1 Lozan’izay mamoaka lalàna tsy marina sy izay manoratra fampahoriana izay efa nampanoratiny;

2 Mba hampiala ny mahantra amin’ny fitsarana sy hanala ny zony amin’ireo malahelo amin’ny oloko ka hahatonga ny mpitondratena ho rembiny sy hahazoany mandroba ny kamboty!

3 Ary inona no hataonareo amin’ny andron’ny famaliana sy amin’ny fandravana izay ho tonga avy lavitra? Any amin’iza no handosiranareo hila vonjy? Ary aiza no hametrahanareo ny voninahitrareo?

4 Tsy eo Aho ka hiankohoka ambanin’ny mpifatotra izy sy ho faty ambanin’ny voavono. Na dia eo aza izany rehetra izany dia tsy mitony ny fahatezerany fa mbola mihinjitra ny tanany.

5 Ry Asyriana, tsorakazon’ny fahatezerako, ary ny tehina eny an-tanany dia ny fahavinirany.

6 Haniraka azy Aho hamely firenena mpihatsaravelatsihy, ka amin’ny olona mahatezitra Ahy izy no homeko baiko haka ny babo sy haka ny remby ary hanosihosy azy toy ny fotaka eny amin’ny lalana.

7 Kanefa tsy mikasa hanao izany izy sady tsy mieritreritra izany ny fony; fa ny handrava sy hamongotra firenena tsy vitsy no ao am-pony.

8 Fa hoy izy: Moa tsy mpanjaka avokoa va ireny printsiko ireny?

9 Tsy tahaka an’i Karkemisy va i Kalno? Tsy tahaka an’i Arpada va i Hamata? Tsy tahaka an’i Damaskosy va i Samaria?

10 Tahaka ny efa nanorenan’ny tanako ny fanjakan’ny sampy ary ny sarin-javatra voasokitra, ny azy dia nanoatra noho ny an’i Jerosalema sy ny an’i Samaria;

11 Tsy toy ny efa nataoko tamin’i Samaria sy ny sampiny va no hataoko koa amin’i Jerosalema sy ny sampiny?

12 Noho izany ny zavatra hitranga, rehefa nahatontosa ny asany rehetra tamin’ny Tendrombohitr’i Ziona sy tamin’i Jerosalema ny Tompo, dia hofaiziko ny vokatry ny fiavonavonan’ny fon’ny mpanjakan’i Asyria sy ny reharehan’ny fijeriny miandranandrana.

13 Fa hoy izy: Tamin’ny herin’ny tanako sy tamin’ny fahendreko no efa nanaovako ireo zavatra ireo; fa malina aho; ary namindra ny sisintanin’ny olona aho sy namabo ny hareny ary nandresy ny mponina toy ny lehilahy mahery;

14 Ary tahaka ny fihaza akanim-borona no fihazan’ny tanako ny haren’ny olona; ary tahaka ny famoriana atody izay nilaozana no namoriako ny tany manontolo; ary tsy nisy nikopaka elatra na nisoka-bava na nisiatsiaka.

15 Hirehareha amin’izay mikapa aminy va ny famaky? Hanindrahindra ny tenany amin’izay manatsofa aminy va ny tsofa? Tahaka ny hanetsehan’ny tsora-kazo ny tenany amin’izay manainga azy, na tahaka ny hanaingan’ny tehana ny tenany, miova tsy ny hazo!

16 Noho izany ny Tompo, ny Tompon’ny Maro dia handefa fahiazana any anivon’ny olo-mataviny; ary ao ambanin’ny voninahiny Izy no hamelona afo toy ny firehitry ny afo iray.

17 Ary ny fahazavan’i Isiraely hanjary afo, ary ny Iray Masiny no ho lelafo izay hirehitra ka handevona ny tsilo sy ny hery ao anatin’ny indray andro;

18 Ary holevoniny ny reharehan’ny alany sy ny sahany mahavokatra, na fanahy na vatana; ary izy dia ho toy ny rehefa torana ny mpitondra faneva.

19 Ary ho vitsy ny hazo tavela amin’ny alany ka ho azon’ny zaza soratana.

20 Ary ny zavatra hitranga amin’izany andro izany dia ny Isiraely sisa tavela sy ny ieren-doza amin’ny mpianakavin’i Jakoba dia tsy hiankina intsony amin’izay nikapoka azy fa hiankina kosa amin’ny Tompo, ny Iray Masin’ny Isiraely marina tokoa.

21 Ny sisa tavela dia hiverina, eny, dia ny sisa tavela tamin’i Jakoba, ho amin’ Andriamanitra Mahery.

22 Fa na dia tahaka ny fasiky ny ranomasina aza ny olonao ry Isiraely, dia izay sisa tavela aminy ihany no hiverina; ny famongorana efa notinapaka dia hampitobaka ny fahamarinana.

23 Fa ny Tompo Andriamanitry ny Maro dia hanao ny famongorana, dia izay notinapaka tamin’ny tany rehetra.

24 Noho izany, izao no lazain’ Andriamanitra, ny Tompon’ny Maro: Ry oloko izay mitoetra ao Ziona, aza matahotra ny Asyriana; hikapoka anao amin’ny tsora-kazo izy sy hanainga ny tehiny aminao araka ny fanao tany Egypta.

25 Fa rehefa afaka kely foana, dia hitsahatra ny fahavinirana sy ny fahatezerako noho ny faharinganany.

26 Ary ny Tompon’ny Maro hahatonga kotopia aminy tahaka ny fandripahana ny Midiana teo amin’ny vatolampin’i Oreba; ary toy ny tehiny teo ambonin’ny ranomasina no hanaingany azy koa araka ny fanao tany Egypta.

27 Ary ny zavatra hitranga amin’izany andro izany dia hoesorina hiala avy eo an-tsorokao ny enta-mavesany ary ny zioga ho afaka avy eo amin’ny vozonao ka hopotehina ny zioga noho ny fanosorana.

28 Tonga ao Aiata izy, mamakivaky an’i Migrona izy; mametraka ny entany ao Mikmasy izy.

29 Mihoatra ny hadilalana ireo; milasy ao Geba ireo; matahotra i Ramata; mandositra i Gibean’i Saoly.

30 Asandrato ny feo, Ry zanakavavin’i Galima; ataovy izay haharenesana izany hatrany Laisy, Ry Anatota mahantra.

31 Mandositra i Madmena; miangona mba hiara-mandositra ny mponina ao Gebima.

32 Nefa mbola hijanona ao Noba izy amin’izany andro izany; hanofahofa ny tanany amin’ny tendrombohitry ny zanakavavin’i Ziona izy, ny havoan’i Jerosalema.

33 Indro, ny Tompo, ny Tompon’ny Maro handrantsana ny sampany amin’ny fampihorohoroana; ary hotapahiny fohy ireo izay avo ny tsanganany; ary haetry ireo izay mianjonanjona.

34 Dia hokapainy amin’ny vy ny ala mikirindro, ary halavon’ny mahery iray i Libanona.