1 Ac tukun ma inge Leum El sapkihn nuh sihk, ohinge nga oraclah plwet ke ohr nga in taflwelah fac ma sihmlac ke mwet luhk. Ac fin plwet ma nga oraclah ah nga taflwelah ma sihmlac luhn pahpah tuhmuhk, ac oacyacpac fuhfahsryucsr lasr ke innimac, ac kahs in pahluh luhn pahpah tuhmuhk; ac oacyacpac puhs sin kahs in pahluh luhk sifacna nga taflwelah faclos.

2 Ac nga tiac etuh ke pacl se ma nga oraclah ma inge lah ngwac sapkihnyuck sin Leum in oraclah plwet inge; ohinge, ma sihmlac luhn pahpah tuhmuhk, ac tahk in sucu luhn pahpah tuhmwacl, ac inkaiyacn mukwikwi lasr ke innimac taflweyucklac fin plwet ekahsr emet ma nga sramsramkihn ac; ohinge, ma ma sikyak met liki nga oraclah plwet inge, ma ke ma pwacye, sruhmuhnyuck yohk ke plwet ekahsr met an.

3 Ac tukun nga oraclah plwet inge ke inkacnek in masap, nga, Nephi, eis sie masap lah orekma ac pahluh, ip ma kahlwem ac sacohklacna ke ma inge, enenuh in sihmihsyucklac fin plwet inge; ac lah ma suc sihmihsyucklac enenuh in karihngihnyuckyang in sang luti mwet luhk, suc fah la acn uh, ac oacyacpac nuh ke srihpac lahlmwetmwet sahyac, suc srihpac inge etweyuck sin Leum.

4 Ohinge, nga, Nephi, oraclah sie ma sihmlac fin plwet pac sahyac, ma sruhmuhn sie sramsram, kuh ma sruhmuhn sie sramsram yohk ke mweun ac fohs ac kuhnausyucklac luhn mwet luhk. Ac ma inge nga oraclah, ac sapkihn nuh sin mwet luhk ma elos enenuh in oruh tukun nga misac; ac lah plwet inge enenuh in tuhtahflah ke fihl nuh ke fihl, kuh yurun sie mwet pahluh nuh sin sie pac, ne ke na oasr sap sin Leum.

5 Ac sie sramsram ke nga oraclah plwet inge ac fah sruhmuhnyuck inge fahlac; ac na, liye, nga oruh in oacna ma nga sruhmuhn ah; ac nga oruh ma se inge in muh ma arulacna muhtahl uh in kuh in liyeyuckyang nuh ke etwacack luhn mwet luhk.

6 Ne ohinge, nga tiacna sihmihs kuhtwena ma fin plwet ah sahyacn na nga fin motko muh ma inge muhtahl. Ac inge, nga fin tahfonglac, finne elos tahfonglac ke pacl omeet ah; nga tiac tuhlweyuc sifacna ke srihpen mwet sahyac, tuhsruhk ke srihpen muhnahs ma oasr in nga, oacna nuh ke mahno, nga ac sifacna tuhlweyuc.

7 Tuh ma suc kuhtuh mwet uh motko muh yohk srihpac, kwewana nuh ke mahno ac moul, kuhtuh pac mwet tiac wek ac longyac ye niyaclos. Ahok, finne God luhn Israel mwet uh longyac ye niyaclos; nga fahk, longyac ye niyaclos tuhsruhk nga ac ahkuhtweyac ke kahs sahyac—elos tiac wackuhl, ac tiac porongo puhsren kai Lal.

8 Ac liye El tuhkuh, in oacna kahs luhn lipufacn sac, ke yac onfoko tukun pacl se pahpah tuhmuhk el som liki acn Jerusalem.

9 Ac facluh, ke srihpen ma koluk lalos, ac fah nuhnuhnkwacl in oacna sie ma wacngihn srihpac; ohinge elos sruhngluhl, ac El kweok kac; ac elos kalyeiluhl, ac El kweok kac. Ahok, elos acnwel, ac El kweok kac, ke srihpen luhngse pahkotwen Lal ac mongfihsrwacsr Lal nuh sin tuhlihk nuhtin mwet.

10 Ac God luhn pahpah tuhmwacsr, suc kolyucklac liki acn Egypt, liki srohoh, ac oacyacpac moliyucklac Sel ke innimac, ahok, God lal Abraham, ac lal Isaac, ac God lal Jacob, eisuhlwacng sifacna, in oacna kahs luhn lipufacn sac, in sie mwet, nuh ke poun mwet koluk, in srihpsrihpyak, oacna kahs lal Zenock, ac in uniyucki, oacna kahs lal Neum, ac in puckpucki ke sie kuclyuck, oacna kahs lal Zenos, ma el sruhmuhn ke lwen tolu ac lohsrlah, ma ac sie mwe akucl ma ahkkahlwemye misac Lal nuh selos suc muhta fin tuhka in meoa uh, yohkna in ahkkahlwemye nuh selos suc ma ke mwet Israel.

