1 Ket napasamak a siak, ni Nephi, nagsubliak manipud iti pannakisarsaritak iti Apo, iti tolda ti amak.

2 Ket napasamak a kinasaritanak, kunana: Kitaen nagtagainepak ket iti tagainepko, binilinnak ti Apo nga agsublika ken dagiti lallaki a kakabsatmo idiay Jerusalem.

3 Ket kitaem, adda ken ni Laban ti kasuratan maipapan kadagiti Hudio ken kasta met ti kapuonan dagiti ammak, ket naikitikitda kadagiti pinanid a gambang.

4 Ngarud, binilinnak ti Apo a masapul a mapanka ken dagiti lallaki a kakabsatmo iti balay ni Laban, ket birokenyo dagiti kasuratan, ken iyegyo ida ditoy let-ang.

5 Ket ita, kitaem agdaydayamudom dagiti lallaki a kakabsatmo, a ibagbagada a narigat a banag ti ipaaramidko kadakuada; ngem kitaen saan a siak ti agpaaramid iti daytoy kadakuada, ngem bilin daytoy ti Apo.

6 Ngarud a mapanka, anakko, maparaburankanto ti Apo, agsipud ta saanka nagdayamudom.

7 Ket napasamak a siak, ni Nephi, kinunak iti amak: mapanak ket aramidek dagiti banag nga imbilin ti Apo, ta ammok a saan a mangted ti Apo iti bilbilin kadagiti annak ti tattao, malaksid no mangisagana isuna iti wagas para kadakuada tapno matungpalda ti banag nga imbilinna kadakuada.

8 Ket napasamak a kasta unay ti ragsak ti amak idi nangngegna dagitoy a balikas, agsipud ta ammona a nabendisionanak ti Apo.

9 Ket siak, ni Nephi, ket linasatmi ken dagiti lallaki a kakabsatko ti let-ang, intugotmi dagiti toldami, tapno mapan iti daga ti Jerusalem.

10 Ket napasamak nga idi nakadanonkami iti daga ti Jerusalem, nagsarita ti tunggal maysa kadakami, siak ken dagiti kabsatko a lallaki.

11 Ket nagbibinnunotankami—no siasino kadakami ti nasken a mapan iti balay ni Laban. Ket napasamak a ni Laman ti nabunot; ket napan ni Laman iti balay ni Laban, ket kinasaritana bayat ti panagtugawna iti balayna.

12 Ket kiniddawna ken ni Laban nga alaenna dagiti kasuratan a naikitikit kadagiti pinanid a gambang, a naglaon iti kapuonan ti amak.

13 Ket kitaem, napasamak a nagpungtot ni Laban, ket pinapanawna isuna iti imatangna; ket saanna nga impalubos a maalana dagiti kasuratan. Ngarud, kinunana kenkuana: Kitaen maysaka a mannanakaw, ket papatayenka.

14 Ngem naglibas ni Laman iti imatangna, ket insaritana kadakami dagiti bambanag nga inaramid ni Laban. Ket nangrugi ti kasta unay a ladingitmi, ket agsubli koman dagiti lallaki a kakabsatko iti amak iti let-ang.

15 Ngem kitaem kinunak kadakuada: Agingga a sibibiag ti Apo, ken sibibiagtayo, saantayonto nga agsubli iti amatayo iti let-ang agingga a matungpaltayo ti imbilin ti Apo kadatayo.

16 Ngarud, napudnotayo koma a mangtungpal kadagiti bilin ti Apo; ngarud intayo iti daga ti amatayo a tawid, ta kitaen imbatina idiay ti balitok ken pirak, ken dagiti amin a kita ti kinabaknang. Ket naaramidna amin dagitoy gapu kadagiti bilin ti Apo.

17 Agsipud ta ammona a nasken a ti Jerusalem ket madadael, gapu iti kinadakes dagiti tattao.

18 Ta kitaem, linaksidda dagiti balikas dagiti propeta. Ngarud, no nagnaed koma ti amak iti dayta a daga kalpasan a naibilin kenkuana a panawanna ti daga, kitaen, natay koma met isuna. Ngaurd, nasken a pumanaw isuna iti dayta a daga.

19 Ket kitaen, maysa daytoy a sirib ti Dios a nasken nga alaenmi dagitoy a kasuratan, tapno mataginayonmi nga agpaay kadagiti annakmi ti pagsasao dagiti ammami;

20 Ken kasta met a tapno mataginayontayo nga agpaay kadakuada dagiti balikas a naisao babaen kadagiti amin a nasantuan a propeta, a naited kadakuada babaen ti Espiritu ken bileg ti Dios, manipud idi nangrugi ti lubong, uray pay inggana ti agdama a panawen.

21 Ket napasamak nga iti kastoy a wagas ti pagsasao talaga a naallukoyko dagiti lallaki a kakabsatko, tapno agbalinda a napudno iti panangtungpal kadagiti bilin ti Dios.

22 Ket napasamak a napankami iti daga a tawidmi, ket pinagtitiponmi dagiti balitokmi, ken dagiti pirakmi, ken dagiti napateg a sanikuami.

23 Ket kalpasan nga idi napagtitiponmi dagitoy a bambanag, napankami manen iti balay ni Laban.

24 Ket napasamak a napankami ken ni Laban, ket kiniddawmi nga itedna kadakami dagiti kasuratan a naikitikit kadagiti pinanid a gambang, ta kasukatna dagitoy itedminto kenkuana dagiti balitokmi, ken dagiti pirakmi, ken dagiti amin a napapateg a sanikuami.

25 Ket napasamak nga idi nakita ni Laban dagiti sanikuami, ket kasta unay ti kaaduna dagitoy, talaga a ginartemanna iti kasta unay dagitoy, uray la a pinagtalawnakami ket imbaonna dagiti katulonganna a papatayendakami, tapno magun-odna ti sanikuami.

26 Ket napasamak a talaga a nakalibaskami kadagiti adipen ni Laban, ket napilitankami nga ibati dagiti sanikuami, ket nagbalinda a sanikua ni Laban.

27 Ket napasamak a nagtaraykami iti langalang, ket saandakami a nakamakam dagiti adipen ni Laban, ket naglemmengkami iti rukib ti maysa a bato.

28 Ket napasamak a nakapungtot kaniak ni Laman, ken kasta met iti amak; ket kasta met ken ni Lemuel, agsipud ta dimngeg isuna kadagiti balikas ni Laman. Ngarud talaga a nagsao da Laman ken Lemuel iti adu a makasair a balikas kadakami, nga in-inaudi a lallaki a kakabsatda, ket sinaplitandakami uray pay iti baston.

29 Ket napasamak a bayat ti panangsaplitda kadakami iti baston, kitaen, immay ti anghel ti Apo ket nagtakder iti sanguananda, ket kinunana: Apay a saplitenyo ti inaudi a lallaki a kabsatyo iti baston? Saanyo kadi ammo nga isu ti napili ti Apo a mangituray kadakayo, ket gapu daytoy iti kinadakesyo? Kitaen, mapankayonto manen idiay Jerusalem, ket iyawatto ti Apo ni Laban kadagiti imayo.

30 Ket kalpasan a nagsao ti anghel kadakami, pimmanawen isuna.

31 Ket kalpasan a pimmanaw ti anghel, nangrugi manen da Laman ken Lemuel nga agdayamudom, a kunada: Kasano koma a mabalin nga iyawat ti Apo ni Laban iti imatayo? Kitaen, nabileg a tao isuna, ken kabaelanna ti mangbilin iti limapulo, wen, mabalinna met a papatayen ti limapulo; ket apay a saan a datayo?