1 Ug nahitabo nga among gipundok ang tanan nga matang sa binhi, lakip ang matag matang sa lugas, ug sa mga binhi usab sa tanan nga matang sa bunga.

2 Ug nahitabo nga samtang ang akong amahan nagpabilin sa kamingawan namulong siya ngari kanamo, nga nag-ingon: Tan-awa, ako nagdamgo og usa ka damgo; o, sa laktod nga pagkasulti, ako nakakita og panan-awon.

3 Ug tan-awa, tungod sa butang nga akong nakita, ako may katarongan nga maglipay diha sa Ginoo, tungod kang Nephi ug usab kang Sam; kay may katarongan ako nga motuo nga sila, ug daghan usab sa ilang kaliwatan, maluwas.

4 Apan tan-awa, Laman ug Lemuel, nabalaka kaayo ko tungod kaninyo; kay tan-awa, nahinumdom ako nga nakakita sa akong damgo og mangitngit ug awaaw nga kamingawan.

5 Ug nahitabo nga nakakita ako og tawo, ug nagsul-ob siya og puti nga kupo; ug miduol siya ug mibarog sa akong atubangan.

6 Ug nahitabo nga siya namulong ngari kanako, ug midapit kanako sa pagsunod kaniya.

7 Ug nahitabo nga samtang ako misunod kaniya akong nakita ang akong kaugalingon nga ako anaa sa mangitngit ug awaaw nga dapit.

8 Ug human nga ako nakabiyahe sulod sa daghan nga oras diha sa kangitngit, nagsugod ako sa pag-ampo sa Ginoo nga siya unta maluoy kanako, sumala sa gidak-on sa iyang malumo nga kaluoy.

9 Ug nahitabo human nga ako nakaampo sa Ginoo, nakakita ako og dako ug lapad nga umahan.

10 Ug nahitabo nga nakakita ako og kahoy, kansang bunga lamian nga makalipay sa usa ka tawo.

11 Ug nahitabo nga miduol ko ug mikaon sa bunga niini; ug ako nakamatikod nga hilabihan ang katam-is niini, labaw pa sa tanang nga sukad akong natilawan. Oo, ug nakakita ako nga puti ang bunga niini, labaw sa tanan nga kaputi nga sukad akong nakita.

12 Ug sa diha nga mikaon ako sa bunga niini mipuno kini sa akong kalag sa tumang kamaya; mao nga, ako nagsugod sa pagtinguha nga ang akong pamilya mokaon usab niini; kay ako nahibalo nga kini madanihon labaw pa sa uban nga bunga.

13 Ug sa diha nga ako mitan-aw sa palibot, nga basin og akong makit-an usab ang akong pamilya, nakakita ako og suba sa tubig; ug nagdagayday kini, ug duol kini sa kahoy diin ako nagkaon sa bunga.

14 Ug ako mitan-aw aron makita kon diin kini naggikan; ug akong nakita ang tinubdan niini sa unahan og gamay; ug dapit sa tinubdan niini akong nakita ang inyong inahan nga si Sariah, ug si Sam, ug si Nephi; ug sila nagbarog nga ingon og wala masayod asa sila paingon.

15 Ug nahitabo nga gikamay nako sila; ug usab mitawag kanila pinaagi sa kusog nga tingog nga sila moduol kanako, ug mokaon sa bunga, nga madanihon nga labaw pa sa ubannga bunga.

16 Ug nahitabo nga miduol sila kanako ug mikaon usab sa bunga.

17 Ug nahitabo nga nagtinguha ako nga si Laman ug Lemuel moduol ug mokaon usab sa bunga; mao nga akong gianinaw ang tinubdan sa suba, basin og makit-an nako sila.

18 Ug nahitabo nga nakit-an nako sila, apan sila dili moduol kanako ug mokaon sa bunga.

19 Ug nakakita ako og gunitanan nga puthaw, ug nagsubay kini sa daplin sa suba, ug padulong ngadto sa kahoy diin ako nagbarog.

20 Ug nakakita usab ako og higpit ug pig-ot nga agianan, buyon sa gunitanan nga puthaw, gani ngadto sa kahoy diin ako nagbarog; ug padulong usab kini sa tinubdan sa suba, ngadto sa dako ug lapad nga umahan, sama nga kini usa ka kalibotan.

