Buku ya Yambo ya Nefi
Boyangeli mpe Mosala na Ye
Lisolo ya Lehi mpe mwasi na ye Salia, mpe bana mibali minei na ye lokola babiangamaki, (kobandaka na nkulutu) Lamani, Lemuele, Sami, mpe Nefi. Nkolo akebisi Lehi ete alongwa uta na mboka ya Yelusaleme, mpo asakoleli bato mpo na oyo etali mabe na bango mpe baluki kobebisa bomoi na ye. Abandi mobembo ya mikolo misato kati na esobe elongo na libota na ye. Nefi akamati bandeko na ye ya mibali mpe bazongi na mboka ya Yelusaleme koluka lisolo ya makomi ya Bayuda. Lisolo ya mpasi na bango kati na esobe. Bakamati bana basi ya Yisamaele na bolongani. Bakamati mabota na bango mpe bakeyi kati na esobe. Mpasi mpe mitungisi na bango kati na esobe. Botamboli ya mibembo na bango. Bakomi na mai monene. Bandeko mibali ya Nefi batomboki na ye. Ayokisi bango nsoni, mpe atongi masuwa. Babiangi nkombo ya esika yango Ebele. Bakatisi mai monene mpo na kokoma na mboka elakelama, mpe bongo na bongo. Oyo ezali engebene na lisolo ebetaki Nefi; soki te na maloba mosusu, ngai, Nefi, nde nakomaki lisolo ya makomi oyo.
Mokapo 1
Nefi abandi lisolo ya makomi ya bato na ye—Lehi amoni likonzi ya moto kati na limoni mpe atangi uta na buku ya masakoli—Asanzoli Nzambe, ayebisi boyei ya Masiya liboso ete esalema, mpe asakoli bobebisami ya Yelusaleme—Anyokwami na Bayuda. Penepene na mobu 600 Liboso na mbotama ya Klisto.
1 Ngai, Nefi, lokola nabotamaki na baboti malamu, boye nateyamaki mwa moke na boyekoli nyonso ya tata na ngai; mpe lokola namonaki mitungisi mingi na botamboli ya mikolo na ngai, nzokande, lokola nasungamaki mingi mpenza na Nkolo na mikolo na ngai nyonso; iyo, lokola nazwaki boyebi monene mpo na oyo etali bolamu mpe mibombamo ya Nzambe, boye nasali lisolo ya makomi ya botamboli ya misala na ngai na mikolo na ngai.
2 Iyo, nasali lisolo ya makomi na lokota ya tata na ngai, oyo ezali na boyekoli ya Bayuda mpe lokota ya Baejipito.
3 Mpe nayebi ete lisolo ya makomi nasali ezali ya solo; mpe nasali yango na loboko na ngai moko; mpe nasali yango engebene na boyebi na ngai.
4 Mpo esalemaki na ebandeli ya mobu ya yambo ya boyangeli ya Sidikiya, mokonzi na Bayuda, (tata na ngai, Lehi, efandaki ye mikolo na ye nyonso na Yelusaleme); mpe na mobu se moko wana, baprofeta mingi bayaki kosakolaka epayi ya bato ete basengeli koyambola, soki te engumba monene ya Yelusaleme esengeli kobebisama.
5 Yango wana esalemaki ete tata na ngai, Lehi, lokola ekendaki ye, asambelaki epayi ya Nkolo, iyo, kutu na motema na ye mobimba, mpo na bato na ye.
6 Mpe esalemaki lokola ezalaki ye kosambela epayi ya Nkolo, likonzi ya moto eyaki mpe efandaki likolo ya libanga moko liboso na ye; mpe amonaki, mpe ayokaki makambo mingi; mpe na ntina ya makambo amonaki mpe ayokaki, aninganaki mpe alengaki mingi koleka.
7 Mpe esalemaki ete azongaki na ndako na ye moko na Yelusaleme; mpe amibwakaki likolo ya mbeto na ye, mpo ete alongamaki na Molimo mpe na makambo oyo amonaki.
8 Mpe elongamaki ye boye na Molimo, akumbamaki na limoni, na lolenge ete amonaki lola efungwami, mpe amikundolaki ete amonaki Nzambe kofandaka likolo ya kiti ya bokonzi na ye, mpe azingamaki na mangomba mingimingi ya banjelu na ezalela ya koyembelaka mpe kosanzolaka Nzambe na bango.
