1 Ac na tukun ma inge tukun nga, Nephi, riti ma inge ma taflweyucklac fin plwet prahs inge, tamuhlwel wiyuck elos tuhkuh nuh yuruk ac fahk nuh sihk: Meac kalmeyacn ma kom riti inge? Liye, yac ma inge ac etweyuck oacna ma ma tuhkuh ke nguhn uh, ma ac fah ahkpwacyeiyuck oacna nuh ke nguhn ac tiac ke mahno?

2 Ac nga, Nephi, fahk nuh selos: Liye ma inge ahkkahlwemyeyuck nuh sin mwet pahluh ke puhsren Nguhn; tuh ke Nguhn ma nuhkwewa ahkkahlwemyeyuck nuh sin mwet pahluh, suc ac fah tuhkuh nuh sin tuhlihk nuhtin mwet ke mahno.

3 Ohinge, ma suc nga riti ah kwewana ma nuh ke ma suc suhkawihl ac ma kawihl; tuh kahlwem muh mwet Israel, ke kihtin pacl kuh ke pacl tok uh, elos fah fahsrelihk nuh fin facluh nohfohn, ac oacyacpac inmahsrlon muhtuhnfacl nuhkwewa.

4 Ac liye, oasr mwet pucspucs suc tuhlac tari in etuh kaclos suc oasr Jerusalem. Ahok, inkaiyacn mwet ke sruf nuhkwewa tuh kolyucklac; ac elos fahsrelihk oaclihk tuhka in meoa uh; ac kuht tiac etuh lah elos oasr oyac, liki na kuht etuh lah elos kolyucklac.

5 Ac ke pacl se elos kolyucklac inge, ma inge palyeiyuck kaclos, ac oacyacpac kaclos nuhkwewa suc fah fahsrelihk ac fohsack inge fahlac, ke srihpen El suc Muhtahl luhn Israel; tuh in lainuhl elos ahkkwekweye insiaclos; ohinge, elos fah fahsrelihk inmahsrlon muhtuhnfacl nuhkwewa ac fah sruhngwacyuck sin mwet nuhkwewa.

6 Ne ohinge, tukun elos fah karihngihnyuck sin mwet Gentile, ac Leum El sruhkwack pahol nuh sin mwet Gentile ac oakiyac tuh elos in sie mwe akwuck, ac tuhlihk nahtuhlos utuck ke paholos, ac acn nahtuhlos utuck fin pihsaclos, liye ma nga sruhmuhn inge ma suhkawihl; tuh ohinge wuhlweacng luhn Leum nuh sin pahpah tuhmwacsr; ac ma inge fahk kacsr ke pacl fahsruh uh, ac oacyacpac mwet wiyacsr kwewa suc pa ma ke mwet Israel.

7 Ac kalmac pa pacl se ac tuhkuh tukun mwet Israel nuhkwewa fahsrelihk ac fohsack, tuh Leum God El ac fah tulohkohnwack sie muhtuhnfacl fokoko inmahsrlon mwet Gentile, ahok, finne fin muhtuhn acn se inge; ac kaclos fihtac lasr uh fah fahsrelihk.

8 Ac tukun fihtac lasr uh fahsrelihk Leum God El ac fah oruh sie orekma wolacna inmahsrlon mwet Gentile, suc ac fah yohk srihpac na pwacye nuh sin fihtac lasr; ohinge, ma inge luhmweyuck in oacna ke elos karihngihnyuck sin mwet Gentile ac utuck ke paholos ac fin pihsaclos.

9 Ac ma inge ac oacyacpac yohk srihpac nuh sin mwet Gentile; ac tiac nuh sin mwet Gentile muhkwena tuhsruhk nuh sin mwet Israel nuhkwewa, nuh ke ahkkahlwemyeyacn wuhlweacng luhn Pahpah inkuhsrao nuh sel Abraham, fahk: Mwet nuhkwewa fin facluh ac fah ahkinsewowoyeyuck ke fihtac lom.

