Ana Moan Boki Nibwaai
Ana Tautaeka Ma Ana Mwakuri Ni I Buobuoki
Rongorongon Riaai ma buuna ae Tiera, ao natiia mwaane aika aman, aika araia, (ni moanaki man te karimoa) Reimwan, Remuera, Taam, ao Nibwaai. E tua te Uea nakon Riaai bwa e na kitana aban Ierutarem, ibukina ngke e tataetae ni burabeti nakoia aomata ni kaineti ma buakakaia ao a baireia bwa a na tiringnga. Mwanangana rinanon te rereua ma ana utu i nanon boong aika teniua. E kairiia tarina Nibwaai n oki nako aban Ierutarem bwa a na anai aia rongorongo Iutaia. Rongorongon korakaia nako. A anaia natin Itimaera aine bwa buuia. A anaia aia utu ao a mwananga nako nanon te rereua. Korakaia ma rawawataia i nanon te rereua. Kawain mwaamwanangaia. A roko n te ran ae korakora. E kaitaraaki Nibwaai irouia tarina. E bon kauntaeka ma ngaiia, ao e kabaa te kaibuke. A arana te tabo arei bwa te Aba ni Mari. A borau rinanon te ran ae korakora nakon te aba ni berita, ao tabeua riki. E a kaineti aio ma ana rongorongo Nibwaai, ke n taekinana riki teuana, Ngai, Nibwaai, ae korea te rongorongo aio.
Mwakoro 1
E moana ana rongorongo Nibwaai ibukiia ana botanaomata—E noora te boua n ai Riaai i nanon te mii ni burabeti ao e wareware mai nanon te boki n taeka ni burabeti—E kamoamoa te Atua, e taekina rokon te Mesia, ao e taetae ni burabeti ibukin uruakan Ierutarem—E bwainikirinaki irouia Iutaia. Uakaan ma 600 I.K.
1 Ngai Nibwaai, I a tia ni bungiaki irouia kaaro aika a tamaroa, mangaia are I a tia n reireinaki n aron rabakaun nako tamau; ao n tia n noori rawaawata aika a mwaiti i nanon au bong, e ngae n anne, e a tia n reke akoakiu ae bati iroun te Uea n au bong ni kabane, eng, n tia ni karekea ataakin ana raoiroi ae korakora ma ana bwai te Atua aika a raba, mangaia ae I a korea rongorongon au waaki i nanon au bong.
2 Eng, I korea te rongorongo n aron ana taetae tamau, are e reke man rabakauia Iutaia ma aia taetae I-Aikubita.
3 Ao I ataia bwa e koaua te rongorongo ae I koroia; ao I koroia n oin tabon baiu; ao I koroia n aron oin au atatai.
4 Ao e koro bukina bwa ni moanakin ana moan ririki n tautaeka Tetekia, are uean Iuta, (tamau ae Riaai, e a tia ni maeka i rarikin Ierutarem n ana bong ni kabane); ao n te ririki naba anne a roko burabeti aika a mwaiti, n taetae ni burabeti nakoia aomata bwa a riai n rairi nanoia, ke e na uruakaki te kaawa ae korakora ae Ierutarem.
5 Mangaia are e koro bukina bwa tamau, ae Riaai, ngke e mwananga e tataro nakon te Uea, eng, ma nanona ni kabane, ibukiia ana botanaomata.
6 Ao e koro bukina bwa ngke e tabe n tataro nakon te Uea, ao e a roko te boua ae te ai n tiku i aon te bwa i matana; ao a mwaiti baike e noori ma n ongo; ao e korakora ruruna ni maaku ibukin baike e noori ma n ongo.
7 Ao e koro bukina bwa e okira oin ana auti i rarikin Ierutarem; ao e aroria i aon ana kainiwene, ngke e niniaki ni korakoran te Tamnei ma baike e a tia n noori.
8 Ao ibukin korakoran niniana iroun te Tamnei, e a uotaki nako n te mii ni burabeti, ao e noora naba karawa bwa e uki, ao e taku n ana iango bwa e noora te Atua ae tekateka iaon ana kaintokanuea, ni katobibiaki irouia anera aika a aki kona ni warekaki mwaitia aika a tabe n anene ma ni kamoamoa Atuaia.
