1 Ac tukun ma inge nga, Nephi, fohlohk tukun nga sramsram nuh sin Leum, nuh ke lohm nuknuk sin pahpah tuhmuhk.

2 Ac tukun ma inge na el sramsram nuh sihk, fahk: Liye nga mwemwei sie mwemwe, suc Leum El sapkihn nuh sihk tuh kom ac tamuhlwel wiyom fah fohlohk nuh Jerusalem.

3 Tuh liye, oasr yohrohl Laban ma sihmlac ke mwet Jew ac oacyacpac tahk in sucu luhn pahpah mahtuh tuhmuhk omeet ah, ac ma inge taflweyucklac ke plwet prahs.

4 Ohinge, Leum El sapkihn nuh sihk tuh kom ac tamuhlwel wiyom enenuh in som nuh lohm sel Laban, ac suk ma sihmlac inge, ac us ma inge tuhkuh nuh yen mwesis.

5 Ac inge, liye tamuhlwel wiyom elos tohrkahskahs, fahk lah ma na upac se pa nga enenuh selos inge; tuhsruhk liye nga tiac enenuh selos ma inge, tuhsruhk ma se inge pa sie masap luhn Leum.

6 Ohinge som, wen nuhtihk, ac kom fah luhngkihnyuck sin Leum, ke srihpen kom tiac tohrkahskahs.

7 Ac tukun ma inge nga, Nephi, fahk nuh sin pahpah tuhmuhk: nga ac fah som ac oruh ma suc Leum El sapkihn, tuh nga etuh lah Leum El tiac sang kuhtwena masap nuh sin tuhlihk nuhtin mwet, sahyacn El fah ahkolah sie inkacnek nuh selos tuh elos in kuh in oraclah ma suc El sapkihn nuh selos.

8 Ac tukun ma inge ke pahpah tuhmuhk el tuh lohng kahs inge el arulacna engan, tuh el etuh lah nga ahkinsewowoyeyuck sin Leum.

9 Ac nga, Nephi, ac tamuhlwel wiyuck oruh fuhfahsryucsr lasr ke yen mwesis, us lohm nuknuk lasr, in som nuh fin acn Jerusalem.

10 Ac tukun ma inge ke kuht tuh sun acn Jerusalem, nga ac tamuhlwel wiyuck tuh toweni sramsramlah.

11 Ac kuht susfa—lah suc kac sesr enenuh in som nuh lohm sel Laban. Ac tukun ma inge tuh oacyang nuh sel Laman; ac Laman el som nuh lohm sel Laban, ac el sramsram nuh sel ke el muhta in lohm sel.

12 Ac el kena sel Laban ke ma sihmlac ma taflweyucklac fin plwet prahs, ma nein tahk in sucu luhn pahpah tuhmuhk.

13 Ac liye, tukun ma inge Laban el kasrkuhsrak, ac luhsuhlwack luhkwel; ac el tiac lwelah tuh elan eis ma sihmlac ah. Ohinge, el fahk nuh sel: Liye kom sie mwet pihsrapasr, ac nga ac fah unikowi.

14 Tuhsruhk Laman el kahinglac luhkwel, ac tahfuh ma suc Laban el tuh oruh ah, nuh sesr. Ac kuht muhtwacwacack in arulacna suhpwacr, ac tamuhlwel wiyuck elos tuh oruh in fohlohk nuh yurun pahpah tuhmuhk ke yen mwesis.

15 Tuhsruhk liye nga fahk nuh selos lah: Ke Leum El moul, ac ke kuht moul, kuht ac fah tiac som nuh yurun pahpah tuhmwacsr ke yen mwesis ne ke na kuht oraclah ma se suc Leum El sapkihn kuht kac.

16 Ohinge, lwelah kuht in oaru in liyacacng masap luhn Leum; ke ma inge lwelah kuht in som nuh ke acn sin pahpah tuhmwacsr, tuh liye el likiyac kol ac selfuh, ac kain in mwe kahsruhp nuhkwewa. Ac ma inge nuhkwewa el tuh oruh ke srihpen masap luhn Leum.

