1 Ka sa yaco ni’u sa vosa vei iratou na tuakaqu ka kaya: Me datou lako cake tale mada ki Jerusalemi ka me datou yalodina mada ni muria na ivakaro ni Turaga; raica sa kaukauwa cake ko koya vei ira na kai vuravura kecega, ka qai cava me sega ni kaukauwa cake kina vei Lepani kei ira na nona lewe limasagavulu, se na nona lewe udolu vakatini?

2 O koya me datou lako cake kina; me datou kaukauwa vakataki Mosese; ni a vosa vakaidina ki na wai e vuqa ni Wasa Damudamu a ra sa tawase vaka ka vaka, era sa lako yani ena vanua mamaca na noda qase, mai na tiko vakavesu, ka’ra a muri ira yani na mataivalu i Fero ka ra luvu kina ena wai e vuqa ni Wasa Damudamu.

3 Ia raica drau sa kila ni sa dina na ka oqo; ka drau sa kila talega ni a vosa vei kemudrau e dua na agilosi; sa rawa vakacava kina mo drau vakatitiqa? Me datou lako cake mada; sa rawa ni sereki kedatou na Turaga me vaka vei ira na noda qase, ka me vakarusai Lepani me vakataki ira na kai Ijipita.

4 Ia oqo ni’u sa vosataka oti na vei vosa oqo, erau se cudru ka vosa kudrukudru tiko ga; ia erau a muri au tiko ga me yacova ni keitou sa yaco ki na taudaku ni bai kei Jerusalemi.

5 A sa bogi na vanua; au sa kaya me ratou vuni ena daku ni bai. Ia ni ratou sa vunitaki iratou toka, koi au, ko Nifai, au sa curu lo ki loma ni koro ka lako yani ki na vale i Lepani.

6 A sa liutaki au tiko na Yalo, ka’u a sega ni kila rawa tiko yani na ka me’u na cakava.

7 Ia, au sa lako ga yani; ia ni’u sa volekata na vale i Lepani au sa raica e dua na tamata, ni sa davo tu ena dela ni qele e mataqu, ni sa mateni ena waini.

8 Ia, ni’u sa yaco yani vua au sa qai kila ni sa i Lepani.

9 Au sa raica na nona iseleiwau, ka’u ucuna tani mai na kena taga; ka sa koula dina na diana, ka sa talei sara ka maqosa na kena icakacaka, ka’u a raica ni sa sitila talei dina sara na yamena.

10 Ka sa yaco ni sa vakauqeti au vakaukauwa na Yalo me’u vakamatei Lepani; ia au sa kaya e lomaqu: A se sega mada vakadua ni’u vakadavea na dra ni tamata. Au a vakasuka mai ka sega ni via vakamatei koya.

11 A sa kaya tale vei au na Yalo: Raica, sa soli koya na Turaga ki na ligamu. Io, ka’u sa kila talega ni a via vakamatei au ko koya; io, ka a sega ni via vakarorogo ki na ivakaro ni Turaga; ka sa kovea talega na neitou iyau.

12 Ka sa yaco ni sa kaya tale vei au na Yalo: Vakamatei koya, ni sa soli koya na Turaga ki ligamu;

13 Raica sa vakamatei ira na dau caka ca na Turaga me vakayacora kina na nona inaki dodonu. Sa vinaka cake me mate e dua na tamata ka me kakua ni ra malumalumu sobu ka mate ena tawavakabauta, e dua na matatamata.

14 Ia oqo, ni’u sa rogoca na vosa oqo, koi au ko Nifai, au sa qai nanuma na vosa ni Turaga ka a vosataka vei au mai na lekutu, ka vaka: Kevaka era na muria na noqu ivakaro ko ira na nomu kawa, era na tiko sautu ena vanua yalataki.

15 Io, au a nanuma talega ni ra na sega ni rawa ni muria na ivakaro ni Turaga me vaka na lawa i Mosese, ka vakavo ga ke sa tu vei ira na lawa.

16 Ka’u sa kila talega ni sa ceuti tu na lawa ena peleti parasa.

17 Au a kila talega ni sa soli Lepani ki na ligaqu na Turaga ena inaki oqo—me’u rawata kina na ivolatukutuku, me vaka na nona ivakaro.

18 O koya au sa talairawarawa ki na domo ni Yalo, ka’u sa taura na drau ni ului Lepani ka tamusuka tani na uluna ena nona iseleiwau.