10 Ac nga kena, tamuhlwel wiyuck, tuh kowos in etuh lah mwet nuhkwewa fin facluh tiac kuh in ahkinsewowoyeyuck ne ke na El ahkkahlwemye kuh Lal ye muhtuhn muhtuhnfacl nuhkwewa.

11 Ohinge, Leum God El fah tahfwelah in ahkkahlwemye kuh Lal ye muhtuhn facl nuhkwewa, in ahkkahlwemye wuhlweacng Lal ac wosasuc Lal nuh selos suc ma ke mwet Israel.

12 Ohinge, El fah sifilpac usacloslac liki srohoh, ac elos fah toweni nuh sie nuh ke acn in usru selos; ac elos fah tuhkuh liki fohs ac liki lohsr; ac elos fah etuh lah Leum pa Mwet Lahngo lalos ac Mwet in Molwelah lalos, El suc Kuhlacna luhn Israel.

13 Ac srah luhn alu luhlahp ac sruhngwacyuck sac, suc pa muhtwacn kosro fin facluh nohfohn, ac fah foracng nuh sin mwet ma sifac lalos sifacna; tuh elos ac fah mweun inmahsrlolos sifacna, ac katlas inpaholos sifacna ac fah puhtatyang nuh fin sifaclos sifacna, ac elos ac fah sruhilac ke srah lalos sifacna.

14 Ac muhtuhnfacl nuhkwewa suc ac fah mweun lain kowos, O mwet Israel, ac fah foracng lain sie sin sie, ac elos fah puhtatyang nuh lin luhf se ma elos puhkanwack in sruokyac mwet luhn Leum. Ac elos nuhkwewa suc acnwuck lain Zion ac fah kuhnausyucklac, ac muhtwacn kosro koluk sac, suc tuh ahkkolukyelah inkacnek pwacye luhn Leum, ahok, alu luhlahp ac sruhngwacyuck sac, ac fah puhtatlac nuh ke infohk uh ac puhtatlac lal ac fah yohk.

15 Tuh liye, mwet pahluh el fahk, pacl se ac sa na tuhkuh ke ac tuh fah wacngihnlac kuh lal Setuhn nuh ke insiacn tuhlihk nuhtin mwet uh; tuh lwen sac ac sa na tuhkuh tuh elos nuhkwewa suc insefuhlwact ac elos suc oruh ma koluk ac fah oacna loa uh; ac lwen sac ac tuhkuh ke elos ac fuhrreyuckyak uh.

16 Tuh pacl se ac sa na tuhkuh ke fohnlah luhn kasrkuhsrak luhn God ac fah kahklah nuh fin tuhlihk nuhkwewa nuhtin mwet; tuh El fah tiac lwelah tuh mwet koluk in kuhnahoslah mwet suwohswohs.

17 Ohinge, El fah molwelah mwet suwohswohs ke kuh Lal, finne enenuh tuh fohnlah luhn kasrkuhsrak Lal ac fah tuhkuh, ac mwet suwohswohs in moliyucklac, finne nuh ke kuhnausyucklac luhn mwet lokoalok lalos ke e. Ohinge, mwet suwohswohs elos tiac enenuh in sahngweng; tuh ohinge mwet pahluh el fahk, elos fah moliyucklac, finne ke e.

18 Liye, tamuhlwel wiyuck, nga fahk nuh suwos, lah ma inge ac fah tuhkuh ke kihtin pacl; ahok, finne srah, ac e, ac fofosr ke kuhlahsr uh enenuh in sikyak; ac ma inge enenuh in sikyak fin muhtuhnfacl se inge; ac ma inge sikyak nuh sin mwet uh oacna nuh ke moul in mahno fin elos ahkkwekweyelah insiaclos lain El suc Muhtahl luhn Israel.

19 Tuh liye, mwet suwohswohs ac fah tiac misac; tuh pwacyena pacl se ac fah tuhkuh ke elos nuhkwewa suc acnwuck lain Zion ac fah lihsyucklac.

