1 Ka sa yaco, koi au ko Nifai, niu sa lesu mai ena veivosaki kei na Turaga, ki na vale laca i tamaqu.

2 Ka sa yaco ni sa vosa vei au ko koya ka vaka: Raica au sa tadra e dua na tadra, ka sa vakarota kina vei au na Turaga mo dou lesu tale ki Jerusalemi, ko iko kei iratou na tuakamu.

3 Raica sa tiko vei Lepani na kedra ivolatukutuku na Jiu kei na nodra itukutuku ni kawa na noqu qase ka ceuti tu ena peleti parasa.

4 O koya sa vakaroti au kina na Turaga, mo lako ko iko kei iratou na tuakamu ki na vale i Lepani ka vakasaqara na ivolatukutuku ka kauta mai ki ke ena lekutu.

5 Ia oqo, raica erau sa vosa kudrukudru na tuakamu, ka kaya ni sa rui dredre na ka au gadreva vei rau; ia raica au sa sega ni gadreva vei rau na ka oqo, ia sa ivakaro ga ni Turaga.

6 O koya mo lako kina, na luvequ, ka na qai totaki iko na Turaga, ni ko sa sega ni vosa kudrukudru.

7 Ka sa yaco ni’u sa kaya vei tamaqu, koi au, ko Nifai: Au na lako ka kitaka na ka sa vakarota na Turaga, ni’u kila ni sega ni dau soli ivakaro na Turaga vei ira na luve ni tamata vakavo kevaka e sa vakarautaka rawa mada na sala me ra rawata kina na ka sa vakarota vei ira ko koya.

8 Ka sa yaco ni sa rogoca ko tamaqu na vosa oqo sa vuabale na nona marau, ni sa kila ko koya sa vakalougatataki au na Turaga.

9 Ia koi au, ko Nifai, kei iratou na tuakaqu, keitou sa qai gole yani ki na lekutu, ka kauta na neitou vale laca, me keitou lako cake ki na vanua ko Jerusalemi.

10 Ka sa yaco ni keitou sa yaco ki na vanua ko Jerusalemi, au sa qai bose vata kei iratou na tuakaqu.

11 Keitou sa vakawirimadigi—se ko cei vei keitou me lako ki na vale i Lepani. Ka sa yaco ni sa dusi Leimani na madigi; ka sa lako ko Leimani ki na vale i Lepani ka rau sa veivosaki kaya ni sa dabe ko koya ena nona vale.

12 A sa kerea vei Lepani na itukutuku ka ceuti tu ena peleti parasa, ka tu kina na itukutuku ni kawa i tamaqu.

13 Ka raica, a sa yaco ni sa cudru ko Lepani ka biliraki koya tani mai matana; ka sa sega ni via solia vua na ivolatukutuku. A sa kaya vua ko koya: Raica ko iko na tamata butabutako, ka’u na vakamatei iko.

14 Ia sa dro tani mai vua ko Leimani ka mai tukuna vei keitou na veika sa kitaka vua ko Lepani. Keitou sa rarawa vakalevu kina, ka ratou sa vakarau me lesu tale na tuakaqu vei tamaqu ki na lekutu.

15 Ia raica au sa kaya vei iratou: Me vaka sa bula na Turaga, ka datou sa bula talega, edatou na sega ni lesu vei tamadatou ki na lekutu me yacova ni datou sa rawata na ka sa vakarota vei kedatou na Turaga.

16 Ia me datou yalodina kina ni muria na ivakaro ni Turaga; o koya me datou lako kina ki na vanua sa nona isolisoli vakawa na tamadatou, ni sa biuta tu mai kina ko koya na koula kei na siliva, kei na veimataqali iyau kecega. Ia, na veika kece oqo sa kitaka ko koya ena vuku ni ivakaro ni Turaga.

17 Ni sa kila ko koya ni na vakarusai ko Jerusalemi ena vuku ni nodra caka ca na tamata.

18 Raica e ra sa cata na nodra vosa na parofita. Ia kevaka me a tiko ga ena vanua ko tamaqu ni sa vakaroti oti vua me dro tani mai kina, raica, ena mate talega ko koya. A sa dodonu kina me dro tani mai na vanua oqo.

19 Ka raica, sa lewa yalomatua ni Kalou me datou mai kauta na ivolatukutuku oqo, me datou maroroya kina na nodra vosa na noda qase vei ira na luveda.

20 Ia me datou maroroya talega kina vei ira na vei vosa kece era a vosataka na parofita yalosavasava, ka a soli vei ira ena Yalo kei na kaukauwa ni Kalou, mai na ivakatekivu kei vuravura me yacova mai na gauna oqo.

21 Ka sa yaco ni’u sa vakamasuti iratou vakaoqo na tuakaqu me ratou yalodina kina ni muria na veivakaro ni Kalou.

22 Ka sa yaco ni keitou sa qai lako sobu ki na vanua sa neitou ivotavota vakawa ka kumuna vata na neitou koula, kei na neitou siliva, kei na neitou iyau talei.

23 Ia ni keitou sa kumuna vata oti na veika oqo, keitou sa qai lesu cake tale ki na vale i Lepani.

24 Ka sa yaco ni keitou sa qai lako yani vei Lepani, ka kerea vua me solia vei keitou na itukutuku ka ceuti tu ena peleti parasa, keitou na qai solia vua na neitou koula, kei na neitou siliva, kei na neitou iyau talei kecega.

25 Ka sa yaco ni sa raica ko Lepani na neitou iyau, ni sa levu sara, sa domona sara, ka qai biliraki keitou ki tautuba, ka talai ira na nona tamata me ra vakamatei keitou me taura kina na neitou iyau.

26 Ka sa yaco ni keitou sa drotaki ira na tamata i Lepani, ka vakasaurarataki me keitou biuta tu yani na neitou iyau; ka sa taura sara ko Lepani.

27 Ka sa yaco ni keitou sa dro ki na lekutu, ka’ra a sega ni toboki keitou na tamata i Lepani, ka keitou sa vunitaki keitou ena loma ni qara vatu.

28 Ka sa yaco ni sa cudruvaki au kei tamaqu talega ko Leimani; ka vakakina ko Lemueli, ni sa vakarorogo ko koya ki na vosa i Leimani. Erau sa vosa vakaukauwa sara ko Leimani kei Lemueli vei keirau na tacidrau, ka mokuti keirau sara ena ititoko.

29 Ka sa yaco ni rau sa mokuti keirau tiko ena ititoko, raica, sa lako mai e dua na agilosi ni Turaga ka mai tu e matadrau, a sa vosa vei rau ka kaya: A cava drau sa mokuta kina na tacimudrau ena ititoko? Drau sa sega beka ni kila ni sa digitaki koya na Turaga me nomudou iliuliu, ia oqo ena vuku ni nomudrau caka cala? Raica mo dou na lako cake tale ki Jerusalemi, ka na soli Lepani ki na ligamudou na Turaga.

30 Ia, ni sa vosa oti vei keitou na agilosi, sa qai lako yani.

31 Ia ni sa yali yani na agilosi, erau sa tekivu vosa kudrukudru tale ko Leimani kei Lemueli ka rau kaya: E rawa vakaevei vua na Turaga me soli Lepani ki na ligadatou? Raica, sa tamata qaqa ko koya, ka rawa me lewai ira e le limasagavulu, io, sa rawa mada ga me vakamatea e le limasagavulu; a cava me dredre kina ni vakamatei kedatou?