19 Ia ni’u sa tamusuka tani oti na uluna ena nona iseleiwau, au sa qai luvata na isulu i Lepani ka tokara, io, na vei tikina lalai kece sara; ka’u a vauca e toloqu na nona iyaragi.

20 Ni’u sa kitaka oti oqo, au sa lako yani ki na vale ni iyau i Lepani. Ia ni’u sa lako tiko yani ki na vale ni iyau i Lepani, raica, au sa raica na tamata i Lepani ka tiko vua na ki ni vale ni iyau. Ka’u sa qai vakaroti koya ena domoi Lepani me keirau lako vata ki na vale ni iyau.

21 Ka sa nanuma ko koya ni sai au ko Lepani, na nona turaga, ni a raica na isulu kei na iseleiwau sa vauci e toloqu.

22 Ka sa vosa vei au me baleti ira na nodra qase ni yavusa na Jiu, ni kila tiko ko koya ni a tiko ena kedra maliwa ena bogi ko ya ko Lepani na nona turaga.

23 Au sa qai vosa vua me vaka ga e vosa tiko ko Lepani.

24 Au sa kaya talega vua, ni’u mai kauta na veika sa ceuti tu ena peleti parasa, vei iratou na tuakaqu, ka ratou tiko mai na daku ni bai.

25 Au a vakaroti koya talega me muri au.

26 Ka sa nanuma ko koya, ni’u sa cavuti ira tiko na veitacini ena lotu; ka ni sai au dina ga ko Lepani, ko koya au a vakamatea, ka sa muri au kina.

27 Ka sa vosa vakavuqa vei au me baleti ira na nodra qase ni yavusa na Jiu, ni’u sa lako tiko ki vei iratou na tuakaqu ka ratou tiko mai na daku ni bai.

28 Ka sa yaco ni sa raici au ko Leimani, sa rere vakalevu ko koya, kei Lemueli kei Semi talega. Eratou sa dro tani mai mataqu; ni ratou sa nanuma ni sai Lepani, ka sa vakamatei au ka sa lako mai me kauta tani talega na nodratou bula.

29 Ka sa yaco ni’u a qai kaci yani vei iratou ka ratou a rogoci au; eratou sa mudu kina ni dro tani tiko mai vei au.

30 Ka sa yaco ni sa raici iratou na tuakaqu ko koya na tamata i Lepani, sa tekivu me sautaninini, ka vakarau me dro tani mai vei au ka lesu ki na koro ko Jerusalemi.

31 Ia oqo, koi au, ko Nifai, me vaka ni’u sa tamata tubu levu, ka sa vakaukauwataki au talega vakalevu na Turaga, au sa toboka kina na tamata i Lepani, ka vesuka me kakua kina ni dro.

32 Ka sa yaco ni’u sa veivosaki kei koya, ni kevaka me muria na noqu vosa, me vaka sa bula na Turaga, ka me vaka ni’u sa bula koi au, kevaka sa na muria na neitou vosa, keitou na vakabulai koya.

33 Ka’u sa vosa vua, ena dua na bubului, ni sega ni dodonu me rere; ni na tamata galala vakataki keitou kevaka ena lako sobu vata kei keitou ki na lekutu.

34 Ka’u sa vosa talega vua, ka kaya: Sa vakaroti keitou vakaidina na Turaga me keitou kitaka na ka oqo; ia sa sega li ni kilikili me keitou gumatua ni muria na ivakaro ni Turaga? O koya gona, kevaka ko na lako vata kei keitou ki vei tamaqu ki na lekutu, ena dua na nomu tikina vata kei keitou.

35 Ka sa yaco ni sa qai dei na yaloi Soramu ena vuku ni vosa au a vosataka. Na yaca ni tamata oqo ko Soramu; ka sa yalataka ni na lako sobu vei tamai keitou ki na lekutu. Io, sa bubuluitaka talega vei keitou ni na tiko ga kei keitou mai na siga ko ya ka lako yani.

36 Keitou sa gadreva sara me tiko vata ga kei keitou ko koya ena vuku ni ka oqo, mera kakua kina ni kila na Jiu na neitou sa dro ki na lekutu, de ra na cici muri mai ka vakarusai keitou.

37 Ka sa yaco ni sa bubului oti vei keitou ko Soramu, sa qai oti na neitou ririkotaki koya.

38 Ka sa yaco ni keitou sa qai kauta na peleti parasa kei na tamata i Lepani, ka biubiu ki na lekutu; ka lako ki na vale laca i tamai keitou.