1 Oqo tale, sa kaya vei au na vosa ni Turaga: Mo taura mada e dua na ivola vivigi levu, ka vola kina ena nona peni e dua na tamata ena vukui Mea-salali-asi-pasi.

2 Ia au a kauta vata kei au na tamata dina me vakadinadinataka, ko Uraia na bete, kei Sakaraia na luvei Jeperekaia.

3 Ka’u a lako vua na parofita yalewa; ka sa kunekune ko koya ka vakasucuma e dua na gone tagane. Sa qai kaya vei au na Turaga: Mo vakayacani koya ko Mea-salali-asi-pasi.

4 Ia raica, ena sega ni kila na gone me kaci, Tamaqu, kei Tinaqu, ni se bera ni kau tani na iyau mai Tamasiko kei na itoki ni valu mai Samaria mai vua na tui Asiria.

5 Sa baci vosa tale vei au na Turaga ka kaya:

6 Me vaka ni ra sa besetaka na wai ni Sailoa sa drodro malua ko ira na tamata oqo, ka ra marautaki Risina kei koya na luvei Rimalaia;

7 Ia oqo, raica, ena vakauta cake mai vei ira na Turaga na wai ni uciwai, sa kaukauwa ka levu, io na tui Asiria kei na nona lagilagi kece; ia ena ulabaleta mai na kena vei-ikeli musu ka vuabale ena batina kecega.

8 Ka na lako kosovi Juta ko koya; ena vuabale ka ulabaleta, ena yala ki domona; ia ni sa vakatetaba ko koya ena robota kece sara na nomu vanua, Imanueli.

9 Dou vakasoqoni vata, oi kemudou na tamata, ka dou na vorolaki vakalalai; ka mo dou vakatudaliga oi kemudou kece mai na veivanua vakayawa; dou vauci kemudou, ia dou na qai vorolaki vakamatailalai; dou vauci kemudou, ia dou na vorolaki vakamatailalai.

10 Dou veivakasalataki mada, ka na sega ga na betena; dou tukuna na vosa, ena sega ga ni yaco; ni sa tiko vata kei keimami na Kalou.

11 Ni a vosa vakaoqo vei au na Turaga ena liga kaukauwa, ka vakasalataki au me’u kakua ni muria na nodra sala na tamata oqo, ka kaya:

12 Dou kakua ni kaya, me dua na ito, vei ira kece era na kaya kina na tamata oqo, E dua na ito; dou kakua talega ni rerevaka na ka era rerevaka, se yalolailai.

13 Dou rokovi koya ga na Turaga ni Lewevuqa, ka sai koya ga mo dou rerevaka, ka sai koya ga mo dou rerevaka vakalevu.

14 Ka na yaco ko koya me ivakavakacegu; ia na vatu ni veivakatarabetaki, ka vatu ni veivakacudrui vei ira na mataqali ruarua i Isireli; ka viri toka me dai ka icori kivei ira na lewei Jerusalemi.

15 Ia e lewe vuqa vei ira era na tarabe ka bale, ka ramusu, ka tacori, ka tauri yani.

16 Vauca vata na ivakadinadina, dregata na lawa vei ira na noqu tisaipeli.

17 Ka’u na qai waraka na Turaga, ko koya sa tabonaka na matana vei ira na mataqali i Jekope, ka’u na vakasaqarai koya.

18 Raica, koi au kei ira na isolisoli sa solia vei au na Turaga keimami sa ivakatakilakila ka veivakurabuitaki e Isireli mai vua na Turaga ni Lewevuqa, ko koya sa tiko mai na ulunivanua ko Saioni.

19 Ena gauna era na qai kaya kina vei kemudou: Dou vakasaqarai ira na daucurumi, kei ira na dau caka isausau era sa dau rai lo ka vosaminimini—me kakua li ni dua na mata tamata me vakasaqara na nona Kalou, me ra rogoci ira kina na nodra mate ko ira na bula?

20 Ki na lawa kei na ivakadinadina; ka kevaka era sa sega ni vosa me vaka na vosa oqo, sa baleta ga ni sa sega vei ira na rarama.

21 Ka ra na lako voli yani ka vakararawataki vakalevu ka viakana; ka na qai yaco ni ena gauna era sa viakana kina, era na vakaleqai ira vakaira, ka vosacataka na nodra tui kei na nodra Kalou, ka ra na rai cake tiko.

22 A ra na rai tale ki vuravura ka kunea na leqa, kei na butobuto, na kabukabu ni yaluma, ka ra na vakasavi ki na butobuto.