11 Tuh ohinge mwet pahluh el sruhmuhn: Pwacyena Leum God El fah fahsr nuh yurun mwet Israel nuhkwewa ke lwen sac, nuh sin kuhtuh ke puhsrwacl, ke srihpen suwohswohs lalos, nuh ke engan yohk ac moliyucklac lalos, ac nuh sin kuhtuh pac ke puhlahl ac sahrom ke kuh Lal, ke eng upac, ke e fihrihr, ac ke kuhlahsr, ac ohkohk in lohsr, ac ke ikackwelihk luhn infohk uh, ac ke finohl ma ac fah pihsryak nuh lucng.

12 Ac ma inge nuhkwewa enenuh na in sikyak, mwet pahluh Zenos el fahk. Ac yot fin facluh ac srasrwelihk; ke srihpen ngihrngihr luhn facluh, tohkohsrah pucspucs ke fin tuhka in meoa ac fah puhlakihn Nguhn luhn God, in wowoyak fahk: God suc oraclah ma nuhkwewa El toasrlacna.

13 Ac nuh selos suc oasr Jerusalem, mwet pahluh sac el fahk, elos fah sringihlyuck sin mwet nuhkwewa, ke srihpen elos sruhpsruhwack God luhn Israel, ac furohklah insiaclos nuh sahyac, pihlesruh akucl ac ma usrnguck, ac kuh ac wolacna luhn God luhn Israel.

14 Ac ke srihpen elos furohklah insiaclos nuh sahyac, mwet pahluh sac el fahk, ac koase El suc Muhtahl luhn Israel, elos fah tahkuhsrkuhsr in mahno, ac misac, ac fah fahkyuck koluk ac isruhnyuck, ac sruhngwacyuck sin muhtuhnfacl nuhkwewa.

15 Ne ohinge, ke lwen sac tuhkuh, mwet pahluh sac el fahk, ke elos ac tiac sifilpac furohklah insiaclos nuh sahyac in lain El suc Muhtahl luhn Israel, na El fah esam wuhlweacng ma El oraclah nuh sin pahpah tuhmwaclos.

16 Ahok, na El fah esam tuhka in meoa uh; ahok, ac mwet nuhkwewa suc ma luhn mwet Israel, Nga fah oracni, Leum El fahk, oacna kahs lal mwet pahluh Zenos, ke lacfahl ahkosr fin facluh.

17 Ahok, ac facluh nohfohn ac fah liye molwelah luhn Leum, mwet pahluh sac el fahk; muhtuhnfacl, kain in mwet, kahs ac mwet nuhkwewa ac fah ahkinsewowoyeyuck.

18 Ac nga, Nephi, suhmuhslah ma inge nuh sin mwet luhk, tuh sahp nga in kuh in kihfucsuhlos in esam Leum Mwet in Molwelah lalos.

19 Ohinge, nga sramsram nuh sin mwet Israel nuhkwewa, fin ma elos kuh in eis ma inge.

20 Tuh liye, nga orekma ke nguhn, ma ahktohtohyeyuc finne oruh kuhpahsr nuhkwewa keik muhnahs, ke srihpaclos suc oasr Jerusalem; tuh fin Leum El tiac pahkomuhta, in ahkkahlwemye nuh sihk kaclos, oacna ke El oruh nuh sin mwet pahluh met ah, luhkuhn nga misac pac.

21 Ac pwacyena El ahkkahlwemye nuh sin mwet pahluh met ah ke ma nuhkwewa kaclos; ac El oacyacpac ahkkahlwemye nuh sin mwet pucspucs kacsr; ohinge, enenuh se na kuht in etuh kaclos tuh elos sihmlac fin plwet prahs.

22 Na tukun ma inge nga, Nephi, luti mwet wiyuck ke ma inge; ac tukun ma inge nga riti ma pucspucs nuh selos, ma taflweyucklac fin plwet prahs, tuh elos in muh kuh in etuh ke orekma luhn Leum ke acn sahyac, inmahsrlon mwet ke pacl met ah.

23 Ac nga riti ma pucspucs nuh selos ma sihmlac ke puk lal Moses; tuhsruhk tuh nga in kuh in kihfucsuhlos in luhlahlfongi Leum Mwet in Molwelah lalos nga riti nuh selos ma suc sihmlac sel mwet pahluh Isaiah; tuh nga luhngse oruh ma suhmuhslah nuhkwewa inge in ma nuh sesr, tuh in ma wo ac mwe lutlut lasr.

24 Ohinge nga sramsram nuh selos, fahk: Kowos lohng kahs luhn mwet pahluh, kowos suc luhlah luhn mwet Israel, sie lah ma kihpatlah; kowos in lohng kahs luhn mwet pahluh, ma sihmihsyucklac nuh sin mwet Israel nuhkwewa, ac oruh oacna in ma nuh suwos sifacna, in muh oasr finsrak lowos oacna mwet wiyowos suc kowos kihpatlah liki; tuh mwet pahluh el suhmuhslah ke ohiyac se inge.