1 Ao n okirana riki: Ongora, O ngkami kaain te bata are Iteraera, ngkami ni kabane ake a tia ni kaokoroaki ma ni kaeaki nako ibukin aia buakaka taan kaira te ekaretia ibukiia au botanaomata; eng, ngkami ake kam kaokoroaki, aika a maenako n aaba nako, aika au botanaomata, O kaain te bata are Iteraera. Kakauongo, ngkami kaain aban marawa, nakoiu, ao ongorangkami aika kam raroa nako; e a tia te Uea ni weteai mai nanon te biroto; e a tia n taekina arau mai nanon biroton tinau.

2 Ao e a tia ni karika wiiu bwa aiaron te kabaang ae kakang; ao e a tia ni karabaai i aan nuun baina, ao ni karikai bwa te kai ni katebe ae raneanea; ao e a tia ni karabaai i nanon nnen ana kai ni katebe.

3 Ao n taku nakoiu: Ngkoe ae au toro, O ngkoe ae Iteraera, ae N na mimitong iroum.

4 Ao ngkanne I taku, I a tia ni beku n akea uaana, I a tia ni kabanea korakorau ibukin te akea ao n akea uaana; n te koaua au moti e mena iroun te Uea, ao au mwakuri iroun te Atua.

5 Ao ngkai, e taku te Uea—ae Ngaia are e karikai i nanon te biroto bwa N na riki bwa ana toro, bwa N na kaoka Iakobwa nakoina—e ngae ngkai e tuai ni botaki Iteraera, ao N na bon mimitong imatan te Uea, ao e na riki Atuau bwa korakorau.

6 Ao E taku: Bon te bwai ae beebete bwa kam na riki bwa au toro are e na kateirakeia ana baronga Iakobwa, ao ni kaokia kaain Iteraera ake a tia ni kawakinaki. Ao n anga ngkoe bwa te oota nakoia Tientaire, bwa ko aonga n riki bwa au tia kamaiu nakon tabon aonaba.

7 Aikai ana taeka te Uea, ae te Tia Kaboa Iteraera, ae Teuare Tabu, are a na bane n ribaia aomata, are a na bane n ribaia aaba nako, are e na riki bwa aia toro uea: A na nooriko uea ao a na teirake, a na neboiko naba natinuea, ibukin ae e kakaonimaki te Uea.

8 Aikai ana taeka te Uea: N te tai ae riai are I ongo iai iroum, O aban marawa, ao ni bongin te kamaiuaki are I a tia ni buokiko iai; ao N na kawakiniko, ao N na anganiko au toro bwa te berita ae tabu ibukiia aomata, ibukin katean te aonaba, bwa e aonga nibwaina te aba are e a tia ni kitanaki.

9 Bwa ko aonga ni kangai nakoia taenikai: Waaki nako; nakoia aika tekateka i nanon te roo: Kaotingkami. A na amwarake iaon kawai, ao a na mena aia tawaana n taabo aika rietata.

10 A na aki baki ke n taka, e na aki naba rootia te kabuebue ke n rootaki ntaai bwa a na kairaki iroun are iai nanoangakia irouna, e na kairiia nako rarikin koburake n ran.

11 Ao N na karaoi au maunga bwa kawai, ao a na karietataki au kawai.

12 Ao ngkanne, O te bata are Iteraera, nooria, a na roko bwaai aikai mai ike raroa; ao nooria, bwaai aika mai meang ao mai maeao; ao bwaai aikai a roko mai aban Tinim.

13 Anene, O karawa; ao kimwareirei, O te aonaba; bwa waeia ake a mena i mainiku ana kamatoaki; ao takarua n anene, O maunga; bwa a na manga aki tiringaki; bwa te uea e a tia ni kabeebeteia ana botanaomata, ao e na nanoangaia ake a karawawataki.

14 Ma, nooria, e taku Tion: E a tia ni kitanai te Uea, ao e a tia ni mwanuokinai au Uea—ma e na kaotia bwa e tuai.

15 Bwa e kona te aine ni mwaninga taekan natina ae mamma, bwa e na akea ana nanoanga nakon natina te mwaane ae kanoan birotona? Eng, tao ana kona ni mwaninga, ma N na bon aki mwanuokiniko, O te bata are Iteraera.

16 Nooria, I a tia ni koroi arami iaon nanon baiu; a na teimatoa uringan ami oo imatau.

17 A na waekoa natimi ni kaaitaraia taan urubwai ao a na nako mai iroum aomata ake a tia ni urubwaiko.

18 Euti matam ma n taratara nako ao nooria; aomata aika a botaki ni kabane, a na bane n nakoim. Ao ngkai I maiu, e taku te Uea, ko na bon kunnikaiko ma ngaiia n aiaron bwaai ni katamaroa i aoia ao kabaei n aiaron te tia mare.

19 Bwa am tabo aika akea kaaia ao am tabo aika kamaroa, ao abam are e a tia n uruakaki, e a riki ni wariki ibukin te maekanaki ao aomata ake a kaniko; a na raroa nako.

20 Ao ataei ake ko na bungiia, i mwin ae ko a tia ni kabuaa are te moan, a na manga taetae riki nakon taningam ni kangai: E rang ni wariki te tabo aio ibukiu, anganai te tabo are N na kona ni maeka iai.

21 Ao ngkanne ko na taku inanom: Antai ae e a tia ni karikiia aikai ibukiu, ngkai a tia ni bua natiu, ao I a kanoabo, te bure ngai, ao I a tiotio nako? Ao antai ae e a tia ni kaikawaia naakai? Nooria, I a tia n tiku n ti ngai; naakai a mena ia ngkoa?

22 Aikai ana taeka te Uea ae te Atua: Nooria, N na tabekarake baiu nakoia Tientaire, ao ni katea au buraeki nakoia te botanaomata; ao a na uotia natim mwaane i nanon baia, ao a na uotiia natim aine i aon angaia.

23 Ao a na riki taian uea n ai aroia am tama n tararua, ao aia uea aine a riki bwa am tina n tararua; a na bobaraaki nakoim ni kaitaraa aontano, ao n newea te bubu are mena i aon waem; ao ko na ataia bwa bon Ngai te Uea; bwa a na aki maamaa akana tataningaai.

24 Bwa a na anaaki konaia naake a korakora mai irouia, ke ni kainaomataki aika tautoronaki i aan te tua?

25 Ma e taku te Uea, ake a tautoronaki irouia aika korakora a na anaaki ao konaia aika bubuaka a na kamaiuaki; bwa N na kaaitaraa ane e kaaitarako, ao N na kamaiuia natim.

26 Ao N na kamwarakeia akana a bwainikiriniko n oin irikoia; ao a na manging n oin raraaia n aiaron te wain ae karewe; ao a na ataia ni kabane aomata bwa Ngai, te Uea, bon am Tia Kamaiu ao am Tia Kabomwi, ae Atuan Iakobwa ae Korakora.