20 Ac pwacyena Leum El fah ahkolah sie inkacnek nuh sin mwet Lal, nuh ke ahkpwacyeiyacn kahs lal Moses, suc el sruhmuhn, fahk: Leum God lowos El fah tuhfahlah sie mwet pahluh nuh suwos, suc oacna nga; kowos fah lohnguhl ke ma nuhkwewa ma el ac fah fahk nuh suwos. Ac ma inge fah sikyak tuh elos nuhkwewa suc ac fah tiac lohng mwet pahluh sac ac fah lihsyucklac liki inmahsrlon mwet uh.

21 Ac inge nga, Nephi, fahk nuh suwos, lah mwet pahluh se suc Moses el sruhmuhn ah pa El suc Muhtahl luhn Israel; ohinge, El fah oruh nuhnuhnkuh ke suwohswohs.

22 Ac mwet suwohswohs tiac enenuh in sahngweng, tuh elos pa mwet suc ma fah tiac fohsack uh. Tuhsruhk pa tohkohsrahi luhn devil, ma ac fah muhsahiyuckyak inmahsrlon tuhlihk nuhtin mwet, suc tohkohsrahi se ma akwucki inmahsrlolos suc moul in mahno uh—

23 Tuh pacl se ac sa na tuhkuh tuh alu nuhkwewa ma muhsahiyuckyak in eis kuhtuh pac ma uh, ac elos nuhkwewa suc muhsahiyuckyak in eis kuh fin mwet uh, ac elos suc muhsahiyuckyak in pwengpweng ye muhtuhn facluh, ac elos suc suk in srihfe mahno ac ma luhn facluh, ac in oruh kain in ohiyac koluk nuhkwewa; ahok, in ahkkahlwemye, elos nuhkwewa suc wi tohkohsrahi luhn devil pa elos suc enenuh in sahngweng, ac rarrar, ac kusrusr; elos pa mwet suc enenuh in itucki nuh ten nuh ye fohk uh; elos pa mwet suc enenuh in fihrihryak oacna loa uh; ac ma se inge ohinge in oacna nuh ke kahs luhn mwet pahluh.

24 Ac pacl se ac sa na tuhkuh ke mwet suwohswohs enenuh in kolyucklac oacna kaho fuhsr ke kalkal, ac El suc Muhtahl luhn Israel El fah kol ke kuhlacna, ac kuh, ac wal, ac wolacna yohk.

25 Ac El oracni tuhlihk nahtuhl liki lacfahl ahkosr fin facluh; ac El oacklah sip nahtuhl, ac elos etwacl; ac e fah oasr sie un mwet ac sie mwet shepherd; ac El fah kihte sip nahtuhl, ac elos fah konwacack nien mongo Yohrohl.

26 Ac ke srihpen suwohswohs luhn mwet Lal, wacngihnlac kuh lal Setuhn; ohinge, el tiacna kuh in fihliyucklac ke lusen yac pucspucs; tuh wacngihnlac kuh lal nuh ke insiacn mwet uh, tuh elos muhta na ke suwohswohs, ac El suc Muhtahl luhn Israel El kol.

27 Ac inge liye, nga, Nephi, fahk nuh suwos lah ma inge nuhkwewa enenuh in sikyak oacna nuh ke moul suhkawihl uh.

28 Tuhsruhk, liye, nuhkwewa muhtuhnfacl, kain in mwet, kahs, ac mwet ac fah muhta ke mislac yurun El suc Muhtahl luhn Israel fin elos ac muh auliyak.

29 Ac inge nga, Nephi, ahksahfye; tuh inge nga ac tiacna tahfwelah in sruhmuhn kuhtuh pac ke ma inge.

30 Ohinge, tamuhlwel wiyuck, nga kena tuh kowos in nuhnkuh lah ma suc sihmlac fin plwet prahs inge ma pwacye; ac elos fahkwack lah sie mwet enenuh in ahkostwen nuh ke masap luhn God.

31 Ohinge, kowos tiac enenuh in pahngon muh nga ac pahpah tuhmuhk pa muhkwena fahkwack, ac oacyacpac luti ma inge uh. Ohinge, kowos fin ahkostwen nuh ke masap, ac muhtweng ne ke na sahflah, kowos ac fah moliyucklac ke lwen sahflah. Ac oreklac ohinge. Amen.