1 Ac tukun ma inge tukun kuht tuh tuhkuh nuh yen mwesis nuh yurun pahpah tuhmwacsr, liye, el sesseslah ke engan, ac oacyacpac ninac kiyuck, Sariah, el tuh arulacna engan, tuh pwacye lah el ahsor ke srihpacsr.

2 Tuh el tuh nuhnkuh muh kuht misac yen mwesis; ac el oacyacpac tuh tohrkahskahs lain pahpah tuhmuhk, fahk nuh sel muh el sie mukul liyactwen; fahkwacng: Liye kom kolkuhtme liki acn in usru lasr, ac wen nuhtihk wacngihnlac, ac kuht ac misac yen mwesis.

3 Ac tukun puhsra inge ninac kiyuck el tohrkahskahs lain pahpah tuhmuhk.

4 Ac tukun ma inge pahpah tuhmuhk el sramsram nuh sel, fahk: Nga etuh lah nga sie mukul liyactwen; tuh nga fin tiac liye ma luhn God ke sie aruhruhma nga fah tiac etuh wolacna luhn God, tuhsruhk tuh nga ac muhta na Jerusalem, ac tuh wi na mwet luhk misac.

5 Tuhsruhk liye, nga eis sie acn wihlwihl, suc ma inge nga kaksakihn; ahok, ac nga etuh lah Leum El fah molwelah wen nuhtihk liki pahol Laban, ac sifilpac usaclosme nuh yohrohsr nuh yen mwesis.

6 Ac tukun ohiyacn kahs inge pahpah tuhmuhk, Lehi, el tuh ahkmisye ninac kiyuck, Sariah, kacsr, ke kuht fuhfahsryucsr ke yen mwesis nuh Jerusalem, in eis ma sihmlac luhn mwet Jew.

7 Ac ke kuht tuh fohlohk nuh ke lohm nuknuk luhn pahpah tuhmuhk, liye engan lalos fohnlah, ac ninac kiyuck el tuh mihsi.

8 Ac el sramsram, fahk: Inge nga etuh na pwacye lah Leum El sapkihn mukul tuhmuhk in kahinglac nuh yen mwesis; ahok, ac nga oacyacpac etuh na pwacye lah Leum El tuh karuhnguhnwacng wen nuhtihk, ac molweloslac liki pahol Laban, ac ohinge sang kuh nuh selos elos in muh kuh in oraclah ma se suc Leum El tuh sapkihn nuh selos. Ac tukun puhsra inge el tuh sruhmuhn ohinge.

9 Ac tukun ma inge elos tuh arulacna kaksak, ac tuh oruh kihsac ac isihk mwe kihsac fihrihr nuh sin Leum; ac elos sang kuloh nuh sin God luhn Israel.

10 Ac tukun elos tuh sang kuloh nuh sin God luhn Israel, pahpah tuhmuhk, Lehi, el eis ma sihmlac inge ma taflweyucklac fin plwet prahs, ac el tuh riti ma inge e ke na muhtwacwacackiyac ah.

11 Ac el liye lah ma inge nein puk limekohsr lal Moses, ma sruhmuhn sie sramsram ke oreklac luhn facluh, ac oacyacpac kacl Adam ac Eve, suc pa pahpah se emet tuhmwacsr ac ninac se emet kiyacsr;

12 Ac oacyacpac sie ma sihmlac ke mwet Jew e ke muhtwacwacackiyac ah, finne ne ke muhtwacwacackiyacn kol lal Zedekiah, tohkohsrah luhn Judah;

13 Ac oacyacpac kahs in pahluh luhn mwet pahluh muhtahl, e ke muhtwacwacackiyac ah, finne ne ke muhtwacwacackiyacn kol lal Zedekiah; ac oacyacpac kahs in pahluh pucspucs ma sruhmuhnyuck ke oaluhl Jeremiah.

14 Ac tukun ma inge pahpah tuhmuhk, Lehi, el oacyacpac sokwack ke plwet prahs sie tahk in sucu luhn pahpah tuhmwacl; ohinge el etuh lah el sie fihlin mwet lal Joseph; ahok, finne Joseph se suc pa wen nahtuhl Jacob, suc tuh kuhkwackihnyucklac nuh Egypt, ac suc tuh moliyucklac ke poun Leum, tuh elan kuh in molwelah pahpah tuhmwacl, Jacob, ac mwet in lohm sel nuhkwewa in tiac misac ke sracl in mongo.

15 Ac elos tuh oacyacpac kolyucklac liki srohoh ac liki acn Egypt, sin God se pacna suc tuh molweloslac ah.

16 Ac ohinge pahpah tuhmuhk, Lehi, el tuh sokwack tahk in sucu luhn pahpah tuhmwacl. Ac Laban el oacyacpac sie fihlin mwet lal Joseph, ohinge el ac pahpah tuhmwacl tuh sruokyac ma sihmlac ah.

17 Ac inge ke pahpah tuhmuhk el liye ma inge kwewa, el tuh sesseslah ke Nguhn, ac muhtwacwacack in palye ke fihtac lal—

18 Lah plwet prahs inge fah som nuh muhtuhnfacl nuhkwewa, kain in mwet, kain in kahs, ac mwet nuhkwewa suc ma oasr ke fihtac lal.

19 Ohinge, el fahk lah plwet prahs inge ac fah tiac kuhnausyucklac; ma inge ac fah tiac pac lohsrlah ke pacl. Ac el palye ma pucspucs ke fihtac lal.

20 Ac tukun ma inge tuh ohinge nga ac pahpah tuhmuhk tuh liyacacng masap ma Leum El tuh sapkihn nuh sesr.

21 Ac kuht tuh eis ma sihmlac ma Leum El tuh sapkihn nuh sesr kac, ac lutlutkihn ma inge ac konwacack lah ma inge ma na wo; ahok, finne arulacna yohk srihpac nuh sesr, yohkna oruh kuht in kuh in karuhnguhnwacng masap luhn Leum nuh sin tuhlihk nahtuhsr.

22 Ohinge, ac mwe lahlmwetmwet se luhn Leum tuh kuht in us ma inge wi kuht, ke kuht fuhfahsryucsr ke yen mwesis nuh ke acn wihlwihl.