21 Ug nakakita ako og dili maihap nga pundok sa katawhan, kadaghanan kanila midutdot padulong sa unahan, aron makaabot sila sa dalan padulong sa kahoy diin ako nagbarog.

22 Ug nahitabo nga nakaduol sila, ug misugod sa pagsubay sa dalan padulong sa kahoy.

23 Ug nahitabo nga adunay miabot nga gabon sa kangitngit; oo, gani hilabihan ka baga nga gabon sa kangitngit, mao nga kadtong misugod sa pagsubay sa dalan, natipas sa agianan, nangasaag sila ug nangawala.

24 Ug nahitabo nga nakakita ako og uban pa nga midutdot padulong sa unahan, ug miduol sila ug migunit sa tumoy sa gunitanan nga puthaw; ug midutdot gayod sila padulong sa unahan lahos sa gabon sa kangitngit, nga naggunit sa gunitanan nga puthaw, hangtod nga nakaabot sila ug mikaon sa bunga sa kahoy.

25 Ug human nga sila makakaon sa bunga sa kahoy ilang gianinaw ang ilang palibot nga ingon og sila nangaulaw.

26 Ug ako usab mianinaw sa akong palibot, ug nakakita, sa pikas nga daplin sa suba sa tubig, og dako ug lapad nga gambalay; ug nagbarog kini sama nga anaa sa hangin, ibabaw kaayo sa yuta.

27 Ug puno kini sa mga tawo, mga tigulang ug mga batan-on, mga lalaki ug mga babaye; ug ang matang sa ilang panapot hilabihan kaanindot; ug anaa sila sa panagway nga mabiaybiayon ug nagtulisok sa ilang mga tudlo ngadto niadtong kinsa miduol ug mikaon sa bunga.

28 Ug human sila nakatilaw sa bunga nangaulaw sila, tungod niadtong nagbugalbugal kanila; ug nahisalaag sila ngadto sa gidili nga mga dalan ug nangawala.

29 Ug karon ako, si Nephi, dili mamulong sa tanan nga gisulti sa akong amahan.

30 Apan, aron mamubo ang pagsulat, tan-awa, nakakita siya og uban pa nga pundok sa katawhan nga midutdot padulong sa unahan; ug miabot sila sa tumoy ug migunit sa gunitanan nga puthaw; ug midutdot sila padulong sa unahan, nga sa kanunay naggunit sa gunitanan nga puthaw, hangtod nga nakaabot sila ug miyukbo ug mikaon sa bunga sa kahoy.

31 Ug nakakita usab siya og uban pa nga pundok sa katawhan nga nagpangapkap sa ilang agianan padulong niana nga dako ug lapad nga gambalay.

32 Ug nahitabo nga daghan ang nangalumos sa kinaladman sa suba; ug daghan ang nangawala sa iyang panan-aw, nahisalaag sa sayop nga mga dalan.

33 Ug hilabihan ka daghan nga tawo ang misulod niana nga katingalahan nga gambalay. Ug human sila makasulod niana nga gambalay ilang gitulisok ang ilang tudlo nga mabiaybiayon ngari kanako ug ngadto usab sa mikaon sa bunga; apan wala kami manumbaling kanila.

34 Mao kini ang mga pulong sa akong amahan: Kay ang tanan nga mipatalinghog kanila, nahisalaag.

35 Ug si Laman ug si Lemuel wala mokaon sa bunga, miingon ang akong amahan.

36 Ug nahitabo nga human nakapamulong ang akong amahan sa tanan nga pulong sa iyang damgo o panan-awon, nga daghan gayod, miingon siya ngari kanamo, tungod niining mga butang nga iyang nakita sa panan-awon, nabalaka siya sa hilabihan alang kang Laman ug kang Lemuel; oo, nabalaka siya basin og sila isalikway gikan sa atubangan sa Ginoo.

37 Ug siya miawhag kanila gamit ang tanan nga pagbati sa malumo nga ginikanan, nga unta mopatalinghog sila sa iyang mga pulong, nga basin ang Ginoo magmaluluy-on kanila, ug dili mosalikway kanila; oo, ang akong amahan miwali ngadto kanila.

38 Ug human siya miwali ngadto kanila, ug usab makapanagna ngadto kanila sa daghan nga butang, siya mihangyo kanila sa pagtuman sa mga sugo sa Ginoo; ug mihunong siya sa pagpamulong ngadto kanila.