1 I awor ami, Nefi, no ta duna e genealogía di mi tatanan den e parti aki di mi registro; tampoko na ningun momento lo mi dun’é despues riba e plachinan aki ku mi ta skirbiendo; pasobra e ta wòrdu duná den e registro ku mi tata ta warda; p’esei, mi no ta skirbi’é den e buki aki.

2 Pasobra ta sufisiente pa mi, pa bisa ku nos ta desendientenan di José.

3 I no ta di importansia pa mi pa ta partikular i duna un relato kompleto di tur e kosnan di mi tata, pasobra, nan no por wòrdu skirbí riba e plachinan aki, pasobra mi ta desea e espasio pa mi por skirbi di e kosnan di Dios.

4 Pues e totalidat di mi intenshon ta pa mi por konbensé hendenan pa bini na e Dios di Abraham, i e Dios di Isaac, i e Dios di Jacob i wòrdu salbá.

5 P’esei, e kosnan ku ta agradabel na e mundu mi no ta skirbi, ma e kosnan ku ta agradabel na Dios i na esnan ku no ta di e mundu.

6 P’esei, lo mi duna mandamentu na mi simía, pa nan no yena e plachinan aki ku kosnan ku no ta di balor pa e yunan di hende.