1 Dou vakatudaliga ka rogoca na ka oqo, na mataqali i Jekope, dou sa vakatokai ena yaca i Isireli, ka dou sa lako mai na wai nei Juta, se mai na wai ni veipapitaisotaki, dou sa bubului ena yaca ni Turaga, ka dou sa dau cavuta na Kalou ni Isireli, ia era sa sega ni bubului ena yalodina se ena ivalavala dodonu.

2 E dina ga, era sa vakatokai ira mera lewe ni koro tabu, ia era sa sega ni vakararavi vua na Kalou ni Isireli, o koya na Turaga ni Lewevuqa; io, sa yacana na Turaga ni Lewevuqa.

3 Raica, au sa tusanaka na veika mai liu mai na ivakatekivu; ka ra sa lako yani mai na gusuqu, ka’u sa vakaraitaki ira. Au a vakaraitaki ira vakasauri.

4 Ka’u sa cakava baleta ni’u kila ni ko sa yalo kaukauwa, ni sa dali kaukamea na domomu, ka parasa na yadremu;

5 Ka’u sa tukuna vei iko mai na ivakatekivu; ni sa bera ni yaco au sa vakaraitaki ira vei iko; ka’u sa vakaraitaki ira ni’u ririkotaka de ko na qai kaya—A noqu matakau ga sa vakayacora, kei na noqu matakau ceuceu, ka a vakaroti ira na noqu matakau a vakawaicalataki.

6 Ko sa raica ka rogoca na ka kece oqo; ia ko na sega li ni tukuni ira yani? Ka’u sa vakaraitaka vei iko na ka vou mai na gauna oqo, io na veika sa vuni, ka ko a sega ni kilai ira.

7 Era sa buli ena gauna oqo, ka segai mai na ivakatekivu, ni se bera mada ga na siga ko a sega ni se rogoca kina era a sa tukuni vei iko, de ko na qai kaya—Raica au sa kilai ira ga.

8 Io, ko a sega ni rogoca; io, ko a sega ni kila; io, ena gauna koya a sega ni se tadola kina na daligamu; ni’u sa kila ni ko na cakacaka vakailawaki sara, ka ko a vakatokai mo dau talaidredre mai na loma ni kete.

9 Ia, ena vuku ni yacaqu au na vakaberaberataka kina na noqu cudru, ka vakakina ena vuku ni noqu vakacaucautaki, au na tarovi au kina mai vei iko, ka me’u kakua ni tamusuki iko laivi.

10 Ia, raica, au sa vakasavasavataki iko, au sa digitaki iko ena lovo bukawaqa ni veivakararawataki.

11 Ena vukuqu ga, io, ena vukuqu ga ka’u na cakava kina na ka oqo, ni’u na sega ni laiva me vakadukadukalitaki na yacaqu, ka’u na sega ni solia na noqu lagilagi vua tale e dua.

12 Vakatudaliga mai vei au, i Jekope, kei Isireli na noqu digitaki, ni sa i au ko koya; koi au na imatai, ka sa i au talega na kena iotioti.

13 Sa tauyavutaka talega na yavu kei vuravura na ligaqu, kei na ligaqu imatau sa robota na lomalagi. Au sa kaci yani vei rau ka rau sa tucake vata mai.

14 Ko i kemudou kece, dou vakasoqoni vata, ka rogoca; ko cei ena kedra maliwa sa tukuna na veika oqo vei ira? Sa lomani koya na Turaga; io, ena vakayacora ko Koya na nona vosa ka ra a tukuna; ka ena vakayacora ga na lomana vei Papiloni, ka na tau na ligana vei ira na kai Kalitia.

15 Sa kaya talega na Turaga; Koi au na Turaga, io, au sa vosa; io, au sa kacivi koya me tukuna, au sa kauti koya mai, ka na kitaka ko koya me sautu na nona sala.

16 Dou toro voleka mada mai vei au; au sega ni vosa vakavunivuni; mai na ivakatekivu, au a sa vosa mai na gauna e a tukuni kina; kei na Turaga na Kalou, kei na Yalona sa talai au mai.

17 Ka sa kaya vakaoqo na Turaga, na nomu Dauveivueti, ko Koya na Yalo Savasava ni Isireli; Au sa talai koya yani; koi au na Turaga na nomu Kalou ka sa vakavulici iko mo vinaka kina, ka sa tuberi iko ena sala mo lakova, au sa vakayacora.

18 O! ke mo a vakarorogo mada ga ki na noqu ivakaro—ke a qai vaka na uciwai na nomu vakacegu, kei na nomu ivalavala dodonu vaka na ua ni wasawasa.

19 Na nomu kawa talega sa vaka na nuku; na luve ni ketemu sa vaka na kena qereqere; ka a sega ni muduki tani se vakarusai mai mataqu na yacana.

20 Dou lako tani mai Papiloni, dou dro tani mai vei ira na kai Kalitia, ena domo ni sere dou cavuta yani, tukuna oqo, dou talaucaka yani ki na iyalayala kei vuravura; dou kaya: Sa vueti Jekope na nona tamata na Turaga.

21 Ka ra sa sega ni karamaca; sa tuberi ira yani ko koya e loma ni vanua dravuisiga; sa vakadavea ko koya na wai mai na vatu ena vukudra; a sa yavita talega na vatu ko koya ka sa tacoka mai kina na wai.

22 Ka dina ga sa cakava ko koya na ka kece oqo, kei na ka lelevu cake; sa kaya na Turaga ni sa sega ga na vakacegu vei ira na dau caka ca.