1 Ongora ao ongo aio, O kaain te bata are Iakobwa, aika a aranaki bwa Iteraera, aika a otinako man te ran are raanga mai iroun Iuta, ke man te ran ni bwabetito, ake a tuea n aran te Uea, ao a tataekina Atuan Iteraera, ma a aki tuea i nanon te koaua ke i nanon te raoiroi.

2 E ngae n anne, a arania bwa kaain te kaawa ae tabu, ma aki mwioko iroun Atuan Iteraera, are bon aia Uea Taanga ni Buaka; eng, arana bon aia Uea Taanga ni Buaka.

3 Nooria, I a tia n tataekin bwaai ake riomoa man moan rikin bwaai; ao a otinako mai nanon wiiu, ao I kaoti nakoia. I kaoti nakoia n te aro ae karina.

4 Ao I karaoia ngkai I ataia bwa kam bonotaninga, ao a matoa roroami n ai aron te biti, ao ramwami buraati.

5 Ao I a tia naba n tataekinna nakoimi man moan rikin bwaai; i mwaain koroni bukina I kaoti nakoimi; ao I kaoti nakoimi bwa kam rawa ni kangai—A tia ni karaoia au bouananti, au bouananti ae kaaraki, ao e a tia n tuangiia au bouananti ae kaburoaki.

6 Ko a tia n noori man ongo bwaai aikai ni kabane; ao e koaua ae ko na aki taekin? Ao I a tia ni kaoti nakoimi bwaai aika boou man te tai aio, ma bwaai naba aika raba, ao ko aki atai.

7 A karikaki ngkai, ao tiaki man moan rikin bwaai, i mwaain naba te bong are ko tuai n ongo iai taekaia ao a tia n taekinaki nakoimi, ko rawa ni kangai—Nooria I atai taekaia.

8 Eng, ao kam aki ongo; eng, kam aki atai; eng, man te tai arei ao a bon aki uki taningami; bwa I ataia ae kam na mwakuri i nanon te babakanikawai, ao kam na aranaki bwa taan riaoa te tua mai nanon te biroto.

9 Ma e ngae n anne, ibukin kakawakin raoiroin arau N na aki un, ao ibukin neboau N na aki kararoaai mai iroum, ma n aki katinanikuko.

10 Bwa, nooria, I a tia ni kaitiakiko, I a tia n rineiko ma i nanon ain te karawawataki.

11 Bon ibukiu, eng, bon ibukiu N na karaoa aio, bwa I aki tangiria bwa e na kabarekaki arau, ao N aki anga mimitongiu nakon temanna.

12 Ongora irou, O Iakobwa, ao Iteraera ae I rineiia, bwa bon Ngai ngaia; bon Ngai naba te moan, ao bon Ngai naba te kabanea.

13 E a tia baiu ni katea aan te aonaba, ao e a tia angaataiu ni karika karawa. I weewete nakoia ao a uaaia n teirake.

14 Ngkami ni kabane, ikotaki ao ongo; antai i buakoia ae e a tia n atong bwaai aikai nakoiia? Te Uea e a tia n tangiria; eng, ao e na kakoroi bukin ana taeka ake e a tia n taekin rinanoia; ao e na karaoa kukurein nanona i aon Bwaburon, ao e na arora baina nako aoia I-Kareria.

15 Ao e taku naba te Uea: Ngai ae te Uea, eng, I a tia n taetae; eng, I a tia ni weteia bwa e na tataekinna, I a tia ni kairia, ao e na waakina kawaina ma te kakabwaiaki.

16 Nakomai kaniiai; I a tia n aki taetae ni karaba; mai moana, man te tai are e taekinaki iai ao I a tia n taetae; ao te Uea ae te Atua, ma Tamneina ae e kanakomaiai.

17 Ao aikai ana taeka te Uea, am Tia Kaboko, ae Atuaia Iteraera ae Tabu; I a tia ni kanakoatia, te Uea ae te Atua are reireiniko ae tamaroa ibukim, are kairiko nakon te kawai are ko na nako iai, ae e a tia ni karaoa aio.

18 O bwa ngke ko a tia n ongo n au tua—ao e na tia n reke iai raum n aiaron te karaanga, ao raoiroim n aiaron naon marawa.

19 A na riki naba kanoam n aiaron mwaitin te tano; natim n aiaron mwaitin atamana; e na riai n aki kaakeaaki ke ni kamaunaki aram mai matau.

20 Kam na otinako mai Bwaburon, birinako ma irouia I-Kareria, ma te bwana n anene kam na taekinna, tuatua aio, atonga aei nakon tabon aonaba; kam na kangai: E a tia te Uea ni kabooa ana toro ae Iakobwa.

21 Ao a aki taka; e kairia rinanon te rereua; e kawanakoa te ran man te bwa ibukiia; e bwena te bwa ao e a raanga te ran.

22 Ao e ngae ngke e a tia ni karaoi bwaai aikai ni kabane, ao aika korakora riki, bon akea te rau e taku te Uea nakoia aika buakaka.