9 Mpe esalemaki ete amonaki Moko kokitaka libanda uta na katikati ya lola, mpe amonaki ete bongengi na ye ezalaki koleka boye ya moi na nzanga.
10 Mpe amonaki lisusu zomi na mibale basusu kolandaka ye, mpe engengeli na bango elekaki oyo ya minzoto na bofungwami ya likolo.
11 Mpe bakitaki, mpe bakendaki na etando ya mabele; mpe ya yambo ayaki, mpe atelemaki liboso ya tata na ngai, mpe apesaki epayi na ye buku moko, mpe atindaki ye ete asengeli kotanga.
12 Mpe esalemaki ete wana ezalaki ye kotanga, atondisamaki na Molimo ya Nkolo.
13 Mpe atangaki, kolobaka: Lisuma, lisuma, epayi ya Yelusaleme, mpo namoni bonsomo na yo! Iyo, mpe tata na ngai atangaki makambo mingi matali Yelusaleme—ete ekobebisama, mpe bafandi na yango; mingi bakowa na mompanga, mpe mingi bakomemama bakangemi kati na Babiloni.
14 Mpe esalemaki ete ntango tata na ngai atangaki mpe amonaki makambo mingi minene mpe ya kokamwa, alobaki na kogangaka makambo mingi epayi ya Nkolo; lokola: Minene mpe ya kokamwa ezali misala na yo, O Nkolo Nzambe ya Bokasi Nyonso! Kiti ya bokonzi na yo ezali mpenza na lola, mpe ya yo nguya, mpe bolamu, mpe boboto ezali likolo ya bafandi nyonso na mabele; mpe, mpo ete otonda na boboto, okopesa te nzela ete bango oyo bayaka epayi na yo bakufa!
15 Mpe ezalaki na elobeli ya lolenge oyo nde tata na ngai asanzolaki Nzambe na ye; mpo molimo na ye esepelaki, mpe motema na ye mobimba etondaki, na ntina ya makambo oyo amonaki, iyo, oyo Nkolo alakisaki epayi na ye.
16 Mpe sikawa, ngai, Nefi, nasali te lisolo mobimba ya makambo oyo tata na ngai akomaki, mpo akomaki makambo mingi oyo amonaki na mamoni mpe na bandoto; mpe akomaki lisusu makambo mingi oyo asakolaki mpe alobaki epayi ya bana na ye; ndambo ya makambo oyo, nakokoma lisolo mobimba te.
17 Kasi nakosala lisitwale ya botamboli ya misala na ngai na mikolo na ngai. Tala, nasali bokuse ya lisolo ya makomi ya tata na ngai, likolo ya bapalaki oyo nasalaki na maboko na ngai moko; yango wana, ntango nakosilisa kosala na bokuse lisolo ya makomi ya tata na ngai, nde nsima nakosala lisitwale ya bomoi na ngai moko.
18 Boye, nalingi ete boyeba, ete esilaki Nkolo kolakisa makambo mingi ya kokamwa epayi ya tata na ngai, Lehi, iyo, oyo etali bobebisami ya Yelusaleme, tala akendaki na kati ya bato, mpe abandaki kosakola, mpe koyebisa epayi na bango mpo na oyo etali makambo oyo amonaki mpe oyo ayokaki.
19 Mpe esalemaki ete Bayuda batiolaki ye mpo na makambo oyo atatolaki na ntina na bango; mpo solo atatolaki na ntina ya nkuna na bango, mpe bonsomo na bango; mpe atatolaki ete makambo oyo amonaki mpe ayokaki, mpe lisusu makambo oyo atangaki na buku, emonisaki polele boyei ya Masiya, mpe lisusu bosikoli ya mokili.
20 Mpe ntango Bayuda bayokaki makambo oyo, basilikaki na ye; iyo, se lolenge moko lokola na baprofeta ya kala, baoyo bango babenganaki, mpe babambaki mabanga, mpe babomaki; mpe lisusu balukaki bomoi na ye, ete bakoka kolongola yango. Kasi tala, ngai, Nefi, nakolakisa epayi na bino ete boboto ya bolamu ya Nkolo ezali likolo ya baoyo nyonso aponaki, na ntina ya bondimi na bango, mpo na kopesa bango makasi, ata kino na nguya ya bokangoli.