ບົດທີ 9
ນີໄຟເຮັດບັນທຶກສອງຊຸດ—ແຕ່ລະຊຸດເອີ້ນວ່າແຜ່ນຈາລຶກຂອງນີໄຟ—ແຜ່ນຈາລຶກໃຫຍ່ປະກອບດ້ວຍປະຫວັດສາດຂອງການປົກຄອງແຜ່ນດິນ; ແຜ່ນຈາລຶກນ້ອຍສ່ວນໃຫຍ່ແມ່ນກ່ຽວກັບສິ່ງສັກສິດ. ປະມານ 600–592 ປີ ກ່ອນ ຄ.ສ.
1 ແລະ ເລື່ອງທັງໝົດນີ້ບິດາຂອງຂ້າພະເຈົ້າໄດ້ເຫັນ ແລະ ໄດ້ຍິນ ແລະ ໄດ້ເວົ້າເວລາທີ່ເພິ່ນຢູ່ໃນຜ້າເຕັນໃນ ຮ່ອມພູເລມູເອນ, ແລະ ມີອີກຫລາຍເລື່ອງທີ່ຂຽນໄວ້ບໍ່ໄດ້ ໃນແຜ່ນຈາລຶກນີ້.
2 ແລະ ບັດນີ້, ດັ່ງທີ່ຂ້າພະເຈົ້າໄດ້ເວົ້າກ່ຽວກັບແຜ່ນຈາລຶກເຫລົ່ານີ້, ຈົ່ງເບິ່ງ ບໍ່ແມ່ນຢູ່ໃນແຜ່ນຈາລຶກນີ້ທີ່ຂ້າພະເຈົ້າເຮັດເລື່ອງລາວຂອງຜູ້ຄົນຂອງຂ້າພະເຈົ້າໂດຍຄົບຖ້ວນ; ເພາະ ແຜ່ນຈາລຶກທີ່ຂ້າພະເຈົ້າເຮັດເລື່ອງລາວຂອງຜູ້ຄົນຂອງຂ້າພະເຈົ້າໂດຍຄົບຖ້ວນນັ້ນຂ້າພະເຈົ້າຕັ້ງຊື່ໃຫ້ວ່າ ນີໄຟ; ດັ່ງນັ້ນ, ມັນຈຶ່ງມີຊື່ວ່າແຜ່ນຈາລຶກຂອງນີໄຟຕາມຊື່ຂອງຂ້າພະເຈົ້າເອງ, ແລະ ແຜ່ນຈາລຶກເຫລົ່ານີ້ຈຶ່ງໄດ້ຖືກເອີ້ນວ່າ ແຜ່ນຈາລຶກຂອງນີໄຟເໝືອນກັນ.
3 ເຖິງຢ່າງໃດກໍຕາມ, ຂ້າພະເຈົ້າໄດ້ຮັບພຣະບັນຍັດຈາກພຣະຜູ້ເປັນເຈົ້າວ່າ ຂ້າພະເຈົ້າຄວນຈະເຮັດແຜ່ນຈາລຶກເຫລົ່ານີ້, ດ້ວຍ ຈຸດປະສົງພິເສດທີ່ຄວນບັນທຶກເລື່ອງລາວຕ່າງໆກ່ຽວກັບ ການປະຕິບັດສາດສະໜາກິດຂອງຜູ້ຄົນຂອງຂ້າພະເຈົ້າ.
4 ໃນແຜ່ນຈາລຶກອີກຊຸດໜຶ່ງຈະບັນທຶກເລື່ອງລາວຕ່າງໆກ່ຽວກັບການປົກຄອງຂອງກະສັດ, ແລະ ສົງຄາມ ແລະ ການຂັດແຍ້ງຂອງຜູ້ຄົນຂອງຂ້າພະເຈົ້າ; ດັ່ງນັ້ນ ແຜ່ນຈາລຶກເຫລົ່ານີ້ຈຶ່ງບັນທຶກກ່ຽວກັບການປະຕິບັດສາດສະໜາກິດເປັນສ່ວນໃຫຍ່ ຊຶ່ງ ແຜ່ນຈາລຶກອີກຊຸດໜຶ່ງບັນທຶກກ່ຽວກັບການປົກຄອງຂອງກະສັດ ແລະ ສົງຄາມ ແລະ ການຂັດແຍ້ງຂອງຜູ້ຄົນຂອງຂ້າພະເຈົ້າເປັນສ່ວນໃຫຍ່.
5 ດັ່ງນັ້ນ, ພຣະຜູ້ເປັນເຈົ້າໄດ້ບັນຊາຂ້າພະເຈົ້າໃຫ້ເຮັດແຜ່ນຈາລຶກເຫລົ່ານີ້ໄວ້ດ້ວຍຈຸດປະສົງ ອັນສະຫລາດໃນພຣະອົງ, ຊຶ່ງຂ້າພະເຈົ້າບໍ່ຮູ້ຫຍັງເລີຍກ່ຽວກັບຈຸດປະສົງນີ້.
6 ແຕ່ ພຣະຜູ້ເປັນເຈົ້າ ຮູ້ເລື່ອງທັງໝົດຕັ້ງແຕ່ຕົ້ນມາ; ດັ່ງນັ້ນ, ພຣະອົງຈຶ່ງຕຽມທາງໄວ້ເພື່ອວຽກງານຂອງພຣະອົງຈະສຳເລັດໃນບັນດາລູກຫລານມະນຸດ; ເພາະຈົ່ງເບິ່ງ, ພຣະອົງມີ ອຳນາດທຸກຢ່າງເພື່ອໃຫ້ຄຳຂອງພຣະອົງທັງໝົດສຳເລັດ. ແລະ ເປັນໄປດັ່ງນັ້ນ. ອາແມນ.