9 Ao e koro bukina bwa e noora Temanna ae ruo rikaaki mai nukan karawa, ao e noria bwa e korakora riki raneaneana nakon ootan taai n te tawanou.
10 Ao e nooriia naba tengaun ma uoman riki aika a rimwina, ao a korakora naba raneaneaia nakon ootaia itoi i annang.
11 Ao a ruo ao a mwananga i aon te aonaba; ao e a roko are te moan aomata n tei i matan tamau, ao e a anganna te boki, ao e tua bwa e na warekia.
12 Ao e koro bukina bwa ngke e tabe ni wareware, ao e a kaonaki n Tamnein te Uea.
13 Ao e wareware, ni kangai: E na reke kaim, e na reke kaim Ierutarem, bwa I a tia n noori am mwakuri aika a ribaki! Eng, ao a mwaiti baike e wareki tamau aika a kaineti ma Ierutarem—bwa e riai n uruakaki, ma kaaina naba; a mwaiti aika a na mate n te kabaang, ao a mwaiti aika a na uotaki nako Bwaburon bwa buure.
14 Ao e koro bukina bwa ngke e a tia tamau ni wareki ao n noori baika a mwaiti aika a korakora ma ni kamimi, ao e tabeka bwanaana nakon te Uea; ni kangai; Moan te korakora ao ma ni kamimi am mwakuri, O te Uea ae te Atua ae Moan te Mwaaka! Am kaintokanuea e rietata i karawa, ma mwaakam, ma raoiroim, ma am nanoanga a mena i aoia kaain te aonaba ni kabane; ao, ibukina ngkai ko nanoanga, ko aki kariaia aika a nakoim bwa a na mate!
15 Ao aio aron ana taeka tamau ni kamoamoa Atuana; bwa e kimwareirei tamneina, ao e onrake nanona ibukin baike e a tia n noori, eng, ake e a tia ni kaotii te Uea nakoina.
16 Ao ngkai ngai, Nibwaai, I aki koroi bwaninin rongorongon baike e a tia ni koroi tamau, bwa e a tia ni koroi baika a mwaiti ake e noori i nanon miina ni burabeti ao i nanon taian mii; ao e a tia naba ni koroi baika a mwaiti ake e taetae ni burabetii ma n taekin nakoia natina, ake N aki koroi rongorongoia aika bwanin.
17 Ma N na koroi rongorongon au waaki i nanon au bong. Noria, I korea ana rongorongo tamau ni kakimototoa, i aon bwaatua ake I a tia ni karaoi n oin baiu; mangaia ae, i mwin tiau ni korea ana rongorongo tamau ni kakimototoi ao N na manga korea rongorongon oin maiu.
18 Mangaia ae, I tangiringkami ni kabane bwa kam na ataia, ae ngke e a tia te Uea ni kaoti baika a kamiimi aika a mwaiti nakon tamau, ae Riaai, eng, aika a kaineti ma uruakan Ierutarem, ao noria, e nako buakoia aomata, ao e moana ana taetae ni burabeti ao e taekin nakoia baike e a tia n noori ao n ongo.
19 Ao e koro bukina bwa a kamaamaaea Iutaia ibukin baike e kaoti ana koaua iaoia; bwa e tataekin ni koaua aron aia buakaka ma kateia aika bati n ribaki; ao e taekin baike e a tia n noori ma n ongo, ma baike e wareki mai nanon te boki, are e kaotaki raoi iai aron rokon te Mesia, ao kaboakin te aonaba.
20 Ao ngke a ongo Iutaia baikai ao a un irouna; eng, n aiaron uniia irouia burabeti ake ngkoa, ake a tia ni kaeia nako, ao ni karebanaia, ao n tiringia; ao a ukoukora maiuna, bwa a aonga n anaia. Ma noria, ngai, Nibwaai, N na kaotia nakoimi bwa ana nanoanga te Uea e mena i aoia ni kabane ake e a tia n rineia, ibukin aia onimaki, bwa a na kakorakoraia bwa aonga ni karekea te mwaaka ni kainaomataki.