi iti las-ud ti uppat nga aldaw, nangrugi a naamiris dagiti lallaki a kakabsatko nga adda kadakuada ti panangukom ti Dios, ket nasken a mapukawda malaksid no agbabawida kadagiti kinadakesda; gapuna, immayda kaniak, ket winarwarda ti tali nga ingalutda iti pungo-punguak, ket kitaen napalaus a limteg dagitoy; kasta met a limteg dagiti palaypalayko, ket nakasaksakit unay.

16 Nupay kasta, nagpannurayak iti Diosko, ket nagdaydayawak kenkuana iti nagmalem; ket saanak a nagdayamudom iti Apo gapu kadagiti panagrigrigatko.

17 Ita adu a banag ti naibaga ti amak, ni Lehi, kadakuada, ken kadagiti pay annak a lallaki ni Ismael; ngem, kitaen, insawangda ti adu a panangipangtada iti siasino man a mangisakit kaniak; ket agsipud ta lakay ken baket unayen dagiti nagannakko, ken nagsagabada iti adu a rigat gapu kadagiti annakda, kimmapsutdan, wen, agingga a naidalitda iti sakit.

18 Gapu iti ladingit ken adu a leddaangda, ken kinadangkes dagiti lallaki a kakabsatko, umasidegen uray pay ti kanito ti ipapanawda a mapan iti Diosda; wen, dagiti ubanda ket dandanin agtinag iti tapok; wen, uray pay nga asidegen a maipanda a sileleddaang iti nadanum a tanem.

19 Ket gapu iti kinaubing da Jacob ken Jose, nga agkasapulan ti adu a taraon, nagladingitda gapu iti panagsagaba ti inada; ken dagiti lua ken kararagda ti asawak ken kasta met dagiti annakko saanda a napalukneng ti puso dagiti lallaki a kakabsatko a ruk-atandak.

20 Ket awan iti uray aniaman malaksid ti pannakabalin ti Dios, a nangipangta kadakuada iti pannakadadaelda, ti mabalin a mangpalukneng kadagiti pusoda; gapuna, idi maimatanganda a dandanin ti pannakaalun-onda iti kaadalman a paset ti baybay, nagbabawida kadagiti banag nga inaramidda, isu nga rinuk-atandak.

21 Ket napasamak a kalpasan ti panangruk-atda kaniak, kitaen, innalak ti kompas, ket nagandar daytoy iti ania man a kinalikagumak. Ket napasamak a nagkararagak iti Apo; ket kalpasan ti panagkararagko nagsardeng ti angin, ken nagsardeng ti bagyo, ket nagari ti linak.

22 Ket napasamak a siak, ni Nephi, inturongko ti bapor, ket naglayagkami manen nga agturong iti naikari a daga.

23 Ket napasamak a kalpasan ti panaglayagmi iti las-ud ti adu nga aldaw nakadanonkami iti naikari a daga; ket simmangladkami iti daga, ket impatakdermi dagiti toldami; ket inawaganmi daytoy iti naikari a daga.

24 Ket napasamak a rinugianmi a sukayen ti daga, ket rinugianmi ti agmula iti bukbukel; wen, intukitmi amin a bukbukel iti daga, nga intugotmi manipud iti daga ti Jerusalem. Ket napasamak a napalaus ti kinalangtoda; gapuna, nalabon ti paraburmi.

25 Ket napasamak a naduktalanmi iti naikari a daga, bayat ti panagdaliasatmi iti langalang, nga adda dagiti nadumaduma a kita ti ayup iti bakir, babbai ken lallaki a baka, ken ti asno ken kabalio, ken ti naamo ken naatap a kalding, ken amin a kita ti naatap nga ayup, nga agpaay iti tattao. Ken naduktalanmi iti amin a kita ti minas, agpada a balitok, ken pirak, ken gambang.