17 Tuh el etuh lah Jerusalem enenuh in kuhnausyucklac, ke srihpen koluk luhn mwet ah.

18 Tuh liye, elos sruhnga kahs luhn mwet pahluh. Ohinge, pahpah tuhmuhk el fin muhta na fin acn we tukun sapkihnyuck elan kahinglac liki acn ah, liye, el ac oacyacpac misac. Ohinge, enenuh se na elan kahinglac liki acn ah.

19 Ac liye, ma na ke lahlmwetmwet luhn God tuh kuht in eis ma sihmlac inge, tuh kuht in kuh in sefiyac nuh sin tuhlihk nahtuhsr kahs luhn pahpah tuhmwacsr;

20 Ac oacyacpac tuh kuht in sefiyac nuh selos kahs ma sramsramkihnyuck ke oalin mwet pahluh muhtahl nuhkwewa, ma ituckyang nuh selos ke Nguhn ac kuh luhn God, e ke na muhtwacwacackiyacn facluh, finne nuh ke pacl se inge.

21 Ac tukun ma inge tukun ohiyacn kahs inge nga tuh kihfucs tamuhlwel wiyuck, tuh elos in kuh in oaru in liyacacng masap luhn God.

22 Ac tukun ma inge kuht som nuh ke acn in usru lasr, ac kuht tuh oracni nuh sie kol lasr, ac selfuh lasr, ac ma sacohk lasr.

23 Ac tukun kuht oracni ma inge nuh sie, kuht sifilpac som nuh lohm sel Laban ah.

24 Ac tukun ma inge kuht som nuh lohm sel Laban ah, ac kena sel tuh elan use nuh sesr ma sihmlac ma taflweyucklac fin plwet prahs, tuh kuht ac sang nuh sel kol lasr, ac selfuh lasr, ac ma sacohk lasr nuhkwewa.

25 Ac tukun ma inge ke Laban el liye mwe kahsruhp lasr, ac tuh ma inge arulacna oasr suhna, el tuh mwelkihn, yohkna oruh el lihskuhtyak, ac suhpwaclah mwet kuhlwacnsap lal in unikuhti, tuh elan muh kuh in sruokyac ma kahsruhp lasr inge.

26 Ac tukun ma inge kuht tuh kahinglac liki mwet kuhlwacnsap lal Laban, ac kuht tuh enenuh in fihliyac na ma kahsruhp lasr ah, ac ma inge puhtatyang nuh in pahol Laban.

27 Ac tukun ma inge kuht kahinglac nuh yen mwesis, ac mwet kuhlwacnsap lal Laban tiacna sruokkuhti, ac kuht wihkihnkuhtlac lun luhf ke sie yot.

28 Ac tukun ma inge Laman el tuh kasrkuhsrak sihk, ac oacyacpac sin pahpah tuhmuhk; ac oacyacpac Lemuel, tuh el porongo kahs lal Laman. Ohinge Laman ac Lemuel tuh fahk kahs upac pucspucs nuh sesr, tamuhlwel fuhsr wiyaclos, ac elos tuh srihngihl kuht finne ke soko sahk.

29 Ac tukun ma inge ke elos uni kuht ke soko sahk, liye, sie lipufacn luhn Leum el tuhkuh ac tu met ye muhtahlos, ac el sramsram nuh selos, fahk: Efuh kowos srihngihl tamuhlwel fuhsr wiyowos ke soko sahk? Yac kowos tiac etuh lah Leum El sulwacllah in sie mwet kol lowos, ac ohinge ke srihpen koluk lowos? Liye kowos fah sifilpac som nuh Jerusalem, ac Leum El ac fah usacloht Laban nuh in pouwos.

30 Ac tukun lipufacn sac sramsram nuh sesr, el som.

31 Ac tukun lipufacn sac som, Laman ac Lemuel sifilpac muhtwacwacack in tohrkahskahs, fahk: Fuhkah tuh Leum Elan usacluh Laban nuh in pahosr? Liye, el sie mukul na fokoko, ac el kuh in kol luhmngaul, ahok, finne el kuh in uniyac luhmngaul; na efuh in tiac kuht?